Ityough Anigheni
‘U Nôngon Ityav a Ujijingi Mba Aferev’
1. Er nan ve kwagh a gbe se sha akaa a ujijingi mba aferev ve eren la yumu?
KA A̱ kaa ér ujijingi mbaaferev mbá yô, ior kpishi ve hule kera. Kpa ka kwagh u asenge ga. Ior vea na jighjigh ér mba, shin vea na jighjigh ga kpa, ujijingi mbaaferev mba, man mba nôngon ér vea kighir hanmaor cii. Mbacivir Yehova kpa due iyol ishô ga. Sha kpôô yô, ka sha a ve jighilii je ashe a ver ye. Apostoli Paulu ta se icin sha kwagh ne nahan, ér: “Kera ka awambe man inyam se lu nôngon ityav a ve ga, kpa ka mbatarev [mba i nengen a ve ga la] man mbautahav man mba ve lu utor sha tar cii mba ime ngin ne, man ujijingi mba aferev mba sha ajiir a Sha” la. (Mbaefese 6:12) Mkighir u ujijingi mbaaferev ve lu kighir ior la hemba taver sha shighe wase ne cii, sha ci u i zenda Satan sha kera i gbihi un shin tar nahan ishima vihi un tsung, gadia a fa shighe na kera vese ga.—Mpase 12:12.
2. Se er nan ve se hemba ityav mbi se nôngon a ujijingi mba ve hembe orumace agee laa?
2 Or a fatyô u nôngon kwagh a ujijingi mba ve hembe orumace agee mban hemban je kpa? Een, kpa saa nana har sha Yehova nana tôô ave sha. Saa se ungwan imo na shi se dondon Mkaanem nam kpaa. Ka er se er nahan la ve, se war iyolvihin man mvihi u aeren man ishima i vihin i mba ve lu sha ikyev i Satan ve zough a mi la ye.—Yakobu 4:7.
Mbahemenev mba Taregh Mba Shaav
3. Ka unô Satan a hendan a ve kpoghuloo je a shin uwegh ga, man eren kwagh ne nena?
3 Yehova pase se mlu u taregh e̱r un lu shaala tseng ve un lu nengen a mi la vindi vindi. Yange na apostoli Yohane mpase u sha mnenge, nahan ken mpase la a nenge Satan lu er ka “zegedarakon u nyian” nahan. Wa iyol lu keghen a kegh ér aluer una fatyô yô, a maren a mar Tartor u Aôndo u Mesiya la ken inyom i 1914 nahan, maa una mena ú je. Ka za hembe Satan heela yô, maa ka moughon na num a mba ve lu shin tar ne ve til sha ityough ki Tartor shon la kpoghuloo je la. (Mpase 12:3, 4, 13, 17) Satan ngu nôngon ityav mbin nena? Ngu nôngon mbi sha ikyev i uumace mba ve eren un tom la.
4. Ka an nan lu imbor i tahav mbu ugomoti mba orumace nan lu a mi laa, man er nan ve se fe kwagh nee?
4 Tsô shi i tese Yohane inyamikyume igen, i lu a ityouv itiankarihiar man akor pue, shi í na inyam shon tahav “sha hanma nongo man hanma nongoior man hanma zwa man hanma ikurior kpaa.” Inyam la i tile sha mserakaa u patii u a lu tar sha won cii la. Yange i kaa a Yohane ér “Darakon [Satan Diabolo] gema na i agee a na man shi ikônough nagh ki torough man shi tahav mbu vesen kpaa.” (Mpase 13:1, 2, 7) Een, ka Satan a lu imbor i tahav man agee a ugomoti mba orumace ve lu a mi la ye. Sha nahan yô, er apostoli Paulu yange nger nahan, sha mimi jighilii yô “mba ve lu utor sha tar cii” la ka “ujijingi mba aferev mba sha ajiir a Sha” la, ka ve ve lu hemen ugomoti mba orumace cica cii ye. Mba i sar ve u civir Yehova cii, saa vea fa kwagh ne nahan doo doo.—Luka 4:5, 6.
