Ú Tese Iengem I Aôndo Kpa?
“Se. . . mba nengen iengem i Ter er ka ken ijingi nahan.”—2 MBAKORINTE 3:18.
1. Mose yange nenge nyi kwagha, man lu nyi i gema i eree?
MOSE lu sha Uwo u Senai un tswen. Tsô i na un ian i nengen kwagh u ma orumace ugen môm nan lu a vande nengen a mi ga yô, ka iengem i Yehova je la. Kwagh ne ka kwagh u kpilighyol tsung u i gbe je ma or lu a vande nengen a mi ga yô. Nahan kpa, u ngu wer Mose yange nenge a Yehova jighilii ga. Gadia mluashe u Aôndo engem je ka u or a fatyô u nengen a na shi lun uma ga. Sha nahan yô, Yehova cir “uwegh” nagh sha Mose sha er una nenge ijime na tseegh, a lu ishigh nagh ga yô, man lu sha ikyev i ortyom na je er kwagh ne ye. Yehova maa na Mose ian nenge iengem na shighe u va kar la. Yehova shi ôr kwagh a Mose sha ikyev i ortyom. Bibilo ôr se kwagh u mase eren yô, i̱ kaa ér: “Tsô Mose hungwa sha uwo u Senai, . . . fa er kwav u ishigh nagh u engem ga, sha er a lu ôron kwagh a [Yehova] yô.”—Ekesodu 33:18–34:7, 29.
2. Apostoli Paulu yange nger nyi sha kwagh u iengem i Mbakristu ve lu nengen laa?
2 Tôô wer ú ngu vea Mose sha uwo la imôngo. Sha kpôô yô, a doo ú kpishi u nengen iengem i Uhembansha la shi keghen ato ungwan kwaghôron u sha zwa na kpaa! U we hungwan sha Uwo u Senai ikyooso ikyooso a Mose, orhimen u Tindi u ikyuryan la kpa a lu ú kwagh u civirigh tsô! Nahan kpa, ú fa er Mbakristu mba mimi ve hembe nengen iengem i Aôndo sha igbenda igen a Mose kpa? Apostoli Paulu pase mimi u kôron ken ishima ne ken washika u nger yô. A ôr kwagh u Mbakristu mba i shigh ve mkurem la ér mba “nengen iengem i Ter er ka ken ijingi nahan.” (2 Mbakorinte 3:7, 8, 18) Mbakristu mba ve lu a ishimaveren i va lun uma shin tar mbara kpa mba nengen iengem i Aôndo.
Gbenda u Mbakristu Ve Tesen Iengem i Aôndo Yô
3. Se fa Yehova sha igbenda i Mose yange fa un sha í ga la nena?
3 Se fatyô u tesen iengem i Aôndo nena? Se mba a vande nengen a Yehova shin se ungwa imo na er Mose nahan ga. Kpa, se fa Yehova sha igbenda i Mose yange fa un ga yô. Mose kpe kera anyom kar je war kuman er 1,500 nahan cii ve Yesu u lu Mesiya la mase van ye. Nahan Mose yange fa er Tindi una kure sha Yesu ga. Shi fa er una va kpe sha u yiman uumace duen a ve ken ican i vihin tsung i isholibo man ku u ve a mi la ga. (Mbaromanu 5:20, 21; Mbagalatia 3:19) U seer yô, Mose yange kav awashima u Yehova u doon tsung, u sha kwagh u Tartor u Mesiya man Paradiso u Tartor shon ua va a mi shin tar la tsembelee ga. Nahan se kav iengem i Yehova sha jighjigh u nan u a har sha atesen a Bibilo la, ka sha ashe kpôghôô ga. Heela tseegh ga, ka sha ikyev i ma ortyom se ongo imo i Yehova ga kpa gema ka ken Bibilo se ongo ye, hemban je yô ngeren mba Ivangeli, mba ve er kwagh u atesen a Yesu man tom na u pasen kwagh sha gbenda u doon tsung la.
4. (a) Mbakristu mba i shigh ve mkurem la mba tesen iengem i Aôndo nena? (b) Ka sha igbenda i nyi nahan mba ve lu a ishimaveren i va lun uma shin tar la kpa ve tesen iengem i Aôndo?
