Mkaanem ma Yehova Ma Uma Je
U Ôron Takerada u Mpase Asav-asav—Vegher u Hiihii
SHIGHE u i wuhe apostoli Yohane ken icile i Patemo ken iyolbeen la, nenge a mbampase mba sha mnenge 16. Yange nenge tom u Yehova Aôndo man Yesu Kristu ve er ken ayange a Ter, a a hii zum u i ver Tartor u Aôndo sha, ken inyom i 1914 la zan zan mkur u Hemen u Kristu u Anyom Dubu la. Yohane yange nger takerada u Mpase, u u lu a mbampase mba sagher iyol la ken inyom i 96 nahan.
Se time ase nen sha akaa a injaa a i er ken Mpase 1:1-12:17 ne. Avur ne ôr kwagh u mbampase mba sha mnenge utaankaruhar, mba Yohane hii nengen a mi yô. Mbampase mban mba a inja hen vese sha ci u ve ôr akaa a a lu eren sha tar hegen yô, shi ve tese kwagh u ica a gba ga tsô, Yehova una er yô. Ior mba ve er mbampase mban shi ve ne ve jighjigh yô, vea zua a ishimasurun man ishimataver.—Heb. 4:12.
“WANIYÔNGO” BUGH IKYAV I SHA ATARATAR KEN AKAV A ATAANKARAHAR LA
Kwagh u Yohane hii nengen a mi ken mpase u sha mnenge la yô, lu Yesu Kristu ken iengem na, shi ngohol ilyoho, i una ‘nger, una tindi a mi hen atôônanongo a Kristu a ataankarahar la’ yô. (Mpa. 1:10, 11) Mpase ugen u Yohane nenge a mi yô, lu ikyônough ki torough Sha. Or tema sha ikyônough ki shon, nan lu a ihurenruamabera, i nger un kimi kua ken ijime kpaa, i cir un i var un akav ataankarahar. Ka “Begha u ken kwe u Yuda” shin ‘Waniyôngo u a lu a akor ataankarahar man ashe kpaa ataankarahar’ la tswen a “kom u bughun ruamabera” la ye.—Mpa. 4:2; 5:1, 2, 5, 6.
Mpase u sha mnenge u sha utar la, lu sha kwagh u za hemen zum u “Waniyôngo” bugh akav a hiihii a ataratar la yô. Zum u i bugh ikyav i sha ataratar la, tar tenger kpishi shi zegeiyange u iyughugh kuma. (Mpa. 6:1, 12, 17) Kpa, mpase u sha mnenge u sha unyiin la tese ‘mbatyomov unyiin kôr ahumbe a anyiin a sha tar,’ zan zan a kar veren iorov 144,000 mbara ikyav been. Shi Yohane nenge a “zegeikpelaior,” i i ver i̱ ikyav ga yô “tile sha ishigh ki ikyônough ki torough man sha ishigh ki Waniyôngo.”—Mpa. 7:1, 9.
Mbamlumun sha Mbampin mba sha Akaa a ken Ruamabera:
1:4; 3:1; 4:5; 5:6—Inja i ishember i̱ “ujijingi mba utaankaruhar” la ér nyi? Namba u utaankaruhar tese kwagh u a lu vough sha shigh ki Aôndo yô. Nahan, ilyoho i i nger hen “iniongo i Kristu i itiankarihiar” la ngi sha ci u ior mba Aôndo, mba ve lu ken atôônanongo a hemban 100,000 tar sha won cii la. (Mpa. 1:11, 20) Er Yehova a ne se icighan jijingi na ér a̱ kure awashima na yô, ishember i “ujijingi mba utaankaruhar” la tese tom u icighan jijingi a eren kpoghuloo sha u nan mba ve ver ishima sha akaaôron a profeti la mfe yô, shi veren ve doo doo kpaa. Ka inja er takerada u Mpase hemba yaren tom a utaankaruhar sha u ôron kwagh nahan. Namba u sha utaankaruhar u se lu ôron kwagh sha mi ne tese kwagh u a lu jimin shin vough yô, man sha kpôô yô, takerada u Mpase ôr kwagh u mbee shin ‘mkur’ u “kwaghmyer u Aôndo.”—Mpa. 10:7.
