“Lu Nen Tsevaa, Kuran Nen!”

 1. Ka nyi Yesu yange ôr a mbahenen nav sha kwagh u shighe u mkur, man yange wa ve kwagh ér nyi?

YANGE ka shin ayange kpuaa u Yesu una kpe yô, mbahenen nav unyiin va pine un ér: “Ka nyi ia lu ikyav i tesen ér . . . mkur u tar ne zurumu?” (Mat. 24:3) Adooga tsô mbahenen mbara lu pinen kwagh u una er ve vea fa ér shighe kuma u a tim Yerusalem shi a hembe tempel kera yô. Yesu gbe nan mlumun sha mpin ve la yô, a ôr kwagh u mkur u Yerusalem kua tempel tseegh ga, kpa ôr kwagh u “mkur u tar” u se lu ker hegen ne kpaa. Yesu ôr kwagh u shighe u mkur u tar ne kaa ér: “Iyange la shin ihwa la yô, or môm fa ga, mbatyomov mba shaav kpa fa ga, Wan kpa fa ga, ka Ter tseegh a fe ye.” Maa a wa mbahenen nav kwagh ér, “lu nen per” shi “kuran nen.”—Mar. 13:32-37.

 2. Yange gba u Mbakristu mba sha ayange a mbaapostoli la vea kuran sha ci u nyi?

² Yange gba u Mbayuda mba ve hingir Mbakristu sha ayange a mbaapostoli la vea kuran sha er vea war uuma vev yô. Yesu yange ôr mbadondon un kwagh u una er ve una wase ve u fan ér mtim u Yerusalem zurum yô. Yange kaa a ve ér: “Zum u ne nenge ushoja vea va haa afo vea kase Yerusalem yô, fa nen ner, mtim na zurum.” Nahan lu u kwagh ne una va eren yô, vea dondo kwaghwan u Yesu vea “hii u yevese yemen sha iwo.” (Luka 21:20, 21) Mba yange ve dondo kwaghwan ne la, ve war shighe u Mbaroma va u va timin Yerusalem la.

 3. Ka nyi se lu timen sha mi ken ngeren nee?

³ Nyian ne, se mba ken shighe u mkur u botar ne a zurum yô. Nahan se kpa gba u se lu tsevaa shi se kuran. Ken ngeren ne, se lu timen sha igbenda i se fatyô u lun a mnenge u vough sha akaa a a lu zan hemen sha tar hegen ne, Shi se nenge er se ver ishima sha ayol ase, man er se er kwagh a shighe u a mase shin her ne sha inja yô.

 4. Gba u se ver ishima se nenge er akaa a lu zan hemen sha tar hegen la a lu kuren kwagh u Bibilo i tsenga ôron la sha ci u nyi?

⁴ Atôakyaa nga a ka se ver ishima sha akaa a a lu zan hemen sha tar nyian u kuren kwagh u Bibilo i tsenga ôron la yô. Ikyav i tesen yô, Yesu yange ter akaa a aa va er ve se fa ser mkur u tar u Satan ne zurum yô. (Mat. 24:3-14) Apostoli Peteru yange taver se ishima ér se keghen ato a akaa a a lu eren u kuren akaaôron a profeti la, sha er se za hemen u lun a jighjigh nan taveraa yô. (2 Pet. 1:19-21) I hii takeda u masetyô ken Bibilo sha mkaanem man, ér: “Mpase u Yesu Kristu; mpase ne due hen Aôndo sha u Yesu a̱ tese ikpan na akaa a ica ia gba ga tsô aa er yô.” (Mpa. 1:1) Nahan ka se ver ishima zulee sha akaa a a lu zan hemen sha tar hegen la, shi i gba se ishima u fan er aa kure kwagh u Bibilo i tsenga ôron la yô. Shi alaghga ka i sar se u lamen sha akaa shon vea mbagenev.

 5. Ka nyi i gbe u se palegh, man gema ka nyi i gbe u se ere? (Shi nenge ufoto kpaa.)

⁵ Nahan kpa, shighe u se lu lamen sha ma kwagh u Bibilo i tsenga ôron yô, gba u se palegh u keren ahaba er kwagh shon una za la. Sha ci u nyi? Sha ci u se soo u ôron ma kwagh u una va a mpav ken tiônnongo ga. Ikyav i tesen yô, alaghga se ungwa mbahemenev mba tar ne vea lu ôron igbenda i vea kar ve ityar i i lu nôngon num la ia de num shi bem a gba, zayol a kera lu ga yô. Gba u se palegh u keren ahaba ser kwagh u ve ôr la kure kwagh u Bibilo i tsenga ôron ken 1 Mbatesalonika 5:3 la. Kpa gba u se fa akaa a i sember gberen ken ityakeda yase yô. Aluer se mba lamen vea mbagenev sha akaa a nongo u Yehova u nger ken ityakeda yase la yô, se wase tiônnongo jimin cii una za hemen u lun gungur môm sha mhen kua awashima kpaa.—1 Kor. 1:10; 4:6.

