Baroma

10 Bakaulengwe, ke eletsa ka pelo ya me yotlhe e bile ke rapela Modimo gore Baiseraele ba bolokwe.+ 2 Gonne ba direla Modimo ka natla,+ mme ga ba na kitso ya boammaaruri. 3 E re ka ba sa itse se Modimo a se tsayang se siame,+ ba dira se bone ba akanyang gore se siame.+ Ka ntlha ya seo, ga ba latele ditaelo tsa Modimo ka se se siameng.+ 4 Gonne Keresete o fedisitse molao wa ga Moshe,+ gore botlhe ba ba dumelang mo go ene ba bolelwe ba siame.+

5 Gonne Moshe o ile a re motho yo o dirang se se siameng go dumalana le se Molao o se buang, o tla tshela.”+ 6 Mme Lefoko la Modimo le bua jaana ka motho yo o bolelwang a siame ka gonne a na le tumelo: “O se ka wa bua mo pelong ya gago wa re,+ ‘Ke mang yo o tla tlhatlogelang kwa legodimong?’+ ke gore, a folose Keresete, 7 kgotsa, ‘Ke mang yo o tla fologelang mo khuting e e kwa tengteng?’+ ke gore, a tsose Keresete mo baswing.” 8 Mme lefoko la Modimo la reng? La re, “Molaetsa o gaufi le wena, o mo molomong wa gago le mo pelong ya gago”;+ ono ke, “molaetsa” o re o rerang mme batho ba dumela mo go one. 9 Gonne fa o bolela phatlalatsa ka molomo gore Jesu ke Morena+ o bo o dumela mo pelong gore Modimo o ne a mo tsosa mo baswing, o tla bolokwa. 10 Gonne Modimo o tsaya motho a siame ka ntlha ya tumelo e a nang le yone mo pelong, mme motho yoo o bolela phatlalatsa ka molomo+ gore a bone poloko.

11 Gonne lokwalo lwa re: “Ga go na ope yo o dumelang mo go ene yo o tla swabisiwang.”+ 12 Gonne ga go na pharologanyo fa gare ga Mojuda le Mogerika.+ Go na le Morena a le mongwe fela mo go botlhe, yo o nayang botlhe ba ba mmitsang masego a mantsi. 13 Gonne “mongwe le mongwe yo o bitsang leina la ga Jehofa* o tla bolokwa.”+ 14 Le fa go ntse jalo, ba tla mmitsa jang ba ise ba dumele mo go ene? Gape, ba tla dumela jang mo go ene ba ise ba utlwe ka ene? Gape, ba tla utlwa jang go se na ope yo o ba rerelang? 15 Gape, ba tla rera jang fa go se na ope yo o ba romileng?*+ Fela jaaka go kwadilwe go twe: “Ruri dinao tsa ba ba bolelang dikgang tse di molemo tsa sengwe se se botoka di dintle!”+

16 Le fa go ntse jalo, ga se botlhe ba ba neng ba dumela dikgang tse di molemo. Gonne Isaia a re: “Jehofa,* ke mang yo o utlwileng se re se buileng* a bo a se dumela?”+ 17 Ka jalo, motho o nna le tumelo fa a sena go utlwa lefoko.+ Mme lefoko le utlwiwa fa mongwe a rera ka Keresete. 18 Le fa go ntse jalo, a seno se raya gore ga ba a ka ba utlwa molaetsa? Nnyaa le e seng, “molaetsa oo o ne wa utlwiwa mo lefatsheng lotlhe, tota le kwa mafelong a a kgakalakgakala.”+ 19 Jaanong, a seno se raya gore Baiseraele ga ba itse?+ Nnyaa, ba a itse. Sa ntlha Moshe o ne a re: “Ke tla lo tlhotlheletsa gore lo fufege ke dirisa setšhaba se sele; ke tla lo tlhotlheletsa gore lo galefe thata ke dirisa setšhaba se se seng botlhale.”+ 20 Mme Isaia o ne a bua a le pelokgale a re: “Ke ne ka bonwa ke ba ba neng ba sa mpatle;+ ke ne ka itsiwe ke ba ba neng ba sa botse ka nna.”+ 21 Mme fa a bua ka Iseraele o ne a re: “Letsatsi le letsatsi ke ne ke otlololela batho ba ba sa reetseng le ba ba tlhogoethata diatla tsa me.”+