Myom Ka Nyi?
Mlumun u Bibilo i ne yô
Ashighe kpishi mba ngeren Bibilo yange ve ter ishember i “yima” shin “myom” la sha u ôron kwagh u or u i war nan sha ikyev i kwaghbo shin mtim yô. (Ekesodu 14:13, 14; Aerenakaa 27:20) Nahan kpa, ashighe kpishi asember ne ka a ôron kwagh u waren or sha ikyev i isholibo. (Mateu 1:21) Er i lu isholibo i ne ve se lu kpen yô, ior mba i yima ve sha ikyev i isholibo la mba a ishimaverenkeghen u va lun uma gbem sha won.—Yohane 3:16, 17.a
Ka nyi or a er ve nana zua a myomo?
Kwagh u u er ve u zua a myom yô, saa u na Yesu jighjigh shi u tese jighjigh u nan wou la sha u dondon atindi a na.—Aerenakaa 4:10, 12; Mbaromanu 10:9, 10; Mbaheberu 5:9.
Bibilo tese ér saa u lu a aeren, shin u lu eren akaa a Yesu a kaa ér i eren la, ve a tese ér jighjigh u nan wou ngu uma ye. (Yakobu 2:24, 26) Nahan kpa, kwagh ne tese ér ka sha tom u eren la man or a fatyô u zuan a myom ga. Myom ka “iyua i Aôndo” a ne or sha “mrumun u sha mhôôn,” shin “erdoo” na yô.—Mbaefese 2:8, 9; King James Version.
Myom una fatyô u karen wee?
Een. Er or u fan ue u ôôn ga u nan lu man mngerem, i za kôr nan i due a mi kpa nan hide nan gba shin mngerem mara nahan, kape or u i war nan sha ikyev i isholibo i nan kpa nan ze hemen u nan jighjigh ga la nana fatyô u zuan a myom ga je la. Sha ityôkyaa ne yô, Bibilo taver Mbakristu mba ve zough a myom la asema ér “nôngon nen ityav tsung sha kwagh u jighjigh u nan.” (Yuda 3) Shi i ta mba i yima ve mbara icin ér: “Eren nen tom sha myom wen a mciem man ikyarikyase iyol.”—Mbafilipi 2:12.
Ka an na lu Oryiman—Ka Aôndo shin ka Yesu?
Bibilo kaa ér ka Aôndo a ne myom ye. I yila un ér “Oryiman.” (1 Samuel 10:19; Yesaia 43:11; Titu 2:10; Yuda 25) Bee kera yô, ior mba Aôndo yange tindi ve sha ashighe kposo kposo ve yima ikyurior i Iserael la, Bibilo yila ve ér “mbayiman.” (Nehemia 9:27; Mbaajiriv 3:9, 15; 2 Utor 13:5)b Yesu Kristu kpa Bibilo yila un ér “Oryiman,” sha ci u ka sha naagh ku ipaan ku Kristu la Aôndo una yima ior ye.—Aerenakaa 5:31; Titu 1:4.c
Ka u a yima hanma or ciili?
Ei, a yima ior mbagenev ga. (2 Mbatesalonika 1:9) Zum u i pine Yesu ér, “Mba á yima ve yô, mba ciôn tsôô?” yô, a na mlumun ér: “Nôngo nyôr nen hen hunda u hogholoo, gadia M kaan ne ne, ior kpishi vea nôngo u nyôron, kpa vea fatyô ga.”—Luka 13:23, 24.
Mbamtsum mba ior mba ve lu a mi sha kwagh u myom u ior cii la yô
Mtsum: 1 Mbakorinte 15:22 tese kwagh u myom u ior cii la ér, ‘ken Kristu, á gema ior cii vea hingir mbaumav.’
Mimi: Ivur Bibilo ne ngi ôron kwagh u mnder u shin ku. (1 Mbakorinte 15:12, 13, 20, 21, 35) Sha nahan yô, ishember i ‘ken Kristu, á gema ior cii vea hingir mbaumav’ la inja na jighilii ér, mbakpenev mba a nder ve shin ku la cii, a nder ve sha ikyev i Kristu.—Yohane 11:25.
Mtsum: Titu 2:11 tese kwagh u myom u ior cii la ér Aôndo ngu ‘van a myom sha ci u ior cii.’—Bibilo i International Standard Version.
Mimi: Ishember i ken zwa Grika i i gem ken ivur ne ér “cii” la, shi a fatyô u geman i kpaa ér “hanma inja, shin nyityô.”d Sha nahan yô, kwagh u i nger ken Titu 2:11 la inja na jighilii ér, Aôndo ngu van a myom sha ci u hanma inja or cii, “ken hanma ikyurior man hanma nongo man hanma nongoior man hanma zwa kpaa.”—Mpase 7:9, 10.
Mtsum: 2 Peteru 3:9 tese kwagh u myom u ior cii la ér ‘sar Aôndo u or môm nana tim ga.’
Mimi: Aôndo soo ér ior ve war, kpa kighir ior ér ve dondo gbenda u myom, u a tese ve la ga. “Iyange i ijirigh” na la ia vaan yô, a lu “mtim u mba ve vende Aôndo la.”—2 Peteru 3:7.
a Bibilo ka i kaa ér i “yima” or, shin er myom u sha ikyev i isholibo man ku, u a lu myom jim jim la a lu a va ga nahan kpaa.—Mbaefese 2:5; Mbaromanu 13:11.
b Ken avur a Bibilo a se ter sha heen ne, ken Ubibilo mbagenev yô, i ter ishember i “oryiman” la ga, ka asember agen i nger ye, ér “orhemban” “orsaghen,” “orageegh,” “orhemen,” shin “orgen” je kpaa. Nahan kpa, ken Bibilo i ken zwa Heberu i yange i hii ngeren la, ka ishember i oryiman la i môm i môm yange i yilan uumace mba ve lu mbayiman la a mi ye, er Yehova Aôndo kpa i yila un ajiir agen ken Bibilo ér Oryiman nahan.—Pasalmi 7:10.
c Ka iti i ken zwa Heberu igen, i i yer ér Yehoh·shuʹaʽ la, i gema a mi i yilan ér Yesu ye, man inja na yô ér “Yehova ka Myom.”
d Nenge takerada u i yer ér Vine’s Complete Expository Dictionary of Old and New Testament Words la. Shi i nger ishember ne i môm i môm sha myer u ken zwa Grika la ken Mateu 5:11, ape i nger mkaanem ma Yesu ér ior vea ter mbadondon un sha “hanma inja” i ifer cii la.