Er Tar Ne Ua Tim La
“Ne mba ken ime ga, nahan iyange la ia kera va tser ne er ormbaiv nahan ga.”—1 TES. 5:4.
Ú FATYÔ U PASEN KPA?
Ka akaa a se lu a̱ nenge a mi ga a nyi, i ter ken avur a Bibilo a a dondo nee?
Daniel 2:44
1. Ka nyi ia wase se u kuran shi wan ishima a ameene?
ICA a kera gba ga tsô akaa a kpilighyol aa er sha tar. Akaaôron a profeti a a lu kuren sha mi la tese ér kape kwagh á lu je la, nahan gba u se kuran. Kpa ka nyi ia wase se u kurana? Apostoli Paulu wa se kwagh ér se “veren asema sha akaa a i nengen a mi . . . ga la.” Gba u se umbur ser Yehova ngu va nan se uma u tsôron, a lu sha ga yô a lu shin tar. Paulu yange nger mkaanem man sha u taver anmgbianev nav mba ken Kristu asema ér ve ver ishima sha injar i vea va zua a mi sha jighjigh ve u nan la. Lu u vea er nahan yô, kwagh ne una wase ve u wan ishima a ameen man mtev u sha ican kpaa.—2 Kor. 4:8, 9, 16-18; 5:7.
2. (a) Ka nyi se er ve ishimaverenkeghen yase ia seer tavera? (b) Ka nyi se time sha mi ken ngeren ne man ngeren u una dondo laa?
2 Ityesen i se zough a mi ken kwaghwan u Paulu ne yô, ér: Aluer se soo ser se za hemen u lun a ishimaverenkeghen taveraa yô, se ver ishima sha akaa a á lu se sha ishi la tseegh tsô ga, kpa se ver ishima sha akaaôron a profeti a doon tsung, a se lu a nenge a mkur u a ga la. (Heb. 11:1; 12:1, 2) Yô, de se time nen sha akaaôron a profeti pue, a aa kure sha mi cii ve se mase zuan a uma u tsôron la.a
KA NYI IA ER ICA A GBA GA MAA MKUR UNA VA?
3. (a) Ka nyi i nger ken 1 Mbatesalonika 5:2, 3, i̱ lu a kure sha mi ga? (b) Ka nyi mbahemenev mba gomoti vea va ere, man ka unô alaghga vea dondo ve u eren kwagh shono?
3 Apostoli Paulu yange tsengaôron kwagh u vesen ugen môm u a lu a er ga yô. A ôr kwagh ne ken washika u yange nger hen Mbatesalonika la. (Ôr 1 Mbatesalonika 5:2, 3.) A ôr kwagh u “iyange i Ter.” “Iyange i Ter” i i ér kwagh u i heen ne ia hii sha mtim u kwaghaôndo u aiegh, ia kure sha ityav mbi Armagedon la. Nahan kpa, zum u a shi zorough zorough u iyange i Yehova ia hii la, mbahemenev mba tar ne vea lu kaan ér “Bem, man mkpeyol.” Alaghga vea ôr kwagh ne kwa môm, shin vea ôr kwa kimbir kimbir, sha ashighe kposo kposo. Alaghga ugomoti mba tar ne vea lu henen ér ica a kera gba ga tsô vea bee a uzayol vev mba vesen mbagenev. Mbahemenev mba kwaghaôndo yô vea er nyi? Ve kpa mba ior i tar ne, nahan alaghga vea dondo mbahemenev mba gomoti sha u kaan ér “bem, man mkpeyol.” (Mpa. 17:1, 2) Nahan ieren i mbahemenev mba aduav ne ia tese ér mba dondon ikyav i uprofeti mba aiev mba ken tar u Yuda, ú sha ayange a tsuaa la. Yehova yange ôr kwagh u uprofeti mban kaa ér: “Mba kaan er: Bem, bem; kpa bem ngu ga.”—Yer. 6:14; 23:16, 17.
