-
Ka Nyi Bibilo i Ôr sha Kwagh u Yavaoro?U Fatyô u Lun Uma Gbem sha Won shi a Saan We Iyol!—Nenge Kwagh u Bibilo i Ôr Yô.
-
-
ITYOUGH 41
Ka Nyi Bibilo i Ôr sha Kwagh u Yavaor?
Ka i taver ior mbagenev kpishi u lamen sha kwagh u yavaor. Nahan kpa, Bibilo ka i a ôron kwagh u yavaor yô, i ôr wang, kpa i lu sha icivir. Kwagh u Bibilo i ôr la una wase se. I ôr ka kwagh u injaa kpishi, sha ci u ka Yehova u a gbe se la a ne i nger Bibilo ye. Nahan a fa kwagh u a hembe doon sha ci wase yô. A ôr se kwagh u se er ve a doo un, kua kwagh u una wase se u zuan a uma u tsôron yô.
1. Yehova nengen kwagh u yavaor la nena?
Kwagh u yavaor la ka iyua i doon tsung i Yehova a ne uumace yô. A soo ér i lu nom vea kwase u nan tseegh ve yaven a ayol a ve ye. Iyua ne ka i wase nom man kwase u maren mbayev tseegh ga, kpa ka i wase ve u tesen er ve soo ayol a ve yô. Ka nahan ve Mkaanem ma Aôndo ma kaa ér: ‘Ember kwase wou u sha uye la’ ye. (Anzaakaa 5:18, 19) Yehova soo ér noov man kasev mba ve lu Mbakristu yô ve eren kwagh a nom shin kwase ve sha mimi, nahan doo u mayange vea er idya ga.—Ôr Mbaheberu 13:4.
2. Ka nyi i lu idya?
Bibilo kaa a vese ér: “Mbaeren idya . . . vea ya dyako u Tartor u Aôndo ga.” (1 Mbakorinte 6:9, 10) Mba yange ve nger Bibilo ken zwa Grika la yange ve er tom a ishember i por·neiʹa u pasen kwagh u a lu idya yô. Ishember la wa u (1) nomsoor shin kwase yaven a ora u i lu nom shin kwase u nan ga yô, (2) nomsoor yaven a nomsoor shin kwase yaven a kwase, man (3) nomsoor shin kwase yaven a zendenya. Ka sea “nyagh idya” yô, i doo Yehova a vese shi se ayol a ase kpa kwagh la a wase se.—1 Mbatesalonika 4:3.
HEN KWAGH I ZA SHIMI
Nenge er u fatyô u palegh idya yô, kua mbamtsera mba u zua a mi sha u lun wang la.
3. Yevese idya
Orjighjigh ugen u yange i yilan un ér Yosev yô, yange venda u yaven a kwase ugen u soo ér a yav a na yô. Ôr Genese 39:1-12, maa lam nen sha mbampin mban:
Ka nyi yange i na ve Yosev yevese?—Nenge ivur 9.
U nenge wer Yosev yange er kwagh u dedoo? Er nan ve u ôr nahana?
Nyian ne, agumaior aa fatyô u dondon ikyav i Yosev la, yevese idya nena? Nenge VIDIO i i lu heen ne.
Yehova soo ér se cii se palegh idya. Ôr 1 Mbakorinte 6:18, maa lam nen sha mbampin mban:
Ka akaa a nyi nahan aa na or a hingir u za eren idya?
U fatyô u yevese idya nena?
4. U fatyô u hendan a imeen
Ka nyi ia na a taver u hendan a imeen i eren idyaa? Nenge VIDIO i i lu heen ne, maa lam nen sha mpin u a dondo ne.
Anmgbian u ken vidio la yange va kaven er akaa a un lu henen la kua ieren na ia na una hingir u eren kwagh a kwase na sha mimi ga yô, a er nena?
Mba ve civir Yehova sha mimi je kpa ashighe agen, ka i gba u vea nôngo kwagh kpoghuloo ve, vea de u henen sha akaa a aa hôngor mhen ve ye. U er nan ve u de u henen sha akaa a dang na? Ôr Mbafilipi 4:8, maa lam nen sha mbampin mban:
Ka akaa a nyi nahan i doo u se henen sha mini?
Aluer se mba ôron Bibilo shi se uve ityou ken tom u Yehova yô, kwagh la una wase se u hendan a ameen nena?
