Ne Icombor I Mbakristu —Dondo Nen Ikyav I Yesu la!
“Kristu . . . ver ne ikyav je sha u né dondo Un ijime yô.”—1 PET. 2:21.
1. (a) Ka tom u nyi Wan u Aôndo yange er sha u gban akaa? (b) Yesu nengen ônov mba iorov nena?
SHIGHE u Aôndo gba sha man tar la, Wan na u iunda la lu vea na “er or u fan tom nahan.” Wan u Aôndo shi er tom vea Ter na zum u Yehova gba annyamev man imendenev anza kposo kposo shin tar la, man shighe u Yehova er Paradiso, u lu ya u uumace la kpaa. Wan u Aôndo u i va hingir u yilan un ér Yesu la soo uumace kpishi. Yange “doo [un] a ônov mba iorov tsung.”—Anz. 8:27-31; Gen. 1:26, 27.
2. (a) Ka nyi man nyi Yehova a er sha u wasen uumace mba ve lu vough ga nee? (b) Ka gbaa uma wase u nyi Bibilo i we se kwagh sha mini?
2 Nomsoor man kwase u hiihii la yange mba gbe ken isholibo yô, tom u paan uumace mba asorabo la hingir kwagh u hange hange ken awashima u Yehova. Yehova yange tindi Kristu sha u a va na nagh ku paan uumace sha ikyev i isholibo la. (Rom. 5:8) Heela tseegh ga, Yehova na se Bibilo, i i lu Mkaanem nam la, man Bibilo ne i tesen uumace er vea nôngon a myen ve, u i mar ve a mi la yô. (Ps. 119:105) Mkaanem ma Yehova ma a kwaghwan u a wasen ior u lun a icombor i dedoo, i lun saan saan kpaa yô. Takerada u Genese ôr kwagh u ivaagh ér, gba u or nana “undu ter u nan kua ngô u nan, [nana] var ken kwase u nan, [vea] hingir iyôgh i môm.”—Gen. 2:24.
3. (a) Yesu yange tese nyi sha kwagh u ivaagh? (b) Kanyi se time sha mi ken ngeren nee?
3 Shighe u Yesu lu pasen kwagh shin tar la, a pase wang ér Aôndo yange wa ishima ér ivaa i lu kwagh u gbekeke. Yesu shi ôr akaa a injaa a tsombor ua eren ve, ua fatyô u palegh aeren a vihin ivaa shin a yangen tsombor u zuan a msaanyol yô. (Mat. 5:27-37; 7:12) Ngeren ne una time sha gbenda u atesen a Yesu man ikyav i yange ver shighe u lu shin tar la ia wase noov man kasev man mbamaren kua ônov u lun imôngo saan saan man kundu kundu kpaa yô.
Er Orkristu Nana Waan Kwase u Nan Ikyo Yô
4. Kwagh u Yesu man noov mba ken Kristu zua nena?
4 Aôndo ver nom ér nana lu ityough ki tsombor, vough er Yesu kpa a lu Ityough ki tiônnongo nahan. Apostoli Paulu kaa ér: “Nom ka ityough ki kwase di er Kristu kpaa A lu ityough ki nongo Na nahan man ka Un je A lu Oryiman u iyol Na la kpaa ye. Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan.” (Ef. 5:23, 25) Sha mimi yô, gbenda u Yesu eren kwagh a mbadondon un la tese noov mba ken Kristu er i doo u ve kpa vea eren a kasev vev yô. De se time sha igbenda igen i Yesu a eren tom a tahav mbu Aôndo a ne un la.
5. Yesu yange hemen mbahenen nav nena?
5 Yesu lu “ishima legh legh, man . . . kehen ityough kpaa ga.” (Mat. 11:29) Shi yange eren zôzô sha kwagh ga. Mayange je gema tom na ar mbagenev a mi ga. (Mar. 6:34; Yoh. 2:14-17) Shi yange waan mbahenen nav kwagh kundu kundu, a̱ gba u una kimbir kwaghwan shon je kpa a de ga. (Mat. 20:21-28; Mar. 9:33-37; Luka 22:24-27) Nahan kpa, Yesu zôhôn a mbahenen nav shin heen ve ga. Yange eren kwagh a ve sha gbenda u á lu ve inja er á soo ve ga ze, shin sha gbenda u vea hen ér ve yina u eren akaa a yange tesen ve la ga. Er ma eren a mbahenen nav nahan yô, gema wuese ve a wuese shi taver ve a taver ishima kpaa. (Luka 10:17-21) Ka nahan ve mbahenen nav naan un icivir kpishi sha ci u dooshima na man erdoo na a ve ye!
