Baroma

11 Ka jalo, a Modimo o ne a latlha batho ba gagwe?+ Nnyaa, le e seng! Gonne le nna ke Moiseraele, wa losika lwa ga Aborahame, wa lotso lwa ga Benjamine. 2 Modimo ga a ka a latlha batho ba gagwe, ba a sa bolong go ba tlhopha.*+ A ga lo itse se lokwalo lo se buang ka Elija, fa a ne a rapela Modimo a ngongorega ka Baiseraele? 3 Elija o ne a re: “Jehofa,* ba bolaile baporofeti ba gago, ba epolotse dibeso tsa gago, go setse nna fela ke le nosi, mme jaanong ba batla go mpolaya.”+ 4 Le fa go ntse jalo, Modimo o ne a mo raya a reng? O ne a re: “Ke sa ntse ke na le banna ba le 7 000 ba ba setseng, ba mangole a bone a sa khubamelang Baale.”+ 5 Ka jalo, ka tsela e e tshwanang, mo nakong eno gape go na le setlhopha+ se sennye* sa ba ba tlhophilweng ka ntlha ya bopelonomi jo bogolo.* 6 Jaanong seno se raya gore Modimo o ne a ba tlhopha ka ntlha ya bopelonomi jwa gagwe jo bogolo,+ e seng ka ntlha ya ditiro tsa bone.+ Fa e le gore ba ne ba dira ka natla gore ba tlhophiwe, ba ne ba tla bo ba sa tlhophiwa ka ntlha ya bopelonomi jwa Modimo jo bogolo.

7 Jaanong go tweng? Baiseraele ga ba a ka ba bona se ba neng ba se batla ka tlhoafalo. Ba ba tlhophilweng ke bone ba ba neng ba se bona.+ Ba bangwe botlhe ga ba a ka ba reetsa,*+ 8 fela jaaka go kwadilwe go twe: “Modimo o dirile gore ba robale boroko jo bogolo,+ mo e leng gore matlho a bone ga a bone le ditsebe tsa bone ga di utlwe, go tla go fitlha mo letsatsing leno.”+ 9 Gape, Dafide a re: “Dira gore tafole ya bone e nne serai le sekgopi mme a ba atlholwe. 10 Dira gore matlho a bone a fifale gore ba se ka ba bona, e bile o dire gore ba obege ba rwale morwalo o o bokete.”+

11 Ka jalo, a ba ne ba kgopiwa gore ba se ka ba tlhola ba ema? Nnyaa, le e seng! E re ka ba ne ba leofa mme batho ba ditšhaba tse dingwe ba ne ba bolokwa, ba a fufega.+ 12 Jaanong fa e le gore go leofa ga bone go tlisetsa lefatshe dikhumo, le go fokotsega ga palo ya bone go tlisetsa batho ba ditšhaba tse dingwe dikhumo,+ ruri dikhumo tsa bone di tla nna dintsi thata fa palo ya bone e tla bo e feletse!

13 Jaanong ke bua le lona ba lo tswang mo ditšhabeng tse dingwe. E re ka ke le moaposetoloi yo o rometsweng mo ditšhabeng tse dingwe,+ ke tlotla tiro e ke e direlang Modimo+ 14 gore ke tle ke bone gore a ka tsela nngwe nka kgona go dira gore batho ba gaetsho* ba fufege mme ke boloke bangwe mo go bone. 15 Gonne go latlhiwa ga bone+ go ne ga dira gore batho ba bangwe mo lefatsheng ba nne ditsala tsa Modimo.* Fa Modimo a ba amogela gape, go tla nna jaaka e kete ba tsosiwa mo baswing ba bo ba tshela gape. 16 Mo godimo ga moo, fa e le gore bontlhanngwe jwa bupi jo bo dubilweng jo bo tsewang e le mabutswapele bo boitshepo, go raya gore bupi jotlhe le jone bo boitshepo; mme fa e le gore modi o boitshepo, dikala le tsone di ntse jalo.

