U Tsua Akaa A U Soo u Eren la Nena?

 1. Ka atindi agen a nyi Bibilo i wa se, man ka sea kuran a yô, se zua a mtsera u nyi?

YEHOVA wa se atindi kpishi ken Bibilo i i lu Mkaanem nam la. Ikyav i tesen yô, a yange idya man akombo a civir man iv kua msôrom ma hunden. (1 Kor. 6:9, 10) Heela tseegh ga, Yesu Kristu u a lu Wan u Aôndo la kpa yange na mbadondon un tom u taver, kpa u doon tsung ne, ér: “Za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi, tesen nen ve u kuran akaa a M we ne kwagh sha mi cii; nenge, Me luun a ven ayange ayange zan zan mkurtar je.” (Mat. 28:19, 20) Hanma kwagh u Yehova man Yesu ve kaa ér se er cii ka sha ci u iwasen yase. Ka sea ungwa imo ve yô, se seer lun a iciviryolough shi i hemba kpen se iyol shi tsombor wase u hemba lun ken msaanyol. Kwagh u hemban cii yô, ka sea kuran atindi a Yehova kua tindi u a kaa ér se eren tom u pasen kwagh la yô, a lumun se shi a haa se iveren.

2, 3. (a) Bibilo wa se atindi sha hanma kwagh ga sha ci u nyi? (b) Ka mbampin mba nyi se lu timen sha mi ken ngeren nee? (Nenge foto u a lu sha mhii u ngeren ne la.)

² Nahan kpa, akaa agen nga kpishi a Bibilo i we tindi sha mi jighilii ga yô. Ikyav i tesen yô, Ruamabera wa Mbakristu atindi a a tese er i doo u vea wuhan iyol la jighilii ga. Kwagh ne tese ér Yehova ngu a kwaghfan nena? Aeren a ityôô a ior man gbenda u ve wuhu iyol la kaha sha ci u mba ken ityar kposo kposo. Kpa ka cii la ga, anyom nga a nguren karen yô, aeren a ityôô a ve man iyolwuhan ve kpa i geman. Luun er Bibilo yange i tese gbenda u i doo u a wuhan iyol shi a eren hwe la cica cii yô, ma i ya tsegh hegen sha gbaa ne. Shi ka ityôkyaa ne kpa i ne ve Mkaanem ma Aôndo a ne i nger la ma we atindi kpishi sha kwagh u tom shin gbenda u sôron angev shin keren iemberyolough i i doo sha ci u Orkristu la ga ye. Sha nahan yô, ka mbayaav man se asange asange i gbe u se tsuan akaa a se soo u eren sha gbaa ne la ye.

³ Kwagh ne tese ér kwagh gba Yehova sha kwagh u se tsough u eren shighe u i gbe u se tsua akaa a hange hange, a a bende a uma wase sha gbenda u vesen la gaa? Ter wase u sha la una lumun a hanma kwagh u se tsough u eren u a per tindi u Bibilo ga yôô? Aluer Bibilo wa atindi sha kwagh jighilii ga je kpa, se er nan ve se fa mnenge u Yehova sha kwagh shono?

4, 5. Akaa a se tsough u eren la nga a bende a vese man mbagenev nena?

⁴ Alaghga ior mbagenev vea nenge ér vea fatyô u eren hanma kwagh u ve soo u eren cii. Nahan kpa, aluer ka u se tsua kwagh u Yehova una lumun a mi yô, gba u se gbidye kwar sha atindi man akaawan aa a lu ken Mkaanem nam la, shi se dondo a kpaa. Ikyav i tese yô, cii man Aôndo a lumun se yô, gba u se dondo tindi na u a we sha kwagh u awambe la. (Gen. 9:4; Aer. 15:28, 29) Msen una fatyô u wasen se u tsuan akaa sha gbenda u u zough sha atindi man akaawan a Ruamabera la.

⁵ Akaa a vesen a se tsough u eren ken uma wase la, nga a bende a vese man mlu wase u ken jijingi la kpishi je. Hanma kwagh u se tsough u eren cii ka a nôngo u benden a mlu wase a Yehova, a lu sha gbenda u dedoo shin u bo kpaa. Aluer se tsua kwagh u dedoo yô, una na ikyar i se ye a Aôndo la ia seer taver, kpa aluer ka u bo yô, una vihi i. Heela tseegh ga, aluer se tsua u eren kwagh u bo yô, una fatyô u vihin mlu u ken jijingi u mbagenev, inja na yô, se na ve ishimavihin shin gbev mbu nôngon gayô se vihi mzough u a lu ken tiônnongo la. Sha kpôô yô, akaa a se tsough u eren la nga a bende vese man mbagenev.—Ôr Mbaromanu 14:19; Mbagalatia 6:7.

