ITYOUGH 07
Yehova Ngu Nena Jimi?
Ka wea hen sha kwagh u Yehova Aôndo nahan, ka nyi ka i va u ken ishima? Kwagh na ka a cier we iyol, shi u nenge wer ngu ica a we, er asan a a lu ica hiinii la nahana? Shin ka u nenge wer ngu kpôô kpôô ga, kpa ka di kwagh u a lu a tahav kpishi er idyuran nahan di tsôô? Yehova ngu nena jimi? Bibilo pase se aeren a Yehova a lu a mi yô, shi i̱ pase se ér kwagh wou gba un ishima.
1. Er nan ve se nengen a Aôndo ga?
“Aôndo ka jijingi.” (Yohane 4:24) Yehova ngu a iyol i inyam man awambe er se nahan ga. Un ka Jijingi, shi ngu Sha, hen ijiir i se fatyô u nengen a na ga yô.
2. Ka aeren a nyi nahan Yehova a lu a mini?
Er se nengen a Yehova ga nahan kpa, ngu kpôô kpôô, shi aluer se fa un yô, kwagh na a doo se sha ci u ngu a aeren a doon tsung. Bibilo kaa ér: “Kwagh u mimi doon [Yehova] ishima, man shi te mba i doo Un a ve la kera ga.” (Pasalmi 37:28) Heela tseegh ga, ‘eren a ior kundu kundu shi zungwen ve mhôônom,’ hemban je yô mba ve lu yan ican la. (Yakobu 5:11) Yehova “ngu ikyua a mba asema a vihin ve la, yem mba ve lu a ishima i zamber yô.” (Pasalmi 34:18) Shi kwagh ugen yô, u fa er ieren yase ia na a saan Yehova iyol, shin ishima a vihi un kpa? Or u nan eren akaabo yô, ka nan na ishima i vihi Yehova. (Pasalmi 78:40, 41) Kpa or u nan eren kwagh u vough yô ka nan na i saan un iyol.—Ôr Anzaakaa 27:11.
3. Ka nyi Yehova a er u tesen ér se doo un ishima?
Ieren i Yehova i hemban cii yô, ka dooshima. Jighilii yô, “Aôndo ka dooshima.” (1 Yohane 4:8) Yehova pase se dooshima na ken Bibilo kua ken akaa a a gbe la. (Ôr Aerenakaa 14:17.) Ikyav i tesen yô, a er se sha gbenda u se fatyô u nengen a ukala mba doonashe, shi ungwan ityogholov mbi doon, man sha gbenda u kwaghyan u nyohon una nyoho se yô. A soo ér i saan se iyol.
HEN KWAGH I ZA SHIMI
Fa gbenda u Yehova a eren akaa a kpilighyol la. Nahan nenge er Yehova a pase aeren a na a doon tsung la, man gbenda u a eren kwagh la yô.
4. Icighan jijingi ka tahav mbu Aôndo a eren akaa a mi yô
Er se eren akaa a ave a ase ne nahan, kape Yehova kpa a eren akaa a icighan jijingi na je la. Bibilo tese ér icighan jijingi ka or ga, kpa ka tahav mbu Aôndo a eren akaa a mi yô. Ôr Luka 11:13 man Aerenakaa 2:17, maa lam nen sha mbampin mban:
Aôndo una “haa” icighan jijingi na sha mba ve sônon un icighan jijingi yô. Sha nahan yô, u nenge wer icighan jijingi ka oro, shin ka tahav mbu Aôndo a eren tom a mini? U ôr nahan sha ci u nyi?
Yehova ka a er tom a icighan jijingi na sha u eren akaa a kpilighyol. Ôr Pasalmi 104:30 man 2 Peteru 1:20, 21, maa lam nen sha mpin ne:
Ka akaa a nyi nahan Yehova a er sha icighan jijingi naa?
5. Yehova ngu a aeren a doon tsung
Mose lu or u civir Aôndo sha mimi yô, kpa yange soo ér ma un seer fan Aôndo u a gbe un la. Nahan Mose kaa a na ér: “Ma U shi tesem igbenda You sha er me fa U yô.” (Ekesodu 33:13) Nahan Yehova pase Mose aeren a Na agen. Ôr Ekesodu 34:4-6, maa lam nen sha mbampin mban:
Ka aeren a Yehova a nyi nahan yange pase Mose?
Ka aeren a Yehova a han a hembe doon we?
6. Kwagh u ior gba Yehova ishima
Ior mba Yehova mba ngise i yilan ve ér Mbaheberu la yange ve lu ikpan ken Igipiti. Yange ve lu yan ican nahan, lu Yehova ken ishima nena? Ungwa INIUMBE i i lu heen ne gayô ôr Ekesodu 3:1-10. Maa lam nen sha mbampin mba ve dondo ne.
Kwagh u Bibilo i ôr ne tese u ér Yehova ngu nengen ican i uumace ve lu yan ne nahan, ka un nena?—Nenge ivur 7 man 8.
U nenge wer mimi je Yehova soo u wasen uumace shi ngu a tahav mbu wasen vee? U nenge nahan sha ci u nyi, shin u nenge nahan ga sha ci u nyi?
7. Se fatyô u fan aeren a Yehova sha akaa a a gbe la
Yehova pasen se aeren a na sha akaa a a gbe la. Nenge VIDIO i i lu heen ne. Ne been yô, ôr Mbaroma 1:20, maa lam nen sha mpin ne.
Ka aeren a Yehova a nyi nahan u nenge a mi ken akaa a a gbe laa?
IOR MBAGENEV KA VE KAA ÉR: “Aôndo ka tahav mbu mbu lu hanma ijiir cii yô.”
We u kaa wer nyi?
U ôr nahan sha ci u nyi?
KA NYI U HENE?
Yehova ka Jijingi, se mba nengen a na ga, kpa gema ngu a aeren a doon kpishi, hemban je yô dooshima.
Mbampin mba umbur kwagh u i hen yô
Er nan ve se fetyô u nengen a Yehova ga?
Ka nyi i lu icighan jijingi?
Ka aeren a nyi nahan Yehova a lu a mini?
SEER HENEN KWAGH
Seer fan kwagh u aeren a vesen anyiin a Yehova a lu a mi yô.
Nenge kwagh u a tese ér Aôndo ngu ken akaa cii ga yô.
Nenge er i hii ve Bibilo i yila icighan jijingi ér ave a Aôndo yô.
Yange taver orapirashe ugen u nan jighjigh ér un doo Aôndo ishima. Nenge ase kwagh u yange na ve gema mnenge u lu a mi ne yô.
“Hegen Me Fatyô u Wasen Mbagenev” (Iyoukura, Oktoba 1, 2015)