Ditiro Tsa Baaposetoloi

4 Fa Petere le Johane ba ntse ba bua le batho, baperesiti le molaodi wa tempele le Basadukae+ ba ne ba tla mo go bone. 2 Ba ne ba betilwe ke pelo ka gonne baaposetoloi ba ne ba ruta batho e bile ba bua phatlalatsa gore Jesu o tsositswe mo baswing.+ 3 Ka jalo, ba ne ba ba tshwara mme ba ba tsenya mo kgolegelong+ go fitlha letsatsi le le latelang, ka gonne go ne go setse go le maitseboa. 4 Le fa go ntse jalo, batho ba le bantsi ba ba neng ba reeditse puo eo ba ne ba dumela, mme palo ya banna ba ba neng ba dumela e ne e ka nna 5 000.+

5 Letsatsi le le latelang babusi, baeteledipele le bakwadi ba bone ba ne ba phuthega mmogo kwa Jerusalema, 6 ba ne ba na le Anase+ moperesiti yo mogolo, Kaiafase,+ Johane, Alekesandere le botlhe ba e neng e le ba losika lwa moperesiti yo mogolo. 7 Ba ne ba emisa Petere le Johane mo gare ga bone ba bo ba ba botsa ba re: “Lo dirile selo seno ka taolo ya ga mang kgotsa ka leina la ga mang?” 8 Foo Petere o ne a ba araba a tletse moya o o boitshepo+ a re:

“Babusi le baeteledipele, 9 fa e le gore gompieno lo re botsolotsa ka selo se sentle se re se diretseng monna yo o neng a golafetse,+ e bile lo batla go itse gore ke mang yo o fodisitseng monna yono, 10 a lona lotlhe le batho botlhe ba Iseraele lo itse gore monna yono yo o emeng fano o fodisitswe ka leina la ga Jesu Keresete wa Monasaretha,+ yo lo neng lwa mmolaela mo koteng,+ le fa go ntse jalo, Modimo o ne a mo tsosa mo baswing.+ 11 Leno ke ‘leje le lona baagi lo neng lwa le tsaya e se la sepe, le gone jaanong le fetogileng leje le legolo la sekhutlo.’*+ 12 Mo godimo ga moo, ga go na ope yo mongwe yo re ka bolokwang ka ene, ka gonne ga go na leina le lengwe+ ka fa tlase ga legodimo le batho ba le neilweng le re tshwanetseng go bolokwa ka lone.”+

13 Jaanong e rile ba bona Petere le Johane ba le pelokgale, mme ba lemoga gore ba ne ba sa rutega* e bile e le batho fela ba ba tlwaelegileng,+ ba ne ba gakgamala. Mme ba ne ba lemoga gore ba kile ba bo ba na le Jesu.+ 14 E re ka ba ne ba bona monna yo o neng a fodisitswe a eme le bone,+ ba ne ba palelwa ke go mo araba.+ 15 Ka jalo, ba ne ba ba laela gore ba tswele kwa ntle ga holo ya Sanehederine, mme ba ne ba sala ba botsana 16 ba re: “Re tla dira eng ka banna bano?+ Ka gonne ruri ba dirile kgakgamatso e e tlhomologileng, e e bonweng ke batho botlhe ba Jerusalema,+ mme re ka se kgone go e ganetsa. 17 Ka jalo, a re ba tshosetseng gore ba se ka ba tlhola ba bua ka seno mo bathong. Mme a re ba boleleleng gore ba se ka ba tlhola ba bua le motho ope ka leina la monna yono.”+

18 Foo ba ne ba ba bitsa ba bo ba ba laela gore ba se ka ba tlhola ba bua sepe kgotsa ba ruta ka leina la ga Jesu. 19 Le fa go ntse jalo, Petere le Johane ba ne ba ba raya ba re: “A e nne lona lo atlholang gore a go siame mo Modimong gore re lo ikobele go na le gore re ikobele Modimo. 20 Mme rona, ga re ka ke ra tlogela go bua ka dilo tse re di boneng le tse re di utlwileng.”+ 21 Ka jalo, fa ba sena go ba tshosetsa gape, ba ne ba ba golola, ka gonne ba ne ba sa bone lebaka lepe la go ba otlhaya le ka gonne ba ne ba tshaba batho e re ka batho botlhe+ ba ne ba galaletsa Modimo ka ntlha ya se se neng se diragetse. 22 Monna yo o neng a fodisitswe ka kgakgamatso o ne a na le dingwaga di feta 40.

