5. Tese ikyav i mkaanem ma Yesu ma ma taver ga, kpa ma gem ma lu a inja kpishi yô.

⁵ Ashighe kpishi Yesu yange una tesen ior yô, a ôron asember a taver ga, a lun tiônôô, kua mkaanem ma lun a inja kpishi. Hen shighe u i lu a gba gberen ityakerada ga la, Yesu fatyô u ôron ior loho na sha gbenda u ua lu ve ken ishima gbem sha won yô. Nenge ase akav agen kpuaa: “De gbe nan nen or ibo gagh ga, er ne kpaa á na ne ibo gagh ga yô.” “Ka mbadedoo kwagh a gbe ve a ortwer ga, saa mba angev mbu ker ve la tseegh.” “Jijingi yô, lumun, kpa iyol yô, ngi a agee ga.” “Na nen Shisar akaa a a lu a Shisar yô, Aôndo di kpaa na nen Un akaa a a lu a Aôndo yô.” “U nan a na kwagh hembe saan iyol a u ngohol a ngohol kwagh.”b (Mateu 7:1; 9:12; 26:41; Marku 12:17; Aerenakaa 20:35) Yesu yange ôr akaa ne zulum anyom 2,000 hegen, kpa mba umbur a her zan zan nyian.