Yehova Kohol Tsombor Na Imôngo
‘M ngu wan ne kwagh mer kuran nen mzough u ken jijingi la.’ —EF. 4:1, 3.
U PASE AKAA A A DONDO SHIN HEEN NE NENA?
Akaa a Aôndo a lu eren la ka sha ci u nyi?
Se er nan ve se “kuran mzough u ken Jijingi” laa?
Ka nyi ia wase se ve se ‘lu sar sar’ a mbageneve?
1, 2. Ka nyi Yehova a we ishima u eren sha ci u tar man uumacee?
KA A ter ishember i tsombor la nahan, ka nyi ka i va u ken ishima? Ka kwagh u dooshima man msaanyolo? Shin ka kwagh u tom u eren vea tsombor wou imôngo sha er ne kure awashima wene? Shin ka u hen kwagh u ijiir i kundu kundu i u vese her, u hen kwaghfan shi u pase mbamnenge ou gbar gbar yôô? Aluer u due hen tsombor u u we u ikyo yô, alaghga u hen sha akaa ne. Ka Yehova yange ver tsombor ye. (Ef. 3:14, 15) Yange wa ishima ér, uumace man mbatyomov cii ve lu ken mkor shi ve na ayol a ve jighjigh shi ve lu ken mzough kpaa.
2 Uumace mba eren isholibo yô, ve kera lu ken tsombor u Aôndo ga, nahan kpa awashima u Yehova la gema ga. A wa ishima ér tar u lu Paradiso, u iv a ônov mba Adam man Ifa. (Gen. 1:28; Yes. 45:18) A sôr hanma kwagh a ver vough sha u va kuren awashima na ne. I ter akaa a Aôndo a ser a ver ne agen kpishi ken takerada u Mbaefese, u u hembe ôron kwagh u mzough la. De se time nen sha avur agen ken takerada la se nenge er se fatyô u eren kwagh u a zough sha awashima u Yehova a lu a mi ér una kohol mbatyomov man uumace cii imôngo la yô.
KWAGH U YEHOVA A EREN SHA U KUREN AWASHIMA NA LA
3. Ka nyi Aôndo yange hii u eren zum u shighe va kuma vough, er i pase ken Mbaefese 1:10 laa, man lu hanma shighe hii u eren kwagh nee?
3 Mose yange kaa a Mbaiserael ér: “TER, Aôndo wase, ka TER tswen, je!” (Dut. 6:4) Akaa a Yehova a eren cii ka sha u kuren awashima na la. Ka nyi Aôndo yange er sha u kuren awashima na u kohol mbatyomov man uumace imôngo laa? Ken zwa Grika yô, mkaanem ma i nger ken Mbaefese 1:8-10 mara tese ér yange ‘shighe va kom vough yô,’ a hii u eren akaa sha u va kuren awashima na la. (Ôr Mbaefese 1:8-10.) Tom u kohol akaa ne ngu ker avegher ahar. Ken vegher u hiihii la, Aôndo tsua Mbakristu mba i shigh ve mkuren la ér ve yem sha, ve za er tom sha hemen u Yesu Kristu. Yehova yange hii u kohol mba vea va hemen vea Kristu sha la sha iyange i Pentekosti u inyom i 33 la. (Aer. 2:1-4) Nagh ku ipaan u Kristu kura na yô, Aôndo na Mbakristu mba i shigh ve mkurem mban ishô, ve hingir mbaperapera sha ishigh ki Aôndo shi ve kuma u va lun uma gbem sha won. Nahan ve kav er i lumun ve ve hingir “ônov mba Aôndo” yô.—Rom. 3:23, 24; 5:1; 8:15-17.
4, 5. Ka nyi i lu vegher u sha uhar u tom u kohol akaa, ú Aôndo a lu eren laa?
