“Uzegembaakaav Mba Aôndo” Na Ishima Mgbegha Se

“Se ungwa ve ôron uzegembaakaav mba Aôndo ken ijô yase je.”—AERENAKAA 2:11.

 1, 2. Ka kwagh u kpilighyol u nyi yange er ken Yerusalem sha Pentekosti u 33 S.W. la?

SHA iyange igen pepe shighe u fam u inyom i 33 S.W. la, kwagh u kpilighyol er nongo u mbadondon mba Yesu Kristu mba nomso man kasev, mba yange ve kohol ken ya ugen ken Yerusalem yô. “Fese nahan ihuran due sha, lu er ijeverahumbe nahan, iv ken iyou i ve tema ker la cii. Tsô ve nenge iniombor er ka i usu nahan, . . . Ve cii i iv ve a Icighan Jijingi, ve gba ôron kwagh ken ijô igen.”—Aerenakaa 2:2-4, 15.

² Zegeikpelaior kohol sha ishigh ki iyou shon. Ken atô ve yô, lu Mbayuda mba i mar ve ken akuraior agen, “ve lu mbacian Aôndo” mba yange ve va sha u va eren iniongo i Pentekosti yô. Yange kondo ve iyol sha ci u ve ungwa mbahenen mba Yesu lu ôron “uzegembaakaav mba Aôndo” ken zwa ve. A er nan man kwagh a lu nahana gadia mba ve lu ôron kwagh ne cii ka Mbagalilia gaa?—Aerenakaa 2:5-8, 11.

 3. Ka loho u nyi apostoli Peteru yange ôr ikpelaior sha iyange i Pentekosti la?

³ Apostoli Peteru lu môm ken Mbagalilia mbara. A pase wener usati mba ve kar kpuaa mbara, ior mbaaferev wua Yesu Kristu. Nahan kpa, Aôndo nder Wan na shin ku. Ka been yô, Yesu ande hen mbahenen nav kpishi, kua Peteru man mbagenev mba ve lu her hegen ne. Lu ayange pue tseegh ken jime Yesu kôndo yem sha ye. Ka un á haa icighan jijingi sha mbahenen nav ye. Kwagh ne lu ior mba ve lu eren iniongo i Pentekosti la a inja je kpa? Een, lu ve a inja. Ku u Yesu la bugh ve gbenda u a de ve a asorabo a ve shi aluer ve na un jighjigh yô, vea ngohol ‘iyua i icighan jijingi’. (Aerenakaa 2:22-24, 32, 33, 38) Nahan mba ve nenge “uzegembaakaav mba Aôndo” la er nena sha kwagh u yange ve ungwa laa? Man kwagh u yange er ne una fatyô u wasen se u gbidyen kwar nengen tom u se lu eren hen Yehova la nena?

Ve Kera Tema a Tema Ga!

 4. Ka kwaghôron u profeti u Yoel u nyi yange kure sha iyange i Pentekosti 33 S.W. laa?

⁴ Er mbahenen mba ken Yerusalem mbara ngohol icighan jijingi yô, ve kera vihi shighe sha u samber a loho u myom hen mbagenev ga, hii sha ikpelaior i í kohol pepe sha iyange i Pentekosti la je. Kwaghpasen ve la iv kwaghôron u profeti u vesen u Yoel, wan u Petuel u lu nger uderimbaanyomov anigheni mba karen la, ér: “Me haa Jijingi Wam sha uumace cii; ônov enev mba nomso man mba kasev vea ôron kwaghôron u profeti, mnyam maa cie mbatamen enev, ikaior yen ia nenge mbampase mba sha mnenge; mbatomov mba nomso man mba kasev kpaa Me haa Jijingi Wam sha a ve sha ayange la . . . man iyange i TER i vesen i cieryol ia va ye.”—Yoel 1:1; 2:28, 29, 31; Aerenakaa. 2:17, 18, 20.