4 Er iengem i Aôndo i mondon sha ishiv mbi Mbakristu ga nahan kpa, ka vea ôron ior kwagh u Yehova man mbaawashima nav yô ve saan sha ishi. Profeti Yesaia ngise tsengaôron kwagh u ior mba Aôndo sha shighe wase ne ér vea “pase icivir [shin iengem i Yehova] ken akuraior.” (Yesaia 66:19) Shi 2 Mbakorinte 4:1, 2 kaa a vese ér: ‘Er se lu a tom ne yô se venda akaa a kunya a ken myer la, se mba zenden sha atseregh ga, se mba kôron mkaanem ma Aôndo geman a mi ga, kpa se mba duen a mimi ken igbar, se mba pasen ayol a ase sha ci u imo i ken ishima i hanma or sha ishigh ki Aôndo.’ Lu Mbakristu mba i shigh ve mkurem, ve lu “mbatomov sha ikuryan i he” la jighilii Paulu lu ôron kwagh ne a ve ye. (2 Mbakorinte 3:6) Nahan kpa, tom u ve eren ne bende a ior kpishi mba ve lu a ishimaveren i va lun uma shin tar la. Tom ve ne wa u tesen iengem i Yehova sha ityesen ve tseegh ga, ú wa ieren ve kpa ker. Nahan yô, se mba a tom man ian i civirigh i tesen iengem i Aôndo Uhembansha la!
5. Er se lu zan hemen ken jijingi nahan tese ikyav ér nyi?
5 Mba pasen loho u dedoo u iengem i Tartor u Aôndo nyian tar sha won cii, di er Yesu tsengakaan ér a er nahan. (Mateu 24:14) Ior mba ken hanma ikurior man hanma nongo man hanma nongoior man hanma zwa cii mba ngohol loho u dedoo ne saan saan, shi mba geman uuma vev kpaa sha er vea er ishima i Aôndo yô. (Mbaromanu 12:2; Mpase 7:9) Vea fatyô u den u ôron akaa a ve ongo man a ve nenge la ga, di vough er Mbakristu mba tsuaa mbara kpa er nahan. (Aerenakaa 4:20) Ior mba ve lu tesen iengem i Aôndo sha tar nyian ne hemba miliôn ataratar, man er i gbe je ka shighe u ior ve hembe tesen iengem i Aôndo je ne. We yô u ngu eren nahan kpa? Er ior mba Aôndo ve lu zan hemen ken jijingi nahan, kwagh ne tese ér Yehova ngu kuran ve shi ngu veren ve doo doo kpaa. Er mbaihyomov mbaageev ve we iyol ve kegh a kegh u tan num sha a vese ne je yô, jijingi u Yehova hemba ngun sha a vese cii. De se nenge nen ase er mimi je se lu a jijingi u Yehova yô.
A Fatyô u Cirin Ior mba Aôndo Zwa Ga
6. Er nan ve i gbe u saa se lu a jighjigh u nan taveraa kua ishimataver keng ve se ta ikyaa a Yehova?
6 Tôô we i yila u ken atejir ér u za pase kwagh u ma iferor u vihin tu tsung nan er yô. Kpa, u gema u fa wer iferor ne ngu a nongoior u ageegh kpishi, shi nana nôngo sha afatyô u nan cii sha er nana cir u zwa yô. Sha nahan yô, a gba u ú taver ishima tsung shi ú lu a vangertiôr wer a kura u sha ikyev i iferor la keng ve u fatyô u pasen kwagh u nan er la ye. Se kpa kape kwagh wase a lu je la. Er se lu pasen ior kwagh u Yehova man mbaawashima nav yô, se mba pasen ken igbar ser Satan Diabolo ka orwuanor shi ka oraie shi ngu tsughun tar cii kpaa. (Yohane 8:44; Mpase 12:9) Nahan saa se lu a jighjigh u nan taveraa shi se taver ishima keng ve se ta ikyaa a Yehova se gema se hendan kwagh a Diabolo ye.
