Ezekiel

40 Nang ika-25 taon ng pagkatapon namin,+ noong ika-10 araw ng unang buwan, nang ika-14 na taon matapos bumagsak ang lunsod,+ sumaakin ang kapangyarihan* ni Jehova nang mismong araw na iyon, at dinala niya ako sa lunsod.+ 2 Sa pamamagitan ng mga pangitain mula sa Diyos, dinala niya ako sa lupain ng Israel at ibinaba ako sa isang napakataas na bundok,+ kung saan may istraktura na gaya ng isang lunsod sa may timog.

3 Nang dalhin niya ako roon, may nakita akong isang lalaki na kumikinang na gaya ng tanso.+ May hawak siyang panaling lino at panukat na tambo,*+ at nakatayo siya sa pasukan. 4 Sinabi ng lalaki: “Anak ng tao, tumingin ka at makinig na mabuti, at bigyang-pansin mo ang* lahat ng ipapakita ko sa iyo, dahil iyan ang dahilan kung bakit ka dinala rito. Sabihin mo sa sambahayan ng Israel ang lahat ng makikita mo.”+

5 May nakita akong pader na nakapalibot sa templo.* Ang lalaki ay may hawak na panukat na tambo na anim na siko ang haba (ang bawat siko ay dinagdagan ng isang sinlapad-ng-kamay).* Sinukat niya ang pader, at ang kapal nito ay isang tambo at ang taas ay isang tambo.

6 Pagkatapos, pumunta siya sa pintuang-daan na nakaharap sa silangan+ at umakyat sa mga baytang nito. Nang sukatin niya ang bungad ng pintuang-daan, isang tambo ang lapad nito, at ang isa pang bungad ay may lapad din na isang tambo. 7 Isang tambo ang haba at isang tambo ang lapad ng bawat silid ng bantay, at limang siko ang pagitan ng mga silid ng bantay.+ Ang sukat ng bungad ng pintuang-daan, na nasa tabi ng beranda nito sa gawing loob, ay isang tambo.

8 Sinukat niya ang beranda ng pintuang-daan sa gawing loob, at ito ay isang tambo. 9 At sinukat niya ang beranda ng pintuang-daan, walong siko; at sinukat niya ang panggilid na mga haligi nito, dalawang siko; at ang beranda ng pintuang-daan ay nasa gawing loob.

10 May tigtatlong silid ng bantay sa magkabilang panig ng silangang pintuang-daan. Iisa ang sukat ng tatlo, at iisa ang sukat ng panggilid na mga haligi sa magkabilang panig.

11 Pagkatapos, sinukat niya ang lapad ng pasukan ng pintuang-daan, at ito ay 10 siko; at ang lapad ng pintuang-daan ay 13 siko.

12 Ang nababakurang bahagi sa harap ng mga silid ng bantay sa magkabilang panig ay isang siko. Ang bawat silid ng bantay sa magkabilang panig ay anim na siko.

13 At sinukat niya ang pintuang-daan mula sa bubong ng isang silid ng bantay* hanggang sa bubong ng isa pa, 25 siko ang lapad; ang isang pasukan ay katapat ng isa pang pasukan.+ 14 Pagkatapos, sinukat niya ang panggilid na mga haligi, 60 siko ang taas, pati ang panggilid na mga haligi sa mga pintuang-daan sa buong palibot ng looban. 15 Mula sa harap ng pasukan ng pintuang-daan hanggang sa harap ng beranda ng pintuang-daan sa gawing loob ay 50 siko.

16 May mga bintanang papakipot ang mga hamba+ sa mga silid ng bantay at sa panggilid na mga haligi sa magkabilang panig sa loob ng pintuang-daan. Ang loob ng mga beranda ay may mga bintana sa magkabilang panig, at may mga disenyo ng puno ng palma+ sa panggilid na mga haligi.

17 At dinala niya ako sa malaking looban, at may nakita akong mga silid-kainan*+ sa palibot ng looban; bato ang sahig sa palibot at may 30 silid-kainan doon. 18 Ang batong sahig sa gilid ng mga pintuang-daan ay kasinghaba ng mga pintuang-daan—ito ang mababang sahig.

19 At sinukat niya ang distansiya* mula sa harap ng mababang pintuang-daan hanggang sa pasukan ng maliit na looban. Ito ay 100 siko sa silangan at sa hilaga.

20 Ang malaking looban ay may pintuang-daan na nakaharap sa hilaga, at sinukat niya ang haba at lapad nito. 21 May tigtatlong silid ng bantay sa magkabilang panig. Ang sukat ng panggilid na mga haligi at beranda nito ay katulad ng nasa unang pintuang-daan—50 siko ang haba at 25 siko ang lapad. 22 Ang sukat ng mga bintana nito, beranda, at mga disenyo ng puno ng palma+ ay katulad ng mga nasa silangang pintuang-daan. Pitong baytang ang aakyatin ng mga tao para marating ito, at ang beranda nito ay nasa harap ng mga iyon.

23 May mga pintuang-daan sa maliit na looban na katapat ng hilagang pintuang-daan at ng silangang pintuang-daan. Sinukat niya ang distansiya ng magkatapat na pintuang-daan, 100 siko.