4 Ken vegher u sha uhar la, Aôndo kohol ior mba vea va lu uma ken Paradiso shin tar, sha hemen u Kristu, ken Tartor u Mesiya la. Ka mba ve lu “zegeikpelaior” la vea lu mba hiihii mba vea lu uma ken paradiso ye. (Mpa. 7:9, 13-17; 21:1-5) Shighe u Hemen u Anyom Dubu la, a nder ior shin ku, vea kohol zegeikpelaior ne, vea lu shin tar. (Mpa. 20:12, 13) Nenge er mnder u shin ku la una seer van a mzough sha wono! Anyom dubu la aa been yô, a kar “akaa . . . a a lu shin tar” la ikyaren i masetyô. Mba vea tile sha jighjigh la a lumun ve vea hingir “ônov mba Aôndo” mba shin tar.—Rom. 8:21; Mpa. 20:7, 8.
5 Nyian ne, Aôndo ngu wan mba i shigh ve mkurem mba vea va lu sha la ago iyol kua mba ve lu iyôngo igen, mba vea va lu ken Paradiso shin tar la kpaa. Kpa ka nyi hanmô wase nana ér hegen sha u suen tom u Aôndo a lu eren nee?
“KURAN MZOUGH U KEN JIJINGI” LA
6. Ka sha nyi gbenda nahan Ruamabera a tese ér gba u Mbakristu vea kohol imôngo?
6 Ruamabera tese ér gba u Mbakristu vea kohol imôngo. (1 Kor. 14:23; Heb. 10:24, 25) Kwagh ne hemba di u gban lun imôngo vea mbagenev ijiir i môm er se za kasua shin se za hen ma agirigi u anumbegh nahan tsô la. Mzough u mimi hemba nahala. Ka sea dondon kwaghwan u Yehova shi sea naan icighan jijingi u Aôndo ian ser a wase se u geman aeren a ase yô, se lu ken imba mzough ne.
7. Inja i u “kuran mzough u ken jijingi” la ér nyi?
7 Er se ne nagh ku ipaan ku Kristu la jighjigh yô, Yehova nengen se ér se mba mbaperapera. Mba i shigh ve mkurem la, nengen ve ér mba ônov nav, mba ve lu iyôngo igen la di nengen ve ér mba azende a na. Nahan cii kpa, er se lu ken tar ne yô, anyiman aa lu hen atô wase keng. (Rom. 5:9; Yak. 2:23) Í lu nahan ga yô, ityôkyaa ma i lu i a wa se kwagh ér “waan nen ishima a ayol a en” ga. Se er nan ve se lu ken mzough vea mbananjighjigh mbageneve? A gba u se lu a ‘iyolgengese ga, man ishima i legh legh.’ Heela tseegh ga, apostoli Paulu wa se kwagh ér: “Nôngon nen tsung u kuran mzough u ken Jijingi sha mkange u bem.” (Ôr Mbaefese 4:1-3.) Gbenda môm u se dondo kwaghwan ne yô, ka u nan jijingi u Aôndo ian ser a gema ieren yase shi a wase se u umen ityamegh nagh. Ityamegh ki jijingi kin ka ki wase ior u himen iyongo, kpa aeren a iyolough yô, nga ve a mpav tseegh.
8. Aeren a iyolough nga ve a mpav sha nyi gbenda?
8 Nenge ase er “aeren a iyolough” ka a va a mpav yô. (Ôr Mbagalatia 5:19-21.) Idya ka i pav or u nan er i la a Yehova man tiônnongo, shi i pav mbayev a mbamaren vev, shi i pav nom shin kwase u nan er i ga la a ikyar u nan. Hôngor ka u pav or a Aôndo kua mba ve doo nan ishima la. Ior mba ve nôngo ér vea var akaa ahar imôngo sha tsur yô, ve fa ér ka i gba u akaa la aa lu pele pele ve tsur ua kôr a imôngo yô. Aluer or ngu eren ijimba yô, nan ngu tesen ér atindi a Aôndo gba nan kwagh cuku ga. Aeren ne zua sha mlu u Yehova ga kuaa.
