“Ka u A Va Nder Mbakpenev Nena?”

1-2. Er nan i gbe u Mbakristu cii vea hen kwagh u mnder u shin ku u mba i lu nderen ve, ve lu yemen sha la?

IOR kpishi mba ve lu civir Yehova nyian mba a ishimaverenkeghen i va lun uma gbem shin tar. Nahan kpa, Mbakristu mba i tsegh ve sha jijingi mba ve shi her shin tar la, mba a ishimaverenkeghen ér a va nder ve, vea za lu uma sha. Ka i sar mba i shigh ve mkurem mban tsung u fan er uma ve u sha la una za lu yô. Kpa er nan mba ve lu a ishimaverenkeghen i va lun uma shin tar la kpa i doo u vea hen kwagh nee? Er se va nenge nahan, mba i lu nderen ve vea yem sha la, vea na mbara mba ve lu a ishimaverenkeghen i va lun uma gbem sha won shin tar la vea zua a averen kpishi. Sha nahan yô, sea lu a ishimaverenkeghen i yemen sha shin va lun uma shin tar kpa, a gba u se hen kwagh u mnder u shin ku u mba i lu nderen ve vea za lu uma sha la.

² Aôndo yange mgbegha mbahenen mba Yesu mbagen mba sha ayange a mbaapostoli la ve nger kwagh u mnder u shin ku u mba ve lu yemen sha la. Apostoli Yohane nger ér: “Hegen se mba ônov mba Aôndo, kpa mba a̱ pase kwagh u se va lu la ve ga. Kpa se fa ser shighe u una va tese iyol na ken igbar la, se lu er un nahan.” (1 Yoh. 3:2) Nahan yô, Mbakristu mba i shigh ve mkurem mbara fa er a nder ve a iyol i ken jijingi vea yem sha ve, vea za lu la ga. Nahan kpa, vea nenge a Yehova sha ase a ve shighe u vea ngohol iyua ve la. Bibilo kera ôr se hanma kwagh sha kwagh u mnder u shin ku u mba ve lu yemen sha la ga, nahan kpa, apostoli Paulu yange pande ôr se akaa agen sha kwagh la. Mba i shigh ve mkurem mbara vea lu vea Kristu shighe u “una tim hanma gomoti man hanma hemen kua tahav cii kera la.” Man kwagh la kua “orhyom u a va mase timin kera yô, ka ku” je la. U masen yô, Yesu kua mba vea lu hemen vea na la vea gema ayol a ve kua akaa cii vea wa sha ikyev i Yehova. (1 Kor. 15:24-28) Sha mimi yô, a lu shighe u saan iyol kpen kpen!b

 3. Er i tese ken 1 Mbakorinte 15:30-32 nahan, jighjigh u Paulu na ér mba nderen ior shin ku la wase un u eren nyi?

³ Er Paulu na jighjigh a mnder u shin ku yô, kwagh la wase un u wan ishima a mbamtaver kpishi. (Ôr 1 Mbakorinte 15:30-32.) Yange kaa a ior mba ken Korinte mbara ér: “Ka m tagher ishigh a ku hanma iyange.” Paulu shi nger wener: “M nôngo num a inyamikyume ken Efese.” Kwagh u ôr ne tese ér alaghga nôngo num a inyamikyume kpôô kpôô ken agirigi ken Efese. (2 Kor. 1:8; 4:10; 11:23) Gayô lu ôron lu kwagh u Mbayuda kua ior mbagen mba ve lu hendan a na kpoghuloo, mba ve lu er ka inyamikyume la. (Aer. 19:26-34; 1 Kor. 16:9) A lu nyi je Paulu lu ôron kpa, yange tagher ishigh a akaabo a vesen. Nahan kpa za hemen u lun a vangertiôr ér a va saan un iyol ken hemen.—2 Kor. 4:16-18.