24 At dinala niya ako sa timog, at may nakita akong pintuang-daan sa timog.+ Sinukat niya ang panggilid na mga haligi at beranda nito, at ang sukat ng mga ito ay katulad ng sa iba. 25 May mga bintana sa magkabilang panig at sa beranda nito, na gaya ng ibang bintana. Ang haba nito ay 50 siko at ang lapad ay 25 siko. 26 Pitong baytang ang aakyatin papunta roon,+ at ang beranda nito ay nasa harap ng mga iyon. At may disenyo ng puno ng palma ang mga panggilid na haligi nito, isa sa bawat panig.

27 Ang maliit na looban ay may pintuang-daan na nakaharap sa timog; sinukat niya ang distansiya ng magkatapat na pintuang-daan sa timog, 100 siko. 28 At idinaan niya ako sa timugang pintuang-daan papunta sa maliit na looban; nang sukatin niya ang timugang pintuang-daan, katulad ito ng sukat ng iba pa. 29 Ang sukat ng mga silid ng bantay, panggilid na mga haligi, at beranda nito ay katulad ng sa iba. May mga bintana sa magkabilang panig at sa beranda nito. Ang haba nito ay 50 siko at ang lapad ay 25 siko.+ 30 May mga beranda sa buong palibot; 25 siko ang haba ng mga ito at 5 siko ang lapad. 31 Ang beranda nito ay nakaharap sa malaking looban, at may mga disenyo ng puno ng palma sa panggilid na mga haligi nito,+ at walong baytang ang aakyatin papunta roon.+

32 Nang ipasok niya ako sa maliit na looban mula sa silangan, sinukat niya ang pintuang-daan at katulad ito ng sukat ng iba pa. 33 Ang sukat ng mga silid ng bantay, panggilid na mga haligi, at beranda nito ay katulad ng sa iba. May mga bintana sa magkabilang panig at sa beranda nito. Ang haba nito ay 50 siko at ang lapad ay 25 siko. 34 Ang beranda nito ay nakaharap sa malaking looban, at may mga disenyo ng puno ng palma sa panggilid na mga haligi nito, at walong baytang ang aakyatin papunta roon.

35 At dinala niya ako sa hilagang pintuang-daan+ at sinukat ito; katulad ito ng sukat ng iba. 36 Ang sukat ng mga silid ng bantay, panggilid na mga haligi, at beranda nito ay katulad ng sa iba. May mga bintana sa magkabilang panig nito. Ang haba nito ay 50 siko at ang lapad ay 25 siko. 37 Ang panggilid na mga haligi nito ay nakaharap sa malaking looban, at may mga disenyo ng puno ng palma sa panggilid na mga haligi nito, at walong baytang ang aakyatin papunta roon.

38 May isang silid-kainan na malapit sa panggilid na mga haligi ng mga pintuang-daan, kung saan hinuhugasan ang mga buong handog na sinusunog.+

39 May tigdalawang mesa sa magkabilang panig ng beranda ng pintuang-daan, kung saan pinapatay ang mga buong handog na sinusunog,+ handog para sa kasalanan,+ at handog para sa pagkakasala.+ 40 Papunta sa hilagang pintuang-daan, may dalawang mesa sa pasukan. May dalawang mesa rin sa kabilang panig ng beranda ng pintuang-daan. 41 May tig-apat na mesa sa magkabilang panig ng pintuang-daan—walong mesa lahat—kung saan pinapatay ang mga hain. 42 Ang apat na mesa para sa buong handog na sinusunog ay gawa sa tinabas na bato. Isa’t kalahating siko ang haba ng mga ito, isa’t kalahating siko ang lapad, at isang siko ang taas. Nasa ibabaw ng mga ito ang mga kagamitan sa pagpatay sa mga handog na sinusunog at mga hain. 43 Nakakabit sa buong palibot ng mga pader sa loob ang mga patungang sinlapad-ng-kamay; at ang laman ng mga handog na kaloob ay ipinapatong sa mga mesa.

44 Sa labas ng pintuang-daan ng maliit na looban ay may mga silid-kainan para sa mga mang-aawit;+ ang mga ito ay nasa maliit na looban malapit sa hilagang pintuang-daan at nakaharap sa timog. May isa pang silid-kainan malapit sa silangang pintuang-daan, at nakaharap ito sa hilaga.

45 Sinabi niya sa akin: “Ang silid-kainan na ito na nakaharap sa timog ay para sa mga saserdote na nag-aasikaso ng mga gawain sa templo.+ 46 Ang silid-kainan na nakaharap sa hilaga ay para sa mga saserdote na nag-aasikaso ng gawaing may kaugnayan sa altar.+ Sila ang mga anak ni Zadok,+ ang mga Levita na inatasang lumapit kay Jehova para maglingkod sa kaniya.”+

47 At sinukat niya ang maliit na looban. Ito ay kuwadrado, 100 siko ang haba at 100 siko ang lapad. Ang altar ay nasa harap ng templo.

48 At dinala niya ako sa beranda ng templo,+ at sinukat niya ang panggilid na mga haligi ng beranda, limang siko sa isang panig at limang siko sa kabila. Ang lapad ng pintuang-daan ay tatlong siko sa isang panig at tatlong siko sa kabila.

49 Ang haba ng beranda ay 20 siko at ang lapad ay 11* siko. May mga baytang na aakyatin ang mga tao papunta roon. May mga haligi sa tabi ng panggilid na mga poste, isa sa bawat panig.+