1:8, 17—Ititom i “Alefa man Omega” man i u “hiihii man u masetyô” la ka i ana? Ititom i “Alefa man Omega” la ka i Yehova, ititom ne tese ér Aôndo u hembanagee môm tsô vande lun a na ga shi môm kpa nana lu ga. Un ka u “hiihii man u masetyô.” (Mpa. 21:6; 22:13) Í ôr ken takerada u Mpase 22:13 ér, Yehova ka u “hiihii man u masetyô,” ishemberkwaghôron ne tese ér ma Aôndo môm tsô vande lun a na ga shi môm kpa nana lu ga. Nahan kpa, avur a ken Mpase ityough i môm la tese ér, ititom i u “hiihii man u masetyô,” i i er ken avur ne la ka Yesu Kristu. Ka Yesu a lu or u hiihii u Yehova Aôndo iyolna a nder un shin ku a ne un uma u tsôron ken jijingi ye, shi ka un a lu or u masetyô u Yehova a nder un iyol na ye.—Kol. 1:18.
2:7—Kanyi i lu “Paradiso u Aôndo”? Er í lu Mbakristu mba i shigh ve mkurem la i er mkaanem man sha a ve yô, paradiso u i er kwagh sha mi heen ne ka mlu u dedoo u sha, u a lu er ka paradiso nahan la—kape Aôndo iyol na a lu je la. Mbakristu mba jighjigh mba i shigh ve mkurem la vea ya “kon u uma,” ka injar i a na ve je la. Inja na yô, a na ve uma u kpen ga.—1 Kor. 15:53.
3:7—Lu hanma shighe Yesu ngohol “ishindan i Davidi,” man ngu eren tom a ishindan ne nena? Shighe u i er Yesu batisema ken inyom i 29 la, hingir Tor ken tsombor u Davidi. Nahan kpa, Yesu yange ngohol ishindan i Davidi la ga zan zan va ngohol i ken inyom i 33, shighe u i kende un sha, i ver un ken uwegh ku yanegh ku Aôndo sha la. Lu hen shighe ne ya dyako i Tartor u Davidi ye. Hii shighe la zan zan nyian, Yesu ngu eren tom a ishindan la sha u bughun aan a tom a sha kwagh u Tartor. Ken inyom i 1919 la, Yesu ‘penda ishindan i ya u Davidi sha avande’ a “wanakiriki u jighjigh man u fan kwagh,” sha u tsuan nongo u wanakiriki ne ér u nengen sha “akaa a na cii.”—Yes. 22:22; Mat. 24:45, 47.
3:12—‘Iti i he’ i Yesu ér ana? Iti ne ka iaven i he man aan a vesen a he a i ne Yesu la. (Fil. 2:9-11) Er or môm tsô nan fe iti la i hembe Yesu ga yô, a nger i sha atsul a anmgbianev nav mbajighjigh mba ve lu sha la, inja na yô, a wase ve u yan ikyar taveraa vea na. (Mpa. 19:12) Yesu ngu ember aan a vesen a i ne un la vea ve imôngo.
Ityesen hen Avese:
1:3. “Shighe mgbôghom [u Aôndo una ôr tar u Satan ne ijir]” nahan ka hange hange u se fa akaa a i er ken takerada u Mpase ne shi se er sha mi kpaa.
3:17, 18. Sea soo ser se lu a kwagh ave ken jijingi yô, se “yam zenaria u i ser sha usu” yô. Inja na yô, se nôngo se lu a “aeren a dedoo.” (1 Tim. 6:17-19) Shi se hua “akondo a pupuu,” inja na yô, se lu a aeren a a tese ér se mba mbadondon Kristu yô, shi se er tom a “icigh ki shighen sha ashe,” inja na yô, se eren sha akaawan a i lu gberen ken Iyoukura la sha er se zua a mkav u ken jijingi yô.—Mpa. 3:17, 18.
