Se Ember Nen Sha Ishimaverenkeghen Yase La

“[Se mba a] ishimaveren keghen uma u tsôron, u Aôndo u A eren aie ga la, A tôndo zwa je er shighe lu a lu ga la.”​—TITU 1:2.

U HIDEN SAVEN A SAV

Hii nan se fe ser iember ka i lu sha shighe u mba i shigh ve mkurem mbara ve civir Aôndo sha mimi zan zan ku ve laa?

Ishimaverenkeghen i mba ve lu iyôngo igen la gba zua vea i mba i shigh ve mkurem la nena?

Aluer se soo ser ishimaverenkeghen yase la i kure sha mi vough yô, ka “icighanmlu” man aeren a “civir Aôndo” a nyi i doo u se lu a mini?

 1. Ishimaverenkeghen i Yehova a ne se la ia wase se u wan ishima nena?

APOSTOLI PAULU Yange kaa ér Yehova ka “Aôndo u ishimaverenkeghen.” Shi kaa ér Yehova una ‘iv se a iember gbing kua bem kpaa sha jighjigh u se ne la, sha u se ngee a ishimaverenkeghen sha agee a Icighan Jijingi yô.’ (Rom. 15:13) Aluer se iv a ishimaverenkeghen yô, se kôrcio u wan ishima a nyityô mlu u se nyer ker cii, nahan se za hemen u lun a bem man iember. Ishimaverenkeghen i Mbakristu mba i shigh ve mkurem kua iyongo igen la cii, ngi er “imandetso i uma i dông i i tenger ga” nahan. (Heb. 6:18, 19) Ishimaverenkeghen yase la ka kwagh u se fatyô u suur sha mi ken ayange a se lu tagher a mbamtaver kpishi ne, man ia wase se se ta akperan shin se ban a jighjigh u nan ga.—Ôr Mbaheberu 2:1; 6:11.

 2. Ka atô a ishimaverenkeghen ahar a nyi Mbakristu ve lu a mi nyiana?

² Mbakristu mba ve lu uma hen shighe u mkur ne mba a ishimaverenkeghen atô ahar. Mbakristu mba i shigh ve mkurem, mba ve lu “anikyumuile u kpeghee” la mba a ishimaverenkeghen ér vea yem sha, vea za zua a uma u kpen ga, shi vea lu upristi shi vea tema tor a Kristu imôngo ken Tartor na. (Luka 12:32; Mpa. 5:9, 10) “Zegeikpelaior” i i lu “iyôngo igen,” i í hembe ngeen a Mbakristu mba i shigh ve mkurem la mba a ishimaverenkeghen i va lun uma gbem sha won ken paradiso, sha ikyev i Tartor u Mesiya la. (Mpa. 7:9, 10; Yoh. 10:16) Gba u hanma shighe cii, iyôngo igen la ia umbur er myom ve a har sha u ve suen “anmgbianev” mba Kristu mba i shigh ve mkurem mba ve lu shin tar la yô. (Mat. 25:34-40) Mba i shigh ve mkurem la vea ngohol injar ve, shi mba ve lu iyôngo igen la kpa vea ngohol injar ve. (Ôr Mbaheberu 11:39, 40.) De se hii time sha kwagh u ishimaverenkeghen i mba i shigh ve mkurem la.

MBAKRISTU MBA I SHIGH VE MKUREM LA MBA A “ISHIMAVERENKEGHEN I I LU UMA” YÔ

3, 4. Yehova “mar” Mbakristu mba i shigh ve mkurem mbara “hegh” nena, man ka ishimaverenkeghen i nyi ve lu a mini?