4. Ka nyi se fe, kpa ior kpishi nyian ve fe ga?
4 A̱ lu unô je vea va kaa ér “bem, man mkpeyol” kpa, kwagh ne una tese ér iyange i Yehova soon hiin. Ka nahan ve Paulu yange kaa ér: “Anmgbianev, ne mba ken ime ga, nahan iyange la ia kera va tser ne er ormbaiv nahan ga” ye. (1 Tes. 5:4, 5) Ior kpishi fa kwagh u Bibilo i tsengeôron sha akaa a a lu eren sha tar nyian ne ga, kpa se yô se fa. Kwaghôron u profeti u a pase ér ior vea lu kaan ér “Bem, man mkpeyol” la una kure sha mi nena? Gba u se ver ashe se nenge er kwaghôron ne una va kure sha mi la. Sha nahan yô, se kange nen ishima se “lu nen per geng ge geng.”—1 Tes. 5:6; Sef. 3:8.
KWAGHAÔNDO U AIEGH FA ÉR MBA VA TIMIN UN KERA GA
5. (a) “Zegecan” una hii nena? (b) Ka hanma idyakwase a henen ér un “tema tor,” nahan kwagh u vihin môm kpa una er un ga?
5 Ka nyi igen kpa ia va ere? Paulu kaa ér: ‘Zum u vea kaan er: Bem, man mkpeyol yô, ka zum la je mtim una ande sha a ve ibuv ye.’ Mtim ne una hii van sha ukwaghaôndo mba aiev mba sha tar cii. Bibilo zom ve cii yila ér “Zegebabilon” shin “idyakwase.” (Mpa. 17:5, 6, 15) A tim nyityô kwaghaôndo u aiegh cii kera, kua mba ve sengen ér ve mba Mbakristu la cii. Kwagh ne una gema a lu mhii u “zegecan” la. (Mat. 24:21; 2 Tes. 2:8) Ior kpishi vea nenge mtim ne nahan, a kpiligh ve iyol. Sha ci u nyi? Sha ci u idyakwase ne una lu henen ken ishima na ér un “tema tor,” nahan “ijungwen kpaa [una] nenge a mi ashe ga,” mayange kwagh u vihin una er un ga. Kpa ica a gba ga tsô una kav er mhen na la a lu u shami ga yô. A tim un kera fese, er ka ken “iyange i môm” nahan.—Mpa. 18:7, 8.
6. Ka unô vea tim kwaghaôndo u aiegh kera?
6 Bibilo kaa ér “inyam” i lun a “akor pue” ia ta num sha idyakwase ne. Aluer se time ken takerada u Mpase yô, se kav er inyam la i til sha ityough ki Mzough u Ityar Cii, u i yer ér United Nations shin UN la yô. “Akor pue” la tile sha ityough ki ugomoti mba ainge mba ve lu suen “inyam” shon i i lu “nyian bong” la cica cii.b (Mpa. 17:3, 5, 11, 12) A tim idyakwase la gburu gburu nena? Ityar i i lu ken Mzough u Ityar Cii la ia ngohol idyakwase la akaa cica cii, ia tsen aeren a na a ijimbagh la ken igbar, ia “nande un sha usu.” Kape a tim kwaghaôndo u aiegh sha won cii kera je la.—Ôr Mpase 17:16.
7. Ka nyi ia na ve “inyam” la ia ta num sha idyakwase laa?
7 Kwaghôron u profeti u ken Bibilo shi tese kwagh u una na ve a ta num sha kwaghaôndo u aiegh la kpaa. A kaa ér Yehova una mgbegha mbahemenev mba tar ne “sha u ve̱ er sha awashima Na,” ve tim un vindi vindi yô. (Mpa. 17:17) Kwaghaôndo za hemen u van a ayôôso sha tar, sha nahan yô, alaghga ugomoti mba sha tar cii vea nenge ér aluer i tim idyakwase ne kera yô, vea zua a mmem. Shighe u mbahemenev mban vea ta num sha idyakwase ne la, vea hen ér ve mba eren kwagh ne “a ishima i môm” je. Nahan kpa, vea gema a lu ikyagh ki tomough ki Aôndo una lu eren tom a mi, sha u timin kwaghaôndo u aiegh kera yô. Sha nahan yô, vegher u tar u Satan ne ugen una hide a ta num sha vegher ugen, kpa Satan una lu a tahav mbu yangen kwagh ne ga.—Mat. 12:25, 26.