9. Se tôv ayol a ase nena sha u se fa, aluer se mba nôngon sha afatyô wase cii ser se “kuran mzough u ken Jijingi sha mkange u bem” yôô?
9 Sha nahan yô, doo u hanmô wase nana pine iyol i nan ér: ‘M ngu nôngon sha afatyô wam cii mer me “kuran mzough u ken Jijingi sha mkange u bem” kpa? Ka m er nena shighe u ayôôso a gbe hen atô wam vea orgene? Ka m zende m ôr azende am cii sha u keren mer ve ta ikyaa a moo? Ka m ver ishima mer mbatamen ve sôr zayol la sha er me palegh u za lamen a or la iyol yam, himen iyongo shon yôô? Ka mea fa mer m er kwagh u doon or ga nahan, m palegh nan sha er se lam sha zayol la ga yôô?’ Imba ieren ne nahan ia tese ér se mba eren kwagh u a zough sha awashima u Aôndo a lu a mi ér una kohol akaa cii ken Kristu la kpa?
10, 11. (a) Ka a inja u se lu ken bem a anmgbianev asev sha ci u nyi? (b) Ka nyi ieren ia va a bem shi ia na Yehova kpa una ver se doo doo?
10 Yesu yange kaa ér: “Nahan yô, aluer wea va a iyua you u va nan sha atse a nanden nagh sha mi la, man wea umbur her er kwagh a zua anngôu a we yô, undu iyua you her hen kpe atseegh la, za vande himen a anngôu la, man ú hide, ú va na iyua you ye. De num a or u yilan we ijir la fese.” (Mat. 5:23-25) Yakobu nger ér: “Ityamegh ki perapera yô, ka i lôô ki sha bem sha ci u mba ve ker num la.” (Yak. 3:17, 18) Sha nahan yô, se fatyô u lun perapera a bem shio ga.
11 U tesen ikyav yô, luun er mbasulev mba cian ubom mba ka i wa shin inya la ken ityar igen i í nenge ityav ker kpoghuloo la ga yô, ma ve kaha sule sha ajiir kpishi. Bom ka una bughur yô, mbasulev ve undu utsa vev, nahan i hingir ve ican u zuan a tom u eren, shi kwaghyan kpa a taver u zuan a mi ken ugeri. Kape aluer ieren yase na hingir ican u lun ken bem a anmgbianev asev ve, se fatyô u vesen ken jijingi ga je la. Kpa aluer se mba den mbagenev kwaghbo ve fese, shi se mba eren kwagh sha ci u mkpeyol ve yô, se cii se lu ken bem shi Yehova una ver se doo doo.
12. Mbatamen vea wase se u lun ken mzough nena?
12 Heela tseegh ga, “ior mba i ne ve lu uiyua,” [NW] la kpa ka ve va a bem man mzough. I na ve sha u ve wase se se̱ “kuma sha mzough u ken jighjigh u nan.” (Ef. 4:8, 13) Shighe u se lu eren tom vea mbatamen imôngo man ve pase se ma kwagh u a zough sha mkaanem ma Aôndo, u i gbe u se sôr inja sha mi yô, ka ve wase se u haan or u he iyol. (Ef. 4:22-24) U nengen kwaghwan ve la wer ka gbenda u Yehova a lu nôngon ér una wa u ago iyol u va lun ken tar u he sha hemen u Wan na la kpa? Ne mbatamen, ka ne lu a kwagh ne ken ishima shighe u ne lu nôngon ner ne wase mbagenev la kpa?—Gal. 6:1.