 5. Ka sha nyi gbenda nahan Mbakristu mba sha derianyom u hiihii la yange ve ôr kwaghôron u profeti? (Nenge ngeren u shin kpe la.)

⁵ Kwagh ne tese ér lu u Aôndo una ver kov u uprofeti, nomso man kasev, di er yange ver Davidi man Yoel kua Debora nahan shi lu u una yar tom a ve u tsenganôron akaa ken hemen shinii? Ei. Kwaghôron u profeti u ônov mba nomso man mba kasev man mbatomov mba nomso man mba kasev mba ken Kristu vea ôr la tese ér, jijingi u Yehova una na ve vea yôô “uzegembaakaav” mba Yehova a er shi una va er la kpaa. Nahan vea lu mbaôron kwagh sha ci u Uhembansha.a Nahan kpa ikpelaior la yange i gema i er nena sha kwagh nee?—Mbaheberu 1:1, 2.

 6. Ishima yange i mgbegha ior kpishi ken ikpelaior la u eren nyi, zum u ve ungwa kwaghôron u Peteru la yôô?

⁶ Zum u ior kpishi ken ikpelaior la mba ongo mpase u Peteru na la kera yô, ve kera tema a tema ga. Ve “rumun kwaghôron na la” nahan “i er ve batisema; sha iyange la i seer ior er dubu utar nahan.” (Aerenakaa 2:41) Er ve lu Mbayuda mba sha marami man mba nyôron a nyôr Mbayuda yô, ve vande fan akaa a a lu hange hange a ken Ruamabera la. Mfe ve ne man jighjigh u nan sha kwagh u ve hen sha ikyev i Peteru la lu imaagh ki a er ve batisema “ken iti i Ter man Wan man Icighan Jijingi” yô. (Mateu 28:19) Yange mba eren ve batisema kera yô, “ve kange asema sha ityesen i mbaapostoli.” Sha shighe shon la je, shi ve hii u ôron mbagenev kwagh u jighjigh ve u nan u he ne. Sha kpôô yô, “ve zer kohol ken tempel ayange ayange, . . . ve lu wuese Aôndo, ior cii kpaa lu rumun ve.” Sha ci u tom u shiada u ve lu eren ne yô, “Ter lu seer mba i lu yiman ve la sha iyenge ve ayange ayange.” (Aerenakaa 2:42, 46, 47) I lu veren atôônanongo a Mbakristu fele fele je ken ityar kpishi i mbananjighjigh mbahev mban lu her la. Ka u henen a hen ga, abunde kera kera kpa mseer ne yange lu sha ci u iniôngon ve i sha gbashima i pasen “Loho u Dedoo” zum u ve hide ve yem sha u yaav vev la.—Mbakolose 1:23.

Mkaanem ma Aôndo Ma Tem Gbilin Ga

 7. (a) Kanyi i lu urugh ior mba ken akuraior cii van a ve ken nongo u Yehova nyiana? (b) Ka mseer u nyi nahan u hen wer una lu tar sha won cii man hen ningir wouwee? (Nenge ngeren u shin kpe la.)

⁷ Mba i sar ve u hingir mbashiren Aôndo tom nyian ne di ye? Gba u ve kpaa vea hen Mkaanem ma Aôndo vighe vighe je. Zum u ve er nahan yô, vea hingir u fan Yehova ér ka Aôndo u “mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je.” (Ekesodu 34:6; Aerenakaa 13:48) Ve hen kwagh u mne u sha mhôôn u Yehova a ne ipaa sha ikyev i Yesu Kristu la, un shon u awambe a na aa fatyô u wanger ve sha asorabo a ve cii la. (1 Yohane 1:7) Shi mba a iwuese sha er ve fe awashima u Aôndo u “mnder u mbaperapera kua mba ve lu perapera ga vea nder shin ku la.” (Aerenakaa 24:15) Dooshima u ve lu a mi hen Imbor i “uzegembaakaav” ne iv asema a ve, shi ishima mgbegha ve u pasen mimi mba injaa mban ne. Ka ve hingir mbatomov mba Aôndo mba ve tsegh ayol a ve shi ve er batisema yô, shi ve za hemen u “vesen ken kwaghfan u Aôndo.”b—Mbakolose 1:10b; 2 Mbakorinte 5:14.

