Timen Sha “Akaacimin A Aôndo”

“Jijingi tev akaa cii, zan zan akaacimin a Aôndo je kpaa.” —1 MBAKORINTE 2:10.

 1. Ka mimi mba ken Bibilo mba nyi ka ve na or u nan hii a hii u henen Bibilo iembere?

SE MBAGEN kpishi ken tiônnongo u Kristu se fatyô u umbur iember i yange se fa mimi hiihii ve se zua a mi la. Yange se fa er i hii ve iti i Yehova i lu a inja yô man er i hii ve a de ior ve lu yan ican yô man ityôkyaa i mbagenev ve lu yemen sha yô kua kwagh u a lu keghen uumace mba jighjigh ken hemen la kpaa. Cii man se fa mimi yô, alaghga se vanden ôron Bibilo, kpa akaa a se ter sha heen ne cii lu myer hen a vese di er a lu myer hen uumace kpishi nyian nahan. Yange se lu vough er or u nan mough u zan zende sha use nahan. Shighe u nan mough zende la, taver nan u nengen zan ica, sha ci u ime wa. Kpa iyange hiin u duen yô, nan gba nengen zan kera. I va tilen sha tembe yô nan gba nengen a akaa a doon, kua aa icaa je kpaa. Kape shighe u or ka nana hii u wasen se ér se fa Ruamabera ve se hii u kaven “akaacimin a Aôndo” je la.—1 Mbakorinte 2:8-10.

 2. Hii nan ve iember i se zua a mi sha u henen Mkaanem ma Aôndo la ia fatyô u been ga?

² Doo u mfe u Bibilo u se zough a mi cuku tseegh la una kuma see? Ishemberkwaghôron i “akaacimin a Aôndo” la i wa mne u icighan jijingi a ne Mbakristu ve kav kwaghfan u Aôndo, kpa ior mbagenev yô a ne ve ga la kpa ker. (1 Mbakorinte 2:7) Sha kpôô yô, kwaghfan u Yehova ngu a ikighir ga, man aluer se mba tôvon kwaghfan na la yô, se zua a iember kpishi. Se fatyô u fan igbenda i Aôndo a eren kwagh sha kwaghfan la cii ga. Aluer se za hemen u tôvon sha “akaacimin a Aôndo” a uwer gban shio yô, se lu a iember i yange se zua a mi shighe u se hii fan atesen a Bibilo a kiriki la her zan zan gbem sha won.

 3. Er nan i gbe u se fa atôakyaa a suen jighjigh wase la tsema tsema?

³ Hii nan ve i doo u se fa “akaacimin” nee? Aluer se fa kwagh u se lumun a mi la tseegh ga, kpa se fa ityôkyaa i i ne ve se lumun a kwagh shon la, ka atôakyaa a suen jighjigh wase je la yô, kwagh ne una taver jighjigh wase kua vangertiôr wase kpaa. Ruamabera wa se kwagh ér se yar tom a “tahav mbu mhen” wase shi se ‘kar er ishima i Aôndo i lu yô man kwagh u a doo man a kom u rumun un man shi a lu vough la kpaa.’ (Mbaromanu 12:1, 2; NW) Aluer se fa er i hii ve Yehova a kaa a vese ér se eren uma er un tese yô, ishima ia hemba taver se u eren sha imo na cii. Man mfe u se fa “akaacimin” la una na se agee a hendan a imeen i eren aeren a bo, kpa ‘asema aa tsee se u eren akaa a dedoo.’—Titu 2:14.

 4. Bibilo i henen wa nyi man nyi kere?

⁴ Aluer se soo u fan akaacimin yô saa se henen kwagh. Nahan kpa, kwaghhenen ngu kposo a u ôron a ôr takerada tseegh la. Kwaghhenen wa u timen sha kwagh u ú lu henen la zulee sha er u fa er kwagh shon a zough sha kwagh u ú vande fan la yô. (2 Timoteu 1:13) Kwagh ne wa u fan atôakyaa a i ne ve i er kwagh shon la kpa ker. Shighe u se lu henen Bibilo yô, doo u se gbidyen kwar sha kwagh u se lu henen la, er se yar tom a mi sha inja shi se wase mbagenev kpaa yô. Kwagh ugen yô, kwaghhenen wase a kua “hanma kwaghôron u a dugh sha zwa u Aôndo” yô, gadia “icighanruamabera cii ka Aôndo A ne i nger ye. Ngu a inja sha ityesen” kpaa. (2 Timoteu 3:16, 17; Mateu 4:4) Gba u se nôngo kwagh kpoghuloo ve se hen Bibilo ye. Kpa aluer se hen i̱ yô a saan se iyol, shi se fa “akaacimin a Aôndo” la kpaa, gadia a taver gande u fan ga.