 4. Ishimaverenkeghen i mnder u shin ku la wase Mbakristu nyian nena? (Nenge foto u sha igbende la.)

⁴ Se mba ken ashighe a bo. Anmgbianev asev mbagenev, mbaaferev bende a ve, mbagen je yô, aferakaa ne hungwa a ve. Mbagen mba sha ajiir a i lu nôngon ityav yô, nahan ve tema kpe ve iyol ga. Mbagen di mba civir Yehova ken ityar i i pande i yange tom wase u pasen kwagh shin i cir u gbindigh gbindigh yô, shin er ve fe ér a fatyô u kôron ve za wuhen shin wuan ve nahan kpaa. Er anmgbianev asev mba nomso man mba kasev mban ve ze hemen u civir Yehova her yô, ve ver se ikyav i dedoo. Mba ken mcie ga, kpa ve fa ér aluer vea kpe a kpe hegen je kpa, Yehova tôndo zwa u va nan ve kwagh u hemban doon cii ken hemen.

 5. Ka mnenge u bo u nyi una fatyô u vihin jighjigh u se ne ser mba va nderen ior shin ku la?

⁵ Paulu yange ta anmgbianev nav cin sha mnenge u bo u mbagenev lu a mi ér: “Aluer mba va nderen mbakpenev shin ku ga yô, ‘se gbaa yan kwagh shi man kwagh, gadia se mba va kpen’ la. Yange ior vande lun a mnenge ne cii ve sha ayange a Paulu la ye. Alaghga lu ôron mkaanem ma ken Yesaia 22:13, ma ma ôr kwagh u ieren i Mbaiserael la. Yange ve hemba soon taryan a u nôngon ér vea seer lun kôôsôô a Aôndo la. Jighilii yô, Mbaiserael mban shi sha u “se ya tar nyian, kper se kera lu ga,” man ka ieren i ior kpishi ve lu a mi nyian je la. Nahan kpa, i nger kwagh u vihin u va tser ikyurior i Iserael sha ci u ieren ve ne la ken Bibilo.—2 Kron. 36:15-20.

 6. Doo u jighjigh u se ne ser mba va nderen ior shin ku la una mgbegha se u tsuan azende a ase nena?

⁶ Se fa wang ser, Yehova ngu va nderen ior shin ku, nahan doo u kwagh la una mgbegha se u tsuan azende ase sha kwaghfan. Yange gba u anmgbianev mba ken Korinte mbara vea palegh u lun azende vea mba ve venda ér mnder u shin ku ngu ga la. Kwagh ngu u se fatyô u henen ken kwagh la nyian kpaa yô: Aluer se mba banen vea ior mba kwagh a gbe ve a mlu u ken hemen ga, kpa ve shi sha taryan tseegh yô, ijende la ia fatyô u vihin se. Aluer Orkristu nan ngu lun vea ambaaior la yô, aa fatyô u saan nan ishe, nana kera lu a inja i dedoo shin aeren a injaa ga. Jighilii yô, aa na nan nana hingir u eren akaa a Aôndo a ker a ihyom yô. Sha nahan yô, Paulu wa kwagh taveraa ér: “Nder lu nen tsevaa sha kwagh u perapera, de eren nen isholibo ga.”—1 Kor. 15:33, 34.

 7. Ka mpin u nyi nahan alaghga mbagenev pine sha kwagh u mbakpenev er i tese ken 1 Mbakorinte 15:35-38 la?

⁷ Ôr 1 Mbakorinte 15:35-38. Alaghga or u yange nan soo ér ior ve lu a akperan sha kwagh u mnder u shin ku yô, nana pine ér: “Ka u a va nder mbakpenev nena?” Sha nahan yô, doo u se hen sha mlumun u Paulu la sha ci u ior mba a mbamnenge kposo kposo sha kwagh u or ka nana kpe ve a er nan yô. Kpa ka nyi Bibilo i tese?

 8. Ka ikyav i nyi ia wase se u fan er i lu nderen ior shin ku ve lu yemen sha la?

⁸ Or ka nana kpe yô, iyol i nan i hôô. Kpa un u a gbe sha man tar cii la una fatyô u nderen nan a iyol i i gbe u una na nan la vough. (Gen. 1:1; 2:7) Paulu yange ôr kwagh u a tese ér Aôndo una nder nan a iyol i tse la ga yô. Hen ase sha kwagh u “ishange kwagh.” Ka a lôô ishange kwagh yô, i mende i hingir itine i kwagh. Itine i kwagh la di ka i lu kposo a an-ishange kwagh u kpuaa u yange i lôô la. Paulu yange er tom a ikyav la u tesen er Orgban se una fatyô u nan se “iyol er a nenge i doo un la” yô.