 6. Ka nyi ia wase se u tsuan akaa a se soo u eren laa?

⁶ Shighe u se soo u eren ma kwagh, kpa Bibilo i gem i tese kwagh u i doo u se er jighilii ga yô, gba u se er nena? Shighe u kwagh a lu nahan yô, ka tom wase u gbidyen kwar sha kwagh u se soo u eren la zulee, nahan tsuan kwagh u Yehova una lumun a mi shi una haa iveren sha mi la, i de lu kwagh u a doo se la tsô ga.—Ôr Pasalmi 37:5.

 7. Shighe u Bibilo i tese kwagh u se er jighilii kpa, se er nan ve se fa kwagh u Yehova a soo ér se ere?

⁷ Alaghga u pine wer: ‘Aluer Mkaanem ma Aôndo pase kwagh u a lumun a mi la jighilii ga yô, se er nan ve se fa kwagh u Yehova a soo?’ Mbaefese 5:17 kaa ér: “Kav nen er ishima i Ter i lu yô.” Shighe u Bibilo i we tindi sha kwagh jighilii ga kpa, se er nan ve se kav ishima i Aôndo? Se kav ishima na sha u eren msen hen a na shi dondon kwagh u icighan jijingi na a kaa ér se er la.

 8. Yesu yange er nan ve kav ishima i Yehova? Tese ikyav.

⁸ Nenge ase kwagh u yange wase Yesu ve kav ishima i Ter na ne. Yesu yange er msen hen Ter na, maa na ikpelaior kwaghyan sha ivande acin ahar. (Mat. 14:17-20; 15:34-37) Kpa shighe u ijen kôr un ken taaikyôngo ve Diabolo va mee un ér a gema awen a hingir bredi la, a lumun u eren nahan ga. (Ôr Mateu 4:2-4.) Er Yesu fa ishima i Ter na tsembelee yô, yange kav er doo u una gema awen la aa hingir bredi ga yô. Jighilii yô, Yesu yange fa ér ka ishima i Aôndo u un eren tom a tahav nav mbura sha u keren mtsera na ga. Er Yesu venda u eren nahan yô, tese ér lu suur sha Yehova ér a kura un shi a na un kwaghyan.

9, 10. Ka nyi ia wase se ve se tsua akaa a se soo u eren la sha kwaghfana? Tese ikyav.

⁹ Aluer ka u se tsua akaa a se soo u eren la sha kwaghfan er Yesu nahan yô, gba u se suur sha Yehova ser a tese se kwagh u se er yô. Gba u se dondo kwagh u Bibilo i kaa ne, ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you. De nengen iyol you wer, u ngu orfankwagh ga, cia TER, pav a ifer kpaa.” (Anz. 3:5-7) Aluer se kav mnenge u Yehova sha u henen Bibilo yô, kwagh la una wase se u kaven kwagh u Aôndo a soo ér se er la hanma shighe cii. Aluer se kav mnenge u Yehova tsembelee yô, a hemba lun se ican ga u dondon atindi a na.—Esek. 11:19..

¹⁰ Ikyav i tesen yô: Tôô ase wer kwase ugen u a vese nom yô, za kasua u za yamen akaa. A nenge a akôv a wan agen a a doo un yô, kpa akôv shon gema taver ishe kpishi. Nahan a pine iyol na ér, ‘Aluer nomom fa ér mo m vihi inyaregh kpishi u yamen akôv ne nahan, a lu un nena?’ Shin er nom na a lu vea na ga nahan kpa, alaghga tsô a fa er aluer un yam akôv la ve, a lu nom na ken ishima yô. Er nan ve a fe ishima i nom naa? A fa sha ci ngu vea nom na shighe wa —karen, nahan a fa mnenge u nom na sha kwagh u vihin inyaregh ki ve lu a mi kpishi ga la tsembelee. Sha nahan yô, a fa mnenge u nom na sha kwagh u yamen imba kwagh u taver ishe la. Kape kwagh u Yehova kpa a lu je la. Ka sea faan mhen na man igbenda na tsembelee yô, kwagh ne a wase se se hemba fan kwagh u Ter wase u sha la a soo ér se er ken hanma mlu u se nyer ker cii yô.

11. Ka mbampin mba nyi se fatyô u pinen ayol a ase shighe u se lu ôron Bibilo shin se lu henen i laa? (Nenge ngeren u kiriki u a lu a itinekwagh ér, “Shighe u U Lu Henen Mkaanem ma Aôndo Yô, Pine Iyol You Wer” la.)