³ Apostoli Peteru yange nger uwashika uhar hen Mbakristu mba i shigh ve mkurem la, a yila ve ér “mba i tsough ve.” (1 Pet. 1:1) A pase kwagh u ishimaverenkeghen i doon tsung, i i lu sha ci u anikyumuile u kpeghee la vighe vighe. Peteru nger ken washika na u hiihii la ér: “I̱ wuese Aôndo, Ter u Ter wase Yesu Kristu u A mar ne hegh sha mhôônom Nam ma zungwen ma vesen er se̱ lu a ishimaverenkeghen i i lu uma sha mnder u Yesu Kristu shin mbakpenev la, se̱ lu a dyako u hôôn ga, u fisee kpaa ga, u usen tsô kpaa ga, u i koso un Sha sha ci wen, ne mba i kor ne sha agee a Aôndo sha jighjigh u nan, sha u ngohol myom u i kegh iyol i ver a ver u pasen un sha iyange i masetyô yô. Sha kwagh ne yô, ne mba ember kpishi.”—1 Pet. 1:3-6.

⁴ Yehova tsua Mbakristu kpuaa sha u ve za tema tor vea Kristu sha, nahan a ‘mar ve hegh,’ ve hingir ônov mba Aôndo mba ken jijingi. I shighe ve mkurem sha icighan jijingi, ve hingir utor man upristi vea Kristu imôngo. (Mpa. 20:6) Peteru pase ér ‘mmar u he’ la bugh ve gbenda u lun a “ishimaverenkeghen i i lu uma” yô; i yila i ér “dyako u hôôn ga, u fisee kpaa ga, u usen tsô kpaa ga,” u i koso un sha ci ve “Sha” yô. Nahan mba i shigh ve mkurem mbara “ember kpishi” je. Kpa, saa vea tile sha jighjigh ve, ishimaverenkeghen ve la ia va kure sha mi vough ye.

5, 6. Er nan ve i gbe kpee u Mbakristu mba i shighe ve mkurem mbara vea za hemen u tile sha mimi?

⁵ Peteru wa Mbakristu mba i shigh ve mkurem mbara kwagh ken washika na u sha uhar la ér ve ‘nôngo ve taver a taver myer u i yila ve la man mtsough u i tsuwa ve la.’ (2 Pet. 1:10) Gba kpee u vea nôngo tsung vea lu a aeren a Mbakristu, amba er jighjigh u nan man mcivir u civir Aôndo man mdoo u doon a anmgbianev, man dooshima nahan. Peteru kaa ér: “Aluer akaa ne aa lu ken a ven man á ngee je, á dumbur yô, . . . né kera lu gbilin shin mbaumen atam ga, ze.”—Ôr 2 Peteru 1:5-8.

⁶ Kristu, u yange i nder un shin ku la tindi loho hen mbatamen mba i mar ve ken jijingi, mba ken tiônnongo u sha derianyom u hiihii, u ken Filadelfia, ken Ashia u Kiriki la ér: “Er u kor kwaghôron u ishimawan Yam yô, Mo kpaa Me kura u sha shighe u imeen i i lu van sha tar cii sha u karen mba ve tem sha tar yô. M ngu van fefa. Kusu kwagh u u lu a mi la gbang gbang sha u ma or nana̱ de ngohol we tsar ga yô.” (Mpa. 3:10, 11) Aluer ma Orkristu u i shigh nan mkurem nan kera tile sha mimi ga yô, nana kera ngohol “tsar u engem u sha ityou u usen mayange ga,” u i tende zwa u nan mba ve til sha mimi zan zan mkur la ga.—1 Pet. 5:4; Mpa. 2:10.

