Ka Nyi Or Aôndo a Lu?

Ka sea seer henen fan aeren a or yô, se hemba fan nan, nahan ikyar i se ye vea nan la i hemba taver. Kape Yehova kpa ka sea seer henen fan aeren a na ve, se hemba fan injaor i a lu, nahan ikyar i se ye vea na la i hemba taver je la. Ken aeren a Aôndo cii, a a hembe duen tseer tseer yô, nga anyiin, a yô: Ka tahav man kwaghfan man ijirôron i sha mimi kua Dooshima na.

“Tere, AÔNDO. Nenge, We, U er Sha man tar sha agee a Ou a vesen.”—YEREMIA 32:17.

I nenge a tahav mbu Aôndo ken akaa a a gbe la. Ikyav i tesen yô, wangernyom ka u a va, abeen a a wanger sha, oo u a ta, wea due a tile ker nahan, ka i lu iyol nena? Ka i tsee u iyol wese wese. Jighilii yô, u ngu zuan a mkpeyol ken tahav mbu Yehova mbu gban akaa la. Iyange ka i ta i tsee nena je? I kaa ér iyange ka ia ta gyaang yô, mtseenem ma iyange la ka ma kuma er umiliôn 15 nahan sha ikyaren i Celcius la. Ikyav i tesen yô, er mngerem ma pagher ka ma tsee tsung nahan kpa, mtseenem ma iyange hemba mtseenem ma mngerem ma pagher kwa 150,000. Hanma sekônd yô, iyange ka i ta i tsee je i kuma er i kohol ubom umiliôn uderi imôngo i ta hen shighe môm nahan.

Nahan kpa, iyange yese ne ngi kpuaa aluer i tôô i i kaa sha asan umiliôn umiliôn a i fe kwagh u a ga la yô. Mbasainsi ve kaa ér ishan môm ken asan a hembe kehen cii, i i yer ér UY Scuti la, i kehe hemba iyange kwa 1,700. Aluer i tôô ishan i i yer ér UY Scuti la i ver sha ityough ki iyange yô, ia fatyô u yisan tar wase ne cii karen za peregh ken tar u i yer ér Jupiter la kpaa. Alaghga kwagh ne una wase se u kaven kwagh u Yeremia ôr ér Yehova Aôndo gba sha man tar sha agee a na a vesen la wang.

Se zua a iwasen ken agee a Aôndo nena? Saa akaa a Aôndo a gbe se nengen a mi, er iyange man akaa a doon tsung agen shin tar a a lu ve se lu uma ye. Kwagh ugen yô, Aôndo ka a er tom a agee a na u wasen uumace asange asange. Nena yô? Sha ayange a mbaapostoli la, Aôndo na Yesu agee a eren akaa aa yange lu uivande mimi mimi yô. I ôr a vese ken Bibilo ér: “Mbaapirashe mba nengen kera, man mbasombon mba zenden, wanger mbaamandev iyol, mbakondonato mba ungwan; mba nderen mbakpenev.” (Mateu 11:5) Nyian di ye? Bibilo kaa ér: “Ka A na or u nan ver la agee,” shi i za hemen i kaa ér, “mba ve veren ashe sha TER yô, vea hide a agee a ve her.” (Yesaia 40:29, 31) Aôndo una fatyô u nan se “agee a hemban,” sha er a a wase se u nôngon shin wan ishima a atsan gayô mbamtaver mba ken uma ne yô. (2 Mbakorinte 4:7) Alaghga tsô se soo u yan ikyar vea Aôndo u se doo un ishima kpishi, nahan a eren tom a agee a na a hemban sha u wasen se u sôron mbamzeyol asev la.

“Kpash! TERE, ityom You ngi atô kposo kposo, U er i cii sha kwaghfan.”—PASALMI 104:24.

Ka se a seer henen fan akaa a Aôndo a gbe la yô, i seer kpiligh se iyol a kwaghfan na la. Jighilii yô, mbasainsi mbagenev hen fa akaa a Yehova a gbe la, shi ve zua a kwaghfan ken akaa ne u a wase ve u seer fan iwavaren yô. Kwagh ne wase ve u fan iwa, hii sha u eren ziipi zan zan ar sha girgi i purugh.