5. Mba kohol mbahemenev mbatarev cii zan a ve hana?
5 Er mbahemenev mba taregh kpishi ka ve senge ér ve mba civir Aôndo nahan kpa, ma tar môm tsô kpa wa iyol i ú sha ikyev i hemen u Yehova ga, shin sha ikyev i Yesu Kristu, Tor u á ver la kpaa ga. Hanma ve yô ka nan nôngon taveraa ér i de ngohol tahav sha ikyev i nan kera ga. Er kwagh u i nger ken Mpase la a tese nahan, “ujijingi mba diabolo” mba kohol utor mba sha won cii ijiir i môm sha ci u “ityav mbi iyange i vesen i Aôndo, Uhembanagee” mbi Armagedon la.—Mpase 16:13, 14, 16; 19:17-19.
6. Er nan ve i gbe u se wa ikyo sha er a kera goom a vese, se gema suen tar u Satan ne ga?
6 Hanma sev cii ahendan a sha ikyaa i patii shin sha ikyaa i mtemimôngo shin kpenga shin kwaghaôndo a a lu paven tsombor u orumace haan avegher avegher ne, nga benden a uuma mba iorov. Ashighe kpishi ka a̱ moughon a ahendan ne yô, ior ve gba tan ikyaa a vegher môm ga yô ugen ken ahendan la sha mkaan shin sha igbenda igenegh, ve gba tan ikyaa a ma tar shin ikyurior shin mba ve lamen ma zwa yô, shin nongoior ú ú lu u̱ ve la. Ior ka vea wa ave sha ma ityav mbi í lu nôngon la jighilii ga je kpa, ashighe kpishi ve ta ikyaa ken ma vegher môm gayô ugen. Kpa, aluer ve ta ikyaa a vegher ne shin ka vegher la ve te ikyaa a na kpa, sha jighilii yô, ka an ve lu suene? Bibilo pase wang ér: “Tar cii ngu sha ikev i Orbo.” (1 Yohane 5:19) Nahan, or a er nan ve a kera tsume a nan e̱r i lu tsumen aa tar cii la nahan ga? Saa nana sue Tartor u Aôndo taveraa nana shi uwegh ga, shi nana lu paleghaa sha ahendan a taregh kpaa.—Yohane 17:15, 16.
Atseregh a Orifer La
7. Satan tese ayom na sha gbenda u a yaren tom a kwaghaôndo u aiegh la nena?
7 Hii sha igbetar je, Satan zer yaren tom a tôvacan u sha ityumbuzwaagh man u sha iyol u goom a ior karen a ve hen mcivir u mimi kera. Shi yaren tom a igbenda igenegh i ken myer kpaa—ka atseregh man wayo na la je la. Er a we ayom yum yô, a wuhe uumace kpishi mba ken ime ken kwaghaôndo u aiegh, a na ve ve hen ér ka Aôndo je ve civir ye. Er ve lu a mfe u vough u Aôndo la ga, kpa mimi a gem a gbe ve ishima yô, ka ve soo mcivir u a lu a ajinge a akaamyer shi a hembe haren sha akaa a sagher or ken ishima la, shi mcivir u eren akaa a ageegh la kpa ka a doo ve. (2 Mbatesalonika 2:9, 10) Kpa i ta se icin ér ken atô u mba ngise ve lu ken mcivir u mimi a vese imôngo la je kpa, “mbagenev vea undu jighjigh u nan, vea ver ishima sha ujijingi mba tsughun ior man sha ityesen i ujijingi mba bov.” (1 Timoteu 4:1) A er nan ve kwagh a er nahana?
