Samuele wa Bobedi

11 Fa ngwaga o simologa,* ka nako ya fa dikgosi di ne di ya matsholong, Dafide o ne a romela Joabe le batlhanka ba gagwe le masole otlhe a Iseraele gore ba ye go fedisa Baamone, mme ba ne ba kampa go dikologa Raba,+ fa Dafide ene a ne a setse kwa Jerusalema.+

2 Maitseboa mangwe* Dafide o ne a tsoga mo bolaong jwa gagwe mme a tsamayatsamaya mo godimo ga borulelo jwa ntlo ya kgosi.* Fa a le kwa godimo ga borulelo jwa ntlo o ne a bona mosadi a tlhapa, mme mosadi yoo o ne a le montle. 3 Dafide o ne a roma mongwe gore a ye go botsa ka mosadi yoo mme o ne a begelwa jaana: “Ke Bathe-sheba+ morwadia Eliame,+ mosadi wa ga Uria+ wa Mohite.”+ 4 Foo Dafide o ne a roma barongwa gore ba mo tlise.+ Ka jalo, mosadi yoo o ne a tla kwa go ene, mme Dafide o ne a tlhakanela dikobo le ene.+ (Seno se ne sa direga fa a ne a iitshekisa.*)+ Morago ga moo, o ne a boela kwa ntlong ya gagwe.

5 Mosadi yoo o ne a ima mme o ne a romela molaetsa kwa go Dafide a re: “Ke imile.” 6 Foo Dafide o ne a romela molaetsa kwa go Joabe a re: “Romela Uria wa Mohite kwa go nna.” Ka jalo, Joabe o ne a romela Uria kwa go Dafide. 7 Fa Uria a goroga kwa go ene, Dafide o ne a mmotsa gore Joabe o ntse a tsoga jang, masole a ntse a tsoga jang le gore ntwa e ne e tsamaya jang. 8 Go tswa foo, Dafide o ne a raya Uria a re: “Ya kwa ntlong ya gago mme o ikhutse.”* Fa Uria a sena go tswa mo ntlong ya kgosi a tsamaya, o ne a romelelwa mpho ya kgosi ya bopelontle.* 9 Le fa go ntse jalo, Uria o ne a lala fa kgorong ya ntlo ya kgosi le batlhanka ba bangwe botlhe ba morena wa gagwe, mme ga a ka a ya kwa ntlong ya gagwe. 10 Ka jalo, Dafide o ne a bolelelwa jaana: “Uria ga a ka a ya kwa ntlong ya gagwe.” Foo Dafide o ne a raya Uria a re: “A ga se gone o gorogang o tswa kwa loetong? Ke ka ntlha yang fa o sa ya kwa ntlong ya gago?” 11 Uria o ne a araba Dafide a re: “Letlole+ le Baiseraele le batho ba Juda ba nna mo ditenteng, mme morena wa me Joabe le batlhanka ba gagwe ba kampile mo nageng. A ke tshwanetse go ya kwa ntlong ya me ke je, ke nwe ke bo ke robale le mosadi wa me?+ Ke ikana ka wena, ga nkitla ke dira selo seno!”

12 Foo Dafide o ne a raya Uria a re: “Nna fano le gompieno, mme kamoso ke tla go naya tsela.” Ka jalo, Uria o ne a nna kwa Jerusalema mo letsatsing leo le mo letsatsing le le latelang. 13 Go tswa foo, Dafide o ne a laela gore a ye go bidiwa gore a tle go ja le go nwa le ene mme o ne a mo tagisa. Le fa go ntse jalo, fa go nna maitseboa o ne a ya go robala mo bolaong jwa gagwe le batlhanka ba morena wa gagwe, mme ga a ka a ya kwa ntlong ya gagwe. 14 Mo mosong Dafide o ne a kwalela Joabe lekwalo a bo a le romela ka seatla sa ga Uria. 15 O ne a kwala jaana mo lekwalong: “Bayang Uria mo meleng e e kwa pele kwa tlhabano e leng maswe thata gone. Go tswa foo, lo tswe fa go ene lo boele kwa morago, gore a tlhabiwe mme a swe.”+

16 Joabe o ne a ntse a lebeletse motse ka kelotlhoko, mme o ne a baya Uria kwa a neng a itse gore go na le batlhabani ba ba maatla gone. 17 E rile banna ba motse ba tswa mme ba ya go tlhabana le Joabe, bangwe ba batlhanka ba ga Dafide ba ne ba bolawa, mme Uria wa Mohite e ne e le mongwe wa ba ba neng ba sule.+ 18 Jaanong Joabe o ne a begela Dafide dikgang tsotlhe tse di amanang le ntwa. 19 O ne a laela morongwa a re: “Fa o sena go bolelela kgosi dikgang tsotlhe tsa ntwa, 20 kgosi e ka nna ya galefa e bo e go raya e re, ‘Goreng lo ne lo atamela motse thata jaana fa lo tlhabana le one? A lo ne lo sa itse gore ba ne ba tla hula go tswa kwa godimo ga lobota? 21 Ke mang yo o neng a bolaya Abimeleke+ morwa Jerubeshethe?+ A e ne e se mosadi yo o neng a latlhela leje le legolo* mo go ene a le kwa godimo ga lobota, mme a mmolaya kwa Thebese? Goreng lo ne lo atamela lobota thata jaana?’ Foo o re, ‘Motlhanka wa gago Uria wa Mohite le ene o sule.’ ”

22 Ka jalo, morongwa o ne a tsamaya mme a bolelela Dafide sengwe le sengwe se Joabe a neng a mo romile gore a se bue. 23 Foo morongwa o ne a raya Dafide a re: “Banna ba bone ba ne ba re fekeetsa, mme ba ne ba tla go re tlhasela kwa nageng; mme re ne ra ba lelekisa go ya go fitlha kwa kgorong ya motse. 24 Mme bahudi ba metswi ba ne ba re hula go tswa kwa godimo ga lobota, mme bangwe ba batlhanka ba gago kgosi ba ne ba swa; motlhanka wa gago e bong Uria wa Mohite le ene o sule.”+ 25 Foo Dafide o ne a raya morongwa a re: “Raya Joabe o re: ‘O se ka wa letla gore kgang eno e go tshwenye ka gonne tšhaka e bolaya mongwe le mongwe e sa tlhaole. Tlhasela motse ka maatla a gago otlhe mme o o fenye.’+ Mme le wena o mo kgothatse.”

26 Fa mosadi wa ga Uria a utlwa gore monna wa gagwe e bong Uria o ne a sule, o ne a hutsafalela monna wa gagwe. 27 Fela fa lobaka lwa go hutsafala lo sena go fela, Dafide o ne a laela gore mosadi yoo a ye go tsewa mme a mo tlisa mo ntlong ya gagwe, mme o ne a nna mosadi wa gagwe+ a bo a mo tsholela morwa. Le fa go ntse jalo, se Dafide a neng a se dirile se ne sa kgopisa* Jehofa fela thata.+