Efangele ya ga Mathaio

4 Foo moya wa Modimo o ne wa dira gore Jesu a ye kwa nageng, mme fa a le koo o ne a raelwa+ ke Diabolo.+ 2 Fa a sena go itima dijo malatsi a le 40 le masigo a le 40, o ne a tshwarwa ke tlala. 3 Mme Moraedi+ o ne a tla kwa go ene a bo a mo raya a re: “Fa e le gore o morwa Modimo, laela maje ano gore a fetoge dinkgwe.” 4 Le fa go ntse jalo, o ne a mo araba a re: “Go kwadilwe jaana: ‘Motho ga a tshwanela go tshela ka senkgwe fela, mme o tshwanetse go tshela ka lefoko lengwe le lengwe le le tswang mo molomong wa ga Jehofa.’”*+

5 Go tswa foo, Diabolo o ne a mo isa kwa motseng o o boitshepo,+ mme a mo emisa mo setlhoeng* sa tempele+ 6 a bo a mo raya a re: “Fa e le gore o morwa Modimo, itatlhele kwa tlase, ka gonne go kwadilwe jaana: ‘O tla laela baengele ba gagwe gore ba go thuse,’ mme ‘Ba tla go tshegetsa ka diatla, gore lonao lwa gago lo se ka lwa itaagana le leje lepe.’”+ 7 Jesu o ne a mo raya a re: “Gape go kwadilwe jaana: ‘Ga o a tshwanela go leka Jehofa,* Modimo wa gago.’”+

8 Gape Diabolo o ne a mo isa kwa thabeng e e goletseng kwa godimo ka tsela e e sa tlwaelegang a bo a mmontsha magosi otlhe a lefatshe le kgalalelo ya one.+ 9 Mme o ne a mo raya a re: “Ke tla go naya dilo tseno tsotlhe fa o ka wela fa fatshe mme wa nkobamela.” 10 Foo Jesu o ne a mo raya a re: “Tsamaya, Satane! Gonne go kwadilwe jaana: ‘O tshwanetse go obamela Jehofa,* Modimo wa gago fela,+ e bile ke ene fela yo o tshwanetseng go mo direla.’”+ 11 Foo Diabolo o ne a mo tlogela,+ mme baengele ba ne ba tla go mo nonotsha.+

12 Jaanong e rile Jesu a utlwa gore Johane o ne a tshwerwe,+ o ne a ya kwa Galalea.+ 13 Morago ga moo, fa a sena go tswa kwa Nasaretha, o ne a tla mme a nna mo Kaperenama+ go bapa le lewatle mo dikgaolong tsa Sebulone le Nafetali, 14 gore go tle go diragale se moporofeti Isaia a neng a se bua fa a ne a re: 15 “Wena Galalea wa ditšhaba, e leng lefatshe la Sebulone le lefatshe la Nafetali, yo o bapileng le tsela e e fa lewatleng, ka fa bophirima jwa Joredane! 16 Batho ba ba ntseng mo lefifing ba ne ba bona lesedi le legolo, mme ba ba nnang mo lefatsheng la moriti o montsho, ba ne ba phatsimelwa+ ke lesedi.”+ 17 Go tloga ka nako eo go ya pele, Jesu o ne a simolola go rera a re: “Ikwatlhayeng, ka gonne Bogosi jwa magodimo bo atametse.”+

18 Fa a ntse a tsamaya go bapa le Lewatle la Galalea, o ne a bona banna ba babedi ba e neng e le bana ba motho, Simone yo o bidiwang Petere+ le monnawe* e bong Anderea, ba latlhela letlowa mo lewatleng, ka gonne e ne e le batshwaraditlhapi.+ 19 Mme o ne a ba raya a re: “Ntshaleng morago, mme ke tla lo dira batshwari ba batho.”+ 20 Ka yone nako eo, ba ne ba tlogela matlowa a bone ba bo ba mo sala morago.+ 21 Fa a ntse a tsweletse ka loeto a tswa koo, o ne a bona banna ba bangwe gape ba babedi ba e neng e le bana ba motho, Jakobe morwa Sebede le monnawe e bong Johane.+ Ba ne ba na le rraabone e bong Sebede mo mokorong, ba rokaganya matlowa a bone, mme o ne a ba bitsa.+ 22 Ka yone nako eo, ba ne ba tlogela mokoro le rraabone mme ba mo sala morago.

23 Go tswa foo, o ne a tsamaya mo Galalea yotlhe,+ a ruta mo disinagogeng tsa bone,+ a rera dikgang tse di molemo tsa Bogosi e bile a fodisa bolwetse jwa mofuta mongwe le mongwe le bokoa jwa mofuta mongwe le mongwe mo bathong.+ 24 Pego ka ga gagwe e ne ya anamela kwa Siria yotlhe, mme ba ne ba mo tlisetsa batho botlhe ba ba neng ba tshwerwe ke malwetse a a farologaneng e bile ba le mo ditlhabing,+ batho ba ba neng ba laolwa ke madimona+ le ba ba nang le bolwetse jwa go wa+ le ba ba sa kgoneng go tsamaya ka ntlha ya bolwetse, mme o ne a ba fodisa. 25 Ka gone, boidiidi jo bogolo bo ne jwa mo sala morago bo tswa kwa Galalea, kwa Dekapolise,* kwa Jerusalema, kwa Judea le ka kwa ga Joredane.