Ang mga Nakatagong Hayop ng Vietnam
“ANG pinakakapana-panabik na yugto ng pagtuklas sa mga hayop ng siglong ito,” ang masiglang pahayag ni Douglas Richardson, tagapangasiwa ng mga mamalya sa London Zoo. Tinutukoy niya ang pagkatuklas sa ilang malalaking hayop sa liblib na mga kagubatan sa Vietnam sa loob ng nakalipas na sampung taon.
Sa loob ng maraming dekada, ang malupit na digmaan ang nagpangyaring maging mahirap puntahan ng mga siyentipiko ang mga kagubatang ito. Gayunman, ginagamit na ngayon ng mga mananaliksik sa hayop na nagtatrabaho roon ang mga awtomatik na kamera upang litratuhan ang mga hayop. Kabilang sa mga ito ay ang Vietnamese rhinoceros, isang pangalawahing uri ng Javan rhino at isa sa mga uring pinakananganganib na malipol sa daigdig.
Ang isa pang matatawag na nakatagong hayop ng Vietnam ay ang tulad-antilope na barakong baka na kilalá rin bilang ang Vu Quang ox. Ang nilalang na ito, na natuklasan noong 1992 sa reserbasyong pangkalikasan sa Vu Quang, ay may bigat na 100 kilo at may taas na isang metro sa balikat nito. Posible na kamag-anak ito ng barakong baka, antilope, o ng kambing. Sa reserbasyon ding iyon, tatlong usa ang natuklasan din—ang malaking muntjac noong 1993, ang Truong Son muntjac noong 1997, at ang leaf muntjac noong 1998.
Noong 1996, natuklasan ng mga siyentipiko sa Tainguen Plateau sa Vietnam ang isang maliit na hayop na kumakain ng karne at lumalabas sa gabi, ang Tainguen civet. Ang bigat nito ay sa pagitan ng 6.6 at 16.5 libra at nabubuhay sa maalinsangang kagubatan sa tropiko.
Ipinaliwanag ni Richardson na ang maliliit na hayop ay patuloy na natutuklasan—marahil ay kasindami ng 20 iba’t ibang palaka sa loob ng isang taon—ngunit ang pag-iral ng malalaking hayop na ito ay talagang di-inaasahan, ulat ng pahayagan ng London na The Independent.
[Mga larawan sa pahina 31]
Tainguen civet
Vu Quang ox
Truong Son muntjac
Vietnamese rhinoceros
[Credit Lines]
Gubat: © Wildside Photography
Vietnamese rhino: AP Photo/World Wildlife Fund, Mike Baltzer; tatlong iba pang hayop: Courtesy EC-SFNC/Acknowledging the European Commission’s support of the photo-trapping program