8. Aluer se mba civir Yehova je kpa, Satan una fatyô u meen se nyôron a vese ken kwaghaôndo u aiegh nena?
8 Er Diabolo a we atseregh yum yô, ka a keren pe se taver ga la. Mase zan mcie u cian or la ngu a vese her shinii? Aluer se mba a imba mcie la her yô, anterev asev shin mbawanndor a vese vea fatyô u kighir se, nahan se dondo ve ken aeren a a we amise ken mcivir u aiegh yô. Se mba gengese iyoloo? Aluer se mbá mbà gengese iyol yô, alaghga ishima a vihi se zum u i we se kwagh shin mbagenev ve vende u dondon mbamhen mba se ve a mi la yô. (Anzaakaa 15:10; 29:25; 1 Timoteu 6:3, 4) U ma se ser mnenge wase ma̱ a zough sha ikyav i Kristu yange ver la yô, alaghga se hemba soon ser i ‘ngiligh se ato’ sha u kaan ér u ôron Bibilo shi keren or iyongo ga la tseegh kpa kuma. (2 Timoteu 4:3) Sea nyôr ma nongo u kwaghaôndo ugenegh, shin sea lu ken kwaghôndo u se eren la her kpa kwagh gba Satan sha mi ga, kwagh u a soo di tsô yô ka u se̱ de civir Yehova sha gbenda u Aôndo a tese ken Mkaanem nam man sha ikyev i nongo na la ga tseegh.
9. Satan yaren tom a kwagh u yavaor la sha atseregh sha u kuren awashima na nena?
9 Shi Satan ka a mee ior sha atseregh ér ve̱ iv asaren a á lu a sha gbaaôndo la sha igbenda i í lu i injaa ga yô. Á er kwagh ne a isharen i yavaor la. Ior kpishi ken tar venda ityesen i Bibilo í sha kwagh u aeren a vough la, nahan mba nengen kwagh u nomso man kasev mba ve vese ayolave ga kpa ve lu tsan ikyagh i môm la ér ka msaanyol u vough shin ka gbenda u tesen ér ve wa akondo, ve kera mba mbayev mba kiriki ga. Man mba ve vese ayolave la di ye? Mbagenev kpishi mba eren idya. Shi mbagenev di yô or u ve vese la ka nana̱ er idya ga je kpa, ve pav ivaa a nan, gayô ve undu nan ve gba za tsan vea orgen kposo. Satan ka a tuur ior ken ijime sha atseregh ér ve̱ ker msaanyol u hegen hegen la, kpa ve̱ gema ve̱ hungur a kwagh u una va ker ken hemen sha a ve kua mbagenev la, man hemban je yô ve̱ hungur mlu ve vea Yehova man Wan na la kpaa.—1 Mbakorinte 6:9, 10; Mbagalatia 6:7, 8.
10. Ka sha nyi igbenda Satan ka a nôngo ér una nzughul a mnenge u se nengen idya i eren man ipila laa?
10 Isharen igen i i lu i sha gbaaôndo yô, ka i keren iemberyolough la. Ka a̱ ker u ivin isharen ne sha inja yô, i va a mkunduyol man mpever ken ishima kua ken mhen kpaa. Kpa Satan ka una gba nôngon sha atseregh ér una gema ashighe a memen ne una na mhen wase a̱ kaha a mhen u Aôndo nahan, ka se er nena? U tesen ikyav yô, se fa idya i eren man ipila ka akaa a a doo Yehova ishima ga yô. Nahan, ka a̱ nguren tesen akaa ne sha senema shin sha televishen shin zum u i lu eren anumbe agenegh yô, ka se tema her se gbaa nengen hanma kwagh tsô shinii? Shi fa kpaa wer, Satan una na akaa ne aa lu hemban vihin gban a gba kera cii er shighe u a gbihi un shin ihungwa i i ze kweng la a lu hemban mgbôghom cii yô, gadia “udangmbaiorov man mbatsughunior vea yem hemen hemen vea hemba vihin a vihi kwagh. Mba tsughun ior man ve di kpaa mba gem mba tsughun ve.” (2 Timoteu 3:13; Mpase 20:1-3) Nahan gba u se luun tsevaa sha atseregh a Satan ne hanma shighe cii.—Genese 6:13; Pasalmi 11:5; Mbaromanu 1:24-32.
11. Ka sha nyi igbenda nahan alaghga or u nan fe mimi u sha kwagh u mbaimev je kpa a mee nan aluer nan ngu tsevaa ga yôô?
