Magpakita ng Personal na Interes—Sa Pamamagitan ng Pagtatanong at Pakikinig
1 Gusto ng karamihan sa mga tao na sabihin ang kanilang pananaw subalit ayaw nilang sinesermunan sila o pinagtatatanong. Kaya bilang Kristiyanong mga ministro, kailangang matutuhan natin ang sining ng pagtatanong upang malaman ang niloloob ng mga tao.—Kaw. 20:5.
2 Ang ating mga tanong ay dapat mag-udyok sa mga tao na mag-isip, hindi humiya sa kanila. Kapag nangangaral sa bahay-bahay, itinatanong ng isang brother, “Sa tingin mo, darating kaya ang panahon na makikitungo ang mga tao sa isa’t isa nang may dignidad at paggalang?” Depende sa sagot, ganito pa ang idinaragdag niya, “Ano sa palagay mo ang kailangan upang mangyari ito?” o “Bakit mo naman nasabi iyan?” Kapag nagpapatotoo nang di-pormal at sa pampublikong mga lugar, isa pang brother ang nagtatanong sa mga may anak, “Ano ang pinakagusto mo sa pagiging magulang?” Pagkatapos ay nagtatanong siya, “Ano naman ang lubhang ikinababahala mo?” Pansinin na ang mga tanong na ito ay nagbibigay sa mga tao ng pagkakataong masabi ang kanilang mga pananaw nang hindi naaasiwa. Yamang iba-iba ang mga kalagayan, baka kailangan nating baguhin ang paksa at paraan ng ating pagtatanong upang bumagay ito sa mga tao sa ating teritoryo.
3 Alamin ang Niloloob ng mga Tao: Kung gustong sabihin ng mga tao ang kanilang niloloob, matiyagang makinig at huwag sumabad nang hindi kinakailangan. (Sant. 1:19) Mabait na pasalamatan ang kanilang komento. (Col. 4:6) Maaari mong sabihin: “Maganda ang sinabi ninyo. Salamat sa pagbanggit niyan sa akin.” Papurihan sila kung angkop naman. Magalang na magbangon ng karagdagang mga tanong upang malaman ang iniisip nila at kung bakit gayon ang palagay nila. Humanap ng mga puntong mapagkakasunduan. Kung gusto mong itawag-pansin ang isang teksto, maaari mong sabihin, “Napag-isipan mo na ba ang sinasabi ng tekstong ito?” Huwag maging dogmatiko at iwasang makipagtalo.—2 Tim. 2:24, 25.
4 Ang paraan ng pagsagot ng iba sa ating mga tanong ay nakadepende nang malaki sa paraan ng ating pakikinig. Nahahalata ng mga tao kung taimtim tayong nakikinig. Ganito ang sabi ng isang naglalakbay na tagapangasiwa, “Kapag matiyaga at handa kang makinig sa mga tao, talagang nakaaakit ito at napakainam na pagpapakita ng magiliw na personal na interes.” Ang pakikinig sa iba ay pagbibigay ng dignidad sa kanila, at maaari silang udyukan nito na makinig sa mabuting balita na sinisikap nating ibahagi.—Roma 12:10.