 9. Takeda u 1 Mbakorinte 15:39-41 tese ér iyol ngi atô kposo kposo nena?

⁹ Ôr 1 Mbakorinte 15:39-41. Paulu yange kaa ér Aôndo gba akaauma nga a iyol kposo kposo. U tesen ikyav yô, iyol i bua man i annyonov man anishuuv ngi kwagh môm ga. A kaa ér, ka sea kende ashe sha kwavaôndo yô, se nenge a mkposo u iyange a uwer. Shi a kaa ér, “hanma ishan ngi a iengem i i kposo.” Mbasainsi kaa a vese ér asan nga atô kposo kposo, agen ka a zegenan agen ka a kiriki, agen nga nyian agen nga pupuu, agen di nga agbedang er iyange nahan. Aluer se nenge a mi sha ashe a marami ne ga je kpa, kape i lu je la. Paulu shi yange kaa ér “akaa a sha nga a iyol i a, shi akaa a shin tar kpa nga a iyol i a.” Yange ôr nahan ver ishigh ér nyi? Shin tar yô, se mba a iyol i inyam man awambe, kpa mba ve lu sha yô mba a iyol i ken jijingi er i mbatyomov ve lu a mi la nahan.

10. Ka iyol i nyi a nder mba ve lu yemen sha la a mi?

¹⁰ Nenge ase kwagh u Paulu shi ôr ne, a kaa ér: “Kape kwagh u mnder u shin ku kpa a lu je la. Ka i ii iyol i i hôôn ne, kpa i gema i nder iyol i i hôôn ga la.” Ka nahan sha ci u, or ka nana kpe yô, nan hôô nan hide nan hingir vuulevu. (Gen. 3:19) Aluer ka nahan yô, er nan i kaa ér “i nder iyol i i hôôn ga la”? Paulu yange lu ôron kwagh u orumace u a nder nan nana lu uma shin tar, er ior mba Eliya man Elisha man Yesu nder ve la nahan ga. Kpa lu ôron kwagh u or u a nder nan nana lu a iyol i yemen sha la; inja na yô, ka “iyol i jijingi” je la.—1 Kor. 15:42-44.

11-12. Ka nyi yange i gema ken Yesu shighe u i nder un shin ku laa, man mba i shigh ve mkurem la kpa imbakwagh la ngi i er ve nena?

¹¹ Shighe u Yesu lu shin tar la, yange lu a iyol i inyam man awambe. Kpa mba va nderen un shin ku yô, a “hingir jijingi u nan or uma” maa kôndo yem sha. Nahan, kape Mbakristu mba i shigh ve mkurem mbara kpa a nder ve a iyol i vea fatyô u za lun sha je la. Paulu pase ér: “Er se lu ibyeen i un u yange i er un sha inya la yô, kape se va lu ibyeen i un u a dugh sha la kpaa je la.”—1 Kor. 15:45-49.

¹² Doo u se fa ser yange i nder Yesu a iyol i inyam man awambe ga. Nahan Paulu va ngur kuren kwaghôron na u sha kwagh u mnder u shin ku la yô, a pase er hii ve kaa ér: “Iyol i inyam man awambe ia fatyô u yan dyako u Tartor u Aôndo” sha ga yô. (1 Kor. 15:50) Nahan lu u a nder mbaapostoli man mbagenev mba i shigh ve mkurem la vea yem sha a iyol i inyam man awambe i hôôn ne ga. Lu u a nder ve hanma shighe? Paulu yange kaa ér a lu kwagh u ken hemen, sha ci u a nder ve ave ave shighe u vea kpe la ga. Shighe u Paulu nger takeda u 1 Mbakorinte la, mbahenen mbagenev ‘kera lu uma ga.’ U tesen ikyav yô, apostoli Yakobu kpa lu uma hen shighe ne ga. (Aer. 12:1, 2) Lu u shighe a karen yô, mbaapostoli kua mbagen mba yange i shighe ve mkurem la kpa vea ‘kera lu uma ga.’—1 Kor. 15:6.