6. (a) Nom nana fatyô u henen nyi sha gbenda u Yesu eren kwagh a mbahenen nav laa? (b) Peteru wa noov kwagh ér nyi?
6 Ikyav i Yesu la tese noov ér, hemen u Orkristu u̱ de lu kwagh u eren a er mbagenev ican ga. Kpa u̱ gema u̱ lu ian i nom nana waan kwase u nan ikyo, shi nana tesen nan dooshima u tangen iyol ga la yô. Apostoli Peteru wa noov kwagh ér ve dondo igbenda i Yesu eren kwagh a mbagenev sha dooshima la, nahan ve luun a kasev vev imôngo, ve ‘waan ve ikyo’ kpaa. (Ôr 1 Peteru 3:7.) Nahan yô, nom nana hemen kwase u nan shi nana waan nan ikyo nena?
7. Nom nana wa kwase u nan ikyo nena? Tese ikyav.
7 Gbenda môm u nom nana waan kwase u nan ikyo yô, ka sha u henen sha mnenge u kwase u nan shi kaven er ishima i lu nan ker sha ma kwagh u i gbe u tsombor ua er, cii man nana mase tsuan kwagh u a doo sha ci u tsombor ye. Alaghga gba u tsombor ua yem ijiir igen shin gba u nom nana musan tom u nan shin gba u a er ma kwagh ugen, er memyol u zan shin u vihin inyaregh sha kwaghfan hen tsombor sha ci u mtaver u inyar nahan. Er kwagh ne una bende a tsombor jimin cii yô, hemba doon u nom nana hen sha mnenge u kwase u nan la kpaa. Aluer nan er nahan yô, alaghga kwagh ne una wase nan u tsuan kwagh u vough, u a hembe tesen ikyo i wan yô, shi kwase u nan kpa a taver nan u suen nan ga. (Anz. 15:22) Mbakristu mba ve we kasev vev ikyo yô, kasev vev ka ve soo ve kpishi shi ve naan ve icivir kpaa, kpa kwagh u hemban doon je yô, Yehova ngu a lumun noov mbara.—Ef. 5:28, 29.
Er Kwase Nana Na Nom Icivir Yô
8. Er nan i doo u kasev vea palegh ieren i Ifa laa?
8 Yesu ver kasev mba ken Kristu ikyav i vough i dondon hemen. Gbenda u Yesu a nengen hemen la kaha kposo a ieren i kwase u hiihii la! Ifa fatyô u veren kasev ikyav i dedoo ga. Yange lu a or u Aôndo ver ér nana lu ityough sha a na, u Yehova pasen nan akaa a vea eren yô. Kpa, Ifa dondo hemen u Yehova ver ne ga. Yange er kwagh u Adam kaa un la ga. (Gen. 2:16, 17; 3:3; 1 Kor. 11:3) Sha mimi yô, yange i tsugh a tsugh Ifa, nahan cii kpa yange ma vande pinen nom na sha er una fa aluer doo u una ungwa imo i or u nan senge ér nan ngu ôron un kwagh u “Aôndo [kpa] fa” la yô. Kpa gema kende a iyol na sha, lu tesen a tese nom na kwagh u vea er yô.—Gen. 3:5, 6; 1 Tim. 2:14.
9. Yesu ver ikyav sha kwagh u dondon hemen nena?
9 Kpa Yesu yô gema ver ikyav i vough sha u ungwan imo i un u a lu Ityough nagh la. Ieren na man uma na jimin cii tese ér, mayange je “nenge . . . mlu u lun kwagh môm a Aôndo la lu kwagh u yan ishar sha mi ga.” Kpa “gema iyol Na hingir gbilin er A tôô mlu u ortom” la. (Fil. 2:5-7) Nyian u Yesu a lu Tor, a lu hemen ne kpa, ngu a ieren la her nahan. Hidi a iyol na ijime, ongo imo i Ter na sha akaa cii shi suen hemen Na kpaa.—Mat. 20:23; Yoh. 5:30; 1 Kor. 15:28.
10. Kwase nana sue hemen u orya u nan nena?
10 Doo u Kwasekristu nana dondo ikyav i Yesu ver la sha u suen hemen u nom u nan. (Ôr 1 Peteru 2:21; 3:1, 2.) Nenge ase er nana fatyô u eren kwagh nahan yô. Tôô ase wer, wan u nan u nomso sôn nan ian i eren ma kwagh u nana fatyô u nan wan la ian nan tswen ga yô. Er Kwasekristu ne a vande lamen a nom na sha kwagh shon ga yô, doo u una pine wan na la ér, “Ú pine teru kpa?” Aluer wan la er nahan ga yô, kwase la nana vande lamen a orya u nan sha kwagh shon cii ve, vea mase ôron wan ve la kwagh u nana er ye. Shi kwagh ugen yô, Kwasekristu nana de vende kwagh a nom u nan shin nyiman kwagh a nan sha ishigh ki mbayev ga. Aluer nan lumun a mnenge u orya u nan sha ma kwagh ga kpa, nana pase nan shighe u ve lu ve uhar tseegh yô.—Ef. 6:4.