“LU NEN SAR SAR AYOL A EN”
13. Aluer se dondo kwaghwan u a lu ken Mbaefese 4:25-32 la yô, ka nyi ia due kere?
13 Mbaefese 4:25-29 pase se kwagh u i gbe u se palegh la jighilii. Ér se palegh aie u eren man hwev man kwaghôron u dang, se gema se ôron kwagh u doon u una fatyô u maan a maa mbagenev yô. Aluer or wa kwaghwan ne ikyo ga yô, nana vihi jijingi u Aôndo ishima, man ka icighan jijingi a lu tahav mbu van a mzough ye. (Ef. 4:30) Kwaghwan u Paulu ugen u a dondo ne kpa aluer se dondo un yô, se lu ken bem ma mzough. A nger ér: “Dugh nen hanma ishima i yuan man ishima i nyoon man iyugh man u zôhôn genger genger man ityuhwanev ken a ven kera kua hanma inja i dang kpaa. Kpa lu nen sar sar ayol a en, zungwen nen mhôônom, de nen ayol a en kwaghbo, er Aôndo kpaa A de ne ken Kristu nahan.”—Ef. 4:31, 32
14. (a) Inja i ishember i ‘lu nen sar sar’ la er nyi? (b) Ka nyi ia wase se u lun sar sar a mbageneve?
14 Ishember i ‘lu nen sar sar’ la i tese ér alaghga ka se lu sar sar a mbagenev ashighe agen ga, nahan a gba u se seer lun sar sar a mbagenev. Doo u se hemba wan ikyo sha mlu u ken ishima u mbagenev, a u wase la. (Fil. 2:4) Alaghga ashighe agen se soo u ôron kwagh u una hôm mbagenev, shin una tese ér se mba a mkav yô. Kpa aluer ka kwagh u una na ishima ia vihi mbagenev yô, doo u se ôr un ga. Aluer se mba vanden henen sha kwagh cii man ôron un yô, kwagh ne una wase se u “lun sar sar” a mbagenev.
HEN U LUN A DOOSHIMA SHI NAN MBAGENEV ICIVIR HEN TSOMBOR
15. Mbaefese 5:28 wase noov u fan er vea kaven Kristu nena?
15 Bibilo tôô mlu u Kristu vea nongo na la kar sha mlu u kwase a nom. Kwagh ne wase se u fan gbenda u i gbe u nom nana tesen kwase u nan, shi nana soo nan shi nana wa nan ikyo, kwase kpa nana ungwan imo i nom u nan la. (Ef. 5:22-33) Shighe u Paulu nger ér: ‘Kape noov kpaa, kasev vev ve̱ doo ve ishima keng er ayol a ve nahan la,’ lu ôron ér nyi? (Ef. 5:28) Cii man a ôr mkaanem man yô, a kaa ér: “Er Kristu kpaa, nongo Na u doo Un ishima man A ne iyol Na sha ci u u nahan, . . . sha u Una tsegha u er A wanger u sha m-ee u A ôô u sha mnger sha kwaghôron Na” la. Sha mimi yô, saa nom nana lu tsevaa sha u koson tsombor u nan ken jijingi ve nana er kwagh u a zough sha awashima u Aôndo a lu mi ér una kohol akaa cii ken Kristu la ye.
16. Aluer mbamaren mba eren tom u Yehova a ne ve hen tsombor la yô, ka nyi ia due kere?
16 Doo u mbamaren vea umbur ér mba eren tom u Yehova a ne ve yô. Kpa kwagh er vihi yô, ior kpishi ken tar “mba a dooshima ga.” (2 Tim. 3:1, 3) Mbamaren kpishi mba kera we ônov vev ikyo ga, man kwagh ne ka a na ônov vev ve ya ican shi ve ure. Nahan kpa, Paulu wa mbamaren mba ve lu Mbakristu kwagh ér: “Ne uter kpaa, de eren nen a ônov enev er vea yuwe ga kpa yese nen ve sha mkôôm man kwaghwan u Ter.” (Ef. 6:4) Ka hen tsombor mbayev ka ve hii henen u lun a dooshima shi nan mba ve hemen la icivir ye. Mbamaren mba ve tesen mbayev vev vough yô, mba eren kwagh u a zough sha awashima u Aôndo a lu a mi ér una va a ior cii ken mzough la. Aluer ya wase ngu ijiir i kundu kundu, i se palegh ishima i nyoon man iyugh man iliam i dang yô, se lu tesen mbayev asev ityesen i injaa sha kwagh u dooshima man u nan mba ve hemen la icivir. Kwagh ne una wa ve ago iyol u va lun ken tar u he la.
