-
Ang Ipinangakong Prinsipe ng KapayapaanHula ni Isaias—Liwanag Para sa Buong Sangkatauhan I
-
-
‘Kautusan at Katibayan’ ng Diyos
8. Ano ‘ang kautusan’ at ‘ang katibayan’ na dapat nating konsultahin sa ngayon ukol sa patnubay?
8 Ang kautusan ni Jehova na nagbabawal sa espiritismo, lakip na ang iba pang mga utos niya ay hindi lingid sa Juda. Ito’y iningatang nakasulat. Sa ngayon ang kaniyang Salita ay makukuha sa kumpletong pagkakasulat nito. Ito’y ang Bibliya, na naglalakip hindi lamang sa kalipunan ng mga kautusan at regulasyon ng Diyos kundi sa ulat din ng pakikitungo ng Diyos sa kaniyang bayan. Ang ulat na ito ng Bibliya hinggil sa mga pakikitungo ni Jehova ay bumubuo ng isang katibayan, o patotoo, na nagtuturo sa atin ng hinggil sa personalidad at mga katangian ni Jehova. Sa halip na kumonsulta sa patay, saan dapat bumaling ang mga Israelita ukol sa patnubay? Sumagot si Isaias: “Sa kautusan at sa katibayan!” (Isaias 8:20a) Oo, yaong mga naghahanap ng tunay na kaliwanagan ay dapat na bumaling sa nasusulat na Salita ng Diyos.
9. May anumang kabuluhan ba ang paminsan-minsang pagsipi sa Bibliya ng mga di-nagsisising makasalanan?
9 Ang ilang Israelitang nasasangkot sa espiritismo ay maaaring magkunwang may paggalang sa nasusulat na Salita ng Diyos. Subalit ang gayong pag-aangkin ay walang-saysay at mapagpaimbabaw. Sinabi ni Isaias: “Tiyak na lagi nilang sasalitain ang ayon sa kapahayagang ito na hindi magkakaroon ng liwanag ng bukang-liwayway.” (Isaias 8:20b) Anong kapahayagan ang tinutukoy rito ni Isaias? Marahil ay ang pananalitang: “Sa kautusan at sa katibayan!” Posible na ang ilang apostatang Israelita ay gumagamit ng Salita ng Diyos, kung paanong ang mga apostata at ang iba pa sa ngayon ay sumisipi rin sa Kasulatan. Subalit ang mga ito’y salita lamang. Ang pagsipi sa Kasulatan ay hindi aakay sa anumang “liwanag ng bukang-liwayway,” o kaliwanagan mula kay Jehova, kung hindi kalakip ang paggawa ng kalooban ni Jehova at paglayo sa maruruming gawain.b
-
-
Ang Ipinangakong Prinsipe ng KapayapaanHula ni Isaias—Liwanag Para sa Buong Sangkatauhan I
-
-
b Ang pariralang “ayon sa kapahayagang ito” sa Isaias 8:20 ay maaaring tumutukoy sa pananalita hinggil sa espiritismo, na sinipi sa Isaias 8:19. Kung gayon, sinasabi ni Isaias na ang iba ay patuloy na hihimukin ng mga tagapagtaguyod ng espiritismo sa Juda na sumangguni sa mga espiritista anupat sila’y walang tatanggaping kaliwanagan mula kay Jehova.
-