U NYÔRON TARTOR U TSÔRON

 7. Ka ishimaverenkeghen i doon tsung i nyi, Yuda yange ter i ken washika naa?

⁷ Ken inyom i 65 la, Yuda, u lu ngô môm vea Yesu la, yange nger washika hen Mbakristu mba i shighe ve mkurem sha jijingi vea na imôngo mbara, a yila ve ér “mba i yer ve.” (Yuda 1; nenge Mbaheberu 3:1.) Yange wa ishima u ngeren ve washika sha kwagh u ishimaverenkeghen i zuan a myom ken Tartor u Aôndo sha, i Mbakristu cii ve “zough sha mi la.” (Yuda 3) Shin er akaa agen kpa lu torough torough a una ôr kwagh sha mi nahan kpa, a kure washika na u tiônôô la sha u ôron kwagh u ishimaverenkeghen i Mbakristu mba i shigh ve mkurem mbara ve lu a mi la, nahan a nger ér: “Un u A lu a agee a Una kura ne sha u né kera nôngo gbev ga shi Una ver ne né lu a acôghor iyol ga sha ishigh ki iengem Na a iember tsung je, Aôndo u mtswen, Oryiman wase ken Yesu Kristu Ter wase ne, iengem i̱ lu i Na kua shagba man agee man tahav, je er kwagh lu a vande lun ga man hegen kpaa zan zan gbem sha won.”—Yuda 24, 25.

 8. Er i tese ken Yuda 24 nahan, ka nyi i tese ér iember ka i lu sha shighe u mba i shigh ve mkurem mbara ve civir Aôndo sha mimi zan zan ve kar kpene?

⁸ Sha kpôô yô, hanma Orkristu u yange i shighe nan mkurem cii nan soo ér Aôndo a sue nan sha ér nana kera nôngo gbev nana hingir u nyôron ken mtim ga yô. Bibilo na ve ishimaverenkeghen ér Yesu Kristu una va nder ve shin mbakpenev, vea hingir ior mba ken jijingi mba lun vough, nahan vea lu a ian i zan sha ishigh ki Aôndo. Or u i shigh nan mkurem ka nana tile sha mimi zan zan nana kar kpen yô, ka i ‘nder iyol i nan sha inja i jijingi,’ i nder “kwagh u a lu u hôôn ga,” u a lu “kwagh u icivirigh” la. (1 Kor. 15:42-44) Aluer “m-ember una lu Sha sha ci u orsholibo môm u nan gema ishima” yô, nenge ase er iember ia mgbough sha, shighe u ma anmgbianev u Kristu nan til sha mimi zan zan nana kar kuren tom u nan shin tar yô. (Luka 15:7) Yehova man mbatyomov mba jighjigh vea “ember” vea ma or u i shigh nan mkurem, u nana lu ngohol injar i nan hen shighe la “tsung” je.—Ôr 1 Yohane 3:2.

 9. I ‘na’ mba i shigh ve mkurem mba ve til sha mimi la ‘ian enger enger’ i nyôron ken Tartor nena, man ishimaverenkeghen ne bende a mba i shigh ve mkurem mba ve lu uma shin tar la nena?

⁹ Peteru kpa yange nger Mbakristu mba i shigh ve mkurem la washika kaa ér aluer ve taver myer u i yila ve la sha u tilen sha jighjigh yô, “á hemba nan [ve] u nyôron tartor u tsôron u Yesu Kristu, Ter wase man Oryiman wase enger enger.” (2 Pet. 1:10, 11) A ‘na ve ian enger enger’ i nyôron ken Tartor u sha, ken iengem tsung. Alaghga kwagh ne shi ngu tesen ér mba ve taver ishima ve til sha mimi la vea va zua a averen a vesen kpishi. Vea hide vea hen sha tom u yange ve er sha jighjigh la nahan, ishima ve ia iv a iember man iwuese kpishi. Ishimaverenkeghen ne ka i taver Mbakristu mba i shigh ve mkurem mba ve lu uma shin tar mbara ishima u ‘nyôôso mfe ve,’ shi zan hemen a tom ve kpaa.—1 Pet. 1:13.

“ISHIMAVERENKEGHEN” I I LU SHA CI U IYONGO IGEN LA

10, 11. (a) Ka ishimaverenkeghen i nyi, iyôngo igen la i lu a mi? (b) Ishimaverenkeghen i shin tar la gba zua vea “mpase u á va pase ônov mba Aôndo ken igbar la” nena?