5. Atindi a Yehova nga wasen se
Yehova fa kwagh u a hembe doon sha ci wase yô. A ôr se kwagh u se er ve se lu wang kua mbamtsera mba se lu wang ve se zua a mi yô. Ôr Anzaakaa 7:7-27 gayô nenge VIDIO i i lu heen ne, maa lam nen sha mbampin mba ve dondo ne.
Gumor la yange palegh imeen ga nena?—Nenge Anzaakaa 7:8, 9.
Anzaakaa 7:23, 26 tese er idya ka i va a akaa a vihin kpishi yô. Kpa aluer se mba wang yô, ka mbamzeyol mba nyi se palegha?
Aluer se mba wang sha aeren a ase yô, kwagh la una wase se u va zuan a uma u tsôron nena?
Mbagenev nenge ér kwagh u Bibilo i ôr sha kwagh u nomso yaven a nomso man kasev yaven a kasev la doo ga. Kpa Yehova ka Aôndo u dooshima man a soo ér hanma or nana va zua a uma u tsôron. Nahan kpa, saa se kuran atindi a na ve se kuma u zuan a uma u tsôron ye. Ôr 1 Mbakorinte 6:9-11, maa lam nen sha mpin ne:
Sha ishigh ki Aôndo yô, ka isharen i nomsoor yaven a nomsoor shin kwase yaven a kwase la tseegh i lu i bo yee?
Se cii ka i gba u se sôr mbamlu asev ve se fatyô u eren kwagh u doon Aôndo ye. Kpa ityôkyaa ngi i nôngon ser se er nahana? Ôr Pasalmi 19:8, 11, maa lam nen sha mbampin mban:
U nenge wer atindi a Yehova a we sha kwagh u aeren a wang la, ka sha injaa? Er nan u ôr nahana?
Yehova wase ior kpishi hegen mba kuran atindi aa a we sha kwagh u aeren a wang la. We kpa una fatyô u wasen we
IOR MBAGENEV KA VE KAA ÉR: “U yaven a hanma or u u soo cii la ka kwaghbo ga, er ne soo ayol a en je ka cii la.”
We u nenge nena?
KA NYI U HENE?
Kwagh u yavaor la ka iyua i doon tsung i Yehova a ne nom man kwase sha u i saan ve iyol yô.
Mbampin mba umbur kwagh u i hen yô
Ka aeren agen a nyi kpa a kohol cii a lu idya?
Ka nyi ia wase se se palegh idya?
Ka sea kuran atindi a Yehova a we sha kwagh u aeren a wang la yô, kwagh la a wase se nena?
SEER HENEN KWAGH
Hen fa er i hii ve Aôndo a soo ér nomsoor man kwase u ve soo u lun imôngo yô ve er ivese la.
Hen fa er kwagh u Bibilo i ôr ér u nomsoor yaven a nomsoor shin kwase yaven a kwase ka kwaghbo la, a tese ér gba u se kôr ambaaior la ihyom ga yô.
“Ieren i Nomsoor Yaven a Nomsoor shin Kwase Yaven a Kwase la Ka Kwaghbo?” (Ngeren u sha Intanet)
Hen fa er atindi a Aôndo a we sha kwagh u yavaor la i lu sha u kuran se yô.
Nenge kwagh u yange wase orgen u yaven a nomso de ieren la, gema eren ishima i Aôndo yô, ken ngeren u a lu a itinekwagh ér “Ve nam icivir kpishi” la.
a Igbenda i bo i yaven a or ne, ka u yaven a or kpôô kpôô, man u ndiar nan alegh a yaven a or man u yaven a or shin ityô man u ngirigh gayô numben nan a alegh a yaven a or.
-
-
Ka Nyi Bibilo i Ôr sha Kwagh u Lun Kwav man Kwagh u Iveseghe?U Fatyô u Lun Uma Gbem sha Won shi a Saan We Iyol!—Nenge Kwagh u Bibilo i Ôr Yô.
-
-
ITYOUGH 42
Ka Nyi Bibilo i Ôr sha Kwagh u Lun Kwav man Kwagh u Iveseghe?
Sha ajiir agen yô, ior na jighjigh ér saa or a er kwase gayô nom ve a saan nan iyol ye. Nahan kpa, ka ior mba ve er ivaa cii i saan ve iyol ga, shi ka hanma or u nan lu kwav cii i saan nan iyol ga. Bibilo kaa ér iyua i ivesegh man i lun kwav la cii ka akaa a dedoo a Yehova a ne se yô.