11 Shi se fa dedoo ser mba ve we ave ken nyityô kwagh u mbaimev cii—a̱ lu ishor i kpehen shin tsav shin u lamen a mbakpenev kpaa—akaa ne cii ka akaa a hôngorough sha ishigh ki Yehova. (Duteronomi 18:10-12) Er se vande fan kwagh ne nahan yô, henen tsô kpa se hen ser se za hen or u nan pin jijingi u orkpen kwagh ga, shi mayange je se lôhô ve ser ve̱ nyôr se hen ya ve̱ va er akombo a ve la kpaa ga. Kpa mase zan se kegh ato a ve aluer ve due sha televishen wase shin sha Intanet yôô? Shin er mayange se lumun ser orakombo nana̱ er se twer ga nahan kpa, mase zan se lumun u man icigh ki í we i ne se kpa i tswer akaa sha mi amba er, kwase a̱ de ker ave ga, shin i de nyer a mi ken iyough ga nahanaa? Shin mase zan se mishi mngerem ma i senge ér ka icighanmnger la iyol shin se mishi ken ya wase shin ken ityev yase ser se mba yangen ú asee? Er se fe ser Bibilo tswer akombo a yangen nahan, se gema mhen wase se wa sha ikyev i or u humen ioroo?—Mbagalatia 5:19-21.
12. (a) Ityogholough mbi ne se u henen sha akaa a se fe ser ka a bo la inja nena? (b) Ikyondo i or nan zeren la, shin hwe u nan u sha ityo la shin gbenda u nan lamen la ua tese ér uma u ior mba kwagh ve a vihi Yehova ishima la gema doo nan nena? (c) Aluer ka u se palegh u gban ken to u atseregh a Satan yô, kanyi i gbe u se ere?
12 Bibilo kaa ér idya man hanma inja i hôngorough yô, u teren (a ter i a mhen u hôngorough ken ishima) tsô kpaa, i de teren her a̱ vese ga. (Mbaefese 5:3-5) Kpa aluer i wa ambaakaa la ken kwaghkuhwan u ityogholough nagh mbi doo ungwan, mbi lu ken ato kundu kundu shi mbi sagher iyol kpaa di ye? Maa se hii u wan atsam á á wuese myav u yaven a or a ivaa i eren shio, shin á wuese ieren i gban man icimbiv sha ci u keren msaanyol tsô la, shin á wuese aeren a isholibo ageneghee? Shin er se fe ser doo u se dondo igbenda i ior mba ve eren ambaakaa la ga nahan kpa, se mba ye ikyar a ve sha u kaven ve sha ikyondo i ve zeren la shin hwe u ve eren sha ityo la shin gbenda u ve lamen la shinii? Igbenda i Satan a yaren tom a mi sha u una núm uumace ve̱ dondo gbenda na u hôngorough ú henen kwagh la ngi myer kpile kpile je gande! (2 Mbakorinte 4:3, 4) Aluer se soo ser se gba ken to u atseregh na la ga yô, saa se palegh u dondon tar yemen a ú ijime gende gende la. Gba u se kav mba ve lu “utor sha tar cii mba ime ngin ne” la, shi se nôngo ityav a mkighir ve la tsung kpaa.—1 Peteru 5:8.
Í Wa Se Ago Iyol sha u Se̱ Hemba Ityav
13. Se er nan ve se fatyô u hemban tar u Satan a hemen ú ne, shin er se yen nahan je kpaa?
13 Cii man Yesu kpe yô, a kaa a mbaapostoli nav ér: “Taver nen asema, Mo M hemba tar ne.” (Yohane 16:33) Lu u ve kpa vea fatyô u hemban tar. Yange anyom nga karen ka kom er 60 nahan yô, apostoli Yohane nger wener: “Ka anti nan hembe tara, saa di u nan ne jighjigh er Yesu ka Wan u Aôndo la gaa?” (1 Yohane 5:5) Se mba tesen imba jighjigh u nan la sha u dondon atindi a Yesu shi suur sha Mkaanem ma Aôndo, di er Yesu kpa lu er nahan. Kanyi igen kpa i gbe u se ere? Gba u se lu vea tiônnongo u un a lu Ityough nagh la ikyooso ikyooso. Zum u se tsum yô, saa se zungwe tsung shi se ker mde u asorabo hen Aôndo sha ikyev i naagh ku Yesu la. Ka nahan ve se kpa, shin er se lu a mbamyen shi se tsum nahan je kpaa, se fatyô u hemban ityav mbin ye.—Pasalmi 130:3, 4.