¹⁰ Apostoli Paulu yange nger washika hen “ônov mba Aôndo” mba i mar ve ken jijingi mbara sha kwagh u ishimaverenkeghen i ve lu a mi i va lun “mbayandyako” a Kristu imôngo la. Maa a ôr kwagh u ishimaverenkeghen i doon tsung i Yehova a ne iyongo igen, i i gande u ôron i iyenge la, ér: “Akaa a i gbe a sha won cii [ka uumace je la] nga veren ashe keghen mpase u á va pase ônov mba Aôndo [mba i shigh ve mkurem mbara] ken igbar la tsung je. Gadia i gbihi akaa a i gbe a cii ken dang, lu sha ishima i a nahan ga, kpa lu sha ishima i Un u A gbihi a ker la. Kpa lu sha ishimaverenkeghen, gadia akaa a i gbe a la kpaa á va pase a sha ikyev i mlu u hôôn la á tuhwa, á za a mi ken mlu u engem u lun a ikyangenev ga u ônov mba Aôndo la.”—Rom. 8:14-21.

¹¹ Yehova yange na uumace “ishimaverenkeghen” shighe u tôndo zwa ér una ver “vor” u ua yima se sha ikyev i “tseyô,” u a lu Satan Diabolo la. (Mpa. 12:9; Gen. 3:15) Ka Yesu Kristu a lu vegher u vesen u “vor” la ye. (Gal. 3:16) Yesu na uumace ishimaverenkeghen ér a va pase ve sha ikyev i isholibo man ku a tuhwa. Ishimaverenkeghen i shin tar la gba zua vea “mpase u á va pase ônov mba Aôndo ken igbar la.” Mba i shigh ve mkurem mbara mba vegher u sha uhar u “vor” la. A va ‘pase ve ken igbar’ shighe u vea va a Kristu imôngo sha u timin botar u Satan ne kera la. (Mpa. 2:26, 27) Nahan kwagh ne una na iyôngo igen, i i dugh ken zegecan la myom.—Mpa. 7:9, 10, 14.

12. Ka mbamtsera mba doon tsung mba nyi mpase u a va pase mba i shigh ve mkurem ken igbar la una va uumace a mi?

¹² Nenge imba er Hemen u Yesu u Anyom Dubu la ua va uumace a mpeveryol la sha wono! Hen zum la, shi a seer ‘pasen ônov mba Aôndo ken igbar’ shighe u vea lu eren tom u pristi vea Kristu imôngo sha u uumace ve̱ zua a mbamtsera mba nagh ku ipaan ku Yesu la. Shighe u Tartor u Aôndo ua hemen uumace cii la, tegh tegh tsô, ua pase ve “sha ikyev i mlu u hôôn la á tuhwa.” Shi ua yima ve sha ikyev i isholibo man ku. Aluer ve tile sha mimi ken anyom dubu la man shighe u anyom la aa bee ve a mase karen ve la yô, a nger ve ati ken “ruamabera u uma” gbem sha won. Vea nyôr ken “mlu u engem u lun a ikyangenev ga u ônov mba Aôndo la.” (Mpa. 20:7, 8, 11, 12) Sha kpôô yô, ishimaverenkeghen ne ka i doon tsung!

DE HUNGUR A ISHIMAVERENKEGHEN YOU LA GA

13. Ishimaverenkeghen yase la har sha nyi, man ka hanma shighe a pase Kristu ken igbaraa?

¹³ Uwashika uhar mba jijingi mgbegha Peteru nger la mba a akaawan kpishi a wasen mba i shigh ve mkurem la kua iyôngo igen cii u lun a ishimaverenkeghen ve la ken ishima hanma shighe cii. Á pase ér ishimaverenkeghen la i har sha ityom i ve eren la ga, kpa i har sha mlumun u sha mhôôn u Yehova. Á nger ér: “Lu nen geng ge geng, ishimaverenkeghen yen i̱ lu sha mlumun u sha mhôôn u i lu van ne a mi sha m-ande u Yesu Kristu la vough.” (1 Pet. 1:13) A pase Kristu ken igbar shighe u una va sha u va nan mbadondon nav mba jighjigh mbara injar shi timin mba ve vende Aôndo la.—Ôr 2 Mbatesalonika 1:6-10.

