Efangele ya ga Luke

3 Mo ngwageng wa bo15 wa puso ya ga Tiberio Kaesara, fa Ponto Pilato e ne e le molaodi wa Judea, Herode*+ e le mmusi wa kgaolo ya Galalea, mogolowe e bong Filipo e le mmusi wa kgaolo ya Iturea le Terakoniti, mme Lisaniase e le mmusi wa kgaolo ya Abilene, 2 mo motlheng wa ga moperesiti yo mogolo Anase le Kaiafase,+ Johane+ morwa Sekarea o ne a amogela molaetsa o o tswang kwa Modimong a le kwa nageng.+

3 Ka jalo, o ne a ya kwa mafelong otlhe a a dikologileng Joredane, a rerela batho gore ba kolobediwe e le go bontsha gore ba ikwatlhaetse maleo a bone gore Modimo a tle a ba itshwarele,+ 4 fela jaaka go kwadilwe mo bukeng ya ga moporofeti Isaia go twe: “Mongwe o goa a le kwa nageng a re: ‘Baakanyang tsela ya ga Jehofa!* Tlhamalatsang ditsela tsa gagwe.+ 5 Mokgatšha mongwe le mongwe o tshwanetse go katelwa, le thaba nngwe le nngwe le thota nngwe le nngwe di tshwanetse go isiwa kwa tlase; ditsela tse di sa tlhamalalang di tshwanetse go tlhamaladiwa le ditsela tse di magwata di tshwanetse go nna borethe; 6 e bile batho botlhe* ba tla bona tsela e Modimo a tla tlisang poloko ka yone.’”*+

7 Ka jalo, o ne a raya batho ba bantsintsi ba ba neng ba tla kwa go ene gore a ba kolobetse a re: “Lona bana ba dinoga tse di botlhole, ke mang yo o lo tlhagisitseng gore lo tshabe bogale jwa Modimo jo bo tlang?+ 8 Ka jalo, ungwang maungo a a bontshang gore lo a ikwatlhaya. Lo se ka lwa ithaya lwa re, ‘Rraarona ke Aborahame.’ Gonne ke a lo bolelela, Modimo a ka kgona go direla Aborahame bana ka maje ano. 9 Eleruri, selepe se setse se le mo meding ya ditlhare. Foo setlhare sengwe le sengwe se se sa ungweng maungo a a molemo se tla remiwa se bo se latlhelwa mo molelong.”+

10 Batho bao ba ne ba mmotsa ba re: “Jaanong re tshwanetse go dira eng?” 11 O ne a ba raya a re: “A motho yo o nang le diaparo tse pedi* a abele yo o se nang sepe, mme a yo o nang le dijo a dire se se tshwanang.”+ 12 Tota le bakgethisi ba ne ba tla kwa go ene gore a ba kolobetse,+ mme ba ne ba mo raya ba re: “Morutisi, re tshwanetse go dira eng?” 13 O ne a ba raya a re: “Lo se ka lwa pateletsa batho go ntsha madi a a fetang selekanyo se se beilweng sa lekgetho.”+ 14 Masole le one a ne a mmotsa a re: “Rona re tshwanetse go dira eng?” Mme o ne a ba raya a re: “Lo se ka lwa kgerisa ope* kgotsa lwa latofatsa ope ka maaka,+ mme kgotsofalelang dilo tse lo tlamelwang ka tsone.”*

15 Jaanong batho ba ne ba letile e bile botlhe ba ne ba ipotsa gore a Johane e ka tswa e le Keresete.+ 16 Johane o ne a ba raya a re: “Nna ke lo kolobetsa ka metsi, mme mongwe yo o nonofileng go mpheta o etla, yo ke sa tshwanelegeng go bofolola dikgole* tsa ditlhako* tsa gagwe.+ O tla lo kolobetsa ka moya o o boitshepo le ka molelo.+ 17 O tshotse garawe ya gagwe e e olosang gore a phepafatse seboana sa gagwe ka botlalo le gore a phuthele korong mo mabolokelong a gagwe, mme mmoko one o tla o ja ka molelo o o ka se kang wa timiwa.”

18 Gape o ne a ba kgothatsa ka ditsela tse dintsi tse di farologaneng a bo a tswelela a bolelela batho dikgang tse di molemo. 19 E re ka Johane a ne a kgalemetse mmusi wa kgaolo e bong Herode ka dilo tsotlhe tse di bosula tse a neng a di dirile le ka ga Herodiase mosadi wa ga mogolowe, 20 Herode o ne a dira molato o mongwe gape: O ne a tswalela Johane mo kgolegelong.+

21 Jaanong e rile batho botlhe ba kolobediwa, Jesu le ene o ne a kolobediwa.+ Fa a ntse a rapela, legodimo le ne la bulega,+ 22 mme moya o o boitshepo o bopegile jaaka lephoi, o ne wa fologela mo go ene, mme lentswe le ne la tswa kwa legodimong le re: “O Morwaake yo o rategang; ke go amogetse.”+