Pagkatapos nito ay naghanda si Ciro para sa pakikipagsagupaan sa makapangyarihang Babilonya. At mula noon, siya’y naging bahagi na ng katuparan ng hula sa Bibliya. Sa pamamagitan ni propeta Isaias, halos dalawang siglo bago nito, tinawag ni Jehova si Ciro bilang ang tagapamahala na magpapabagsak sa Babilonya at magpapalaya sa mga Judio mula sa pagkabihag. Dahilan sa patiunang pag-aatas na ito kung kaya tinukoy si Ciro sa Kasulatan bilang “pinahiran” ni Jehova.​—Isaias 44:26-28.

Para sa mga Judio na nasa Babilonya, ang tagumpay ni Ciro ay nangahulugan ng pagdating ng matagal nang hinihintay na kalayaan mula sa pagkabihag at ang katapusan ng 70-taóng pagkawasak ng kanilang lupang tinubuan. Malamang na kay laking kagalakan nila nang magpalabas si Ciro ng isang kapahayagang nagpapahintulot sa kanila na bumalik sa Jerusalem at itayong-muli ang templo! Ibinalik din sa kanila ni Ciro ang mahahalagang kagamitan na dinala ni Nabucodonosor sa Babilonya, nagbigay ng pahintulot na umangkat ng kahoy mula sa Lebanon, at nagpalabas ng mga pondo mula sa sambahayan ng hari upang gugulin sa pagtatayo.​—Ezra 1:1-11; 6:3-5.