¹¹ Aluer se soo u fan mnenge u Yehova tsembelee yô, gba u se nenge kwaghhenen u sha tseeneke wase la ser ka beerkwagh ga. Shighe u se lu ôron shin henen Mkaanem man Aôndo yô, se fatyô u pinen ayol ase ser, ‘Kwagh ne tesem nyi sha kwagh u Yehova man igbenda na i perapera kua mhen na laa?’ Gba u ieren yase ia lu er i Orpasalmi la nahan. Yange wa icam kaa ér: “TERE, nam, m̱ fa igbenda You, tesem ihiange You. Hemen mo ken mimi Wou, tesem, gadia ka We, U lu Aôndo u myem wam ye; ka We m shi veren ashe We didi ye.” (Ps. 25:4, 5) Zum u u lu gbidyen kwar sha ma kwagh u Bibilo i er yô, u fatyô u pinen iyol you wer: ‘Me dondo kwagh ne hen tsombor wam nena? Me fatyô u dondon kwagh ne hana? Hen yaa? Sha ijiirtomo? Ken makerantaa? Shin ka ken kwaghpasena?’ Se faan ape i doo u se dondo kwaghwan la yô, adooga a hemba lun se zange u fan gbenda u se er tom a kwaghwan shon yô.

12. Ityakerada yase man mbamkombo asev vea wase se u kaven mnenge u Yehova sha akaa kposo kposo nena?

¹² Kwagh ugen u una wase se ve se kav mnenge u Yehova tsembelee yô, ka u dondon kwagh u nongo u Yehova u lu wan se ken Bibilo la zulee. Ikyav i tesen yô, i gber Takerada u Tôvon sha Kwagh ú Mbashiada mba Yehova la man akaa agen a wasen or u tôvon sha kwagh, sha u wasen se u kaven mhen u Yehova sha igbenda kposo kposo, nahan tsuan kwagh u se er yô. Shi ka sea kegh ato ken mbamkombo mba Mbakristu zulee shi sea wa zwa kwagh u i lu henen la yô, kwagh ne a wase se kpishi. Ka sea gbidye kwar sha kwagh u i tese se la yô, kwagh la a wase se u kaven mhen u Yehova, shi henen kwagh er un nahan. Ka sea yaan kwaghyan u Yehova a ne se ken jijingi la tsembelee yô, se hemba fan igbenda na. Sha nahan yô, se hemba lun sha ian i tsuan kwagh u dedoo u se er, u Aôndo wase u lun a dooshima la una haa iveren sha mi yô.

13. Aluer se kav mnenge u Yehova yô, kwagh la una wase se u tsuan kwagh u se soo u eren la sha kwaghfan nena? Tese ikyav.

¹³ Nenge ase ikyav i i tese er aluer se fa gbenda u Yehova a henen kwagh la ve a wase se u tsuan akaa sha kwaghfan yô. Er se lu mbapasenkwagh u Tartor yô, alaghga a sar se u hingir pania u keke, nahan eren tom u pasen kwagh la hanma shighe cii. Kpa cii ve se er kwagh ne yô, doo u se hii u eren akaa ken uma akuma akuma. Heela tseegh ga, alaghga ishima ia lu zan se iyol ser se kera va lu a akaa kpishi ga yô, a saan se iyol sha mimi ga. Kpa jighilii yô, tindi ngu ken Bibilo u a kaa ér se er pania ga. Sea lu mbapasenkwagh tseegh kpa, se mba civir Yehova sha mimi. Nahan cii kpa, Yesu pase se wang nahan ér, mba ve de akaa agen a kar ve sha ci u Tartor yô, vea zua a averen kpishi. (Ôr Luka 18:29, 30.) Heela tseegh ga, Ruamabera tese ér ka sea na Yehova “nagh ku sha ishima i dedoo ku sha zwa” wase shi sea er un tom sar sar sha u kwagh u mimi a za hemen yô, i doo un kpishi. (Ps. 119:108; 2 Kor. 9:7) Aluer se hen sha atôakaa a ken Ruamabera ne shi se er msen ser Yehova a tese se kwagh u se er yô, se fatyô u kaven mnenge na. Nahan aluer se gbidye kwar sha akaa ne yô, alaghga aa wase se u tsuan kwagh u una lu se a iwasen shi Ter wase u sha la kpa una haa iveren sha mi yô.