 6. Ka nyi se fatyô u henen ken 2 Peteru 3:11-13?

⁶ Ôr 2 Peteru 3:11-13. Apostoli Peteru wase se u lun a mnenge u vough zum u se lu henen sha atôakyaa a i doo u se tôv kwagh u Bibilo i tsenga ôron yô. A kaa a vese ér se “keghen mve u iyange i Yehova, shi iyange shon i lu [se] sha ishima.” Sha ci u nyi? Ka sha ci u se mba nôngon ser se fa ‘iyange man ihwa’ i Yehova una va a Armagedon la ga, kpa ka sha ci u se soo ser shighe u se mase shin a mi ne, se nôngo se eren akaa a tesen ér se mba ken ‘icighanmlu shi se mba civir Aôndo.’ (Mat. 24:36; Luka 12:40) Inja na yô, se soo ser se za hemen u eren kwagh u vough shi nengen ser hanma kwagh u se lu eren sha ci u Yehova cii yô, i lu sha ci u Yehova doo se ishima. Kpa saa se za hemen u veren ishima sha ayol a ase ve se fatyô u eren kwagh ne ye.

 7. Se tese ser se ver ishima sha ayol a ase nena? (Luka 21:34)

⁷ Yesu yange kaa a mbahenen nav ér ve ver ishima sha akaa a a lu zan hemen sha tar la tseegh ga, kpa kua sha ayol a ve kpaa. A pase kwagh ne wang ken kwaghwan na u i nger ken Luka 21:34 la. (Ôr.) Nenge ase kwagh u Yesu ôr ne, ér: “Ver nen ishima sha ayol a en.” Or u nan ver ishima sha iyol i nan yô, ka nan lu tsevaa sha u fan hanma kwaghbo u una fatyô u vihin mlu u nan vea Yehova cii, shi nan nôngo nan palegh. Nahan nan eren akaa a nana za hemen u doon Yehova ishima yô.—Anz. 22:3; Yuda 20, 21.

 8. Apostoli Paulu yange wa Mbakristu kwagh ér nyi?

⁸ Apostoli Paulu yange wa Mbakristu kwagh ér ve ver ishima sha ayol a ve. Ikyav i tesen yô, yange kaa a Mbakristu mba ken Efese ér: “Ver nen ishima sha zende wen tsembelee, u de lu er u mbalanenkwagh nahan ga, kpa zenden nen er mbafankwagh nahan.” (Ef. 5:15, 16) Satan ka a meen se hanma shighe cii ér se pav ijende a Yehova. Sha nahan yô, Bibilo wa se kwagh ér se “keren . . . u fan ishima i Yehova,” sha er Satan una ta num sha a vese nan nan kpa, se pav a Yehova ga yô.—Ef. 5:17.

 9. Se er nan ve se fa kwagh u Yehova a soo ér se ere?

⁹ Bibilo pase hanma kwaghbo u una na se pav ijende a Yehova ga. Man gba keng u se tsuan akaa a Bibilo i ôr kwagh sha mi jighilii ga la hanma shighe cii. Nahan kwagh u una wase se u tsuan akaa sha inja yô, saa se fa shin se kav “ishima i Yehova.” Se fatyô u eren kwagh ne sha u henen Mkaanem ma Aôndo shi gbidyen kwar sha mi hanma shighe cii. Aluer se seer kaven ishima i Yehova shi se nôngo se mba a “mhen u Kristu” yô, se hemba zenden sha inja i “mbafankwagh,” aluer atindi nga a tesen se er se er kwagh ga je kpaa. (1 Kor. 2:14-16) Akaabo agen nga lu ican u nengen a mi ga; agen ka a hemba lun myer.

10. Ka akaabo a nyi nahan i gbe keng u se palegha?

¹⁰ Akaabo agen a i gbe keng u se palegh yô, ka u hian a or u se vese nan ga la, kua u man msôrom kpishi, man u yan kwagh karen ikyaa inya, man u lamen a ior dang dang, man u nengen anumbe a ipilaa kua ufoto mba ijimbagh, kua ambaakaa la nahan. (Ps. 101:3) Orihyom wase Diabolo ka a zer keren igbenda i paven se a Yehova. (1 Pet. 5:8) Nahan aluer se mba kuran ga yô, Satan una lôô aeren a bo ken a vese, er kwaghtômon man anyighe man hua man ihyom i kôron man iyolmoron kua ishimanyoon nahan. (Gal. 5:19-21) Sha hiihii la, aeren ne aa taver ken a vese ga. Kpa aluer se dugh a ken a vese kera fese ga yô, aa za hemen u vesen er ka kon u bo yô, nahan kwagh ne una va se a zayol.—Yak. 1:14, 15.

