-
Humahantong sa Kahihiyan ang KapangahasanAng Bantayan—2000 | Agosto 1
-
-
16. Sa anong paraan ipinamalas ni Saul ang isang mainiping saloobin?
16 Gayunman, nang maglaon, nawala ang kahinhinan ni Saul. Nang nakikipagdigma sa mga Filisteo, siya’y umurong patungo sa Gilgal, kung saan inaasahang hihintayin niya si Samuel na dumating at makiusap sa Diyos sa pamamagitan ng mga hain. Nang hindi dumating si Samuel sa takdang panahon, si Saul mismo ang buong-kapangahasang naghandog ng haing sinusunog. Pagkatapos na pagkatapos niya, dumating naman si Samuel. “Ano itong ginawa mo?” tanong ni Samuel. Sumagot si Saul: “Nakita kong nangangalat ang bayan mula sa akin, at ikaw—hindi ka dumating sa itinakdang mga araw . . . Sa gayon ay napilitan ako at inihandog ko ang haing sinusunog.”—1 Samuel 13:8-12.
17. (a) Sa unang tingin, bakit mukhang makatuwiran ang mga ginawa ni Saul? (b) Bakit pinuna ni Jehova si Saul sa kaniyang ginawa dahil sa pagkainip?
17 Sa unang tingin, mukha namang makatuwiran ang ginawa ni Saul. Tutal, ang bayan ng Diyos noon ay “nasa kagipitan,” “napipighati,” at nanginginig dahil sa kanilang desperadong kalagayan. (1 Samuel 13:6, 7) Mangyari pa, hindi naman masamang magkusa kung hinihingi ng pagkakataon.d Subalit, tandaan na si Jehova ay nakababasa ng puso at nakababatid ng ating kaloob-loobang mga motibo. (1 Samuel 16:7) Samakatuwid, maaaring may nakita siyang ilang salik tungkol kay Saul na hindi tuwirang binanggit sa salaysay ng Bibliya. Halimbawa, maaaring nakita ni Jehova na ang pagkamainipin ni Saul ay udyok ng pagmamataas. Marahil ay inis na inis si Saul na siya—ang hari ng buong Israel—ay kailangang maghintay sa isa na sa pangmalas niya’y isang matanda na at mapagpaliban na propeta! Anuman ang nangyari, inakala ni Saul na ang kabagalan ni Samuel ay nagbigay sa kaniya ng karapatang siya na mismo ang gumawa ng mga bagay-bagay at ipagwalang-bahala ang maliliwanag na tagubilin na ibinigay sa kaniya. Ang resulta? Hindi pinuri ni Samuel ang pagkukusa ni Saul. Sa kabaligtaran, kinagalitan niya si Saul, na sinasabi: “Hindi mamamalagi ang iyong kaharian . . . sapagkat hindi mo tinupad ang iniutos sa iyo ni Jehova.” (1 Samuel 13:13, 14) Minsan pa, ang kapangahasan ay humantong sa kahihiyan.
-
-
Humahantong sa Kahihiyan ang KapangahasanAng Bantayan—2000 | Agosto 1
-
-
d Halimbawa, dali-daling kumilos si Finehas upang pigilin ang salot na kumitil ng sampu-sampung libong Israelita, at pinasigla ni David ang kaniyang gutom na gutom na mga tauhan na makisalo sa kaniya sa pagkain ng tinapay na pantanghal na nasa “bahay ng Diyos.” Alinman sa ginawang ito ay hindi hinatulan ng Diyos bilang kapangahasan.—Mateo 12:2-4; Bilang 25:7-9; 1 Samuel 21:1-6.
-