A TA NUM SHA IOR MBA AÔNDO
8. “Gogi, u ken tar u Magogi” una ta num sha unô?
8 A timin kwaghaôndo u aiegh kera yô, ior mba Aôndo mba vea lu er gar u a “lu a ugir ga la” vea “tema bem bem a mkpeyol.” (Esek. 38:11, 14) Nahan ka nyi ia er mbacivir Yehova, mba i lu inja er mba a orjime ga nee? A̱ shi nan kpa, hen zum la “ior kpishi” vea kohol cii vea ta num sha a ve. Mkaanem ma Aôndo pase kwagh u una za hemen la ér, ka “Gogi, u ken tar u Magogi” una ta num sha ior mba Aôndo ye. (Ôr Esekiel 38:2, 15, 16.) Doo u se nenge kwagh u num u a va ta sha ior mba Aôndo ne nena?
9. (a) Ka nyi í hembe hangen Mbakristu u i̱ ere? (b) Ka nyi i gbe u se er nyian sha er jighjigh wase u nan una hemba tavera?
9 Er se fe ser a va ta num sha ior mba Aôndo nahan kpa, doo u ishima ia nyian se a kar ikyaa inya ga. Kwagh u a hembe hangen se yô, ka myom wase ga, kpa ka u i̱ tsegha iti i Yehova, shi i̱ tese ken igbar ér ka un a kom u hemen sha won cii ye. Yehova ôr kwagh ne ken takerada u Esekiel la hemba kwa 60, ér: “Man né fa er Mo M lu Ter ye.” (Esek. 6:7) Sha nahan yô, se mba veren ashe keghen shighe u kwagh ne una kure sha mi la. Shi se na jighjigh ser, “mba ve civir Aôndo la Ter fa u yiman ve ken imeen.” (2 Pet. 2:9) Se gema se nôngo sha afatyô wase cii, se tile dông sha jighjigh wase u nan, sha er sea va tagher a nyityô ikyaren kpa, se var a Yehova her yô. Nahan ka nyi i doo u se ere? Doo u se eren msen shi se henen Mkaanem ma Aôndo shi se gbidyen kwar sha ma, shi se pasen mbagenev loho u dedoo u Tartor kpaa. Kwagh ne una na ishimaverenkeghen yase i va zuan a uma u tsôron la ia seer taver her dông er “imandetso” nahan.—Heb. 6:19; Ps. 25:21.
AKURAIOR CII AA FA YEHOVA
10, 11. Ka nyi ia na ve ityav mbi Armagedon mbia hii, man ka nyi ia er hen zum laa?
10 Ka kwagh u cieryol u nyi una er shighe u a ta num sha mbacivir Yehova laa? Yehova una tindi Yesu vea akumautya a sha, vea sen shin tar vea va nôngo kwagh sha ci u ior mba Aôndo. (Mpa. 19:11-16) Kwagh ne una lu “ityav mbi iyange i vesen i Aôndo, Uhembanagee,” mbi i yer ér Armagedon la.—Mpa. 16:14, 16.
11 Yehova yange pase kwagh u ityav mbin sha ikyev i Esekiel ér: “Me yila sanker hen iwo Yam cii, sha u tan num sha a na, kape Ter AÔNDO A kaa ne; sanker u hanma or una lu num a anngô u nan.” Mciem ma a gba mba ve lu ken vegher u Satan la iyol, vea hingir tum tu tum, nahan vea hingir u wuan ayol a ve. Shi Satan, u a lu Gogi la kpa kwagh a tser un. Yehova kaa ér: “Me nôô . . . usu man sulfur sha a na, man sha akum a na la, man sha ior kpishi, mba ve lu a na imôngo la.” (Esek. 38:21, 22) Ka nyi ia due ken kwagh u Aôndo una er nee?
