Bakorintha wa Ntlha

1 Nna Paulo, yo ke neng ka bilediwa go nna moaposetoloi+ wa ga Keresete Jesu ka thato ya Modimo, ke na le Sosethenese mokaulengwe wa rona. 2 Ke kwalela phuthego ya Modimo e e mo Korintha.+ Modimo o lo dirile boitshepo e bile lo seoposengwe le Keresete Jesu.+ O lo dirile gore lo nne batho ba ba boitshepo mmogo le botlhe ba gongwe le gongwe ba bitsang leina la Morena wa rona, Jesu Keresete,+ Morena wa bone le wa rona:

3 E kete Modimo Rraarona le Morena Jesu Keresete ba ka lo naya bopelonomi jo bogolo* le kagiso.

4 Ke leboga Modimo ke sa kgaotse ka ntlha ya bopelonomi jo bogolo jo Modimo a lo bo neileng a dirisa Keresete Jesu; 5 ka gonne lo amogetse sengwe le sengwe ka ene, go akaretsa le bokgoni jwa go rera lefoko la Modimo le go le itse sentle.+ 6 Lo ne lwa nonofa ka ntlha ya molaetsa* o o ka ga Keresete+ o lo neng lwa o utlwa, 7 gore lo nne le sengwe le sengwe se lo se tlhokang fa lo ntse lo letetse gore Morena wa rona Jesu Keresete a bontshe maatla a gagwe.+ 8 Gape Modimo o tla lo nonotsha go ya kwa bokhutlong, gore ka letsatsi la Morena wa rona Jesu Keresete go se ka ga nna le ope yo o lo latofatsang.+ 9 Modimo o a ikanyega.+ O ne a lo biletsa gore lo nne seoposengwe* le Morwawe e bong Jesu Keresete Morena wa rona.

10 Jaanong bakaulengwe, ke a lo rotloetsa ka leina la Morena wa rona Jesu Keresete gore lo dumalane ka se lo se buang, le gore go se ka ga nna le dikgaogano mo go lona+ mme lo nne seoposengwe le gore lo akanye ka tsela e e tshwanang.+ 11 Bakaulengwe, ba lelapa la ga Keloe ba ne ba mpolelela ka ga lona, gore ga lo utlwane. 12 Ke bua jaana ka gonne bangwe mo go lona ba re: “Nna ke wa ga Paulo,” ba bangwe ba re “Nna ke wa ga Apolose,”+ ba bangwe ba re “Nna ke wa ga Kefase,”* mme ba bangwe ba re “Nna ke wa ga Keresete.” 13 A Keresete o kgaogane? A Paulo o ne a lo swela? Kgotsa a lo ne lwa kolobediwa mo leineng la ga Paulo? 14 Ke leboga Modimo go bo ke sa kolobetsa ope wa lona fa e se Kiresepo+ le Gaio+ fela, 15 gore ope wa lona a se ka a re o kolobeditswe mo leineng la me. 16 Gape ke ne ka kolobetsa le ba ba nnang mo lelapeng la ga Setefanase.+ Fa e le ka ba bangwe, ga ke itse gore a ke ne ka kolobetsa ope wa bone. 17 Gonne Keresete o ne a nthoma gore ke tsamaye ke bolela dikgang tse di molemo,+ e seng gore ke tsamaye ke kolobetsa batho. Mme ga a ka a nthoma gore ke rere ke dirisa mafoko a batho ba ba rutegileng, ka gonne go dira jalo go ne go tla dira gore go swela ga ga Keresete mo koteng ya tlhokofatso* go se ka ga nna mosola.

18 Gonne molaetsa wa gore Keresete o swetse mo koteng ya tlhokofatso* ke boeleele mo go ba ba nyelelang,+ mme mo go rona ba ba bolokwang, molaetsa oo o bontsha maatla a Modimo.+ 19 Gonne go kwadilwe jaana: “Ke tla dira gore botlhale jwa batho ba ba botlhale bo nyelele, e bile tlhaloganyo ya batho ba ba botlhale e tla tlhokomologiwa.”*+ 20 Motho yo o botlhale mo lefatsheng* o kae? Mokwadi* ene o kae? Motho yo o ganetsang ene o kae? A Modimo o ne a se ka a dira gore botlhale jwa lefatshe e nne boeleele? 21 Batho ba lefatshe leno ga ba itse Modimo+ ka gonne ba dira dilo go ya ka botlhale jwa bone.+ Molaetsa o re o rerang ga o na mosola+ mo go ba bangwe mme Modimo o ne a o dirisa go boloka ba ba o dumelang. Seno se ne sa dira gore botlhale jwa Modimo bo bonale.

22 Gonne Bajuda ba kopa ditshupo,+ Bagerika bone ba batla botlhale; 23 mme rona re rera ka ga Keresete yo o neng a bolaelwa mo koteng, e leng sengwe se Bajuda ba sa kgoneng go se amogela* mme ditšhaba di se tsaya e le boeleele.+ 24 Le fa go ntse jalo, Keresete o bontsha ba ba biditsweng, e bong Bajuda le Bagerika, gore Modimo o na le maatla e bile o botlhale.+ 25 Ka gonne dilo tse di tswang kwa Modimong tse batho ba di tsayang e le boeleele, di botlhale go feta batho, mme dilo tse di tswang kwa Modimong tse batho ba di tsayang di le bokoa, di nonofile go feta batho.+

26 Bakaulengwe, le lona lo a bona gore ga go a ka ga bidiwa batho ba le bantsi ba ba botlhale,+ ba ba nang le maatla, le ba ba tswang mo malapeng a a tlotlegang,*+ 27 mme Modimo o ne a tlhopha dilo tse batho ba di tsayang e le boeleele, gore a tlhabise batho ba ba botlhale ditlhong; gape Modimo o ne a tlhopha dilo tse batho ba di tsayang di le bokoa, gore a tlhabise dilo tse di nonofileng ditlhong;+ 28 gape Modimo o ne a tlhopha dilo tse batho ba di tsayang di se botlhokwa, di nyatsega e bile di se na mosola, gore a tle a nyeletse dilo tse batho ba di tsayang di le botlhokwa,+ 29 gore ope a se ka a ikgantsha fa pele ga Modimo. 30 Jesu o re bontsha botlhale jwa Modimo le tshiamo ya Modimo.+ Gape a ka dira gore re nne batho ba ba boitshepo+ e bile a ka re golola mo boleong ka go re rekolola,+ 31 gore go tle go nne fela jaaka go kwadilwe go twe: “Mme a yo o ikgantshang a ikgantshe ka Jehofa.”*+