5. Si Herodes Felipe. Anak ni Herodes na Dakila kay Mariamne II, na anak ng mataas na saserdoteng si Simon. Si Felipe ang unang asawa ni Herodias, na dumiborsiyo sa kaniya upang mapangasawa ng kaniyang kapatid sa ama na si Herodes Antipas. Binabanggit siya nang pahapyaw sa Bibliya sa Mateo 14:3; Marcos 6:17, 18; at Lucas 3:19.

Ang pangalang Herodes Felipe ay ginagamit upang ipakitang iba pa siya kay Felipe na tetrarka, sapagkat ang huling nabanggit, ayon kay Josephus, ay anak din ni Herodes na Dakila sa ibang asawa, kay Cleopatra ng Jerusalem.

Kaya naman, si Juan na Tagapagbautismo ay may dahilan na hatulan ang pag-aasawang ito nina Herodias at Herodes Antipas, yamang ito ay kapuwa ilegal at imoral sa ilalim ng kautusang Judio, at dahil sa paggawa niya nito, si Juan ay itinapon sa bilangguan at nang maglaon ay pinugutan ng ulo. Pinukaw ng kaniyang walang-takot at matuwid na pagtuligsa ang matinding pagkapoot ni Herodias, kung kaya sinamantala nito ang unang pagkakataon na maipapatay ang propeta.​—Mat 14:1-11; Mar 6:16-28; Luc 3:19, 20; 9:9.