7. Satan ngu a tahav nan je, man keren ér una er nyi?
7 Sha kpôô yô, ka Yehova a lu Uhembansha ye. Ngu a tahav hemba Satan yem zende zende. Aluer se mba civir Yehova sha mimi yô, se lu a vangertiôr ser ngu a tahav mbu kuran se tseegh ga, kpa shi a wa iyol a kegh a kegh u kuran se. (2 Kroniku 16:9) Nahan kpa, ka Satan a lu tor u azôv man tar u uumace mba ve lu paleghaa a Aôndo ne cii ye. (Mateu 12:24, 26; Yohane 14:30) Er i zende Satan i gbihi un shin tar shi ‘ishima i vihi un tsung’ yô, ngu hendan kwagh a ior mba Yehova kpoghuloo je, shi ngu yaren tom a tar u u lu sha ikyev na ne ér una cir mba ve pasen loho u dedoo la cii zwa. (Mpase 12:7–9, 12, 17) Ngu eren kwagh ne nena? Ngu eren kwagh ne sha igbenda ityar.
8, 9. Satan ngu a yar tom a dooshima u vough ga la nena, man er nan ve i doo u se tsua ahuraior a ase sha kwaghfana?
8 Gbenda môm u Satan a keren ér una dan se yô ka sha akaa a hange hange a uma. Ior mba sha ayange ne ka mba inyaregh ki hembe doon ve ishima yô, shi ka ior mbawan ayol a ve ikyo tseegh man mba iemberyolough i hembe doon ve yô. Aôndo yô, doo ve ishima ga. (2 Timoteu 3:1–4) Ior uve ityough ken akaa a ve eren ayange ayange la, nahan ‘ve fa’ kwagh u loho u dedoo u se pasen ve ne ga. Kwagh tsô gba ve u henen mimi u ken Bibilo la ga. (Mateu 24:37–39) Imba uma la ia fatyô u tsaren se, nahan akaa a ken jijingi aa kera gba maan se iyol ga. Aluer uyôughyôughmbaakaav hingir u doon se ishima kua iemberyolough kpaa yô, Aôndo una kera doo se ishima ga.—Mateu 24:12.
9 Sha ityôkyaa ne yô, Mbakristu mba tsough ahuraior a ve sha kwaghfan. Tor Solomon ngise kaa wener: “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” (Anzaakaa 13:20) Nahan se ‘zenden’ nen vea mba ve tesen iengem i Aôndo yô. Aluer se er nahan yô, a kpe se iyol je a zua ga! Ka sea lu vea anmgbianev asev mba nomso man mba kasev imôngo ken mbamkombo shin sha ashighe agen nahan dooshima ve man jighjigh u nan ve man mlu ve u sar sar man kwaghfan ve la a taver se ishima kpen kpen. Ka sea kumban imôngo a ve nahan yô ishima i taver se u zan hemen ken tom wase.
10. Satan yaren tom a iliam i dang sha u yangen mba ve tesen iengem i Aôndo la nena?
10 Gbenda u sha uhar u Satan a yaren tom a mi ér una na Mbakristu cii ve de u tesen iengem i Aôndo yô ka iliam i lamen sha ve dang. Mayange kwagh ne a de kpiligh se iyol ga. Yesu Kristu kpa shighe u lu eren tom na shin tar la kape i lam sha a na dang je la, yange ior se un shi ve naha un tar shi ve hee un shi ve haa un azer iyol je kpaa. (Marku 5:40; Luka 16:14; 18:32) Mbakristu mba tsuaa mbara kpa i lam sha ve dang. (Aerenakaa 2:13; 17:32) Kape mbacivir Yehova mba ainge kpa i lamen sha a ve dang vough je la. Apostoli Peteru kaa ér ior a lam sha ve dang, vea kaa ér mba uprofeti mbaaiev. Á kaa ér: “Ken ayange a masejime mbanahantar vea due a tarnahan, vea zende sha asaren a ve ayol a ve. Vea kaa er ityendezwa i m-ande Na ngi hana? Gadia . . . akaa cii nga her di er a lu sha mhii u igbetar la nahan.” (2 Peteru 3:3, 4) Ka i lam sha ior mba Aôndo dang, i kaa ér mba ior mba mimi ga. Ior mba nengen ityesen i Bibilo i tese sha kwagh u aeren a dedoo la ér kera ngi a inja ga. Ior kpishi mba nengen loho u se pasen ne ér ka ibumekwagh. (1 Mbakorinte 1:18, 19) Ka i lam sha Mbakristu dang ken makeranta man sha ijiir i tom, man sha ashighe agen je yô mba hen tsombor ve je kpa ka ve lam sha a ve dang. Kpa se gba uwer ga, se mba tesen iengem i Aôndo ken tom wase u pasen kwagh la, gadia se fa ser Mkaanem ma Aôndo ka mimi, er Yesu kpa fa nahan.—Yohane 17:17.