17 Le fa go ntse jalo, dikala tse dingwe di ne tsa kgaolwa* mo setlhareng. Go tswa foo, wena, o ne wa bofelelwa* mo go tsone le fa o le motlhware wa naga, mme jaanong o solegelwa molemo ke modi wa motlhware. 18 Mme gone, o se ka wa akanya gore o botoka go na le* dikala tse dingwe. Mme fa o akanya gore o botoka mo go tsone,*+ o gakologelwe gore ga se wena o tshegeditseng modi, mme modi o tshegeditse wena. 19 Ka jalo, o tla re: “Dikala di ne tsa kgaolwa gore ke tle ke bofelelwe.”+ 20 Seo se boammaaruri! Gonne ba ne ba kgaolwa ka ntlha ya go tlhoka tumelo,+ mme wena o eme ka tumelo ya gago.+ O se ka wa nna mabela, mme o boife. 21 Gonne fa e le gore Modimo o ne a kgaola dikala tsa setlhare seo, le wena o tla go kgaola. 22 Ka jalo, o kgona go bona gore Modimo o pelonomi+ gape o bogale. O galefela ba ba neng ba wa.+ Mme o pelonomi mo go wena fa fela o nnela ruri mo bopelonoming jwa gagwe; go seng jalo, le wena o tla kgaolwa. 23 Le bone, fa ba simolola go nna le tumelo, ba tla bofelelwa,+ ka gonne Modimo o kgona go ba bofelela gape mo setlhareng. 24 O ne wa kgaolwa mo setlhareng sa motlhware sa naga mme wa bofelelwa mo setlhareng sa motlhware sa tshingwana, e leng selo se se sa tlwaelegang. Ruri go tla nna motlhofo gore dikala tsa tlholego di bofelelwe gape mo setlhareng sa tsone sa motlhware!

25 Gonne ke batla gore lo itse ka sephiri se se boitshepo+ seno lona bakaulengwe, gore lo se ka lwa akanya gore lo botlhale: Bangwe ba batho ba Iseraele ba ne ba nna tlhogoethata go fitlha palo ya batho ba ditšhaba tse dingwe e felela, 26 mme eno ke tsela e Iseraele yotlhe+ e tla bolokwang ka yone. Dikwalo tsa re: “Mmoloki* o tla tswa mo Siona+ a bo a tlosa dilo tse di bosula tse di dirwang mo go Jakobe. 27 Mme eno ke kgolagano e ke e dirang le bone,+ fa ke tlosa maleo a bone.”+ 28 Ke boammaaruri gore ke baba ba Modimo ka gonne ba ne ba gana dikgang tse di molemo, mme seno se lo solegetse molemo. Mme ka ntlha ya se Modimo a ileng a se solofetsa borraabonemogolo, o ne a tlhopha bangwe ba bone gore e nne ditsala tsa gagwe.+ 29 Gonne Modimo ga a kitla a ikwatlhaela dimpho tse a neng a di ntsha, e bile ga a kitla a ikwatlhaela go bitsa ba a neng a ba bitsa. 30 Gonne lo kile lwa bo lo sa utlwe Modimo+ mme jaanong lo utlwetswe botlhoko+ ka ntlha ya botlhokakutlo jwa Bajuda.+ 31 Jaanong ke bone ba ba sa utlweng Modimo, mme lona Modimo o ne a lo utlwela botlhoko. Mme le bone a ka ba utlwela botlhoko jaaka lo ne lwa utlwelwa botlhoko. 32 Gonne Modimo o letlile batho botlhe gore ba nne makgoba a botlhokakutlo,+ gore a ba utlwele botlhoko botlhe.+

33 Ruri dikhumo le botlhale le kitso ya Modimo di boteng! Ruri ga re kitla re itse dikatlholo tsa gagwe ka botlalo e bile ga re kgone go tlhaloganya ditiro tsa gagwe tsotlhe! 34 Gonne “ke mang yo o itseng mogopolo wa ga Jehofa,* kgotsa ke mang yo o ka nnang mogakolodi wa gagwe?”+ 35 Kgotsa, “ke mang yo o neng a mo naya sengwe, mo e leng gore o tshwanetse go duelwa?”+ 36 Ka gonne dilo tsotlhe di tswa mo go ene e bile di teng ka ene e bile ke tsa gagwe. A a galalediwe ka bosakhutleng. Amen.