14. Ôr Mbaefese 6:13-17, nahan tôô mbampin mba i pin la kua avur a ruamabera a i ne ken ikyumhiange ne gema time sha hanma vegher u ikyav mbi ken jijingi mbin.
14 Aluer ka u se za ikyura yô, saa se ‘tôô ikav mbi utyav mbi Aôndo cii,’ se undu mbigenev ken inya ga. Bugh ase Bibilo you ken Mbaefese 6:13-17, nahan ôr ipyasen i í ne sha kwagh u ikyav mbi shon la. Nahan, time sha er ú zua a mtsera sha mkor u hanma ikyagh kira ki ne la, sha u nan mbamlumun sha mbampin mba i nger shin heen ne.
‘Tsule kwange hen uya, ka mimi je la’
Aluer se fa mimi je kpa, u henen kwagh nduuruu man u gbidyen kwar sha mimi u ken Bibilo la kua u zan mbamkombo la una kura se nena? (1 Mbakorinte 10:12, 13; 2 Mbakorinte 13:5; Mbafilipi 4:8, 9)
‘Perutya, ka perapera je la’
Perapera ne ka u sha mnenge u ana? (Mpase 15:3)
Na ikyav i tesen er u vendan u dondon igbenda i Yehova i perapera la ka a tsen or sha iyolvihin i ken jijingi yô. (Duteronomi 7:3, 4; 1 Samuel 15:22, 23)
“Akôv shin angahar, ka mkoholyol u sha ivangeli i bem je la”
Aluer se tema a tema ga, kpa se mba zeren zenden zan hen ior za pasen ve akaa a Aôndo a ser a ver sha u van a bem la yô, kwagh la una kura se nena? (Pasalmi 73:2, 3; Mbaromanu 10:15; 1 Timoteu 5:13)
“Akuvautya, ka jighjigh u nan je la”
Aluer jighjigh u nan wase ngu dông a wa amise taveraa yô, se er nena zum u i nôngo ér a na se se̱ gba ahon shin se̱ cia yôô? (2 Utor 6:15-17; 2 Timoteu 1:12)
“Agunduutya u iyôô, ka myom je la”
Ishimaverenkeghen i myom la ka i wase or nan kera gema ishima i nan cii nan har sha akaa a inyar ga nena? (1 Timoteu 6:7-10, 19)
“Sanker u Jijingi”
Hanma shighe u se lu nôngon num a akaa a á te ityav sha mlu wase u ken jijingi la shin u mbagenev cii yô, kanyi i gbe u se har sha mini? (Pasalmi 119:98; Anzaakaa 3:5, 6; Mateu 4:3, 4)
Kanyi kwagh igen kpa i lu hange hange ken ityav yasev mbi ken jijingi nee? Ka kwa me i doo u se yar tom a mini? Man ka sha ci u an se yar tom a mini? (Mbaefese 6:18, 19)
15. Se nômbo ikyôr taveraa ken ityav mbi ken jijingi mbin nena?
15 Er se lu mbautyaav mba Kristu yô, se mba ken zege ikyumuitya i i lu nôngon ityav mbi ken jijingi yô. Aluer se mba tsevaa shi se mba yaren tom a ikyav mbi utyaav mbi Aôndo a ne se la tsema tsema yô, ityav mbin mbia gbihi se inya mayange ga cii. Kpa, se gema se taver a taver mba civir Aôndo mbagenev asema. Se wa iyol se keghen a kegh u nômbon ikyôr tan ityav mbin, shi a saan se iyol u samber aa loho u dedoo u Tartor u Aôndo u Mesiya la, gomoti u sha shon u Satan a hendan a mi sha ipila la.
Kwaghôron u Hiden Kimbir Kwagh
• Er nan ve mba civir Yehova ve til palegha sha ahendan a taregh ciilii?
• Ka atseregh a ken myer a nyi Satan a eren sha u una hungwa a Mbakristu ken jijingi?
• Ikyav mbi utyaav mbi Aôndo a ne la mbi kor se ken ityav yasev mbi ken jijingi mbin nena?
[Ufoto mba sha peeji 76 la]
Mba kohol akuraior cii yemen a ve hen Armagedon