8-10. (a) Vande-eren u kwase Kristu ugen tese ér Mkaanem ma Aôndo ma “tem gbilin ga” nena? (b) Vande-eren ne tese ú nyi sha kwagh u Yehova man gbenda u a eren kwagh a mbatomov nav laa? (Ekesodu 4:12)

⁸ Mfe u mbatomov mba Aôndo ka ve zua a mi ken Bibilo ve i henen la ka u a ze shimi yô. Imba mfe ne ngu a mgbegha asema a ve shi a gema gbenda u ve henen kwagh la, shi a hingir u lun ken ve kpaa. (Mbaheberu 4:12) U tesen ikyav yô, yange i tôô kwase ugen u i yer un ér Camille la tom u nengen sha mbabeenyol. Môm ken mba yange nengen sha a ve yô lu Martha u a lu môm ken Mbashiada mba Yehova yô. Er Martha lu a angev mbu ken ityou yô, gba u á nengen sha a na sha hanma shighe cii. Yange i gba u a umbur un a umbur ér a ya kwagh—shin a mena kwaghyan je kpaa. Nahan kpa, kwagh ugen gema lu Martha ken ishima her u yange hungur un ga yô, se nenge nen kwagh shon.

⁹ Iyange igen yô, Martha nenge Camille lu vaan sha ci u ican i lu yan sha mbamzeyol nav mbagenev la. Martha kuve Camille, maa kaa a na ér á va vea hen Bibilo. Kpa or er Martha nahan nana fatyô u henen Bibilo a orgen je kpa? Een, yange fatyô u eren nahan! Shin er yange kera faantyô u umbur kwagh ga kuaa je nahan kpa, Martha hungur Aôndo na u kpilighyol la ga; shin hungur mimi u doon kpishi u yange hen ken Bibilo la ga. Zum u ve lu henen kwagh yô, Martha kaa a Camille ér a ôr hanma ikyumhiange shi a nenge avur a Ruamabera kpaa, shi a ôr mbampin mba ve lu shin kpe u peeji la nahan a na mbamlumun sha mi. Ve er kwagh ne shighe kar naleghaa je, man e̱r Martha fatyô u eren kwagh ne tsembelee ga nahan kpa, Camille za hemen u zuan a mfe u Bibilo. Martha kav er i gbe u Camille una kohol imôngo a mbagenev mba ve lu a isharen i civir Aôndo yô. Sha nahan yô, á na Camille ikyondo man akôv sha er una lu a kwagh u wuhan iyol tsembelee zum u una hii zan mkombo ken Iyou i Tartor yô.

¹⁰ Ishima mgbegha Camille sha ikyo i wan i Martha i sha dooshima man ikyav na kua jighjigh na la. Nahan a mase kaven wener kwagh u Martha a lu nôngon u tesen un ken Bibilo ne ka kwagh u injaa je, gadia Martha hungur akaa cii sar di kwagh u yange hen ken Ruamabera la tseegh. Zum u i va musan Camille i yem a na ken iyaagh ki gen yô, nenge wener shighe kuma u una kera tema a tema ga. Zuan a zua a ian nahan maa zer ikyondo shi wa akôv a Martha na un la za ken Iyou i Tartor, shi kaa ér i va hen Bibilo a na. Camille za hemen doo doo je, shi i er un batisema kpaa.

Ishima Mgbegha Se u Eren Atindiakaa a Yehova

11. U seer sha gbashima u se lu a mi sha tom u kwaghpasen la yô, se fatyô u tesen ser loho u Tartor mgbegha asema ase nena?

