Bibilo Tese Ér ‘Er I Yima U Je Kwagh Kuree’?
Mlumun u Bibilo i ne yô
Ei, Bibilo tese ér, ‘er i yima u je kwagh kure’ ga. Aluer or na Yesu Kristu jighjigh yô, nana zua a myom, kpa aluer nan va kera na un jighjigh ga yô, myom la una kar nan. Bibilo kaa ér, saa u nôngo kwagh kpoghuloo, shin ‘u nôngo ityav tsung’ ve u za hemen u nan jighjigh ye. (Yuda 3, 5) Yange i kaa a Mbakristu mba hiihii mba ve lu mbadondon Kristu mba mimi mbara ér: “Eren nen tom sha myom wen a mciem man ikyarikyase iyol.”—Mbafilipi 2:12.
Avur a Bibilo a a vende ityesen i i kaa ér, ‘er i yima u je kwagh kure’ la
Bibilo ta se icin sha kwagh u asorabo a vesen a or a er ve nana nyôr Tartor u Aôndo ga la. (1 Mbakorinte 6:9-11; Mbagalatia 5:19-21) I luun er ka u myom una fatyô u karen or ga yô, icintan ne ma i lu a inja ga. Nahan cii kpa Bibilo tese ér or u i yem nan kpa nana fatyô u hiden eren isholibo i vesen. Ikyav i tesen yô, Mbaheberu 10:26 kaa ér: “Aluer se mba eren asorabo sha apera zum u se ngohol mfe u mimi la kera yô, ma nagh sha ci u asorabo kera ku ga.”—Mbaheberu 6:4-6; 2 Peteru 2:20-22.
Yesu yange tese er i gbe hange hange u se za hemen u lun a jighjigh u nan yô, zum u a tôô iyol na a kar sha kon u wain, gema tôô mbadondon un kar sha agbar a kon u wain shon la. Lu u mbagenev ken ve vea va tese ér ve na un jighjigh sha atam a ve, shin aeren a ve, kpa shighe a karen yô, vea de u tesen jighjigh u nan ve, nahan a “gbihi [ve] kera er gbaa [u lun a atam ga] nahan,” maa myom una kar ve. (Yohane 15:1-6) Apostoli Paulu kpa tese imba ikyav ne, a kaa ér Mbakristu mba ve ze hemen a jighjigh ve u nan ga la, a “tôndo [ve] kera.”—Mbaromanu 11:17-22.
I wa Mbakristu kwagh ér ve “kuran.” (Mateu 24:42; 25:13) Mba ve gbe mnyam ken jijingi sha “aeren a imegh” shin ve lu eren akaa a Yesu Kristu yange kaa la sha gbashima ga yô, myom una kar ve.—Mbaromanu 13:11-13; Mpase 3:1-3.
Avur a Bibilo kpishi tese ér gba u mba i yem ve la vea taver ishima a jighjigh ve u nan zan zan mkur. (Mateu 24:13; Mbaheberu 10:36; 12:2, 3; Mpase 2:10) Yange saan Mbakristu mba sha ayange a mbaapostoli la iyol kpishi er ve nenge mbadondon Kristu a ve imôngo taver ishima a jighjigh ve u nan yô. (1 Mbatesalonika 1:2, 3; 3 Yohane 3, 4) Luun er ka u a yima mba yange ve taver ishima a jighjigh u nan ve ga la nahan, kwagh u Bibilo i ôr var var ér mbananjighjigh ve taver ishima la ma a lu a inja kpa?
Ka shighe u apostoli Paulu yange fa ér gba u a wua un la, a nenge ér shighe kuma u a yima un ye. (2 Timoteu 4:6-8) Cii man shighe ne yô, a nenge ér, aluer un yem u zendan asaren a iyolough yô, myom una fatyô u karen un. A nger ér: “M ngu gbidyen iyol yam . . . veren i ken kpan je, sha u i̱ de lu u m ôr mbagenev kwaghaôndo kera man mo iyol yam yô, m̱ gema m̱ yina sha ikyaren ga.”—1 Mbakorinte 9:27; Mbafilipi 3:12-14.