Kwaghôron Wou Lun ‘Een Vea Ei Imôngoo’?

Shi hen sha kwagh ne kpaa: Tôô wer anmgbian ugen vea kwase na lôhô anmgbian u kwase ugen, u a lu yesen ônov uhar un tswen yô imôngo hen ya ve. Anmgbian u kwase ne ôr mbayev nav kwagh ne, nahan doo ve kpen kpen. Tsô ve gba veren ashe a aikighe u vea za vannya la. Nahan kpa, sha iyange i kpernan vea za la, anmgbian la kaa a anmgbian u kwase ne ér, kwagh ugen za va ve abur abur, nahan imôngo la bunde. Shighe kar yô, anmgbian u kwase ne fa er i hii ve imôngo la yange i bunde yô. Anmgbian ne vea kwase na mba lôhôn anmgbian u kwase ne imôngo la cii yô, azende a ve agen kpa lôhô ve imôngo aikighe sha iyange shon, maa ve lumun.

Er se lu Mbakristu yô, gba u se eren kwagh u se kaa ser se er la. Doo u mayange kwaghôron wase una lu inja er se mba kaan ser ‘een vea ei imôngo’ ga. (2 Kor. 1:18) Nahan kpa, er akav a ahar a se ter sha heen ne a tese nahan, ka hanma shighe cii se er kwagh u se tende zwa u eren la ga. Ashighe agen yô, alaghga a lu inja er kwagh ugen ngu u se er ga, saa se bunde kwagh u se tende zwa ser se er la nahan. Apostoli Paulu kpa yange tagher a imba kwagh ne.

Ken inyom i 55, zum u Paulu lu ken Efese, shighe u yem zende na u mishen u sha kwa tar la, a wa ishima ér una per Zegemnger u Aegean, una yem ken Korinte, una za mough keera una yem ken Masedonia. Ngur hiden ken Yerusalem yô, a wa ishima u hiden zan tiônnongo u ken Korinte la inya sha kwa har, man ikyav tese ér lu u una za ngohol iyua i tiônnongo la kohol sha u tindin anmgbianev mba ken Yerusalem a mi la. (1 Kor. 16:3) Se nenge a kwagh ne wang ken 2 Mbakorinte 1:15, 16. I nger ér: “Er m fe kwagh ne dedoo nahan yô, kera je kpaa m wa ken ishima u vanden van hen ven sha u né shi né zua a iember i sha kwa har yô. Ma m kar ken ven ma m ze Masedonia, shi ma m mough ken Masedonia ma m hir ken a ven, ne ma ne wem ikyav u zan ken Yudia ye.”

Ken washika u Paulu vande ngeren la, ikyav tese ér yange pase anmgbianev mba ken Korinte er un we ishima u zan ve inya yô. (1 Kor. 5:9) Nahan kpa, ica lu a gba ga maa mba hen ya u Kelue ôr Paulu ér ayongo nga hen atô u anmgbianev mba ken tiônnongo la taveraa. (1 Kor. 1:10, 11) Paulu maa bunde awashima na u zan hen a ve la, gema nger ve washika u i yer hegen ér 1 Mbakorinte la. Ken washika la, Paulu wa ve kwagh shi kôôm ve sha dooshima. Shi yange pase ve er lu u una vande zan ken Masedonia cii ve, una za ken Korinte yô.—1 Kor. 16:5, 6.a

Ikyav tese ér anmgbianev mba ken Korinte yange mba zough a washika u Paulu nger ve la yô, “uihembanmbaapostoli” mbagenev ken tiônnongo la gba un ijir ér, er kwagh zwa môm ga, sha ci u ngu eren akaa a a tende zwa ér una er la ga. Paulu ngur palegh iyol yô, a pine ér: “Er m we ishima nahan yô, lu sha beer tsô zee? Shin akaa a m we ishima mer me er la, m gba wan ishima sha inja i iyolough tsô, “een” wam kua “ei” hingir kwagh môm zee?”—2 Kor. 1:17; 11:5.

Se fatyô u pinen ser, ken ashighe a Paulu fatyô u kuren mbaawashima nav ga la, mimi je yange “lu sha beer tsô zee?” Mayange ga! Ishember i ken zwa Grika i i gem ér “beer” la ngi ôron kwagh u or u nan er kwagh zwa môm ga, inja er nan ngu a jighjigh iyol ga, shi nan tende zwa kpa nan eren kwagh shon ga nahan. Mpin u Paulu pine ve ér ‘m gba wan ishima sha inja i iyolough tsô zee?’ la, yange ma wase Mbakristu mba ken Korinte mbara u kaven wang ér, er Paulu bunde awashima na u van hen ve nahan kpa, tese ér yange ban a jighjigh iyol ga.