¹¹ Nyian ne, Mbashiada mba Yehova hemba miliôn ataratar nahan mba pasen “Loho u Dedoo u tartor” sha tar cii, er Martha man er Camille kpa a lu eren hegen nahan. (Mateu 24:14; 28:19, 20) “Uzegembaakaav mba Aôndo” la mgbegha ve dedoo, vough er Mbakristu mba sha derianyom u hiihii la kpa yange lu nahan. Mba a iwuese kpishi sha ian i civirigh i í yer ve sha iti i Yehova la man sha er a ne ve jijingi na yô. Sha nahan yô, ka ve nôngo kpoghuloo sha er vea ‘zende zende u u kom Ter, vea doo un ken akaa cii,’ sha u yaren tom sha atindiakaa a na sha avegher a uma ve cii. Hwe man iyolwuhan ka môm ken akaa a a lu sha u yaren tom sha atindiakaa a Aôndo yô.—Mbakolose 1:10; Titu 2:10.

12. Ka nyi kwaghwan jighilii sha kwagh u hwe man iyolwuhan se nenge a mi ken 1 Timoteu 2:9, 10?

¹² Een, Yehova ver atindiakaa sha kwagh u iyol wuhan yase kpaa. Apostoli Paulu tese atindiakaa a Aôndo agen sha gbar ne. “Sarem pe kasev di kpaa ve̱ wuhan ayol a ve daalaa, i̱ lu sha kwaghfan man akuma akuma kpaa, i̱ de lu sha gbatyo u gban, shin sha zenaria shin sha utagbede shin sha akondo a taver ishe kpaa ga, kpa i̱ lu sha aeren a dedoo er i kom u kasev mba ve kaa er ve mba cian Aôndo mimi vea er yô.”c Mkaanem man tese se nyi kwagha?—1 Timoteu 2:9, 10.

13. (a) Inja i u ‘wuhan iyol daalaa’ la er nyi? (b) Er nan ve se fatyô u kaan ser atindiakaa a Yehova nga sha inja?

¹³ Mkaanem ma Paulu man tese ér Mbakristu “ve̱ wuhan ayol a ve daalaa.” Ka u vea wuhan iyol caveraa shin dang ga. Ior cii, kua atsanaior je kpaa, vea fatyô u yaren tom sha atindiakaa a sha inja ne sha u veren ishima ér akondo a ve nga tsembelee shi nga wang man a doo kenger kpaa. Ikyav i tesen yô, hanma inyom Mbashiada ken tar ugen shin South America ka ve zende ukilomita kpishi ken ikyô shi ve naha tsô ahwa kpishi sha er vea za mkohol u vesen yô. Ka kwagh u ican ga u or gban shin ifi shin ikyondo i nan wever sha toho shighe u ve lu zan zende la. Nahan akondo a mba zan mkohol mban ka a vihi kenger kpen kpen sha shighe u ka vea za nyôr hen ijiir i mkohol la yô. Sha nahan yô, ka ve tôô shighe ve hide ve kor akeva shi ve sôr uziipi, shi ve ôô akondo a vea hua sha mkohol shi ve kôô á kpaa. Ka i doo ve kpishi sha er i lôhô ve ér ve va ya kwaghyan sha tebul u Yehova yô, shi vé soo ér vea wuha iyol tsembelee kpaa.

14. (a) Inja i u wuhan iyol sha “kwaghfan man akuma akuma” la er nyi? (b) U se wuhan iyol sha inja i ‘ior mba ve kaa er ve mba cian Aôndo’ la wa nyi akaa kere?

