Mbampin mba Mbaôron Takerada Ne Ve Pin La
Yesu yange pase kwagh tser tar u Iserael cii. Nahan er nan man apostoli Peteru yange kaa ér Mbayuda kua mbahemenev vev er kwagh “sha lan” shighe u ve kaa ér i wua Yesu laa?—Aer. 3:17.
Shighe u apostoli Peteru lu lamen a Mbayuda mbagenev sha kwagh u uwegh ku ve lu a mi sha ku u Mesiya la yô, a kaa a ve ér: “M fa, ka sha lan ne er kwagh ne ye, er mbavesen enev kpaa lu er nahan.” (Aer. 3:14-17) Alaghga Mbayuda mbagenev yange ve fa ér Yesu ka Mesiya ga shin ve kav ityesen na ga. Kpa mbagenev yô, yange ve er kwagh sha lan sha ci u ve lu a ishima i civir Aôndo ga, shin kwagh u Yesu doo ve ga shin ve lu a imorshima a na, gayô ve kôr un a kôr ihyom jighilii je.
Nenge ase er Mbayuda kpishi yange doo ve u civir Yehova ga ve kwagh ne gema bende a gbenda u ve nengen ityesen i Yesu yô. Ashighe kpishi Yesu yange a tese ior kwagh sha anzaakaa, shi a pase mba i sar ve u seer fan la inja i anzaakaa shon. Kpa mbagenev ken ve yô, yange vea ungwa kwaghôron u Yesu, vea kav ga kpa, ve kar ve yem kwagh ve kera. Sha shighe ugen la, mbahenen mba Yesu mbagenev je kpa kera doo ve a na ga, sha ci u injakwagh igen i ôr ve yô. (Yoh. 6:52-66) Ior mban kera fa er Yesu ôron anzaakaa sha er una kar ve una fa aluer vea wa iyol u geman mbamhen man aeren a ve a bo la ga. (Yes. 6:9, 10; 44:18; Mat. 13:10-15) Shi kwaghôron u profeti u i tsenga ôron ér Mesiya una yar tom a anzaakaa ken ityesen na la kpa hungur ve kpum kpum.—Ps. 78:2.
Mbagenev yange ve venda ityesen i Yesu sha ci u kwagh na doo ve ga. Shighe u tese ior ken shinagoge hen gar na u Nasareti la, ityesen na la “kpiligh ve iyol.” Kpa er ma ve lumun Yesu ér ka Mesiya yô, ve gema ve lu pinen a pine ape a dugh yô: “Ka han je Or ne A zough a akaa ne; . . . Ngun kera ka orgbanakaa, Wan u Maria ne gaa, ka anngô u Yakobu man [Yosev] man Yuda man Shimon kpaa gaa, anngôôv Nav mba kasev kpaa mba a vese imôngo gaa?” (Mar. 6:1-3) Ior mba ken gar u Nasareti lumun ityesen i Yesu ga sha ci u i mar un hen tsombor u lun a kwagh ave ga yum.
Man gema mbahemenev mba kwaghaôndo mba sha ayange a na la di ye? Mbakpishiv ken a ve yange ve keghen ato a Yesu ga, sha ci u atôakaa shon a se vande teren sha heen ne. (Yoh. 7:47-52) Shi er ior banen hen Yesu ga yô, doo ve a na ga, nahan ve venda ityesen na. (Mar. 15:10) Heela tseegh ga, Yesu yange una zôhô a ashagbaior a sha ayange na la sha ci u atseregh ve man icugh ve la yô, ishima i vihi ve a na kpishi. (Mat. 23:13-36) Sha nahan yô, Yesu na ve ibo sha mvende u ve venda un sha apera ne, wener: “Kwagh a̱ tser ne, ne mbafanatindiakaa, gadia ne tôô ishindan i kwaghfan kera; ne ayol a en ne nyôr ga man mba ma ve nyer la kpaa ne yange ve.”—Luka 11:37-52.
Yesu yange pase loho u dedoo ken tar u Iserael anyom atar man tiôn. Shi tese ior mbagenev kpishi sha u ve kpa ve er tom ne yô. (Luka 9:1, 2; 10:1, 16, 17) Tom u Yesu man mbahenen nav lu eren la yange u za kera kpishi je yô, Mbafarishi gba ijir ér: “Nenge, tar cii ngu dondon Un ijime.” (Yoh. 12:19) Nahan kwagh ne tese ér Mbayuda kpishi yange ve lan kwagh na ga. Nahan kpa, ve lu ken ‘mlan’ kpishi sha kwagh u Yesu, u lu Mesiya la. Yange vea soo yô ma ve seer fan kwagh u Mesiya shi ma doo ve ishima kpaa, kpa ve er nahan ga. Mbagenev ken a ve lu uwegh sha ku u Yesu. Sha nahan yô, apostoli Peteru wa mbakpishiv ken a ve kwagh kaa ér: “Yô, zamber nen man gema nen ishima, sha u i̱ ese asorabo a en kera, man sha u ashighe a myôhôryol a sha ishigh ki Ter kpaa a̱ va sha a ven yô; man sha u A̱ tindi ne Kristu u lu i vande veren Un sha ci wen la, ka Yesu.” (Aer. 3:19, 20) Kwagh yange er doo yô, Mbayuda udubu udubu hii u keghen ato, kua “upristi kpishi.” Nahan ve kera lu eren kwagh sha mlan ga. Kpa ve gema ishima, tsô Yehova zungwe ve mhôônom.—Aer. 2:41; 4:4; 5:14; 6:7.