11. Satan yaren tom a tôvacan ér una cir Mbakristu zwa nena?
11 Kwagh u sha utar u Diabolo a yaren tom a mi sha u cirin se zwa yô ka tôvacan shin ahendan. Yesu ngise kaa a mbadondon nav ér ior: “Vea na ne ken ican, vea wua ne kpaa; akuraior cii aa kôr ne ihom sha ci u iti Yam.” (Mateu 24:9) Sha kpôô yô, se Mbashiada mba Yehova se tagher a tôvacan u vihin tsung sha ajiir wue wue sha tar. Kpa se lan er Yehova tsengaôron tsuaa ér ihyom ia lu hen atô u mbacivir Aôndo man mba eren Satan Diabolo tom nahan ga. (Genese 3:15) Shi se fa ser aluer se mba wan ishima a ameen yô, se mba tan ikyaa a hementor u Yehova u vough la. Aluer se fa kwagh ne nahan yô, se fatyô u tilen dông sha ashighe a taver tsung je kpaa. Aluer se tile dông se mba tesen iengem i Aôndo yô, ma tôvacan môm kpa una fatyô u cirin se zwa kpum kpum ga.
12. Er nan i doo u se ember shighe u se tagher a ahendan a Satan kpa se til dông laa?
12 Ú hendan a ameen a tar ne shi ú til sha jighjigh zum u ior ka vea nahan we tar shi vea tôvon we a ican kpa? Wea eren nahan yô i saan we iyol. Yesu yange kaa a mbadondon nav ér: “Saan ne iyol zum u ka a heen ne, a tôvon ne a ican, man a teren ne sha hanma inja i ifer sha aie, sha ci Wam yô, ember nen, i̱ saan ne ken ishima tsung, gadia injar yen vese Sha, gadia kape ve tôv uprofeti mba ve vande a ven la a ican je la.” (Mateu 5:11, 12) Ishimawan you la tese ér ú ngu a icighan jijingi u Yehova u ageegh la, nahan ngu nan we agee sha er u tese iengem na yô.—2 Mbakorinte 12:9.
Yehova Wase Se u Wan Ishima
13. Kanyi i lu ityôkyaa i vesen i se we ishima ken tom wase u Mbakristu?
13 Ityôkyaa i vesen i i ne ve se we ishima ken tom kwaghpasen yô ka sha ci u Yehova doo se ishima shi sar se u tesen iengem na. Uumace ka ve nôngo ér vea dondo ikyav i or u nan doo ve ishima shi ve ne nan icivir yô, man ka Yehova Aôndo i hembe doon u se dondo ikyav na cii ye. Er tar ne u doo un ishima yum yô, á tindi Wan na ér a̱ va pase mimi shi a̱ paa uumace mba ungwan tindi kpaa. (Yohane 3:16; 18:37) Sar se u ior cii ma ve gem asema ma ve war di er i sar Aôndo nahan, ka nahan ve se pasen ior kwagh ye. (2 Peteru 3:9) Isharen ne, kua isharen i se lu a mi i tesen iengem i Aôndo la kpa i na yô, se mba gbe uwer u tesen iengem i Aôndo ken tom kwaghpasen wase ga.
14. Yehova ne se agee a wan ishima ken tom wase u pasen kwagh nena?
14 Kwagh u hemban cii yô ka Yehova a ne se agee a wan ishima ken tom wase u Mbakristu ye. Ne se agee sha jijingi na man sha ikyev i nongoior na kua Mkaanem nam, Bibilo. Yehova wasen mba ve soo u tesen iengem na la u wan ishima. Ongo mbamsen asev shi ne se kwaghfan u nôngon a ameen kpaa. (Mbaromanu 15:5; Yakobu 1:5) Heela tseegh ga, Yehova den ér se ya ican je i gande se u wan ishima ga. Aluer se suur sha Yehova yô, una bugh gbenda sha er se za hemen u tesen iengem na yô.—1 Mbakorinte 10:13.