12. Ka nyi a va gba kpee u akuraior aa fa?
12 Shighe la akuraior ne aa kav er i lu Yehova a ne zwa ér i tim a yô. Nahan alaghga mba ve te ikyaa a Satan la vea ôr kwagh u Mbaigipiti mba yange ve zenda Mbaiserael ijime ve za ar shin Zegemnger u Nyian la kpa ve ôr la. Ve kaa ér: “[Yehova] ta ikyaa ken a ve”! (Eks. 14:25) Hen shighe la vea fa Yehova kpee je. (Ôr Esekiel 38:23.) Se mgbôghom a shighe u akaa ne aa hii la kuma nena?
TARTOR UGEN UA KERA KAR A HEMEN GA
13. Ka nyi se fe sha kwagh u vegher u sha utaan u eev mbu Daniel yange pase kwagh u mbu laa?
13 Kwaghôron u profeti Daniel ugen wase se u fan shighe u se lu ker hegen ne. Daniel pase kwagh u zegeuee ugen u lun er or nahan, shi lun a avegher kposo kposo. (Dan. 2:28, 31-33) Eev mbun tile sha ityough ki ityartor i yange i ta num sha ior mba Aôndo mba tsuaa mbara, kua mba sha ayange ne kpaa la. Ityartor ne ka, tartor u Babilon, man tartor u Mbamedia man Mbapershia, man tartor u Grika, man tartor u Roma, kua tartor u sha ayange ne, u u lu u masetyô la. Kwaghôron u profeti u Daniel ne tese ér akevangahar man ahôangahar a eev mbun tile sha ityough ki tartor u masetyô ne. Shighe u i lu nôngon Ityav mbi Tar cii Mbi Hiihii la, tar u Ingila ya ikyar a tar u Amerika kôôsôô. Nahan vegher u sha utaan u eev mbu Daniel yange pase kwagh u mbu ne tile sha ityough ki tartor u Amerika vea Ingila, u ú hembe tahav sha tar cii la. Akevangahar ne ka vegher u masetyô u eev mbun, nahan kwagh ne tese ér ma tartor u uumace môm ua kera kar a hemen sha tar ga. Er akevangahar man ahôangahar a iyôôgh la a nongo sha inyatyuu yô, tese ér tartor u Ingila man Amerika ngu fetyô u eren tahav er u soo la ga.
14. Ka ityar i han ia hemba tahav sha tar cii shighe u Armagedon una va laa?
14 Kwaghôron u profeti ne shi tese ér zege iwen u yange bugh sha uwo, ken inyom i 1914 la, tile sha ityough i Tartor u Aôndo. Uwo la tile sha ityough ki ian i Yehova a lu a mi hemen la. Ica i gba ga tsô iwen la ia va ta sha eev mbura. Ia cagh akevangahar a mbu, kua eev mbura cii, sha ityav mbi Armagedon mbira. (Ôr Daniel 2:44, 45.) Sha nahan yô, shighe u Armagedon una va la, a lu Amerika vea Ingila vea hemba tahav sha tar cii her ye. A doo se u va nengen er kwaghôron u profeti ne una kure sha mi la kpen kpen!c Kpa ka nyi Yehova a we ishima u va eren a Satana?
KA NYI IA ER ORIHYOM U AÔNDO U TAMEN LAA?