Kwaghfan u Aôndo la hemba duen ken igbar sha gbenda u a er iyol i orumace i kpilighyol tsung la. Ikyav i tesen yô, nenge ase gbenda u wanikyundan ka a hii shi a za hemen u vesen ken uya la. Kwagh ne ka a hii shighe u mnyandem ma nomsoor ma za zough vea iveghemkwagh igen ken iji i kwase la. Iveghemkwagh la ka i lu a akaawan a a tese aeren a wan shon nana va lu a mi la man er nana va vese a lu la, kua sha akaa agen kpaa. Iveghemkwagh la ka i va pav ker, nahan aveghemakaa agen kpishi a due ker a a lu inja er nga kwaghmôm yô. Shighe a karen yô, hanma iveghemkwagh i hii u vesen duen tilen kwagh u i kposo. Nahan aveghemakaa uderi imôngo a due, er iveghemkwagh i awambe man i igbila man i ikyuhe nahan. Ica ia gbaan ga yô, wan a hii u tseren alegh a yolough kposo kposo shi alegh shon a hii u eren tom. Ken atô u iwer itiankarinyiin tseegh, iveghemkwagh i yange i hii u jiren la ka i vese i hingir wanikyundan, u lun aveghemakaa ken iyol ubiliôn imôngo. Kwaghfan u se nenge a mi sha gbenda u Yehova a er or la, una mgbegha ior kpishi u lumun a kwagh u orngeren Bibilo ugen a kaa ne, ér: “M ngu wuese We er U erem m lu kwagh u cieryol man u kpilighyol kpaa yô.”—Pasalmi 139:14.

Kwaghfan u Aôndo la una wase u nena? Orgbanakaa fa kwagh u i gbe u se lu a mi ve a saan se iyol yô. Er a lu a mfe man mkav yô, una fatyô u wan se kwagh u a lu a kwaghfan ker yô, ken Mkaanem nam, Bibilo. Ikyav i tesen yô, a taver se ishima ér: “Deen nen ayol a en kwaghbo.” (Mbakolose 3:13) Kwaghfan ngu ken kwaghwan ne kpa? Een ngu. Mbatwerev kaa ér, aluer or nan ngu den ior mbagenev a kwaghbo ve yô, kwagh ne una wase nan nana yaven kundu kundu shi una na nana lu a angev mbu ishimaa ga. Shi kwagh ne una wase u been iuren kua iangev mbigenev. Aôndo ngu er ma ijende i lun a kwaghfan, i i we u ikyo, nahan ka i waan we kwagh u una wase u shi una lu u a inja yô. (2 Timoteu 3:16, 17) U soo wer u lu a imba ijende la gaa?

“Kwagh u mimi doon TER ishima.”—Pasalmi 37:28.

Aôndo eren kwagh sha mimi hanma shighe cii. Sha mimi yô, “Aôndo Una er iferkwagh mayange ga, Uhembanagee kpaa Una er kpe ga.” (Yobu 34:10) Aôndo er ijir sha mimi, er orpasalmi yange ôr shighe u lu ôron kwagh u Yehova la nahan, ér: “U er ior ijir sha mimi.” (Pasalmi 67:4) Sha ci u “TER yô, nengen ken ishima,” nahan or a fatyô u eren atseregh bumen un ga shi ka a fa mimi u kwagh hanma shighe cii, nahan a ôr ijir sha mimi. (1 Samuel 16:7) Kwagh ugen yô, Aôndo fa hanma anyighe man ijirôron i mimi ga i i lu zan hemen shin tar ne la cii, nahan a tôndo zwa ér ica a kera gba ga tsô “aferaior yô, á tim a sha tar kera.”—Anzaakaa 2:22.

Nahan kpa Aôndo ka orjir u wan tswam u ka nan soo u tsahan ior la ga. Ka a tese mhôônom ma zungwen shighe u i doo u una er nahan kpa a lu vough yô. Bibilo kaa ér: “TER mgbough a mhôônom ma zungwen kua mlumun u sha mhôôn.” Ka a er kwagh ne a mbaaferev mba ve gem ishima sha mimi la je kpaa. Kwagh ne ka ijirôron i sha mimi ga zee?—Pasalmi 103:8; 2 Peteru 3:9.