Yehova Wasen Mbaasemaleghlegh u Zuan a Mkav

 5. Ka unô vea fatyô u kaven ‘akaacimin a Aôndo’?

⁵ Aluer wea faan takerada ken makeranta ga shi kwaghhenen una doon we ga je kpa, de henen wer “akaacimin a Aôndo” la aa taver we u fan ga. Shighe u Yesu lu eren tom u pasen kwagh shin tar la, lu mbafankwagh man mbakavenkwagh Yehova pase ve awashima Na ga, kpa lu ior mba ve fa takerada yum ga shi ve lu sha kwarkyaa kpaa ga, shi ve hiden a ayol a ve ijime ér wanakiriki u Aôndo a tese ve la Yehova pase ve awashima na ye. Lu kwagh u a tôô ve a kar sha mba ve za makeranta la yô, vea lu er anikyundanev nahan. (Mateu 11:25; Aerenakaa 4:13) Apostoli Paulu yange nger mba ve na jighjigh a na imôngo mbara washika sha kwagh u “akaa a Aôndo A ser a sha ci u mba Un doo ve ishima la” ér: “Se yô, Aôndo gema pase se a sha Jijingi. Gadia Jijingi tev akaa cii, zan zan akaacimin a Aôndo je kpaa.”—1 Mbakorinte 2:9, 10.

 6. Inja i mkaanem ma ken 1 Mbakorinte 2:10 la ér nyi?

⁶ Jijingi u Aôndo tev “akaa cii, zan zan akaacimin a Aôndo” je kpa tev a nena? Yehova pasen hanma Orkristu mimi nan tswen ga, kpa ne ior mba Aôndo mba ve lu ken mzough ne mkav u ken Bibilo sha ikyev i nongo u jijingi na a lu hemen u ne. (Aerenakaa 20:28; Mbaefese 4:3-6) Atôônanongo tar sha won cii nga henen Bibilo kwagh môm. Atôônanongo ne hen atesen a Bibilo kposo kposo cica cii bee ken anyom a karen ne. Icighan jijingi ka a wase ior ken tiônnongo ve lu a ieren i i gbe u saa vea lu a mi ve vea kav “akaacimin a Aôndo” la.—Aerenakaa 5:32.

“Akaacimin a Aôndo” Wa Nyi man Nyi Kere?

 7. Hii nan ve ior kpishi ve fe “akaacimin a Aôndo” ga?

⁷ Doo u se hen ser “akaacimin” la ka akaa a a taver u kaven keng keng ga. Ior kpishi fa “akaacimin a Aôndo” ga, kpa u ngu wer kwaghfan u Aôndo ngu a ngu ican u zuan a mi ga, kpa ka sha ci u Satan tsugh ior ve venda iwasen i Yehova a lu nan se sha ikyev i nongo Na la.—2 Mbakorinte 4:3, 4.

 8. Ka akaacimin a nyi Paulu a ter ken ityough ki sha utar ki washika u nger Mbaefese laa?

⁸ Paulu tese ken ityough ki sha utar ki washika u nger Mbaefese la ér “akaacimin a Aôndo” la kua mimi mba ior mba Yehova kpishi ve vande fan doo doo yô, er mimi sha kwagh u Vor u ityendezwa la nahan man ior mba i tsough ve ér ve yem sha la kua mimi sha kwagh u Tartor u Mesiya la. Paulu nger ér: “Ken ikyov igen yô, i lu a pase ônov mba iorov kwagh ne er hegen i pase uicighanmbaapostoli Nav kua uprofeti ken Jijingi nahan ga, er atôatyev kpaa a lu mbayandyako imôngo man iyol i môm man nongo môm a vese sha ityendezwa i ken Kristu Yesu” nahan. Paulu kaa ér i wa un tom u “pasen wanger wanger er tom u sha kwaghmyer la u lu yô; kwaghmyer ne lu myer ken Aôndo u A gbe akaa cii, hii je er shighe lu a lu ga la.”—Mbaefese 3:5-9.