¹⁴ Paulu shi tese e̱r se wuha iyol “sha kwaghfan man akuma akuma kpaa.” Kwagh ne inja na yô, iyolwuhan yase i de lun sha ihyagh man sha gbenda u ú due kposo ga, shi i de lu sha u kenden isharen i jimbagh man sha u tesen alegh a yolough a ase ga shin sha u eren hwe za karen ikyaa inya ga. U seer yô, doo u se wuha iyol sha gbenda u ú tese ‘mcie u cian Aôndo’ yô. Kwagh ne ka kwagh u a lu u se gbidye kwar sha mi yô, shin ka nahan ga? Sar sha shighe u se lu zan mbamkombo mba tiônnongo la tseegh se wuha iyol tsembelee kpa sha ashighe agenegh yô se gema kwaghwan ne se ta kera ga. Hanma shighe yô iyol wuhan yase i tese ieren i civirigh man i vough, gadia se mba Mbakristu man mbatyomov sha ahwa 24 sha hanma iyange. Se lan a lan ga, ka u akondo ase a tom man akondo a makeranta kpaa á zua vough sha ma tom u se lu eren cii. Nahan kpa, doo u se wuhan iyol akuma akuma man sha icivir kpaa. Aluer iyol wuhan yase tese jighjigh wase u nan hen Aôndo sha hanma shighe yô, mayange je uwegh ua gba se u eren shiada u ian a due sha ci u mlu u iyol wuhan yase la doo ga yum ga.—1 Peteru 3:15.

‘Tar U̱ De Doon Ne Ishima Ga’

15, 16. (a) Er nan i lu hange hange u se palegh u dondon tar ne sha kwagh u hwe u eren man iyolwuhana? (1 Yohane 5:19) (b) Ka ityôkyaa i nyi i ne ve i doo u se palegh gbenda u ior ve eren hwe shi ve wuhan iyol laa?

¹⁵ Kwaghwan u i nger ken 1 Yohane 2:15, 16 la kpaa wa se kwagh sha kwagh u hwe man iyolwuhan yase. I ôr her ér: “Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga. Gadia akaa a a lu shin tar cii, isharen i iyolough, man isharen i ashee man ihagh i uma ne, ka a Ter ga, ka a taregh tsô.”

¹⁶ Nenge er kwaghwan ne a lu sha shighe vough sha wono! Mayange se de nen ser tar ne u tese se hwe u se er sha shighe u mkighir u mbakov a hembe ngeen yum ne ga. Gbenda u ior ve lu eren hwe shi wuhan iyol ken anyom a a sember karen ne kera doo ga kpishi je. Gbenda u sha tindi u mbakpengav man ior mba eren ityom ve wuhan iyol la je kpa ka hanma shighe u tesen mlu u vough u a doo u Mbakristu vea dondo ga. Kwagh ne kpaa ka ityôkyaa igen i í ne ve i doo u se fa e̱r i gbe u se ‘hingir inja i môm a tar ne ga’ aluer se soo u eren sha atindiakaa a Aôndo, man sha er se “hingir kwagh u hweegh sha ityesen i Aôndo Oryiman wase sha akaa cii” yô.—Mbaromanu 12:2; Titu 2:10.

17. (a) Ka mbampin mba nyi i doo u se pine zum u se lu yamen ikyondo shin se lu tsuan ma ikyondo i í er i hwe yôô? (b) Er nan ve i gbe u kwagh una gba mbayaav sha kwagh u hwe u mba hen tsombor ve ve eren laa?