14, 15. (a) Ka nyi se er ve se luun a ishimaverenkeghen yase la ken ishima hanma shighe? (b) Peteru yange wa se kwagh ér nyi?

¹⁴ Saa se ver ishima yase sha mve u ‘iyange i Yehova’ la keng ve, se luun a ishimaverenkeghen yase la ken ishima hanma shighe ye. Yehova una tim ugomoti mba uumace mba ve lu hegen la, ka “usha” je la, man mbaaferev, ka “tar” je la, kua “asemaakaa” a shin u la cii. Peteru nger ér: “Doo u né lu ken icighanmlu . . . nana? Er ne keghen mve u iyange i Aôndo, man ne eren sha u i̱ va fefa yô; sha iyange la yô, Usha vea yegh vea saa kera man asemaakaa cii aa hia aa sough kera.”—2 Pet. 3:10-12.

¹⁵ “Usha mba hev” [Ka Tartor u Kristu je la], vea kar a tile sha ityough ki “Usha” mba ve lu hegen ne, shi tar u he [ka nongoior u he u shin tar je la], ua kar a tile sha ityough ki “tar” u u lu hegen ne. (2 Pet. 3:13) Peteru tese se kwagh u se er ve se za hemen u veren ishima “keghen” usha mba hev man tar u he u i tende zwa u van a mi la wang. A nger ér: “Ne mbadoon mo ishima, er ne lu keghen akaa ne yô, nôngo nen tsung sha u á kohol ne ken bem sha ishigh Nagh né lu wang a acôghor iyol ga yô.”—2 Pet. 3:14.

EREN KWAGH U A ZOUGH SHA ISHIMAVERENKEGHEN YOU LA YÔ

16, 17. (a) Ka “icighanmlu” man aeren a “civir Aôndo” a nyi i doo u se lu a mini? (b) Ishimaverenkeghen yase la ia kure nena?

¹⁶ Gba u se luun a ishimaverenkeghen yase la ken ishima hanma shighe tseegh ga, kpa se eren kwagh u a zough sha i kpaa yô. Gba u se ver ishima sha er se lu ambaaior a Yehova a lumun a ve yô. U se lun ken “icighanmlu” la inja na yô, ka u ‘zende wase u hen atôatyev ua lu wanger wanger,’ sha u eren akaa a Aôndo a lumun a mi yô. (2 Pet. 3:11; 1 Pet. 2:12) Gba kpee u ‘se doo ayol a ase.’ Kwagh ne wa u se eren kwagh u se fetyô cii sha u zan hemen u suen mzough wase u anmgbianev u sha tar cii la, kua ken tiônnongo kpaa. (Yoh. 13:35) Peteru shi ôr kwagh u aeren ase a “civir Aôndo” la, inja na yô ka akaa a se eren sha u seer taver ikyar i se ye vea Yehova la. Akaa ne wa gbenda u se eren mbamsen la ker, kua Bibilo yase i ôron ayange ayange man kwaghhenen u sha tseeneke wase la man mcivir wase u hen tsombor kua u pasen “Loho u Dedoo u tartor” kpoghuloo kpaa.—Mat. 24:14.

¹⁷ Hanmô wase yô, nan soo ér nana lu imbaor i Yehova a lumun a nan shi una va yima nan shighe u botar ne una va “sough kera” la. Hen zum la “ishimaveren keghen uma u tsôron, u Aôndo u A eren aie ga la, . . . tôndo zwa je er shighe lu a lu ga la” ia kure sha mi vough.—Titu 1:2.

[Foto u sha peeji 22 la]

I “mar” Mbakristu mba i shigh ve mkurem mbara “hegh” sha er ve̱ lu a “ishimaverenkeghen i i lu uma” yô

[Foto u sha peeji 24 la]

Tsombor wou u de hungur a ishimaverenkeghen yase la ga