Paulu yange venda ijir i ve gba un la wang, nger ér: “Aôndo ka u jighjigh, kwaghôron wase a ven lu “een” vea “ei” imôngo ga.” (2 Kor. 1:18) Mimi je, Paulu yange bunde awashima na u zan ken Korinte la sha ci u mkpeyol u anmgbianev mba nomso man mba kasev mba ken Korinte mbara. 2 Mbakorinte 1:23 pase se ér lu ‘sha u yiman ve a yima je’ Paulu bunde awashima na u zan zende la ye. Sha kpôô yô, yange na ve ian i sôron mbamzeyol vev mbara cii man una za hen a ve ye. Er Paulu ver ishima ér vea sôr mbamzeyol mbara nahan, shighe u lu ken Masedonia la je, Titu za ôr un ér washika na la na anmgbianev mba ken Korinte ure shi ve gema ishima, nahan saan Paulu iyol kpishi.—2 Kor. 6:11; 7:5-7.

Kwagh u i wa Paulu iyol ér, er kwagh zwa môm ga la yange ma tese ér, aluer akaa a se eren ayange ayange ne kpa Paulu tôndon zwa sha mi eren ga yô, kwagh u yange pasen la kpa kuma u or a suur sha mi ga. Nahan kpa, Paulu umbur Mbakorinte er un pase ve kwagh u Yesu Kristu yô. A nger ér: “Yesu Kristu Wan u Aôndo u se ôr ne kwagh Na la lu mo man Siluanu man Timoteu, lu ‘een’ vea ‘ei’ imôngo ga, kpa ken a Na yô, lu ‘een’ vough.” (2 Kor. 1:19) Ma gbenda ngu u Yesu Kristu, u Paulu lu dondon un la kuma u suur sha a na ga yôô? Ei! Ken uma u Yesu kua tom na u pasen kwagh la jimin cii, yange ôron kwagh u mimi tseegh. (Yoh. 14:6; 18:37) Aluer kwagh u Yesu pasen la lu u mimi shi kuma u suur sha mi, shi Paulu kpa lu pasen kwagh shon môm yô, tom na u pasen kwagh la kuma u suur sha mi.

Yehova kpa ka “Aôndo u mimi” je ka u henen a hen ga. (Ps. 31:5) Se fatyô u nengen a kwagh ne ken mkaanem magen ma Paulu nger man, ér: “Uityendezwa mba Aôndo cii, ken a Na yô, ka een,” ka ken Kristu je la. Mtil u Yesu tile sha mimi a mshi shio shighe u lu shin tar la yange tese wang er akpelan a lu sha kwagh u uityendezwa mba Yehova ga yô. Shi Paulu kaa ér: “Ka nahan man se lumun Amen ken a Na [Yesu] sha ci u icivir i Aôndo ye.” (2 Kor. 1:20) Yesu ka “Amen,” shin ibumun i tesen ér hanma ityendezwa i Yehova Aôndo a er cii ia kure sha a mi yô!

Er Yehova man Yesu ve er mimi hanma shighe nahan, kape Paulu kpa hanma shighe yange una ôr kwagh ve, a er sha mi je la. (2 Kor. 1:19) Yange lu or u ôron kwagh zwa môm ga ze, shi lu or u eren uityendezwa sha “inja i iyolough tsô” ga. (2 Kor. 1:17) Kpa lu or u ‘zenden sha jijingi.’ (Gal. 5:16) Ior mba Paulu eren kwagh a ve cii, yange kwagh ve gba un ishima tsung. Een na yange a lu Een!

Ainge ne ior kpishi mba ve dondon atindiakaa a Bibilo ken uuma vev ga la ka ve er ityendezwa, ankwagh a zaan iyol cuku shin ma kwagh u a hembe gban ve ishima una va duen yô, ve hungur a ityendezwa ve la. Ken kpenga u eren kpa, ka hanma shighe cii “een” u ior a lun “een” ga, ka vea nger ityendezwa i ve er la shin inya je kpaa. Ior kpishi mba kera nengen ivaa, i i lu iceghzwa i iorov uhar la, ér ka kwagh u igbekeke ga. Kpa ivaapaven i i de ishar hegen ne tese ér ior kpishi nenge ivaa ér ka di mzough u vea fatyô u undun un hanma shighe u ve soo cii yô.—2 Tim. 3:1, 2.

We di ye? Een wou lu Een her Kpa? Ka mimi, er se vande nengen sha mhii u ngeren ne nahan, alaghga shighe ugen a gba u ú bunde kwagh u ú tende zwa u eren yô, man a lu sha ci u ú er kwagh zwa môm ga yum ga, kpa a lu sha ci u kwagh u hange hange ugen va due, u i gbe u ú bunde ga yô. Kpa aluer u ngu Orkristu man u tôndo zwa u eren ma kwagh yô, nôngo sha afatyô wou cii er kwagh la. (Ps. 15:4; Mat. 5:37) U er nahan yô, a hingir u fan we ér u ngu a jighjigh iyol, u eren kwagh u ú kaa yô, shi u er kwagh u mimi hanma shighe cii. (Ef. 4:15, 25; Yak. 5:12) Ior vea nengen ér u ngu or u a fatyô u nan we jighjigh sha akaa a se eren ayange ayange la yô, vea hemba soon u keghen ato a we shighe u u lu pasen ve mimi u sha kwagh u Tartor u Aôndo yô. Sha nahan yô, Een wase a luun Een heregh!