Kakɔna keyaso lo dikambo dia kɛtshi ka Jehowa? Ngande wakandɛnya dia nde “halange kaanga onto 1 ndanyema”? (2 Pe. 3:9) Tɔsɛdingole kɛtshi kande otsha le anto amɔ wakasale pɛkato ya weke. Nkumekanga Davidɛ akasale pɛkato ya weke efula, ɛnyɛlɔ akasale loseka ndo akadiake. Koko Davidɛ akayatshumoya, ko Jehowa akodimanyiya la kɛtshi tshɛ. (2 Sa. 12:​1-12) Nkumekanga Manase akasale awui wa kɔlɔ efula lo lɔsɛnɔ lande. Kaanga mbakandasale awui wa kɔlɔ asɔ, Jehowa akɛnya Manase kɛtshi ndo akodimanyiya l’ɔtɛ wakandayatshumoya. (2 Ɛk. 33:​9-16) Bɛnyɛlɔ sɔ toholaka dia Jehowa mɛnyaka kɛtshi kande etena kɛnande dia ɛkɔkɔ wekɔ wa nsala dui sɔ. Nde ayolola anto asɔ, nɛ dia vɔ wakeye dia wakasale pɛkato ya weke ndo wakayatshumoya. w24.05 4 od. 12

L’ɔkɔngɔ wa nde ntshungola ekambi ande oma lo lɔhɔmbɔ l’Edjibito, Jehowa akasɔnɛ ɛlɔmbɛdi dia vɔ nkamba lo tabɛrnaklɛ. Ase Lɛwi wakasɔnama dia tokambaka elimu ekina wa lo tabɛrnaklɛ. Onde Jehowa akaleke nkokɛ wanɛ wakakambaka lo tabɛrnaklɛ kana wanɛ waki mpango yawɔ sukana la tabɛrnaklɛ oleki anto akina? Ndooko! Jehowa bu la shɔnɔdi. Onto tshɛ la lo mpango akakokaka monga la diɔtɔnganelo dia ma ma la Jehowa. Ɛnyɛlɔ, Jehowa akayashikikɛ dia wodja w’otondo monga l’akoka wa mɛna ekundji ka dinge ndo ekundji ka dja kaki la diko dia tabɛrnaklɛ. (Eto. 40:38) Etena kakatatɛka dinge monɛ otsha lo lɛkɛ lokina, kaanga wanɛ wakangana etale la tabɛrnaklɛ wakil’akoka wa mɛna dui sɔ, ntshumanya diangɔ diawɔ, mɔmba mvudu yawɔ y’apɛma ndo ntetemala la lɔkɛndɔ kaamɛ l’anto akina. (Wal. 9:​15-23) Woho akɔ waamɛ mbele ɛlɔ kɛnɛ, oyadi dihole diodjashiso, sho koka nkondja wahɔ oma lo ngandji ka Jehowa, woho wayakiyanyande lo dikambo diaso ndo woho watokokɛnde. w24.06 4 od. 10-12

Lɔsɛnɔ la Davidɛ laki lo waale. Ɔnande Abisalɔma akayashikikɛ dia mbodiaka l’oyango wa nde nkoma nkumekanga. (2 Sa. 15:​12, 13) Davidɛ akahombe mimɔ oma la Jɛrusalɛma aha la ntshimbatshimba! Etena kakatatshɔka ekambi ande, Davidɛ akashihodia di’akahombama onto ɔmɔtshi ntshikala dia mbeewoyaka kɛnɛ tshɛ kakahombaka Abisalɔma nsala. Ɔnkɔnɛ, nde akakawoya Zadɔka ndo ɛlɔmbɛdi ekina l’osomba dia vɔ tokamba oko atɔpi. (2 Sa. 15:​27-29) Wakahombe monga la yambalo y’efula. Davidɛ akalɔmbɛ Zadɔka la ɔngɛnyi ande wa kɔlamelo Hushai, dia vɔ mbosukɛ lo kanyi yande. (2 Sa. 15:​32-37) Lo ndjela kanyi yakɔ, Hushai aketawɔma le Abisalɔma lakayowetɛ owandji w’asɔlayi ndo kɛsɔ akasha Davidɛ etena ka ndjalɔngɔsɔla dia mbalɔsha. Oma laasɔ, Hushai akatɛ Zadɔka la Abiyatara kanyi yakɔ. (2 Sa. 17:​8-16) Laasɔ, apami ahende asɔ wakayonga l’akoka wa tomɛ Davidɛ losango laki ohomba efula dia nkokɛ lɔsɛnɔ la Davidɛ.—2 Sa. 17:​21, 22. w24.07 4-5 od. 9-10