“M Tile Dông! M Tile Dông! M Tile Dông!”
1 Mkaanem ma Orkristu u jighjigh u yange war Tim Gburugburu man ma tese ishima tsoghor i Mbashiada udubu udubu—mba ve lu uma her man mba ve kpe kpaa cii—mba yange ve tile sha jighjigh u nan ve dông, shin er ior mba Nazi na ve atsan tsung nahan je kpaa. (Ef. 6:11, 13) I ôr kwagh u ishimataver ve i kpilighyol man mhembe u ve hemba la ken tser u vidio u kôron ken ishima tsung, mba yer ú ér Jehovah’s Witnesses Stand Firm Against Nazi Assault (Mbashiada mba Yehova Tile Dông Hendan a Ipila i Nazi). Mba taver hanma or ken tiônnongo cii ishima ér nana̱ nenge ú nahan nana̱ pase mbagenev er i lu nan ken ishima la.
2 Mbampin mban ve sagher mhen wou: (1) Yange lu sha atôakyaa a nyi Mbashiada mba Yehova tile dông hendan a ior i Nazi? (2a) Ka mbamnenge kposo kposo mba nyi yange ve lu sha ikyaa i ishughunu, man lu sha ityôkyaa i nyi? (2b) Kwagh ne yange bende a icombor i Mbashiada nena? (3) Ka Mbashiada u me yange i yem a ve ken afo a mbakwareve, yange i ver ve ikyav ker nena, man dasenda mba vihin tu mba yange i yilan ér Gestapo la yange ve eren a ve nena? (4) Ka injar i nyi yange anmgbianev asev venda ér vea kimbi sha u i pase ve i tuhwa ga? (5a) Yange Mbashiada mba Yehova pase atsan a hemen u Hitler yange ú naan ior la ken igbar nena, man lu hanma shighe? (5b) Hitler yange gema er nyi? (6) Ijoughzwa i ior mba Yehova la yange i war uuma vev man uuma mba mbagenev kpôô kpôô man ken jijingi kpaa nena? (7) Ka icam i Tartor i nyi yange i dugh ken afo a mbakwareve? (8) Ka akav a tesen a jighjigh u nan u nomsombaiorov man kasev man mbayevikyaior a nyi a sagher we ken ishima u kôron jighjigh u ú ne Yehova la her dông, shin a lu ka nyityôkwagh je i er kpaa? (Shi nenge ken 1999 Yearbook, peeji 144-147 la.) (9) Er ú lu Orshiada u Yehova yô, tser u vidio ne na ú nenge kwagh u lun ior i tar ne ga la nena?
3 Ikyav i tesen i injaa i Mbashiada mba Yehova i í tese ken tser u vidio u Stand Firm ne ia fatyô u wasen agumaior, kua mba ve lu Mbashiada ga je kpaa, u tagher ishigh a ambaakaa er ihyom i gban kôron or tsô la, man mkighir u mbakov, man imoshima nahan. Aluer ú ngu wanyemakeranta u ken kôleeji shin ú ngu sha makeranta u vesen yô, ú fatyô u nan atica ou ian i tesen mbagenev tser ne ken klase kpa? Alaghga ú fatyô u nan ve tser u vidio ne pasen ve wer ka vegher u tsegh ku mbayiase u ior ve fe kwagh sha mi kpishi ga yô, shin ú kaa wer ka senema u a tese ieren i injaa yô.
4 Tser u vidio u Stand Firm ne ka ikyagh ki tomov ki injaa ki tesen er ityesen i Aôndo i ne se mtaver u ken jijingi sha u eren ishima i Aôndo, zan hemen u tilen dông eren kwagh u sha mi yô. (1 Kor. 16:13) Kar ú a ior mba kwagh u mimi a gbe ve ishima cii.