7:13, 14. Mbatamen 24 mbara tile sha ityough ki iorov 144,000 mba ve lu sha, ken iengem, ape ve lu eren tom u utor man upristi kpaa la. Ve tile sha ityough ki upristi mba ken Iserael u sha ashighe a tsuaa, mba Tor Davidi yange pav ve ker ikwe 24 la. Môm ken mbatamen mbara tese Yohane zegeikpelaior. Nahan, a shi nan kpa, yange i hii u nderen Mbakristu mba i shigh ve mkurem la cii man inyom i 1935 ye. Sha ci u nyi? Sha ci u lu ken inyom ne i pase mbatomov mba Aôndo, mba i shigh ve mkurem ve lu shin tar la ior mba ve lu zegeikpelaior la jighilii ye.—Luka 22:28-30; Mpa. 4:4; 7:9.
MBA BUGHUN IKYAV I SHA UTAANKARUHAR LA YÔ, Í TÔNGO IKYOR ITIANKARIHIAR
Waniyôngo bugh ikyav i sha utaankaruhar la, nahan mbatyomov utaankaruhar ngohol ikyor i tôngon i itiankarihiar la. Mbatyomov mba ataratar mbara tôngo ikyor, yôô ajiraôron a Aôndo sha “tiôn môm u ken atôôn atar,” a Mbakristu Mbaaiev. (Mpa. 8:1, 2, 7-12; 9:15, 18) Lu kwagh u Yohane nenge a mi ken mpase u sha utaan je la. Ken mpase u sha mnenge u dondo la, Yohane ya antakerada, shi a kar tempel kpaa. Mba tende korough ku sha utaankaruhar la yô, i ger amo genger genger ér: “Tartor u shin tar hingir u Ter wase man u Kristu Na ve, Una tema tor gbem sha won.”—Mpa. 10:10; 11:1, 15.
Mpase u sha mnenge u sha utaankaruhar la, ka sha kwagh u i er ken Mpase 11:15, 17 la. Í nenge zegeivande Sha, kwase u sha mar wannomso. Shi i zenda Diabolo sha, i gbihi shin tar. Ishima vihi darakon a kwase la, tsô a yem sha u za “nôngon ityav a tsombor na u u shi her” la.—Mpa. 12:1, 5, 9, 17.
Mbamlumun sha Mbampin mba sha Akaa a ken Ruamabera:
8:1-5—Yange i huan Sha ving sha ci u nyi, man lu nyi í daa Sha í gbihi shin tara? M-huan u sha ikyav u yange i huan sha ving la, lu sha er a ungwa “mbamsen mba uicighanmbaiorov” mba shin tar yô. Kwagh ne er shighe u ityav mbi tar cii mbi hiihii mbira kure la. Mbagenev kpishi yange ve hen ér Mbakristu mba i shigh ve mkurem mbara vea kôndo a yem sha Shighe u Atôatyev bee la, kpa kwagh er nahan ga. Yange Mbakristu mban ya ican kpishi shighe u i lu nôngon ityav la. Sha nahan yô, ve er msen kpoghuloo ér Aôndo a hemen ve. Aôndo yange ungwa mbamsen vev, nahan ortyom ugen va haa usu u sha ikyav shin tar, usu ne mgbegha Mbakristu mba i shigh ve mkurem ne ve er tom u pasen kwagh kpoghuloo. Er ve vese iyenge hen shighe la ga nahan kpa, ve pase kwagh kpoghuloo tar sha won cii, nahan kwagh ne wase u yôôn angwe u Tartor gbungur gbungur. Sha nahan yô, ve gbihi Mbakristu Mbaaiev ken usu. Yange ve pase ior acinatan a ken Bibilo wanger wanger, shi ve ta ior iwanger sha akaa a ken Bibilo, nahan amagh a kwaghaôndo u aiegh tenger, vough er tar ka ua tenger ve amagh a ayough a tenger nahan.
