Tshenolo e e Yang Kwa go Johane

22 Mme o ne a mpontsha noka ya metsi a a nayang botshelo,+ e galalela e bile e phatsima, e elela e tswa kwa setulong sa bogosi sa Modimo le sa Kwana+ 2 e tsamaya mo gare ga tsela e kgolo ya motse. Mo matlhakoreng a mabedi a noka eo go ne go na le ditlhare tsa botshelo tse di ungwang maungo a mefuta e le 12, di ungwa maungo a tsone kgwedi le kgwedi. Mme matlhare a ditlhare tseo e ne e le a go fodisa ditšhaba.+

3 Mme ga go kitla go tlhola go nna le phutso epe. Setulo sa bogosi sa Modimo le sa Kwana+ se tla nna mo motseng oo, e bile batlhanka ba Modimo ba tla mo direla tirelo e e boitshepo; 4 mme ba tla bona sefatlhego sa gagwe,+ e bile leina la gagwe le tla bo le kwadilwe mo diphatleng tsa bone.+ 5 Gape, ga go kitla go tlhola go nna le bosigo,+ e bile ba tla bo ba sa tlhoke lesedi la lobone kgotsa la letsatsi, ka gonne Jehofa* Modimo o tla ba phatsimisetsa lesedi,+ mme ba tla busa e le dikgosi ka bosakhutleng le go ya go ile.+

6 O ne a nthaya a re: “Mafoko ano a a ikanyega* e bile a boammaaruri;+ eleruri, Jehofa,* Modimo yo o neng a bua a dirisa baporofeti,+ o ile a romela moengele wa gagwe gore a bontshe batlhanka ba gagwe dilo tse di tla tlogang di diragala. 7 Ke tla ka bonako.+ Go itumela ope fela yo o ikobelang mafoko a boporofeti jwa momeno ono.”+

8 Nna Johane, ke nna yo ke neng ka utlwa dilo tseno ka bo ka di bona. E rile ke di utlwa e bile ke di bona, ke ne ka khubama fa dinaong tsa moengele yo o neng a ntse a mpontsha dilo tseno gore ke mo obamele. 9 Le fa go ntse jalo, o ne a nthaya a re: “Nnyaa! O se ka wa dira jalo! Le nna ke motlhanka fela jaaka wena le bakaulengwe ba gago ba e leng baporofeti le ba ba ikobelang mafoko a momeno ono. Obamela Modimo.”+

10 Gape o ne a nthaya a re: “O se ka wa boloka mafoko a boporofeti jwa momeno ono e le sephiri, ka gonne nako e e tlhomilweng e gaufi. 11 A yo o dirang tshiamololo, a tswelele a dira tshiamololo, e bile a yo o nang le boitshwaro jo bo leswe a tswelele a dira dilo tse di leswe; le fa go ntse jalo, a yo o siameng a tswelele a dira se se siameng, e bile a yo o boitshepo a tswelele a le boitshepo.

12 “‘Ke tla ka bonako. Ke tla duela mongwe le mongwe go ya ka ditiro tsa gagwe.+ 13 Ke nna Alefa le Omega,*+ wa ntlha le wa bofelo, tshimologo le bokhutlo. 14 Go itumela ba ba tlhatswang diaparo tsa bone tse ditelele,+ gore ba tle ba nne le tshwanelo ya go ja maungo a ditlhare tsa botshelo+ le gore ba tle ba kgone go tsena mo motseng ka dikgoro.+ 15 Kwa ntle go na le dintša* le batho ba ba dirisanang le badimo le ba ba dirang boitsholo jo bo sa siamang jwa tlhakanelodikobo* le babolai le ba ba obamelang medingwana le mongwe le mongwe yo o ratang maaka e bile a a bua.’+

16 “‘Nna Jesu, ke ne ka roma moengele wa me gore a lo neye bosupi ka dilo tseno gore diphuthego di solegelwe molemo. Ke nna modi le setlogolwana sa ga Dafide+ le naledi ya moso e e phatsimang.’”+

17 Mme moya le monyadiwa+ ba nna ba re, “Tla!” mme a ope fela yo o utlwang a re, “Tla!” e bile a ope fela yo o nyorilweng a tle;+ a ope fela yo o batlang a tseye metsi a a nayang botshelo mahala.+

18 “Mongwe le mongwe yo o utlwang mafoko a boporofeti jwa momeno ono, ke mo itsise jaana: Fa mongwe a ka oketsa dilo tseno,+ Modimo o tla mo romelela dipetso tse di kwadilweng mo momenong ono;+ 19 mme fa mongwe a ka tlosa sepe fela mo mafokong a momeno wa boporofeti jono, Modimo ga a kitla a mo letla go ja maungo a ditlhare tsa botshelo+ kgotsa go tsena mo motseng o o boitshepo,+ e leng dilo tse go kwadilweng ka tsone mo momenong ono.

20 “Nna yo ke nayang bosupi jwa dilo tseno ka re, ‘Ee, ke tla ka bonako.’”+

Ke ne ka re: “Amen! Tla, Morena Jesu.”

21 E kete bopelonomi jo bogolo* jwa Morena Jesu bo ka nna le ba ba boitshepo.