Pase Mimi u Kwagh u Yesu La
1 Mbakristu mba i shigh ve mkurem la kua iyôngo igen i í lu akar a ve la mba “eren shiada sha kwagh u Yesu.” (Mpa. 12:17) Kwagh ne ka tom u numben sha mi ga, gadia ka ken a na tseegh myom a lu ye.—Yoh. 17:3; Aer. 4:12.
2 ‘Gbenda, Mimi man Uma’: Yesu kaa ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” (Yoh. 14:6) Ka sha ikyev i Yesu tseegh, un u a lu “gbenda” la se fatyô u kporom hen Aôndo ken msen shi Una lumun se kpaa ye. (Yoh. 15:16) Yesu ka “mimi” sha ci u akaaôron a profeti man mure u akaa a i nger ken Ruamabera u ken Zwa Heberu la cii hingir kwagh jim jim ken a na. (Yoh. 1:17; Kol. 2:16, 17) Awashima u hiihii u kwaghôron u profeti u mimi yô ka u seer tan iwanger sha tom u injaa u a lu a mi u eren sha er awashima u Aôndo una kure vough yô. (Mpa. 19:10) Heela tseegh ga, Yesu ka “uma.” Saa se cii se na jighjigh a naagh ku ipaan ku a ne la keng keng a bunde ga, sha er se zua a iyua i uma u tsôron la yô.—Yoh. 3:16, 36; Heb. 2:9.
3 Ngu Ityough man Tor U a Lu Hemen Yô: Ka keng keng u ior shi vea fa ér tahav mbu hemen cii, Yehova gema wa sha ikyev i Wan na. I bum Yesu Tor u Tartor u Aôndo—“ka Un akuraior aa ungwan imo Na ye.” (Gen. 49:10) U seer yô, Yehova ver un ér a lu Ityough ki tiônnongo. (Ef. 1:22, 23) Doo u se wase mba se henen Bibilo a ve la u kaven er i lu Yesu a lu hemen tiônnongo man á gem a lu yaren tom a “wanakiriki u jighjigh man u fan kwagh” sha u nan se ‘kwaghyan u ken jijingi sha ashighe ashighe’ yô.—Mat. 24:45-47.
4 Zegepristi u Mhôôn: Yesu “fetyô u wasen mba i lu meen ve la,” sha ci u un kpa ameen kua ican yange bende a na er lu orumace la. (Heb. 2:17, 18) Nenge i lu kwagh u doon kpishi u orumace u isheer ne fan ér Yesu zungu a ve imôngo ken aseer a ve ne, nahan ngu a zamber sha mhôôn sha ci ve sha wono! (Rom. 8:34) Sha naagh ku Yesu man tom na u Zegepristi u a lu eren la yô, se fatyô u kporom hen Yehova “vangertiôr” sha er se zua a ‘iwasen sha shighe vough yô.’—Heb. 4:15, 16.
5 Iniôngon i se lu nôngon ser mbagen kpa ve fa mimi u kwagh u Yesu ne a mgbegha ve ken ishima u ungwan ikyaan na shi kohol se sha u dondon un.—Yoh. 14:15, 21.