8:6-12; 9:1, 13; 11:15—Lu hanma shighe mbaityomov mba utaankaruhar mbara wa iyol u tôngon ikyoro, man lu hanma shighe i tôngo ikyor ne jighilii, man i tôngo i nena? Iyol i yange i wa u tôngon ikyor i itiankarihiar ne kua kwaghwan u yange i wa sha u nyôôso nongo u Yohane, u yange u lu shin tar ken inyom i 1919 zan zan 1920 la. Sha nahan yô, Mbakristu mba i shigh ve mkurem mban yange ve hide ve wa iyol u eren tom u pasen kwagh shi maan ayou a gberen ityakerada kpaa. (Mpa. 12:13, 14) Ikyor i tôngon ne tile sha ityough ki loho u ijir i Aôndo una va ôr tar u Satan, u ior mba Aôndo ve lu yôôn gbar gbar sha iwasen i mbatyomov ne. Yange i hii u yôôn loho u ijirigh ne sha mkohol u vesen u i kumba ken gar u Cedar Point, Ohio, ken inyom i 1922 la, man a yôô loho ne zan zan zegecan una kar van.
8:13; 9:12; 11:14—Ikyortôngon i itiar i masetyô la va a ‘akaatseren’ nena? Ikyortôngon i inyiin i hiihii la tile sha ityough ki loho u se lu yôôn sha u pasen ku u Mbakristu Mbaaiev ve kpe ken jijingi ne. Ikyortôngon itiar, i masetyô la va a kwaghtseren sha ci u i tile sha ityough ki akaa a a lu eren shin tar yô. Korough ku tôngon ku sha utaan la gba zua sha mdugh u yange i due a ior mba Aôndo ken uikyangen ken inyom i 1919 la; shi ku zua sha tom u pasen kwagh u ior mba Aôndo yange ve er hen shighe la kpoghuloo je, lu inja er mba eren Mbakristu Mbaaiev ican la. (Mpa. 9:1) Korough ku tôngon ku sha ataratar la ka sha kwagh u mbautyaav mba sha anyinya mba ve hembe cii la man sha kwagh u tom u pasen kwagh u yange i hii u eren ken inyom i 1922 la. Korough ku tôngon ku masetyô la ka sha kwagh u m-mar u Tartor u Mesiya.
Ityesen hen Avese:
9:10, 19. Loho u ageegh u ken Bibilo u “wanakiriki u jighjigh man u fan kwagh” a gberen ken ityakerada la ka loho u sôôn iyol. (Mat. 24:45) Loho ne zua sha ica i ikyomon i i lu a “ishoho” er “ayese” nahan la, shi u zua sha mbautyaav mba sha anyinya a a ‘ica ve i lu er iyô nahan’ la. Er nan ve kwagh a lu nahana? Ityôkyaa yô, ityakerada i wanakiriki u jighjigh a gberen la ngi te ior icin sha kwagh u “iyange i iyevoron i Aôndo.” Nahan se taver nen ishima shi se za nen hemen u samber a ityakerada ne sha gbashima.
9:20, 21. Mbaasemaamimi kpishi, mba ve lu ken ityar i ka i senge ér Mbakristu mba ker ga la mba ngohol loho u se yôôn ne. Nahan kpa, u ngu wer, se mba veren ishima ser ior kpishi mba ve lu ken Mbakristu Mbaaiev ga, mba i yer ve ken Bibilo ér “ior mba ve shi her” la ve gema asema ga. Nahan kpa, se mba gbe uwer u eren tom u pasen kwagh ga.
12:15, 16. “Tar,” shin akaa a a lu shin tar u Satan, shin utor mba ve lu hemen ken ityar kposo kposo la na ior ian i civir Aôndo ga. Hii ken kwavanyom u 1940 la je, mbautahav mban “mena ifi u [tôvacan u] darakon suwa ken zwa na kera la.” Sha kpôô yô, Yehova ka una soo ér kwagh a er nahan yô, a bende a asema a ugomoti nahan ve er ishima na. Sha nahan yô, i ôr ken Anzaakaa 21:1 ér: “Ishima i tor ngi sha ikyev i TER er uikuwanmbamngerev nahan, ka A gema i henpe i sar Un cii.” Kwagh ne a seer taver jighjigh u se ne Aôndo la.