15. Ityav mbi Armagedon mbia been kera yô, a er a Satan man azôv a na nena?
15 Hiihii yô, Satan una nenge sha ashe a na er a tim nongo na u shin tar la gburu gburu yô. A timin u a been kera cii yô, maa a hide a hôn ishigh sha Satan. Apostoli Yohane ôr kwagh u una za hemen la. (Ôr Mpase 20:1-3.) Yesu Kristu, “ortyom u sha, [u a] lu a ishindan u ihyungwa i i ze kweng la,” una kôr Satan kua azôv a na cii, una kende shin ihungwa i i ze kweng la, vea lu shimi zan zan anyom dubu. (Luka 8:30, 31; 1 Yoh. 3:8) Ka gbenda u a hii u caghen iyô ityough je ne.d—Gen. 3:15.
16. Satan una lu shin “ihyungwa i i ze kweng la” inja nena?
16 “Ihyungwa i i ze kweng,” i a va gbihi Satan man azôv a na shimi la ka nyi? Ka ijiir i or môm nana fatyô u zan her ga, saa Yehova kua ortyom u a ne un “ishindan i ihyungwa” la tseegh yô. A kende Satan shin ihyungwa ne sha u “a̱ de kera tsughun akuraior ga” yô. Nahan “begha u tan kume” ne una huan imo hen shighe la.—1 Pet. 5:8.
AKAA A AA ER CII MAN SHIGHE U BEM UNA VA LA
17, 18. (a) Ka akaa a se lu a nenge a mi ga a han se hila time sha mini? (b) Akaa ne aa karen kera yô, se nyôr ken mlu u nyi?
17 Ica ia gba ga tsô akaa a vesen man a cieryol aa hii u eren. Se mba veren ashe u nengen er a va kaa ér “Bem, man mkpeyol” la. Shi se nenge er a tim Zegebabilon la, man er Gogi u ken tar u Magogi una ta num sha ior mba Aôndo la, kua ityav mbi Armagedon. Shi se nenge er a kende Satan man azôv a na shin ihyungwa i i ze kweng la yô. Akaa ne a karen kera, mbaaferev cii vea kera luun ga yô, se nyôr ken mlu u he. Kristu una hemen anyom dubu môm, hen shighe la se ember sha ci u “mngee u bem.”—Ps. 37:10, 11.
18 Se hila hen sha akaa ataan a a lu a̱ er ga yô. Akaa a se lu a ‘nenge a mi ga’ agen kpa nga, a i gbe u se ‘ver asema’ sha mi yô. Se va time sha akaa ne ken ngeren u a dondo ne.
[Ngeren mba shin kpe]
a Se time sha akaaôron a profeti a pue ne ken ngeren ne man u una dondo la.
b Ôr takerada u ken zwa Buter, u Revelation—Its Grand Climax at Hand! la, peeji 251-258.
c Kwaghôron u profeti u i er ken Daniel 2:44 ér a ‘hembe ityartor igen ne cii avur avur’ la ngu ôron kwagh u ityartor i i til sha avegher kposo kposo a zegeuee la tseegh. Nahan kpa, kwaghôron u profeti ugen, u un kpa a er kwagh u shighe wase ne yô tese ér, sha “iyange i vesen i Aôndo, Uhembanagee la,” a kohol ‘utor mba sha tar sha won cii’ ér ve nôngo ityav a Yehova. (Mpa. 16:14; 19:19-21) Sha nahan yô, ka ityartor i i lu avegher a zegeuee la tseegh a tim í sha shighe u Armagedon la ga, ugomoti mba uumace mbagenev cii kpa a tim ve sha ityav mbira.
d A mase caghen iyô ityough sha mbee u anyom dubu, zum u a gbihi Satan man azôv a na ken “ber u usu” la.—Mpa. 20:7-10; Mat. 25:41.
[Ngeren u kiriki/Foto u sha peeji 4]
AKAA A VESEN ATAAN A AA VA ER YÔ:
1 Myee u a va yôô “Bem, man mkpeyol” la
2 Akuraior aa ta num sha “Zegebabilon,” aa tim un
3 A ta num sha ior mba Yehova
4 Ityav mbi Armagedon
5 A kende Satan man azôv a na shin ihyungwa i i ze kweng la