1. Aluer u ngu kwav yô, ka mbamtsera mba nyi u zua a mini?
Bibilo kaa ér: “Aluer or er ivaa kpaa, a doo . . . kpa aluer or er ivaa ga yô, a hemba doon.” (Ôr 1 Mbakorinte 7:32, 33, 38.) Ka sha nyi igbenda nahan aluer or er ivaa ga ve “a hemba doon”? Mbakristu mba ve lu kwav la mba lun a nom shin kwase u vea lu nengen sha a nan ga. Sha nahan yô, mba hembe lun a ian. Ikyav i tesen yô, mbagen ka ve seer eren Yehova tom sha igbenda injaa er u yemen ken tar ugen za pasen loho u dedoo nahan. Kpa u hemban cii yô, ka ve lu a shighe u vea seer lun kôôsôô a Yehova yô.
2. Aluer u er ivaa sha tindi yô, ka mbamtsera mba nyi u zua a mini?
Er or ka nana lu kwav ve nan zua a mbamtsera kpishi nahan kape ivese kpa i lu je la. Bibilo kaa ér ‘guda uhar a u môm.’ (Orpasenkwagh 4:9) Mbakristu mba ve vese ayol a ve ka vea dondon akaawan a Bibilo ken ivese ve yô, mlu ve maa a zua vough sha kwagh u Bibilo i ôr ne. Mbakristu mba ve er ivaa sha tindi la, ka ve tôndo zwa u soon ayol a ve shi nan ayol a ve icivir hanma shighe cii. Sha nahan yô, ishima kera nyian ve er nomso man kasev mba ve gbe lun imôngo, a u eren ivese shio la ga. Shi ior ka vea er ivaa sha tindi yô, mbayev vev kpa ve hemba teman kpen ve iyol.
3. Yehova nenge ivese nena?
Shighe u Yehova zua nom man kwase u hiihii ivese la, a kaa ér: ‘Or nan undu ter u nan kua ngô u nan, nan var ken kwase u nan.’ (Genese 2:24) Yehova soo ér nom a soo kwase u nan shi kwase kpa a soo nom u nan, shi ve lu imôngo sha ayange a ve lu uma la cii. Ka shighe u nom shin kwase nan er idya tseegh, a ne ve ian i paven ivaa ye. Shighe u nom shi kwase nan er idya yô, Yehova na or u nan er idya ga la ian i nana fatyô u paven ivaa.a (Mateu 19:9) Yehova soo ér Orkristu nana er kwase môm tseegh, kwase Kristu kpa nana er nom môm tseegh.—1 Timoteu 3:2.
HEN KWAGH I ZA SHIMI
Hen fa kwagh u u er ve a saan we iyol shi u na a saan Yehova iyol, aluer u ngu kwav shin u er kwase shin nom je kpaa yô.
4. Er u lu kwav ne, er tom a mlu wou ne sha inja
Yesu yange nenge kwav ér ka iyua. (Mateu 19:11, 12) Ôr Mateu 4:23, maa lam nen sha mpin ne:
Er Yesu lu kwav yô, yange er tom u Ter na shi wase mbagen nena?
Mbakristu mba ve lu kwav la kpa, aluer ve dondo ikyav i Yesu la yô, a saan ve iyol. Nenge VIDIO i i lu heen ne, maa lam nen sha mpin u a dondo ne.
Mbakristu mba ve lu kwav la vea fatyô u eren tom a mlu ve la sha igbenda injaa nena?
U fa kpa?
Bibilo ver anyom a or a lu ve nana er nom shin kwase ga. Nahan kpa, i taver se ishima ér hemba doon u or nana kegh zan zan nana “kar iaven i hian a hia,” zum u isharen i yaven a or ka i taver ken or la. Sha ci u shighe la ka i taver agumaior u tsuan akaa sha inja.—1 Mbakorinte 7:36.
5. Tsua kwase shin nom sha kwaghfan
U tsuan nom shin kwase u u er la, ka kwagh u vesen ugen u i gbe u u tsua ken uma wou yô. Ôr Mateu 19:4-6, 9, maa lam nen sha mpin ne:
Er nan ve i doo u Orkristu nana torough u eren nom shin kwase ga?
Bibilo ia wase u u fan akaa a u nenge a mi ken kwase shin ken nomsoor ve u fa wer nana lu nom shi kwase u injaa yô. Kpa kwagh u hemban cii yô, i lu or u nan soo Yehova yô.b Ôr 1 Mbakorinte 7:39 man 2 Mbakorinte 6:14. Maa lam nen sha mbampin mban:
Er nan i gbe u se er kwase shin nom u nan civir Yehova a vese imôngo tseeghele?