23 Fa ba sena go gololwa, ba ne ba ya kwa barutweng ba bangwe mme ba ba bolelela se baperesiti ba bagolo le baeteledipele ba neng ba se ba boleletse. 24 Fa batho botlhe ba ba neng ba le gone ba utlwa seno, ba ne ba rapela Modimo ba le seoposengwe ba re:

“Morena Molaodimogolo, ke Wena yo o neng wa dira legodimo, lefatshe, lewatle le dilo tsotlhe tse di mo go tsone,+ 25 e bile o ne wa dirisa moya o o boitshepo go bua ka molomo wa motlhanka wa gago Dafide,+ e bong rraaronamogolo o re: ‘Ke ka ntlha yang fa merafe e ile ya galefa le batho ba ile ba tlhatlhanya ka dilo tse di se nang mosola? 26 Dikgosi tsa lefatshe di ne tsa ema le babusi ba ne ba phuthega mmogo gore ba nne seoposengwe mme ba ganetsane le Jehofa* le motlodiwa wa gagwe.’*+ 27 Gonne Herode le Ponto Pilato+ mmogo le banna ba ditšhaba tse dingwe le batho ba Iseraele, ba ne ba phuthegetse mo motseng ono ba ganetsana le motlhanka wa gago yo o boitshepo e bong Jesu, yo o neng wa mo tlotsa.+ 28 Ba ne ba kopana mmogo gore ba dire se o ileng wa se bolelela pele. Dilo tseno di ne tsa direga ka gonne o na le maatla le ka gonne di dumalana le thato ya gago.+ 29 Mme jaanong, Jehofa,* reetsa matshosetsi a bone, mme o dire gore batlhanka ba gago ba tswelele ba bua lefoko la gago ka bopelokgale, 30 fa o ntse o dirisa maatla a gago go fodisa batho ba ba lwalang le fa ditshupo le dikgakgamatso di ntse di dirwa+ ka leina la motlhanka wa gago yo o boitshepo e bong Jesu.”+

31 E rile ba sena go rapela ka tlhoafalo, lefelo le ba neng ba phuthegetse mo go lone le ne la roroma, mme botlhe fela ba ne ba tlala moya o o boitshepo+ ba bo ba bua lefoko la Modimo ka bopelokgale.+

32 Mo godimo ga moo, ba le bantsi ba ba neng ba dumela ba ne ba akanya e bile ba ikutlwa ka tsela e e tshwanang, e bile go ne go se na ope wa bone yo o neng a re dilo tse a nang le tsone ke tsa gagwe, ka gonne ba ne ba tlhakanetse dilo tsotlhe.+ 33 Mme baaposetoloi ba ne ba tswelela ba rera ka tsela e e maatla ka tsogo ya Morena Jesu,+ e bile Modimo o ne a ba bontsha bopelonomi jwa gagwe jo bogolo.* 34 Tota e bile, go ne go se na ope wa bone yo o tlhokang,+ ka gonne botlhe ba ba neng ba na le masimo kgotsa matlo ba ne ba a rekisa ba bo ba tlisa madi a dilo tse ba di rekisitseng 35 ba bo ba a naya baaposetoloi.+ Go tswa foo, mongwe le mongwe o ne a abelwa go ya ka se a se tlhokang.+ 36 Ka jalo, Josefa, yo gape baaposetoloi ba neng ba mmitsa Barenabase+ (leina le fa le ranolwa le rayang, “Morwa Kgomotso”) yo e neng e le Molefi yo o tswang kwa Kupero, 37 o ne a na le tshimo, mme o ne a e rekisa a bo a isa madi ao kwa baaposetoloing.+