 9. Er nan i lu se kwagh u civirigh u fan “akaacimin a Aôndo”?

⁹ Paulu shi za hemen ér Aôndo soo ér “nongo u Kristu u̱ pase . . . mba sha ajiir a Sha la ve̱ fa kwaghfan u Aôndo u a dumbur la.” (Mbaefese 3:10) Mbatyomov ka ve zua a iwasen sha u nengen gbenda u Yehova a eren kwagh a tiônnongo u Kristu sha kwaghfan la shi kaven kpaa. Nenge er i lu kwagh u civirigh u se fan akaa a a gbe mbatyomov ishima u fan la sha wono. (1 Peteru 1:10-12) Paulu shi kaa ér se nôngo “u kaven er igbanger man iniembe man mtav man mze” u jighjigh u nan u Mbakristu la a lu yô. (Mbaefese 3:11, 18) Se time ase nen sha akaacimin agen a alaghga se lu a vande fan ga yô.

Akav a Tesen Akaacimin a Aôndo

10, 11. Ka hanma shighe Ruamabera a tese ér Yesu hingir vegher u vesen u “vor” u “kwase” u Aôndo u sha laa?

¹⁰ Se fa ser Yesu ngu vegher u vesen u “vor” u “kwase” u Aôndo u sha ikyav, u i er kwagh na ken Genese 3:15 la. Aluer se soo u seer fan kwagh u vor ne yô, se fatyô u pinen ayol a ase ser: ‘Lu hanma shighe Yesu hingir Vor u ityendezwa laa? Lu shighe u lu sha la shiini? Shin lu shighe u i mar un shin tar laa? Shin lu shighe u i er un batisema shin shighe u i nder un shin ku laa?’

¹¹ Aôndo yange tôndo zwa ér vegher u nongo na u sha, u kwaghôron u profeti a yer u ér “kwase” la ua mar vor u ua cagh iyô ityough yô. Kpa anyom kar udubu imôngo je kpa kwase u Aôndo u sha ikyav la lu a kôr cio u maren vor u ua tim Satan man ityom na la ga. Nahan, kwaghôron u profeti u Yesaia yila un ér “ikyômkwase” man kwase u “ishima i vihi nan ken vanger yô.” (Yesaia 54:1, 5, 6) Ken masejime yô, i mar Yesu ken gar u Betelehem. Kpa lu shighe u i er un batisema kera la, icighan jijingi tsua un hingir wan u Aôndo u ken jijingi ye. Lu hen shighe la Yehova pase gbar gbar ér: “Ngun ka Wan Wam u ishima ishima” je ne ye. (Mateu 3:17; Yohane 3:3) Nahan un u a lu vegher u vesen u “vor” u kwase la maa mase duen. Shighe kar yô, mbadondon mba Yesu kpa i shighe ve mkurem shi i tsua ve sha icighan jijingi. Sha nahan yô, “kwase” u Yehova u sha ikyav u lu er ‘kwase u nan mar ga’ ica i gbe la hingir u wan “atsam” ken masejime.—Yesaia 54:1; Mbagalatia 3:29.

12, 13. Ka avur a ruamabera a nyi a tese ér Mbakristu mba i shigh ve mkurem mba ve lu shin tar cii kohol hingir ‘wanakiriki u jighjigh man u fan kwagha’?

¹² Ikyav i sha uhar i akaacimin a i pase se yô, ka sha kwagh u iorov 144,000 mba Aôndo wa ishima u tsuan ken uumace la. (Mpase 14:1, 4) Se na jighjigh ser mba i shigh ve mkurem ve lu shin tar sha ashighe kposo kposo la cii kohol hingir “wanakiriki u jighjigh man u fan kwagh,” u Yesu a kaa wener una naan se “kwaghyan” sha ashighe ashighe la. (Mateu 24:45) Ka avur a Bibilo a nyi a tese ér kwagh u se ne jighjigh a mi ne ka u mimi? Yesu yange lu ôron kwagh u hanma Orkristu u nana koso anmgbianev nav sha kwaghyan u ken jijingi shinii?