Ikyav i Yesu Ver Mbamaren La
11. Yesu ver mbamaren ikyav i nyi?
11 Er Yesu vôso kwase ga, shi lu a ônov ga nahan cii kpa, a ver mbamaren mba ken Kristu ikyav i dedoo. Nena yô? Yange tesen mbahenen nav kundu kundu sha mkaan man sha ieren na shi waan ishima a ve kpaa. A tese ve u eren tom u a na ve la. (Luka 8:1) Gbenda u Yesu eren kwagh a mbahenen nav la wase ve u fan er ve kpa i doo u vea eren a mbagenev yô.—Ôr Yohane 13:14-17.
12, 13. Aluer mbamaren soo u yesen ônov vev ér ve lu mba cian Aôndo yô, gba u vea er nyi?
12 Mbayev mba kaven mbamaren vev sha ieren i dedoo shin i bo je kpaa. Nahan yô, ne mbamaren, pine nen ayol a en ner: ‘Aluer shighe u se vihin u nengen televishen shi eren akaa agen a nan se msaanyol la hemba ngeen a shighe u se henen Bibilo shi se dugh kwaghpasen la yô, ka ikyav i nyi jim se lu veren ônov aseva? Ka nyi jim tsombor wase u hembe erenee? Se mba veren ônov asev ikyav i dedoo sha u tesen ishima i tseen sha akaa a i eren ken mcivir u mimi la kpa?’ Aluer mbamaren soo ér ônov vev ve vese ve lu mba cian Aôndo yô, gba u tindi u Aôndo una vande lun ve ken ishima ve vea kôr cio u yesen ônov vev nahan ye.—Dut. 6:6.
13 Aluer mbamaren mba nôngon kpoghuloo u dondon akaawan a Bibilo hanma iyange yô, ônov vev vea fa. Kwaghôron man ityesen i mbamaren mba ve eren nahan la una bende a ônov vev kpishi. Kpa aluer ônov nenge ér mbamaren vev mba ôron kwagh kpa eren sha mi ga yô, alaghga vea kure ikyaa ér akaawan a Bibilo nga a inja shin nga a iwasen kpee ga. Kwagh ne una na yô, alaghga ônov mban vea fatyô u hendan a ameen a tar ne a.
14, 15. Ka akaa a injaa a nyi mbamaren vea wase ônov vev u erene, man ka gbenda môm u nyi mbamaren vea er kwagh nee?
14 Mbamaren mba ken Kristu fa dedoo ér, wan u yesen saa sha u kuren ugbayol mba nan tseegh ga. Nahan yô, a lu kwagh u shami ga kpishi u mbamaren tesen wan ve ér nana hemba veren ishima u eren akaa a van a inyaregh la. (Orpa. 7:12) Yesu tese mbahenen nav ér ve penda ishima sha akaa a ken jijingi. (Mat. 6:33) Nahan yô, mbamaren mba ken Kristu ve dondo ikyav i Yesu la, sha u kenden a isharen i hemban eren Aôndo tom la ken ônov vev.
15 Gbenda môm u mbamaren vea er kwagh ne yô, ka u veren ian i ônov vev vea fatyô u lun imôngo a mbaeren tom u pasen kwagh hanma shighe la. Sha kpôô yô, aluer ônov ou mba ve lu hian a hia la fa upania shin ve hoghol iyol a ortamen u sôron atôônanongo man kwase na yô, kwagh ne una taver ve ishima kpen kpen. Mbavannya ou, amba er mbamishen man mba eren tom shin Betel kua mba eren tom u maan kwagh sha ityar ityar la nahan, vea fatyô u lamen a ônov ou sar sar, ôron ve er ve zough a iember sha u civir Yehova yô. Se fa keng ser, mbavannya mbara nahan vea lu a uvande-eren mba doon ungwan. Ikyav ve i ve ne ayol a ve sha u eren Aôndo tom la, ia wase ônov enev kpishi u tsuan akaa a dedoo, shi veren akaa a vea er sha u civir Aôndo yô, shi ia wase ve u zan makeranta akuma akuma, sha er vea fatyô u eren tom u pasen kwagh hanma shighe yô.
Mbayev, Kanyi Ia Wase Ne u Dondon Ikyav i Yesu Laa?
