Dikgosi wa Ntlha

9 Fela fa Solomone a sena go fetsa go aga ntlo ya ga Jehofa, ntlo ya kgosi*+ le sengwe le sengwe se Solomone a neng a eleditse go se dira,+ 2 Jehofa o ne a iponatsa mo go Solomone lekgetlo la bobedi, fela jaaka a ne a iponaditse mo go ene kwa Gibeone.+ 3 Jehofa o ne a mo raya a re: “Ke utlwile thapelo ya gago le kopo ya gago ya go amogelwa e o neng wa e dira fa pele ga me. Ke dirile gore ntlo eno e o e agileng e nne boitshepo ka go dira gore leina la me le nnele ruri mo go yone,+ mme matlho a me le pelo ya me di tla nna mo go yone ka metlha.+ 4 Mme wena, fa o ka tsamaya mo ditseleng tsa me fela jaaka Dafide rrago a ne a tsamaya,+ ka pelo+ e e tlhamaletseng le ka tshiamo,+ ka go dira sengwe le sengwe se ke se go laetseng+ e bile o ikobela melao ya me le dikatlholo tsa me,+ 5 foo ke tla tiisa setulo sa bogosi jwa gago mo Iseraele gore se nne ka bosakhutleng, fela jaaka ke ne ka solofetsa Dafide rrago ke re, ‘Ka metlha go tla nna go na le monna wa losika lwa gago mo setulong sa bogosi sa Iseraele.’+ 6 Mme fa lona le bomorwaalona lo tlogela go ntshala morago e bile lo sa ikobele ditaelo tsa me le melao ya me e ke lo e neileng, mme lo tsamaya lo bo lo ya go direla medimo e mengwe le go e ikobela,+ 7 ke tla ntsha Iseraele mo lefatsheng le ke le ba neileng,+ mme ntlo e ke e dirileng boitshepo ka ntlha ya leina la me ke tla e ntsha fa pele ga me,+ mme Iseraele e tla nna sengwe sa go kgobiwa* le sengwe sa go sotliwa mo ditšhabeng tsotlhe.+ 8 Mme ntlo eno e tla nna mekoa ya marope.+ Mongwe le mongwe yo o fetang fa go yone o tla e rotolela matlho a gakgametse a bo a letsa molodi a bo a re, ‘Ke ka ntlha yang fa Jehofa a dirile lefatshe leno le ntlo eno jaana?’+ 9 Foo ba tla re, ‘Ke ka gonne ba ne ba tlogela Jehofa, Modimo wa bone yo o ntshitseng borraabonemogolo kwa lefatsheng la Egepeto, mme ba ne ba amogela medimo e mengwe ba bo ba e ikobela le go e direla. Ke gone ka moo Jehofa a ba tliseditseng masetlapelo ano otlhe.’”+

10 Kwa bokhutlong jwa dingwaga di le 20, tse mo go tsone Solomone a agileng matlo a mabedi, ntlo ya ga Jehofa le ntlo ya kgosi,*+ 11 Hirame+ kgosi ya Ture o ne a naya Solomone dikota tsa mosedara le tsa mofira le gauta e ntsi kafa a neng a batla ka gone,+ mme Kgosi Solomone o ne a naya Hirame metse e le 20 kwa lefatsheng la Galalea. 12 Ka jalo, Hirame o ne a tswa mo Ture a ya go bona metse e Solomone a neng a e mo neile, mme o ne a sa e kgotsofalele.* 13 O ne a re: “Ke metse ya mofuta mang eno e o e nneileng, morwarre?” Ka jalo, e ne ya bidiwa Lefatshe la Kabule* go tla go fitlha mo letsatsing leno. 14 Ka yone nako eo, Hirame o ne a romelela kgosi ditalenta* di le 120 tsa gauta.+

15 Eno ke pego ya batho ba Kgosi Solomone a neng a ba tlhophile gore ba mo direle tiro+ ya go aga ntlo ya ga Jehofa,+ ntlo ya gagwe,* Thota,*+ lobota lwa Jerusalema, Hasore,+ Megido+ le Gesere.+ 16 (Faro kgosi ya Egepeto o ile a tla mme a gapa motse wa Gesere a bo a o fisa ka molelo, mme gape o ile a bolaya Bakanana+ ba ba neng ba nna mo motseng oo. Ka jalo, o ne a o naya morwadie,+ mosadi wa ga Solomone, e le mpho* fa a kgaogana le ene.) 17 Solomone o ne a aga* Gesere, Bethe-horona yo o Kwa Tlase,+ 18 Baalathe+ le Tamare mo nageng e e mo lefatsheng leo, 19 mmogo le metse yotlhe ya mabolokelo ya ga Solomone, metse ya dikara,+ metse ya masole a a tsamayang ka dipitse le sepe fela se Solomone a neng a eletsa go se aga mo Jerusalema, mo Lebanona le mo lefatsheng lotlhe le a neng a le busa. 20 Fa e le batho botlhe ba ba neng ba setse ba Baamore, Bahite, Baperise, Bahife le Bajebuse,+ ba e neng e se karolo ya batho ba Iseraele,+ 21 ditlogolwana tsa bone tse di neng di setse mo lefatsheng, tse Baiseraele ba neng ba sa di fedisa, Solomone o ne a di tlhopha gore di mmerekele e le makgoba go tla go fitlha mo letsatsing leno.+ 22 Le fa go ntse jalo, Solomone ga a ka a dira Baiseraele bape makgoba,+ ka gonne e ne e le batlhabani ba gagwe, batlhanka ba gagwe, dikgosana tsa gagwe, balaodi ba badiredibagolo ba masole a gagwe le balaodi ba bakgweetsi ba gagwe ba dikara le masole a a tsamayang ka dipitse. 23 Go ne go na le balaodi ba bathusi ba le 550 ba ba neng ba okametse tiro ya ga Solomone, e leng balebedi ba ba neng ba okametse batho ba ba neng ba dira tiro.+

24 Le fa go ntse jalo, morwadia Faro+ o ne a tswa mo Motseng wa ga Dafide+ a ya kwa ntlong ya gagwe e Solomone a neng a e mo agetse; go tswa foo Solomone o ne a aga Thota.*+

25 Gararo ka ngwaga,+ Solomone o ne a ntsha ditlhabelo tse di fisiwang le ditlhabelo tsa go abelana mo sebesong se a neng a se agetse Jehofa,+ ka go dira jalo o ne a dira gore setlhabelo se kuise mosi mo sebesong, se se neng se le fa pele ga ga Jehofa, mme o ne a fetsa go aga ntlo.+

26 Gape Kgosi Solomone o ne a dira dikepe kwa Esione-gebere,+ e e gaufi le Elothe, mo losing lwa Lewatle le Lehibidu kwa lefatsheng la Edoma.+ 27 Hirame o ne a romela batlhanka ba gagwe ka setlhopha sa dikepe,+ batsamaisi ba dikepe ba ba nang le maitemogelo gore ba dire mmogo le batlhanka ba ga Solomone. 28 Ba ne ba ya kwa Ofire+ mme ba tsaya ditalenta tsa gauta di le 420 teng ba bo ba di isa kwa go Kgosi Solomone.