14. U er nan ve u fa wer ikyondo i u kor la i doo Yehova?

¹⁴ Nenge ase ikyav igen kpaa. Tôô ase wer i kor ikyondo igen doo u, kpa aluer u yam i u hua yô, alaghga mbagenev ken tiônnongo vea nenge a doo ve ga. Kpa adooga u gema u nenge a ijiir ken Bibilo jighilii, i i yange ikyondo la ga. Yehova nenge kwagh ne nena? Bibilo kaa ér: “Sarem pe kasev di kpaa ve̱ wuhan ayol a ve daalaa, i̱ lu sha kwaghfan man akuma akuma kpaa, i̱ de lu sha gbatyo u gban, shin sha zenaria shin sha utagbede shin sha akondo a taver ishe kpaa ga, kpa i̱ lu sha aeren a dedoo er i kom u kasev mba ve kaa er ve mba cian Aôndo mimi vea er yô.” (1 Tim. 2:9, 10) Jighilii yô, kwaghwan ne ngu sha ci u nomso mba ve lu Mbakristu la kpaa. Er se civir Yehova sha mimi yô, se soo ser se wuhan iyol shi se eren hwe sha gbenda u a doo se tseegh ga, kpa a doo mbagenev kpaa yô. Aluer se mba a dooshima shi se mba eren kwagh akuma akuma yô, kwagh ne una mgbegha se se wa mnenge u mba se civir Aôndo vea ve imôngo la ikyo, nahan se palegh u eren kwagh u una dan ve shin una vihi ve ishima ker yô. (1 Kor. 10:23, 24; Fil. 3:17) Aluer se umbur kwagh u Ruamabera a kaa la yô, kwagh ne una wase se se fa mnenge u Yehova sha ikyaa ne, nahan se tsua u eren akaa a a doo un yô.

15, 16. (a) Aluer se za hemen u henen sha kwagh u idya yô, a lu Yehova ken ishima nena? (b) Shighe u se lu tsuan iemberyolough yô, se er nan ve se fa i i lu sha ishima i Yehova? (c) Se tsua akaa a vesen a se er yô nena?

¹⁵ Bibilo pase ér ior ka vea dondo gbenda u ifer shi ‘mhen u ishima ve kpaa a lu u bo tseegh gbem’ yô, ishima i vihi Yehova. (Ôr Genese 6:5, 6.) Kwagh ne wase se u fan ér, doo u se henen sha kwagh u yaven a or la ga, sha ci u ieren ne ia mgbegha se u za eren isholibo i vesen i Ruamabera a vende shi i zough sha mhen u Yehova ga yô. Orhenen Yakobu nger ér: “Kwaghfan u a dugh Sha yô, hiihii ka u wang, shi ka u bem kpaa, man u sar sar, man u norom ikyaa ga, a iv a mhôônom ma zungwen kua atam a dedoo, ka u sangen sha dooshima ga man shi u imangeregh kpaa ga.” (Yak. 3:17) Aluer se umbur kwagh ne yô, una mgbegha se u palegh iemberyolough i ia na se yem u henen sha akaabo la. Ka sea fa kwagh u Yehova a soo man u a ker un ihyom la wang yô, i kera lu se ican u tsuan ityakerada i se ôr shin ufiim mba se nenge shin anumbe a se er la ga. Shi ka se kera yem pinen mbagenev ser ve tese se kwagh u se er ga.

¹⁶ Sha akaa agen kpishi yô, kwagh u or tsough cii a lu u vough, shi una doo Yehova kpaa. Nahan kpa, ka sea tsuan akaa a vesen a se er yô, ashighe agen i doo u se ker kwaghwan hen mbatamen shin hen Mbakristu mbagenev mba ve vie ken jijingi la. (Titu 2:3-5; Yak. 5:13-15) Nahan cii kpa, doo u se za kaa a mbagenev ser, ve tsua kwagh u se er la sha ci wase ga. Gba u Mbakristu vea tsaase mkav ve u ken ishima la tsembelee. (Heb. 5:14) Gba u se cii se er kwagh u jijingi yange mgbegha Paulu nger ne, ér: “Hanma or nana va tôô ikyav mbi nan iyol i nan je” la.—Gal. 6:5.

17. Ka sea tsua u eren akaa a a doo Yehova yô, i wase se nena?

¹⁷ Aluer akaa a se tsough u eren la zua sha mhen u Yehova yô, kwagh ne una wase se se hemba lun kôôsôô a na. (Yak. 4:8) Nahan kwagh ne una na Yehova una lumun se shi una ver se kpaa. Maa jighjigh u se ne Ter wase u sha la a seer taver. Sha nahan yô, se dondon nen atindi man akaawan a a lu ken Bibilo la, sha ci u a pase gbenda u Yehova a nengen kwagh la. Jighilii yô, hanma shighe cii kwagh u he una lu u se hen sha kwagh u Yehova yô. (Yobu 26:14) Nahan kpa, aluer se nôngo kpoghuloo yô, hegen je kpa se fatyô u zuan a kwaghfan man mfe kua mkav u una wase se u tsuan akaa sha inja yô. (Anz. 2:1-5) Mbamhen man mbaawashima mba uumace mba gem, kpa Yehova yô gem kposo ga. Sha nahan yô, orpasalmi yange kaa ér: “Mhen u TER ngu dông gbem sha won, mbamhen mba ken ishima Na kpaa mba sha ikyov ikyov.” (Ps. 33:11) Kwagh ne tese wang ér, aluer aeren a ase man mbamhen asev zua sha mhen u Yehova Aôndo, u a hembe kwaghfan cii la yô, se fatyô u tsuan akaa a se er la sha inja.