15. Kanyi ka i wase se ve se wa ishima?
15 Ka sea waan ishima ken tom wase u pasen kwagh yô se lu tesen ser se mba a jijingi u Aôndo. U tesen ikyav yô, tôô wer or kaa a we ér u zenden sha uya mba iorov u karen ve beredi gbilin. Man gba u ú er kwagh ne sha shighe wou shi u vihi inyaregh sha zende la ken ikpa you. Shi u va mase kaven wer ka ior kpuaa tseegh ve soo bredi wou la ye, kpa mbagenev yô gema mba keren a ker ér vea yange u u̱ de u karen ior bredi la. Nahan ú hen wer ú za hemen u eren tom shon ayange ayange sha hanma inyom kpa? Alaghga u kera er u ga. Kpa we yô, adooga u ngu nôngon tsung pasen loho u dedoo ne anyom imôngo shin upuembaanyomov imôngo hegen, man u er kwagh ne sha shighe u ma u er akaa ou agen shi u vihi inyaregh sha er ú er tom ne kpaa. Sha ci u nyi? Ka sha er Yehova a doo u ishima shi a lu wasen we sha jijingi na, shi a lu veren iniôngon you la ve ú fetyô u wan ishima ga zee? Kape i lu vough je la!
Tom u A Hungur Ú Ga Yô
16. U wan ishima ken tom kwaghpasen wase la una va se man mba ve lu ungwan se la a nyi?
16 Tom u ikyuryan i he ka iyua i injaa, ma tom ugen môm kuma sha ú ga. (2 Mbakorinte 4:7) Man kape tom u Mbakristu mba ve lu nongo u iyôngo igen ve lu eren tar sha won cii la kpa u lu u injaa je la. Aluer ú ngu wan ishima ken tom kwaghpasen wou yô, ú “yima iyol you kua shi mba ve lu ungwan we la kpaa” er Paulu nger Timoteu nahan. (1 Timoteu 4:16) Hide hen ase sha inja i kwagh la tsô u nenge. Loho u dedoo u ú pasen ne ngu nan mbagenev ian i lun uma gbem sha won. Nahan ú fatyô u maan mlu u kangenaa vea mba ú lu wasen ve ken jijingi la. Nenge ase er a lu kwagh u doon tsung u lun uma gbem sha won ken Paradiso imôngo vea mba u wase ve u henen kwagh u Aôndo la yô! Mayange je iniôngon you i tesen ve la ia hungur ve ga. Kwagh ne una lu kwagh u doon tsung je!
17. Er nan ve shighe wase ne a kaha kposo a ashighe agen ciilii?
17 Shighe wase ne hemba kahan kposo a ashighe agen cii. Shighe ngu van u mayange a kera pase loho u dedoo ken tar u bo u mbafanaôndoga ne ga. Noa lu hen shighe u tar vihi nahala yô, shi nenge mtim u ú kpaa. Yange a doo un er un til sha jighjigh un er ishima i Aôndo sha u gban tso u un a tsombor na cii ve war ker la tsô! (Mbaheberu 11:7) Kape we kpa a fatyô u saan we iyol je la. Hen ase er u nyôr ken tar u he la ve a lu u yô, ú hide ú kenger ken ijime ú nenge ityom i yange ú er ken ayange a masejime ne, shi ú umbur er ú nôngo sha afatyô wou cii ú sue tom u Tartor la kpaa yô.
18. Ka ishimataver man ishimasurun i nyi Yehova a ne ior nava?
18 Sha nahan yô, mayange se gba nen uwer u tesen iengem i Aôndo ga. Aluer se er nahan yô, iniôngon yase ne ia hungur se ga gbem sha won. Shi Yehova kpa umbur ityom yase. Bibilo taver se ishima ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa. Sar se u hanmô wen nana̱ tese imbashima i veren tsung shon la u zan ken mfe u mimi u ishimaverenkeghen yase zan zan mkur je, sha u iyol i̱ de kera kpeen ne ga, kpa ne̱ hingir mbakaven mba ve ya dyako u uityendezwa sha jighjigh u nan man sha ishima i wan kpaa” la.—Mbaheberu 6:10–12.
Ú Fatyô u Pasen Kpa?
• Mbakristu mba tesen iengem i Aôndo nena?
• Ka akaa a nyi nahan Satan a yaren tom a mi sha u cirin ior mba Aôndo zwa?
• Kanyi kwagh i tese ér jijingi u Aôndo ngu sha a vese?
[Picture on page 5]
Ishigh ki Mose mondo iengem
[Pictures on pages 6, 7]
Se mba tesen iengem i Aôndo ken tom kwaghpasen wase