13. Ka akaa a nyi aa lu eren shighe u Yesu a “lu vea vese imôngo” ne?

¹³ Yesu man Paulu yange ve tsengaôron kwagh u shighe u injaa u lu van ken hemen yô. Lu shighe u Ter una lu vea vese imôngo la. Shighe la a lu nôngon ityav sha ajiir kposo kposo shi ityartenger ia lu kua ubombauangev shi akaabo aa lu eren kposo kposo sha tar. Se nenge er kwaghôron u profeti ne yange hii u kuren sha mi ken inyom i 1914 yô. Shi a lu eren kwagh u injaa ugen kpaa, u a lu môm ken akaa a aa lu ikyav shon yô. Yesu kaa ér a pase loho u dedoo u sha kwagh u Tartor u Aôndo u u lu hemen la “a tser tar sha u u lu shiada hen akuraior cii, ka zum la mkur una va ye.” (Mat. 24:3, 7-14) Paulu yange kaa ér, ka “shighe u Ter una lu vea vese imôngo la” a nder Mbakristu mba i shigh ve mkurem mba ve “kpe la” vea yem sha ye.—1 Tes. 4:14-16; 1 Kor. 15:23.

14. Ka nyi ka i er mba i shigh ve mkurem mba ve kpe hen shighe u Kristu a lu vea vese imôngo ne?

¹⁴ Nyian ne, mba i shigh ve mkurem mbara ka vea kpeen a kpe nahan, i nder ve ve yem sha. Mkaanem ma Paulu ôr ken 1 Mbakorinte 15:51, 52 la tese kwagh ne wang. A kaa ér: “A lu se cii se kpe ga, kpa se cii a va gema se fele, er or ka nan pelegh ishe nahan, sha shighe u a mase tôngon busa la.” Mkaanem ma Paulu man ma kuren sha mi hegen! Ka a nderen anmgbianev mba Kristu mban yô, i saan ve iyol kpishi sha ci u i lu u vea “za hemen u lun vea Ter gbem.”—1 Tes. 4:17.

15. Ka nyi tom i lu u mba a gema ve “fele, er or ka nan pelegh ishe nahan” la vea za ere?

¹⁵ Bibilo pase se tom u mba ka i gema ve “fele, er or ka nan pelegh ishe nahan” la vea za er sha yô. Yesu kaa a ve ér: “Or u nana hemba shi nana ver ishima sha aeren a am zan zan mkur yô, me na nan tahav sha akuraior, shi nana hemen ior sha gbough ku iyôgh, sha er a hembe ve avur avur er ka ikyav mbi inyaav yô, vough er Terem a nem tahav nahan.” (Mpa. 2:26, 27) Vea er tom vea Yesu imôngo u hemen ior sha gbough ku iyôgh.—Mpa. 19:11-15.

16. Uumace kpishi vea va hemba ku nena?

¹⁶ Ikyav tese ér, mba i shigh ve mkurem la vea hemba ku. (1 Kor. 15:54-57) A nderen ve yô, vea lu sha ian i vea wase u been a iferkwagh sha tar cii shighe u ityav mbi Armagedon la. Mbakristu mbagen umiliôn imôngo, nomso man kasev vea “due ken zegecan kera” vea nyôr ken tar u he. (Mpa. 7:14) Mba vea war sha tar la vea nenge sha ashe a ve er a hemba ku sha gbenda ugen kpaa yô. Vea nenge er a nder ior ubiliôn imôngo mba yange ve kpe la yô. Nenge imba er a saan se iyol tsung shighe u kwagh ne una er la sha wono! (Aer. 24:15) Shi mba vea za hemen u civir Yehova sha mimi la cii, vea hemba ku u yange ve ya dyako u u hen Adam la. Vea lu uma gbem sha won!

17. Ka nyi 1 Mbakorinte 15:58 a taver se ishima u eren hegene?

¹⁷ Hanma Orkristu u nan lu uma hegen cii doo u nana lu a iwuese sha mkaanem ma surun ishima ma Paulu nger hen mba ken Korinte sha kwagh u mnder u shin ku la. Se mba a atôakaa a injaa a dondon kwagh u Paulu a we se ér se luun a akaa a eren kpishi “ken tom u Ter” hegen ne la. (Ôr 1 Mbakorinte 15:58.) Aluer se mba eren tom shon sha afatyô wase hanma shighe cii yô, se lu a ishimaverenkeghen i va ember uma ken hemen. Mlu u ken hemen la una doo a hemba er se henen la ica je. Kwagh la una tese wang je ér, tom u se eren Ter ne ka gbilintom ga.