Esera

3 E rile kgwedi ya bosupa+ e goroga mme Baiseraele* ba setse ba le mo metseng ya bone, ba ne ba phuthegela kwa Jerusalema ka boikaelelo bo le bongwe. 2 Jeshua+ morwa Jehosadake le baperesiti mmogo le ene le Serubabele+ morwa Shealatiele+ le bomorwarraagwe ba ne ba simolola go bereka ba bo ba aga sebeso sa Modimo wa Iseraele, gore ba kgone go isa ditlhabelo tse di fisiwang mo go sone, jaaka go ne go kwadilwe mo Molaong wa ga Moshe+ monna wa Modimo wa boammaaruri.

3 Ka jalo, ba ne ba tlhoma sebeso mo lefelong le se kileng sa nna mo go lone, le fa gone ba ne ba boifa batho ba dinaga tse di ba dikologileng,+ mme ba ne ba simolola go isetsa Jehofa ditlhabelo tse di fisiwang mo go sone, ditlhabelo tse di fisiwang tsa mo mosong le tsa maitseboa.+ 4 Go tswa foo, ba ne ba keteka Moletlo wa Diobo* go ya ka se se kwadilweng,+ mme letsatsi le letsatsi ba ne ba ntsha palo e e neng e beilwe ya ditlhabelo tse di fisiwang tse di neng di tlhokega letsatsi lengwe le lengwe.+ 5 Morago ga moo, ba ne ba ntsha setlhabelo se se fisiwang sa ka metlha+ le ditlhabelo tsa bongwedi ba basha+ le tsa meletlo ya dipaka e e dirilweng boitshepo+ ya ga Jehofa, mmogo le ditlhabelo tse di tswang mo go mongwe le mongwe yo o neng a ntsheditse Jehofa moneelo ka go rata.+ 6 Go tloga mo letsatsing la ntlha la kgwedi ya bosupa,+ ba ne ba simolola go isetsa Jehofa ditlhabelo tse di fisiwang le fa gone motheo wa tempele ya ga Jehofa o ne o ise o thaiwe.

7 Ba ne ba naya basegi+ ba maje le badiri ba ba ditswerere+ madi, mme ba ne ba naya Basidona le Bature dijo le dinô le leokwane ka gonne ba ne ba ba tliseditse dikota tsa mosedara di tla ka lewatle go tswa kwa Lebanona go ya kwa Jopa,+ go ya ka tetla e ba neng ba e neilwe ke Kgosi Kurose wa Peresia.+

8 Mo ngwageng wa bobedi fa ba sena go tla mo ntlong ya Modimo wa boammaaruri mo Jerusalema, mo kgweding ya bobedi, Serubabele morwa Shealatiele, Jeshua morwa Jehosadake le bomorwarraabone ba bangwe botlhe, baperesiti le Balefi, le botlhe ba ba neng ba tlile mo Jerusalema ba tswa botshwarwa+ ba ne ba simolola tiro; ba ne ba tlhoma Balefi ba ba nang le dingwaga di le 20 go ya kwa godimo gore ba direle e le baokamedi ba tiro ya ntlo ya ga Jehofa. 9 Ka jalo, Jeshua, bomorwawe le bomorwarraagwe, le Kadamiele le bomorwawe, e leng bomorwa Juda, ba ne ba kopana mmogo gore ba okamele batho ba ba dirang tiro mo ntlong ya Modimo wa boammaaruri, ba na le bomorwa Henadade,+ bomorwaabone le bomorwarraabone, ba Balefi.

10 E rile baagi ba thaya motheo wa tempele ya ga Jehofa,+ foo baperesiti ba apere diaparo tsa bone tsa tiro ba tshotse diterompeta,+ le Balefi, e leng bomorwa Asafe ba tshotse disemebala, ba ne ba ema gore ba bake Jehofa go ya ka taelo ya ga Kgosi Dafide wa Iseraele.+ 11 Mme ba ne ba simolola go opela ba refosana+ ba baka Jehofa e bile ba mo ntshetsa ditebogo, “ka gonne o molemo; lorato lwa gagwe lo lo sa kgaotseng mo go Iseraele ke lo lo nnelang ruri.”+ Foo batho botlhe ba ne ba goela kwa godimo ba baka Jehofa ka gonne motheo wa ntlo ya ga Jehofa o ne o setse o thailwe. 12 Bontsi jwa bannabagolo ba ba neng ba bone ntlo ya pele,+ e leng baperesiti, Balefi le ditlhogo tsa dikgotla tsa bone, ba ne ba lela ka lentswe le le kwa godimo fa ba bona motheo wa ntlo eno o thaiwa, mme ba bangwe ba bantsi bone ba ne ba goela kwa godimo thata ba itumetse.+ 13 Ka jalo, batho ba ne ba sa kgone go farologanya modumo wa go goa ka boitumelo le modumo wa go lela, ka gonne batho ba ne ba goela kwa godimo thata mo modumo wa bone o neng wa utlwiwa kgakala thata.