¹⁷ Cii man u tsua ma ikyondo i ú soo u yamen yô, doo u ú pine iyol you wer: ‘Er nan ve mlu u ikyondo ne a doom yumu? I fa ma or u eren anumbe u nan due iti—u kwagh u nan a doom yô—a imba ikyondo nee? Ka ikyondo i ma nongo u ú zenden sha godobi shin ma kwe u ú lu keren ú lun sha tseeneke u ú shin u lu a jijingi u ihyembeato yôô?’ Shi doo u se kenger ikyondo la tsembelee kpaa. Aluer ka ikyondo i huan a hua shin siketi yô, iniembe na ngi nena? I tôndo ikyondo shon nena? Ikyondo la ngi akuma akuma shi i doo man ngi sha civir je kpa, shin i tsule ken iyol man ia fatyô u kenden isharen i jimbagh ken oro, shin ngi caveraa? Pine iyol you wer, ‘Aluer m zer ikyondo ne nahan ia na or ityôkyaa i nôngon gbev shinii?’ (2 Mbakorinte 6:3, 4) Er nan ve kwagh a gbe se sha kwagh ne? Sha ci u Bibilo i kaa ér: “Kristu kpaa ker kwagh u doon sha ci Na ga.” (Mbaromanu 15:3) Ka u kwagh una gba mbayaav mba ve lu Mbakristu sha hwe u mba hen tsombor ve ve eren la keng je. Sha ci u ikyo i wan i ve lu a mi hen Aôndo u iengem u ve civir la yô, mbayaav ve de timbir u nan kwaghwan var var man sha dooshima sha shighe u i gbe u kwagh a lu nahan la ga.—Yakobu 3:13.

18. Kanyi i mgbegha ú u veren ishima tsung sha kwagh u hwe man iyolwuhan youwe?

¹⁸ Loho u se lu pasen ne due hen Yehova u a lu ikyav i vesen i civir man mlu u icighanegh la. (Yesaia 6:3) Bibilo wa se kwagh ér se kav un “er ônov mba doon ishima nahan.” (Mbaefese 5:1) Hwe u se eren man iyolwuhan yase la una fatyô u benden a Ter wase u sha la sha gbenda u dedoo shin u bo je kpaa. Sha mimi je, se soo u nan ser i saan ishima na iyol! —Anzaakaa 27:11.

19. Ka mbamtsera mba nyi ve lu sha u ôron mbagenev “uzegembaakaav mba Aôndo” laa?

¹⁹ Ka ú ken ishima nena sha kwagh u “uzegembaakaav mba Aôndo” mba ú hen kwagh sha mi nee? Sha kpôô yô, nenge imba er se lu a iveren sha mhen u se hen mimi ne sha wono! I de se asorabo ase sha ci u se mba a jighjigh u nan sha awambe a Yesu Kristu a her inya la. (Aerenakaa 2:38) Sha nahan yô, se mba a vangertiôr sha ishigh ki Aôndo. Se mba cie ku e̱r mba ve lu a ishimaverenkeghen ga la ga. U ma i lu nahan yô, se mba a ishimataver i Yesu a ne la ser, iyange igen yô “mba ve lu shin iwar cii vea ungwa imo Na, vea due.” (Yohane 5:28, 29) Yehova er kwagh doo kpishi sha u pasen se akaa ne jimin cii. U seer yô, a haa jijingi na sha a vese. Nahan yô, ishughun i se lu a mi sha uiyua mba dedoo mban ne cii i̱ mgbegha se u wan atindiakaa a na a tseng la ikyo, shi se wuese un sha gbashima, sha u yôôn “uzegembaakaav” mban hen mbagenev.

[Footnotes]

Ú Na Mlumun Wer Nyi?

• Ka “uzegembaakaav” mba nyi yange ior ungwa sha Pentekosti u 33 S.W. la, man yange ve er nena?

• Or nana hingir orhenen u Yesu Kristu nena, man u lun orhenen la kua nyi kere?

• Er nan ve i lu hange hange u se ver ishima sha hwe man iyolwuhan yase laa?

• Ka akaa a nyi nahan i doo u se nenge sha mi zum u se soo u fan aluer ma ikyondo shin mlu u i er ikyondo shon una doo yôô?

[Picture on page 27]

Peteru yôô wener i nder Yesu shin ku

[Pictures on page 29]

Mlu u iyol wuhan you la bende a Aôndo u ú civir la sha gbenda u dedoo kpa?

[Pictures on page 30]

Ka tom u mbamaren mba ve lu Mbakristu la u nengen sha iyolwuhan i ior mba hen tsombor ve la keng je