Aluer se er kwase shin nom u nan civir Yehova ga nahan, u hen wer a lu Yehova nena?
Aluer u tôô annyamev mba ve lu kwaghmôm ga u kange ve igbur i môm yô, vea ya ican. Kwagh la tese ér aluer Orkristu nan er kwase shin nom u a civir Yehova ga yô, vea lu a mbamzeyol kpishi
6. Nengen ivese er Yehova kpa a nengen i la
Sha ayange a tsuaa la, Mbaiserael mbagen lu paven a kasev vev sha atôakyaa a injaa ga. Ôr Malaki 2:13, 14, 16, maa lam nen sha mpin ne:
Er nan ve ior ka vea pav ivaa sha ityôkyaa injaa ga ve, i vihi Yehova kpishi?
Idya man ivaa paven ka i va or u nan er idya ga la kua mbayev a ican kpishi
Nenge VIDIO i i lu heen ne, maa lam nen sha mpin u a dondo ne.
Aluer nom shin kwase wou civir Yehova ga kpa, u er nan ve a saan ne iyol ken ivese yene?
7. Kuran atindi a Yehova a we sha kwagh u ivesegh la
Alaghga a gba u or nana nôngo kwagh kpoghuloo ve nana fatyô u kuran atindi a Yehova a we sha kwagh u ivesegh la ye.c Kpa mba ve er nahan yô, Yehova ka a ver ve. Nenge VIDIO i i lu heen ne.
Ôr Mbaheberu 13:4, maa lam nen sha mbampin mban:
U nenge wer atindi a Yehova a we sha kwagh u ivesegh la, ka sha injaa? Er nan ve u ôr nahana?
Yehova soo ér Mbakristu ve ngeren avese a ve, shi shighe u ve pav ivaa kpaa ve za nger, vough er ken ityar kpishi gomoti a we tindi ér i eren nahan. Ôr Titu 3:1, maa lam nen sha mpin ne:
Aluer u er kwase shin nom yô, u nenge wer gomoti lumun a ivese you ér ka i sha tindi?
ALAGHGA ORGEN NANA PINE ÉR: “Saa or a er kwase shin nomo? Vea fatyô u gban lu imôngo tsô gaa?”
We u nenge nena?
KA NYI U HENE?
Wea lu kwav shin wea er kwase gayô nom kpa, akaa ne cii ka iyua i Yehova a ne yô. Mba ve lu kwav kua mba ve er kasev shin noov cii aluer mba eren ishima i Yehova yô, a fatyô u saan ve iyol.
Mbampin mba umbur kwagh u i hen yô
Aluer or ngu kwav yô, nana er tom a mlu u nan la sha inja nena?
Er nan ve Bibilo i kaa ér se vôso or u nan civir Yehova tseeghele?
Ka ityôkyaa i nyi tseegh Bibilo i kaa ér or a fatyô u paven a kwase shin nom u nana?
SEER HENEN KWAGH
Inja i u eren nom shin kwase “ken Ter tseegh” la ér nyi?
“Mbampin mba Mbaôron Takeda Ne Ve Pin La” (Iyoukura, Julai 1, 2004)
Nenge uvidio mba tiônôô uhar mba vea wase u u fan er u tsua akaa sha inja sha kwagh u shiôr man ivesegh yô.
Hen fa er i hii ve anmgbian ugen a nenge ér akaa a Yehova a ne un la hemba hanma kwagh u un de a kar un la ica je yô.
Ka akaa agen a nyi nahan i gbe u or a hen sha mi cii ve nana tsua u paven ivaa shin undun kwase shin nom u nan, za lun kwagh u nana?
Na “Kwagh u Aôndo je Zua” la Icivir (Iyoukura, Disemba 2018)
a Nenge Ngeren u Seer Tan Iwanger u sha 4 sha kwagh u shighe u nom man kwase ve kera lu imôngo ga, kpa i lu sha ci u idya ga yô.
b Sha ajiir agen yô, ka mbamaren ka ve tsua kwase shin nom sha ci u wan ve ye. Shighe u kwagh a lu nahan yô, mbamaren mbafankwagh ka ve hemba veren ishima ér or shin kwase u ve lu tsuan sha ci u wan ve la, i lu u nan soo Yehova yô, mba hembe nengen sha vegher u nan ngu a kwagh a ve shin imbakwagh la nahan ga.
c Aluer u ngu imôngo vea nomsoor shin kwase man ne er ivaa ga yô, ka we u tsua u undun nan shin vôson nan sha tindi ye.
-