Ekambi wa Nzambi tshɛ wekɔ lo nongola mbo ya ndɛ ya lo nyuma, ɛlɔmbwɛlɔ ndo ekokelo kele lawɔ ohomba. Ɛnyɛlɔ kɛnya dia Jehowa bu la shɔnɔdi ekɔ lo woho wasalande dia Bible kokanɛ le anto wa l’andja w’otondo ɛlɔ kɛnɛ. Afundelo w’Ekila wakatatɛ fundama l’ɛtɛkɛta esato: Hɛbɛru, Arameyɛ ndo Grɛkɛ. Onde wanɛ wakoka mbadia Bible l’ɛtɛkɛta wakatatɛ fundama Bible wekɔ la diɔtɔnganelo dia ma ma la Jehowa oleki wanɛ wahakoke kiadia l’ɛtɛkɛta ɛsɔ? Ndooko. (Mat. 11:25) Jehowa tetawɔka aha l’ɔtɛ wa kalasa yakatɔtɔ kana l’ɔtɛ w’akoka aso wa mbeya ɛtɛkɛta. Lo dihole dia mbisha lomba lande paka le wanɛ wakɔtɔ kalasa y’etale, Jehowa lishaka anto wa lo nkɛtɛ k’otondo, oyadi wanɛ wakɔtɔ kalasa y’etale kana bu. Ɔtɛkɛta Ande wakasambiyama, Bible, wambokadimɔma lo nunu di’ɛtɛkɛta; diakɔ diele, anto wa l’andja w’otondo wokoka nkondja wahɔ oma lo wetshelo wa lɔkɔ ndo weka woho wakokawɔ nkoma angɛnyi ande.—2 Tim. 3:16, 17. w24.06 6-7 od. 13-15

Elanyelo ka dikongɛ di’akambo di’ase Juda kakatatshi Yeso, kakayasukanaka. Akristo wakahombe nkamba la etena kakaatshikalɛ dia nkeketsha waonga awɔ wele oko: Mbetawɔ ndo ekikelo. (Hɛb. 10:25; 12:1, 2) Tekɔ suke la mfɔnu ka woke koleki kɛnɛ kakahomana l’Akristo w’ase Hɛbɛru. (Mat. 24:21; Ɛny. 16:14, 16) Tɔsɛdingole alako amɔtshi w’eshika wakasha Jehowa Akristo asɔ wakoka tokimanyiya sho lawɔ. Ɔpɔstɔlɔ Pɔɔlɔ akakeketsha asekande ambetawudi dia mbekaka ndo kanaka yimba la Ɔtɛkɛta wa Nzambi. (Hɛb. 5:14–6:1) Pɔɔlɔ akakambe l’Afundelo w’ase Hɛbɛru ndo akalembetshiya lande na kele yoho yakatɛmɔlaka Akristo Jehowa akaleke la fwa yoho yakɔɔtɛmɔlaka ase Juda. Pɔɔlɔ akakeketsha Akristo dia vɔ mbeya ndo nshihodia dimɛna dimɛna akambo wa mɛtɛ w’oma l’Afundelo dia vɔ monga l’akoka wa mbishola wetshelo wa kashi ndo ntona wetshelo akɔ. w24.09 8-9 od. 2-3; 10 od. 6

Ambeki wa Yeso waki l’ohomba w’ekeketshelo. Lande na? Amɔtshi wakatshike ngelo yawɔ, nkumbo yawɔ ndo elimu awɔ l’oyango wa ndjela Yeso lɛnɛ tshɛ akandatatshɔɔka. (Mat. 19:27) Amɔtshi wakasɔkishama l’ɔtɛ wakawakome ambeki wa Yeso. (Jni. 9:22) Vɔ wakayahondja ngasɔ nɛ dia vɔ waketawɔ dia Yeso mbaki Mɛsiya wakalakema. (Mat. 16:16) Koko lam’akandadiakema, elongamelo kawɔ kakashishɔ ndo vɔ wakakɔmɔ. Aha la taamu, Yeso kɔmbɔsa ɔkɛyi w’ambeki ande oko wɔɔdu wa lo nyuma koko aki l’ɔtɛ wakandavu. Diakɔ diele oma ko lushi lakandolɔ, nde akatatɛ nkeketsha ambeki ande. Ɛnyɛlɔ, nde akɛnama le Mariya w’ose Mangadala etena kakandalelaka la diombo diande. (Jni. 20:11, 16) Nde akɛnama nto le ambeki ahende wanɛ wakatshikala lo ngelo ka tshitshɛ ka Emayo. Ndo nde akɛnama le ɔpɔstɔlɔ Petero. w24.10 13 od. 5-6