17. Ka nyi ia wase se u hendan a Diaboloo?
17 Gba u se fa ser, aluer se mba nôngon ser se er ishima i Aôndo yô, Diabolo, or u hiihii u yange nôngo ér una yange ior u civir Aôndo la una hendan a vese. Er ior ve lu paven ivaa seer a seer shi nomso man kasev mbagenev ve lu tsan imôngo a ivaa i eren shio shi nomso ve lu vôson nomso, kasev kpa ve lu vôson kasev yô, tese wang ér awashima u Satan ngu kuren sha mi. Se mba dondon ieren i ior ve lu a mi ken tar u ainge ne ga. Ka Kristu a lu ikyav i se dondon ye. (Ef. 4:17-21) Sha nahan yô, i wa se kwagh ér: “Kwagh ugen yô, taver nen ken Ter sha tahav mbu agee a Na. Hua nen ikyav mbi utyav mbi Aôndo cii iyol sha u né fatyô u tilen dông hendan a ayom a diabolo yô. Gadia kera ka awambe man inyam se lu nôngon ityav a ve ga, kpa ka mbatarev man mbautahav man mba ve lu utor sha tar cii mba ime ngin ne, man ujijingi mba aferev mba sha ajiir a Sha. Sha ci u nahan yô, tôô nen ikyav mbi utyav mbi Aôndo cii.” Gba u se er nahan sha er se fatyô u hendan a Diabolo man azôv a na yô.—Ôr Mbaefese 6:10-13.
“ZENDEN NEN KEN DOOSHIMA”
18. Ka nyi i lu kwagh u vesen u a wasen Mbakristu u lun ken mzougho?
18 Dooshima ka kwagh u vesen u a wasen Mbakristu u lun ken mzough yô. Yehova doo se ishima shi Yesu Kristu kpa doo se ishima, shi anmgbianev asev kpa doo se ishima. Ka ityôkyaa ne i ne ve se kange ishima ser se “kuran mzough u ken Jijingi sha mkange u bem” ye. (Ef. 4:3-6) Yesu yange er msen ér mbahenen nav ve lu ken imba mzough la, a kaa ér: “Man ka sha ci u mban tseegh M eren msen ga, kpa ka sha ci u mba vea va nam jighjigh sha kwaghôron u mban la kpaa, sha u ve cii ve̱ lu kwagh môm, er We Ter, U lu ken a Mo, Mo kpaa M lu ken a We nahan, sha u ve kpaa ve̱ lu ken a vese; . . . Man M pase ve iti You; Me shi Me pase ve i kpaa; sha u dooshima u M doo U la, a̱ lu ken a ve, Mo kpaa M̱ lu ken a ve yô.”—Yoh. 17:20, 21, 26.
19. U kange ishima wer u er nyi?
19 Aluer se mba a ieren i kpeegh i i taver se u geman yô, dooshima una mgbegha se se er msen er orpasalmi nahan, ser: “Sôr ishima yam i̱ hingir i môm sha u cian iti You.” (Ps. 86:11) Yô, se kange nen ishima u nôngon a Satan shighe u a nenge ér una pav se a Ter wase Yehova kua mba Yehova a lumun ve la yô. Shi se nôngo nen kpoghuloo u ‘lun mbakaven Aôndo er ônov mba doon ishima nahan, se zenden ken dooshima,’ hen tsombor man ken kwaghpasen man ken tiônnongo kpaa.—Ef. 5:1, 2.
[Foto u sha peeji 29 la]
A undu iyua na sha atse a nanden nagh, a yem u za himen iyongo a anngô na
[Foto u sha peeji 31 la]
Ne mbamaren, tese nen ônov enev u nan ior icivir