Lekwalo la ga Jakobe

1 Nna Jakobe,+ motlhanka wa Modimo le wa Morena Jesu Keresete, ke kwalela ditso tse 12 tse di phatlaletseng:

Madume!

2 Bakaulengwe ba me, itumeleng* thata fa lo tlelwa ke diteko tse di farologaneng,+ 3 ka gonne lo a itse gore fa tumelo ya lona e lekwa jalo, e tla lo thusa gore lo kgone go itshoka.+ 4 Mme gone, letlang gore boitshoko bo feleletse tiro ya jone, gore lo felele lo bo lo itekanele sentle mo dilong tsotlhe, lo sa tlhaele mo go sepe.+

5 Ka jalo, fa mongwe wa lona a tlhoka botlhale, a a nne a bo kope mo Modimong+ mme o tla bo newa,+ ka gonne Modimo o bo naya botlhe ba ba bo kopang mme o dira jalo ka bopelotshweu e bile a sa ba kgobe.*+ 6 Mme a a nne a kope a na le tumelo,+ a sa belaele sepe,+ ka gonne yo o belaelang o tshwana le lekhubu la lewatle le le kgweediwang ke phefo, le phailelwa kwa le kwa. 7 Tota e bile, motho yoo a se ka a solofela gore o tla amogela sengwe mo go Jehofa;* 8 ke motho yo o sa kgoneng go dira ditshwetso,+ yo o sa tlhomamang mo dilong tsotlhe tse a di dirang.

9 Mme a mokaulengwe wa maemo a a kwa tlase a itumele* ka gonne Modimo a mo godisitse,+ 10 le mohumi a itumele ka gonne a kokobeditswe,+ gonne o tla nyelela* jaaka lelômô* le le kwa nageng. 11 Gonne fela jaaka letsatsi le tlhaba ka mogote o o babolang e bile le dira gore dimela di swabe, malômô a tsone a tlhotlhorege le bontle jwa dimela bo nyelele, ka tsela e e tshwanang, monna yo o humileng o tla nyelela ka gonne a lelekisa dikhumo.+

12 Go itumela motho yo o tswelelang a itshokela diteko,+ ka gonne fa Modimo a mo amogela, o tla amogela serwalo sa botshelo,+ se Jehofa* a se solofetsang ba ba tswelelang ba mo rata.+ 13 Fa mongwe a le mo tekong, a a se ka a re: “Ke lekwa ke Modimo.” Gonne Modimo ga a ka ke a lekwa ka dilo tse di bosula, le gone ene ka boene ga a leke ope. 14 Mme mongwe le mongwe o lekwa ka go gogelwa ke keletso ya gagwe e bo e mo raela.*+ 15 Go tswa foo, fa keletso e sena go gola,* e tsala boleo; boleo le jone fa bo sena go diragadiwa, bo tsala loso.+

16 Ka jalo, bakaulengwe ba me ba ba rategang, lo se ka lwa tsiediwa. 17 Mpho nngwe le nngwe e e molemo le neo nngwe le nngwe e e itekanetseng e tswa kwa godimo,+ e tswa kwa go Rara wa masedi a legodimo,+ yo o sa fetogeng jaaka moriti.*+ 18 Thato ya gagwe e ne e le go dira gore re tshele fa re dumela gore lefoko la gagwe le boammaaruri,+ gore re nne ba ntlha ba a ba tlhophileng mo dibopiweng tsa gagwe.+

19 Bakaulengwe ba me ba ba rategang, itseng seno: Mongwe le mongwe o tshwanetse go nna bonako go utlwa, bonya go bua,+ bonya go galefa,+ 20 gonne fa motho a galefile ga a dire se se siameng fa pele ga Modimo.+ 21 Ka jalo, latlhang leswe lotlhe le sengwe le sengwe se se bosula,+ mme lo nne bonolo lo bo lo letle Modimo a jalele lefoko la gagwe mo go lona ka gonne le ka kgona go lo boloka.

22 Le fa go ntse jalo, dirang se lefoko la Modimo le se buang+ mme lo se ka lwa le utlwa fela, lo itsietsa ka go akanya ka tsela e e phoso. 23 Gonne fa motho a utlwa lefoko, mme a sa le diragatse,+ o tshwana le monna yo o lebileng sefatlhego sa gagwe mo seiponeng. 24 Gonne o a iteba, a bo a tsamaya mme ka yone nako eo o lebala gore o lebega jang. 25 Le fa go ntse jalo, motho yo o lebang ka kelotlhoko* mo molaong o o itekanetseng+ wa kgololesego e bile a nnela ruri mo go one, ga a nne motho yo o utlwang a bo a lebala, go na le moo o diragatsa se a se utlwileng; mme o tla itumelela se a se dirang.+

26 Fa motho a akanya gore o obamela Modimo* mme a sa laole loleme lwa gagwe,+ o tsietsa pelo ya gagwe e bile kobamelo ya motho yono ga e na mosola. 27 Kobamelo* e Modimo wa rona e bong Rara a e tsayang e le phepa e bile e sa leswafala ke eno: go tlhokomela dikhutsana+ le batlholagadi+ ba ba bogang,+ le gore motho a se ka a kgotlelwa ke tsela e batho ba ba seng kutlo ba tshelang ka yone.+