Ditiragalo wa Ntlha

22 Go tswa foo, Dafide o ne a re: “Eno ke ntlo ya ga Jehofa, Modimo wa boammaaruri, mme seno ke sebeso sa ditlhabelo tse di fisiwang tsa Iseraele.”+

2 Foo Dafide o ne a laela gore go phuthiwe batswakwa+ ba ba neng ba le mo lefatsheng la Iseraele, mme o ne a ba tlhoma gore e nne basegi ba maje gore ba sege maje ba bo ba a betla gore go agiwe ntlo ya Modimo wa boammaaruri.+ 3 Gape Dafide o ne a kokoanya tshipi e ntsi thata gore go dirwe dipekere tsa ditswalo tsa dikgoro le dilo tse di tshwaraganyang, le kopore e ntsi thata e bokete jwa yone bo neng bo ka se ka jwa kalwa,+ 4 le dikota tsa mosedara+ tse di se nang palo, ka gonne Basidona+ le Bature+ ba ne ba tlisetsa Dafide dikota tsa mosedara tse dintsi thata. 5 Mme Dafide o ne a re: “Morwaake e bong Solomone o mmotlana e bile ga a na maitemogelo,*+ mme ntlo e e tshwanetseng go agelwa Jehofa e tshwanetse go nna kgolo thata,+ gore go tuma ga yone le bontle jwa yone+ di itsiwe mo dinageng tsotlhe.+ Jaanong, ke tla mmaakanyetsa.” Ka jalo, Dafide o ne a kokoanya didirisiwa di le dintsi thata pele ga loso lwa gagwe.

6 Mo godimo ga moo, o ne a bitsa morwawe e bong Solomone mme a mo laela gore a agele Jehofa, Modimo wa Iseraele ntlo. 7 Dafide o ne a raya morwawe e bong Solomone a re: “Mme nna, keletso ya pelo ya me e ne e le go agela leina la ga Jehofa, Modimo wa me ntlo.+ 8 Le fa go ntse jalo, Jehofa o ne a nthaya a re, ‘O tsholotse madi a mantsi thata, e bile o lole dintwa tse dikgolo. Ga o kitla o agela leina la me ntlo,+ ka gonne o tsholotse madi a mantsi thata mo lefatsheng fa pele ga me. 9 O tla nna le morwa+ yo e tla nnang monna yo o ratang kagiso,* mme ke tla mo naya boikhutso go se na mmaba ope yo o mo dikologileng yo o tla mo tshwenyang,+ ka gonne leina la gagwe e tla nna Solomone,*+ mme ke tla naya Baiseraele kagiso le boiketlo mo motlheng wa gagwe.+ 10 Ke ene yo o tla agelang leina la me ntlo.+ O tla nna morwaake, mme nna ke tla nna rraagwe.+ Ke tla tiisa setulo sa bogosi jwa gagwe gore se nne ka bosakhutleng mo Iseraele.’+

11 “Jaanong morwaaka, e kete Jehofa a ka nna le wena, mme e kete o ka atlega mme wa aga ntlo ya ga Jehofa, Modimo wa gago, fela jaaka a buile ka wena.+ 12 E kete Jehofa a ka go naya botlhale le tlhaloganyo+ fa a go naya taolo mo Iseraele, gore o boloke molao wa ga Jehofa, Modimo wa gago.+ 13 Fa o ka boloka ka kelotlhoko melao+ le dikatlholo tse Jehofa a neng a laela Moshe gore a di neye Baiseraele, foo o tla atlega.+ O nne pelokgale o bo o nonofe. O se ka wa boifa kgotsa wa tshoga.+ 14 Bona, ke dirile ka natla go kokoanyetsa ntlo ya ga Jehofa ditalenta* tsa gauta di le 100 000 le ditalenta tsa selefera di le 1 000 000 le kopore le tshipi+ di le dintsi thata mo bokete jwa tsone bo ka se kang jwa kalwa, mme gape ke kokoantse dikota le maje,+ mme tsone o tla di oketsa. 15 O na le badiri ba bantsi thata: basegi ba maje, babetli ba maje+ le babetli ba logong le badiri botlhe ba ba ditswerere ba ditiro tse di farologaneng.+ 16 Gauta, selefera, kopore le tshipi ga di ka ke tsa lekanngwa.+ Ipaakanye mme o simolole tiro, mme e kete Jehofa a ka nna le wena.”+

17 Go tswa foo, Dafide o ne a laela dikgosana tsotlhe tsa Iseraele gore di thuse morwawe e bong Solomone, a re: 18 “A Jehofa, Modimo wa lona ga a na le lona, e bile a ga a lo naya boikhutso mo matlhakoreng otlhe? Gonne o ne a tsenya banni ba lefatshe leno mo seatleng sa me, mme lefatshe le ne la fenngwa fa pele ga ga Jehofa le fa pele ga batho ba gagwe. 19 Jaanong ikemisetseng ka pelo ya lona yotlhe le ka moya wa lona otlhe go batla Jehofa, Modimo wa lona,+ mme lo simolole go aga lefelo le le boitshepo la ga Jehofa, Modimo wa boammaaruri,+ gore lo tlise letlole la kgolagano ya ga Jehofa le dilwana tse di boitshepo tsa Modimo wa boammaaruri+ mo ntlong e e agetsweng leina la ga Jehofa.”+