¹³ Aôndo yange kaa a ikyurior i Iserael ér: “Ka ne ne lu mbashiada Av ye, . . . wanakiriki Wam u M tsough” yô. (Yesaia 43:10) Kpa sha iyange i Nisan 11 ken inyom i 33 la, Yesu kaa a mbahemenev mba Mbaiserael ér Aôndo venda ikyurior ve u lun ior Nav. A kaa ér: ‘Á ngohol tartor u Aôndo hen a ven kera á na ikyurior i ia ume atam yô.’ Yesu shi kaa a ikpelaior ér: “Nenge ase, i undu ya [wen], hingir ice.” (Mateu 21:43; 23:38) Yehova yange venda ya u Iserael, u lu wanakiriki na la sha ci u kera lu jighjigh ga, shi fa kwagh kpaa ga. (Yesaia 29:13, 14) Sha iyange shon i Nisan 11 la je, Yesu pine ér: ‘Ka an nan lu wanakiriki u jighjigh man u fan kwagha’? Lu pinen ér, ‘Ka hanma ikyurior i fan kwagh ia kar a tile sha ityough ki Iserael ia lu wanakiriki u jighjigh u Aôndo?’ Apostoli Peteru na mlumun sha mpin ne shighe u kaa a tiônnongo u Mbakristu mba i shigh ve mkurem la wener: ‘Ne mba . . . nongoior u Aôndo jim’ la. (1 Peteru 1:4; 2:9) Ikyurior i ken jijingi i i lu “Iserael u Aôndo” ne hingir wanakiriki u Yehova. (Mbagalatia 6:16) Er ior mba Iserael u sha ashighe a tsuaa la kpa kohol cii hingir “wanakiriki” môm nahan, kape Mbakristu mba i shigh ve mkurem ve lu shin tar sha ashighe kposo kposo ne kpa ve kohol cii ve hingir “wanakiriki u jighjigh man u fan kwagh” je la. Doo se kpishi er se lu ngohol “kwaghyan” sha ikyev i wanakiriki u Aôndo ne nahan.

Kwaghhenen u sha Tseeneke Ka Kwagh u Nan Msaanyol

14. Er nan ve Bibilo i henen i hembe nan msaanyol a u ôron a ôr i tseegh laa?

¹⁴ Ka sea zua a iwanger sha kwagh u ken Ruamabera u se vande fan ga nahan i saan se iyol er mfe la a taver jighjigh wase ga he? Ka nahan ve se hembe zuan a msaanyol sha u henen Bibilo a u gban ôron i̱ tsô ye. Nahan shighe u u er ityakerada i Mbakristu yô, pine iyol you wer: ‘Iwanger i m zough a mi ne zua sha kwagh u m vande fan sha kwagh u m hen ne nena? Ka avur a Ruamabera shin mbamhen mbagen mba nyi i doo u me time sha mi ve vea seer suen kwagh u m ôr ken ngeren nee?’ Aluer u soo u seer zuan a iwanger sha ma mpin yô, nger un shin inya sha er u va time sha mi ken hemen yô.

15. Ka akaa a nyi nahan i gbe u u hen ve a saan we iyolo, man aa wase u ken ayange a uma wou cii nena?

¹⁵ Ka akaa a nyi nahan i gbe u u hen ve a saan we iyol sha ci u iwanger i u zua a mi laa? Se fatyô u timen sha uikyurmbayan kposo kposo mba Aôndo ya sha ci u iwasen i uumace la. U fatyô u maan jighjigh wou sha u timen sha akaaôron a profeti a a er kwagh u Yesu Kristu la shin timen sha hanma ivur i ma takerada u profeti u ken Bibilo cii. Shi aluer u time sha kwagh u Mbashiada mba Yehova mba ainge ken takerada u i yer ér Jehovah’s Witnesses-Proclaimer’s of God’s Kingdom la kpa jighjigh wou una seer taver.a Shi aluer u time sha “Mbampin mba Mbaôron Takerada Ne Ve Pin La,” mba i gberen ken Iyoukura la yô, u seer zuan a iwanger sha avur a Bibilo agen. Ver ishima sha gbenda u i tim ken Ruamabera sha u tan iwanger sha kwagh u i pin la. Kwagh ne una wase u u tsaase “mkav u ken ishima” you shi u lu a mfe kpaa. (Mbaheberu 5:14) Ú timen ken Ruamabera yô, ngeren atôakaa a u soo u yaren tom a mi la ken kôpi u Bibilo you shin ken kwatakerada sha er aa wase u ken ayange a uma wou cii kua mbagenev kpaa yô.

