Ang Salita ng Kaharian—Kinukuha ang Diwa Nito
1 Sa kaniyang ilustrasyon ng manghahasik, sinabi ni Jesus na ang binhi na nahasik sa “mainam na lupa” ay lumalarawan sa “isa na nakikinig sa salita at kinukuha ang diwa nito.” (Mat. 13:23) Pagkatapos marinig ang tungkol sa Kaharian, nakuha ba natin “ang diwa nito”? Atin bang inuuna ang mga kapakanan ng Kaharian, anupat ipinakikita na ating nakuha ang diwa ng mensahe?
2 Ang tumpak na unawa sa mensahe ng Kaharian ay humihiling ng personal na pag-aaral. Kailangan natin ang panahon upang bulaybulayin ang inilaang espirituwal na pagkain. Ang madaliang pagbabasa ng Ang Bantayan ay katulad ng basta paglunok sa isang masarap at masustansiyang pagkain. Upang lubusang makinabang, kailangang magkaroon ng tunguhin at isang malusog na gana sa espirituwal. Kung wala ang mga ito, ang iba pang mga gawain ay makababawas sa kapakinabangan ng personal na pag-aaral o uubos ng panahong kailangan natin para dito. Ang pananatili sa isang mabuting iskedyul ng pag-aaral ay hindi madali, subalit ang tatamuhing espirituwal na mga kayamanan ay di matutumbasan.—Kaw. 3:13-18; Col. 1:27.
3 Ang Pagsusuri sa Kasulatan ay tumutulong sa atin bawat araw na magkaroon ng positibo, nakapagpapatibay na kaisipan hinggil sa Kaharian. Yaong mga “palaisip sa kanilang espirituwal na pangangailangan” ay nagpaplano na gumamit ng ilang minuto araw-araw para basahin ang teksto at mga komento. (Mat. 5:3) Maraming teksto ang nagpapaliwanag ng iba’t ibang pitak ng Kaharian. Halimbawa, noong Nobyembre 22, 1994, ang itinampok na teksto ay Mateo 13:4. Ang komento ay tumalakay sa pag-asa ng Kaharian at nagpaalaala sa atin sa mga panganib ng di kanaisnais na pakikisama sa mga kamag-anak at mga kapitbahay. Sa mga tahanang Bethel sa palibot ng daigdig, may 15-minutong pagtalakay sa pang-araw-araw na teksto tuwing umaga sa bawat araw ng pagtatrabaho na nagdiriin sa mga kapakinabangan at kaselangan ng pagsasaalang-alang sa teksto nang magkakasama. Inilalakip ba ng inyong pamilya ang ganitong pagtalakay sa inyong pang-araw-araw na rutina?
4 Habang lumalaki ang inyong pagpapahalaga para sa Kaharian, magkakaroon ng lalong malaking dahilan na ibahagi ang mensahe ng Kaharian sa iba. Ang Bantayan at Gumising! ay tumutulong sa atin upang lubusang mabatid kung gaano kalaki ang pangangailangan ng sanlibutan para sa Kaharian ng Diyos. Ang mga ito ay tumutulong sa atin na maging espirituwal na mga tao, na “taglay . . . ang pag-iisip ni Kristo.” (1 Cor. 2:15, 16) Ang lahat ng ito ay nagpapalaki sa ating sigasig na ibahagi ang pag-asa ng Kaharian sa iba.—1 Ped. 3:15.
5 Mahalaga na personal nating makuha ang diwa ng mensahe ng Kaharian. Ang Kaharian ang pangunahing tema ng Bibliya. Ito ang paraan na gagamitin ng Diyos upang wakasan ang kabalakyutan at pangyarihin ang isang bagong sanlibutan. Ipinag-utos ni Jesus sa atin na unahin ito sa ating mga buhay. (Mat. 6:10, 33) Lubusang samantalahin ang inyong pagkakataon upang tamuhin ang mga pagpapala nito.