Ijirôron i sha mimi i Aôndo la ka i wase se nena? Apostoli Paulu yange kaa ér: “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan.” (Aerenakaa 10:34, 35) Ijirôron i Aôndo i sha mimi la ka i wase se sha ci u sangen a sange ior sha dooshima ga shi te ikyar ken or sha icugh ga. Aluer kwavyolough wase kaha shin tar wase shin se fa takerada shin se fa ga, gayô se mba a kwagh ave shin se mba a mi ga kpa, Aôndo una lumun se shi se fatyô u lun mbacivir un.

Er Aôndo a soo ér se fa ijirôron na i sha mimi la shi se zua a iwasen ker yô, a na se imo i ken ishima. Ruamabera ôr kwagh u imo i ken ishima la ér ka tindi u i ‘nger ken asema a ase,’ u ka a “eren shiada” ér, ma ieren yase ka i bo shin ka i dedoo yô. (Mbaromanu 2:15) Imo i ken ishima ia wase se nena? Aluer se tsaase imo i ken ishima yase la tsembelee yô, ia fatyô u mgbeghan se u palegh aeren a bo shin aa mimi ga la. Shighe u se er kwagh u shami ga je kpa, imo i ken ishima yase la ia fatyô u wasen se u geman ishima shi sôron kwagh u se er shami ga la. Sha mimi yô, aluer se fa kwagh u ijirôron i Aôndo i sha mimi la yô, a wase se shi se kporom ikyua a na!

“Aôndo ka Dooshima.”—1 Yohane 4:8.

Aôndo ka a tese tahav man kwaghfan kua ijirôron i sha mimi, kpa ma yange Bibilo kaa ér Aôndo ka tahav shin kwaghfan gayô ijirôron i sha mimi ga. Bibilo kaa ér Aôndo ka Dooshima je. Sha ci u nyi? Sha ci u se fatyô u ôron sha mimi nahan ser, tahav mbu Aôndo ka mbu na un agee a eren ma kwagh shi ijirôron na i sha mimi la man kwaghfan na ka ve hemen un sha gbenda u a eren akaa la. Kpa ka dooshima u Yehova la ka a mgbegha un u eren kwagh ye. Ka dooshima ka a na ve a er hanma kwagh cii ye.

Er kwaghmôm yange ban Yehova ga nahan kpa, dooshima na mgbegha un u gban akaa a uma agen a sha man a shin tar, a a fatyô u zuan a iwasen kua msaanyol ken dooshima na man ikyo i wan na la yô. Aôndo yange gba tar ne a iyol tangen shio sha u u lu ya u uumace yô. Shi a za hemen u tesen uumace cii dooshima na je yô, “ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mbaperapera ga kpaa.”—Mateu 5:45.

Kwagh ugen yô, “mhôônom ma ker Ter man shi zungu mhôônom kpaa.” (Yakobu 5:11) Ka a zungwe mba ve soo u fan un shi kporom ikyua a na la mhôônom. Aôndo nengen a amba ior la asange asange. Sha mimi yô, ‘ka Un A lu koson we ye.’—1 Peteru 5:7.

Dooshima u Aôndo la ka a wase se nena? Ka sea nenge a mdooashe u iyange miren la nahan i doo se. Ka sea ungwa ahan a wanye u sha ikyum nahan i saan se iyol. Or u hen tsombor wase u nan lu kôôsôô a vese la ka nana tese se dooshima yô, i doo se. Alaghga akaa ne a lu a vesen ga, kpa aa na uma wase una seer doon sha gbenda u vesen.

Ka se zua a iwasen ken dooshima u Aôndo a tesen se la, sha gbenda ugen kpaa: Gbenda shon yô, ka msen. Bibilo taver se asema ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun.” Er a lu ter u lun a dooshima yô, a soo ér se ker iwasen hen a na sha mbamzeyol asev mba vesen mbara. Er Yehova a lu a dooshima u tangen iyol ga yô, a tôndo zwa u van a “bem u Aôndo u a gande hanma mfe wase cii” la.—Mbafilipi 4:6, 7.

Se lam sha kwagh u aeren a Aôndo a vesen, er tahav nav man kwaghfan na man ijirôron i sha mimi kua dooshima na la kpuaa tseegh, nahan kwagh ne wase u u hemban fan injaor i Aôndo a lu la ga he? Aluer u soo wer u seer wuese Aôndo yô, se mba kaan a we ser hen fa kwagh u Aôndo a vande eren man u una va er sha ci u iwasen you la.