Wase Agumaior a Zua a Msaanyol sha u Henen Bibilo

16. U wase agumaior aa zua a msaanyol sha u henen Bibilo nena?

¹⁶ Mbamaren vea fatyô u wasen ônov vev ér ve lu a isharen i yan ikyar a Aôndo. De henen wer a taver ônov ou u kaven akaacimin a Aôndo ga. Aluer u kaa a ônov ou wer ve ker iwanger sha kwagh u tsombor ua va henen kwagh ve ua time sha mi la yô, pine ve ve ôr ú kwagh u ve hen yô. Kwaghhenen u hen tsombor la wa u ônov karen iyol ayol a ve sha er aluer or pine ve mpin sha akaa a ve ne jighjigh a mi la kpa vea fatyô u nan mlumun shi tesen ér akaa a ve hen la ka a mimi yô. Shi u fatyô u yaren tom a antakerada u i yer ér “See the Good Land”b la tesen ônov ou ityar i i er kwagh u i ken Bibilo la shi tan ve iwanger sha akaa a u we ishima u henen a ve ken Bibilo i ne henen ken hanma sati la.

17. Er nan ve i doo u se er kwagh sha kwaghfan sha gbaa u Bibilo i henen sha tseeneke laa?

¹⁷ Aluer se mba henen Bibilo sha tseeneke wase yô, a saan se iyol shi jighjigh wase kpa una taver. Kpa ver ishima sha er ia imbishi shighe wou u wan iyol sha mbamkombo mba tiônnongo ga yô. Mbamkombo kpa ka gbenda ugen u Yehova a tesen se sha ikyev i “wanakiriki u jighjigh man u fan kwagh” yô. Kpa aluer u seer keren iwanger sha akaa a i gbe u a hen ken mbamkombo yô, u hemba nan mbamlumun mba injaav. U tesen ikyav yô, se na mbamlumun mba injaav ken Takerada u Henen hen Tiônnongo shin shighe u i lu timen ken Bibilo asav-asav ken Makeranta U Henen Tom U Hemen la.

18. Er nan ve iniôngon you i timen sha “akaacimin a Aôndo” la ia saa ishe ga?

¹⁸ Aluer u ngu henen Mkaanem ma Aôndo kpoghuloo yô, ma a wase ú u kporom hen Yehova. Bibilo ôr iwasen i se zua a mi sha u henen i yô, ér: “Kwaghfan kor or sha kwagh u vihin di er inyaregh nahan kpaa; kpa mhembe u mfe yô, ka er kwaghfan a kor uma u or u nan lu a mi la.” (Orpasenkwagh 7:12) Nahan iniôngon you i seer fan mkaanem ma Aôndo la ia saa ishe ga cii. Bibilo tôndo zwa a mba ve gbe uwer u timen ken mkaanem ma Aôndo ga la ér: “Mfe u fan Aôndo kpaa, ú zua a mi.”—Anzaakaa 2:4, 5.

[Footnotes]

Ú Fatyô u Pasen Kpa?

• Kanyi i lu “akaacimin a Aôndo”?

• Er nan i doo u se gba uwer u timen sha akaacimin a Aôndo ga?

• Er nan ve hanma Orkristu nan lu a ian i fan “akaacimin a Aôndo”?

• Aluer u ngu timen sha “akaacimin a Aôndo” yô, aa wase u nena?

[Picture on page 24]

Yesu yange hingir Vor u ityendezwa hanma shighe?

[Picture on page 27]

Mbamaren vea fatyô u tesen ônov vev akaa a vea time sha mi sha u wan agoyol sha kwaghhenen u hen tsombor yô