16. Yesu yange naan mbamaren nav man Ter na u sha la icivir nena?
16 Mbayev, ne kpa Yesu ver ne ikyav i dedoo. Yesu lu sha ikyev i Yosev man Maria, nahan lu ungwan ve. (Ôr Luka 2:51.) Yange fa ér, er ve lu vough ga nahan kpa, Aôndo wa ve tom u yesen un. Sha nahan yô, lu u Yesu una ungwan imo ve. (Dut. 5:16; Mat. 15:4) Shighe u Yesu gande or la kpa, lu eren ishima i Ter na u sha la hanma shighe cii. Gadia lu hendan a ameen. (Mat. 4:1-10) Ne ônov, alaghga ashighe agen ishima ia kende ne ker u taver mbamaren enev ityough. Nahan kanyi ia wase ne u dondon ikyav i Yesu laa?
17, 18. (a) Ka mzeyol u nyi agumaior a tagher a mi ken makeranta? (b) Kanyi agumaior aa umbur ve vea kôr cio u hendan a ameene?
17 A shi nan kpa, mbakov wou mbagenev kpishi ken makeranta mba we akaawan a Bibilo ikyo ga. Alaghga vea soo u urugh we nyôron a mi ken aeren a dang, ú vendan yô vea gba sen we. I lu nahan mbakov wou mba ken makeranta ii u ati sha ci u u venda u eren ma kwagh u sha ishima ve yum vee? Aluer kwagh er u nahan yô, yange u er nena? U fa wer, aluer u de wer ve kighir we, nahan u er kwagh u ve lu eren la yô, u na ishima ia vihi mbamaren ou kua Yehova kpaa. Aluer u dondo mbakov wou mba ken makeranta mbara yô, kanyi ia er u we? Alaghga u ngu a akaa a u we ishima u eren yô, inja er u hingir pania shin diakon shin za pasen kwagh ape kwagh a hembe gban sha mbapasenkwagh u Tartor la, shin za eren tom shin Betel nahan. Aluer u ya ikyar a mbakov wou mba ken makeranta mbara nahan, vea wase ú u eren akaa ne kpa?
18 Ne agumaior a ken tiônnongo u Kristu, ne mba tagher a akaa a karen jighjigh u nan wen kpa? Ka nea tagher a a nahan ne er nena? Hen ase sha kwagh u Yesu, u a lu orveren ne ikyav la. Yange venda u gban ken imeen, kpa gema tile dông sha kwagh u perapera. Aluer u umbur kwagh na yô, u zua a agee á vendan kwagh a mbakov wou mba ken makeranta wang wer, u er kwagh u ú fe wer ka u bo la a ve ityô ga. Penda ishima u ungwan imo i Yehova shi eren akaa a ken mcivir u mimi a nan we iember ken uma wou er Yesu er nahan.—Heb. 12:2.
Gbenda u Vesen u Zuan a Msaanyol hen Tsombor
19. Kanyi se er ve se zua a msaanyol u mimi?
19 Kwagh u uumace gba Yehova Aôndo man Yesu Kristu ishima kpishi. Shin er se yen nahan cii kpa, se fatyô u zuan a msaanyol. (Yes. 48:17, 18; Mat. 5:3) Yesu yange tese ior mimi u Aôndo, u a lu kwagh u vesen u nan uumace jimin cii msaanyol yô, kpa lu cii kwagh u tese mbahenen nav la ga. Yange tese ve gbenda u u hembe doon u vea eren a uuma vev kpaa yô. Yesu tese sha zwa tseegh ga, yange ver ve ikyav sha kwagh u uma u akuma akuma man ieren i akuma akuma kpaa. Hanma or hen tsombor cii, nana lu orya shin kwaseya shin wan kpa, ikyav i Yesu ver la ia fatyô u wasen nan. Nahan ne noov man kasev man mbamaren kua ônov cii, dondo nen ikyav i Yesu la! Sha kpôô yô, u dondon ityesen man ikyav i Yesu ver se la ka kwagh u vesen u una fatyô u wasen tsombor wase u zuan a mkom man msaanyol yô.
Ú Na Mlumun Wer Nyi?
• Noov vea yar tom a tahav mbu hemen tsombor ve, mbu Aôndo a ne ve la nena?
• Kwase nana dondo ikyav i Yesu la nena?
• Gbenda u Yesu eren kwagh a mbahenen nav la tese mbamaren nyi?
• Ikyav i Yesu ver la tese agumaior nyi?
[Foto u sha peeji 8]
Nom u fan kwagh ka nan vande eren nyi cii ve nan tsua kwagh u tsombor u a eree?
[Foto u sha peeji 9]
Ka shighe u nyi nahan ian ka i due i kwase nana tese ér nan sue hemen u nom u nana?
[Foto u sha peeji 10]
Ônov mba dondon anza a dedoo a mbamaren vev