11. Ka kwaghbo u i nengen a mi bong ga u nyi i gbe u se palegh, man ka sha ci u nyi?

¹¹ Kwaghbo ugen u i nengen a mi bong ga u i gbe u se palegh yô, ka u yan ijende a mbaeren afer. Hen ase sha kwagh ne. U ngu eren tom hen ijiir i môm vea orgen u nan lu Orshiada u Yehova ga yô. Kpa u gema u soo wer or la nana nenge ér Mbashiada mba Yehova ka ior mba fan kwagh, nahan ka u eren kwagh a nan kundu kundu, shi u wasen nan. Ashighe agen ka u za ahumbe vea nan ne za ya kwaghyan imôngo je kpaa. Ica i gbe ga yô, u gema eren kwagh ne hanma shighe cii. Ashighe agen ka nan soo u lamen sha akaa a ijimbagh. Sha hiihii la u soo u wan zwa ga. Kpa shighe karen yô, u hoghol a iliam la, je yô ka wea ungwan kpa i kera lu u zayol ga. Iyange igen yô, or la nan lôhô u ér ne za ma kwagh shighe u a kur tom yô, maa u lumun. Maa u hii u henen kwagh er or shon nahan. Hen shighe ne, ica ia kera gba ga je tsô u hingir u eren kwagh er or la nahan. Ka mimi, se mba eren kwagh a ior cii kundu kundu man sha icivir, kpa gba u se umbur ser se fatyô u hingir inja i môm a ior mba se lun vea ve la. (1 Kor. 15:33) Aluer se mba veren ishima sha ayol a ase yô, se palegh u lun vea ior mba ve dondon atindi a Yehova ga la, er Yesu wa se kwagh nahan. (2 Kor. 6:15) Se fatyô u nengen a kwaghbo la, nahan palegh.

12. Ka nyi yange lu u mbahenen mba Yesu vea er shighe u ve lu keghen mkur laa?

¹² Yange lu u mbahenen mba Yesu vea tema a tema vea keghen mkur ga. Yesu yange na ve tom u vea eren yô. A kaa a ve ér ve pase loho u dedoo “ken Yerusalem man ken Yudia kua ken Samaria cii, man ken ajiir a hemban gban ica sha tar.” (Aer. 1:6-8) Lu tom u kiriki ga! Er ve lu nôngon sha afatyô ve cii pasen ior kwagh yô, ve er kwagh a shighe ve sha inja.

13. Gba u se eren kwagh a shighe wase sha inja sha ci u nyi? (Mbakolose 4:5)

¹³ Ôr Mbakolose 4:5. Gba keng u se hen sha gbenda u se eren kwagh a shighe wase la tsembelee, sha er se ver ishima sha ayol a ase yô. Sha ci u “aikyôr” una fatyô u eren hanma wase cii. (Orpa. 9:11) Shin se fatyô u kpen hen shighe u se hen ser se kpe ga yô.

14-15. Se er kwagh a shighe wase sha inja nena? (Mbaheberu 6:11, 12) (Shi nenge foto kpaa.)

¹⁴ Se fatyô u eren kwagh a shighe wase sha inja sha u eren ishima i Yehova man sha u taver ijende i se ye vea na la. (Yoh. 14:21) Gba u se ‘tile dông, se tenger ga, se luun a akaa a eren kpishi ken tom u Ter.’ (1 Kor. 15:58) Nahan shighe u mkur a ve cii se vaa afanyô ga, aluer ka mkur u uma wase shin mkur u tar ne kpaa.—Mat. 24:13; Rom. 14:8.

¹⁵ Nyian kpa, Yesu ngu hemen mbahenen nav ken tom ve u pasen loho u Tartor u Aôndo sha tar cii la her. A kure ityendezwa na. Yesu ngu tesen se tom u pasen kwagh la shi nan se akaa a aa wase se u samber a loho u dedoo la cii sha ikyev i nongo u Yehova. (Mat. 28:18-20) Se mba eren kwagh u Yesu a soo ér se er la sha u pasen ior kwagh shi tesen ve er se fetyô la cii man sha u kuran, er se lu keghen iyange i Yehova una va kar a tar ne kera la. Aluer se mba dondon kwaghwan u ken Mbaheberu 6:11, 12 la yô, se za hemen u lun a ishimaverenkeghen yase her taveraa “zan zan mkur.”—Ôr.

16. Ka nyi se soo ser se za hemen u erene?

¹⁶ Yehova ver iyange man ihwa i una kar a tar u Satan ne kera yô. Sha iyange la, Yehova una kure akaaôron a profeti a a nger ken Mkaanem nam la keng a bunde ga. Er iyange la i lu a va ga ne, alaghga ashighe agen a lu se er mkur u tar ne timbir u van yô. Nahan kpa, iyange i Yehova ia “bunde ga.” (Hab. 2:3) Nahan yô, se za nen hemen u ‘veren ashe hen TER,’ se ‘keghen Aôndo u myom wase.’—Mika 7:7.