Esekiele

21 Jehofa o ne a bua le nna gape a re: 2 “Morwa motho, lebisa sefatlhego sa gago ntlheng ya Jerusalema mme o itsise molaetsa wa katlholo e e tla tlelang mafelo a a boitshepo le lefatshe la Iseraele. 3 Raya lefatshe la Iseraele o re, ‘Seno ke se Jehofa a se buang: “Jaanong ke fetogile mmaba wa gago, mme ke tla ntsha tšhaka ya me mo kgetsaneng+ ya yone ke bo ke kgaola mosiami mmogo le modirabosula mo go wena. 4 E re ka ke tla kgaola mosiami le modirabosula mo go wena, tšhaka ya me e tla tswa mo kgetsaneng ya yone gore e kgemethe batho* botlhe, go tswa kwa borwa go ya kwa bokone. 5 Batho botlhe ba tla itse gore nna, Jehofa, ke ntshitse tšhaka ya me mo kgetsaneng ya yone. Ga e kitla e boela mo teng gape.”’+

6 “Mme wena morwa motho, hutsafala o* ntse o roroma, hutsafala thata fa pele ga bone.+ 7 Mme fa ba go raya ba re, ‘Ke ka ntlha yang fa o hutsafetse?’ o ba reye o re, ‘Ka ntlha ya pego.’ Gonne ruri e tla tla, mme pelo nngwe le nngwe e tla nyera ka ntlha ya poifo le seatla sengwe le sengwe se tla repa le moya mongwe le mongwe o tla hutsafala e bile lengole lengwe le lengwe le tla rotha metsi.*+ ‘Ruri e tla tla! E tla diragala,’ go bua Morena Molaodimogolo Jehofa.”

8 Jehofa o ne a bua le nna gape a re: 9 “Morwa motho, porofeta mme o re, ‘Seno ke se Jehofa a se buang: “Bua o re, ‘Tšhaka! Tšhaka+ e looditswe e bile e phatsimisitswe. 10 E looditswe gore e bolaye batho ba le bantsi; e phatsimisitswe gore e tsabakele jaaka legadima.’”’”

Batho ba ne ba re: “Re tla itumela.”

Mme Modimo o ne a re: “‘Tšhaka* eno e remile ditlhare tse dingwe, mme e le ruri e tla rema lore lwa segosi lwa ga morwaake.+

11 “‘E ntshitswe gore e phatsimisiwe e bo e kgatikanngwe ka seatla. Tšhaka eno e looditswe e bile e phatsimisitswe, gore e tsenngwe mo seatleng sa yo o tlisang katlholo.+

12 “‘Lela o bo o bokolele,+ wena morwa motho, ka gonne e tletse batho ba me; e tletse dikgosana tsotlhe tsa Iseraele.+ Bano ba tla bolawa ka tšhaka mmogo le batho ba me. Ka jalo, hutsafala thata.* 13 Gonne go dirilwe dipatlisiso,+ mme go tla diragala eng fa tšhaka eno e gana lore lwa segosi? Lo* tla kgaotsa go nna teng,’+ go bua Morena Molaodimogolo Jehofa.

14 “Mme wena morwa motho, porofeta mme o ope diatla tsa gago o bo o bue lefoko ‘Tšhaka!’ gararo. Ke tšhaka ya ba ba bolailweng setlhogo, tšhaka e e bolayang batho ba le bantsi, e e ba dikologang.+ 15 Ba tla tshoga+ e bile ba le bantsi ba tla wela kwa dikgorong tsa motse wa bone; ke tla ba bolaya setlhogo ka tšhaka. E tsabakela jaaka legadima e bile e phatsimiseditswe go bolaya! 16 Bolaya ka fa mojeng o bo o bolaye ka fa molemeng! Ya gongwe le gongwe fela kwa bogale jwa gago bo lebileng gone! 17 Le nna ke tla opa diatla tsa me ke bo ke kokobetsa tšhakgalo ya me.+ Nna Jehofa, ke buile.”

18 Mme Jehofa o ne a bua le nna gape a re: 19 “Morwa motho, dira tsela e e tswang kwa lefatsheng lengwe. Tsela eno e tla kgaogana e bo e nna ditsela tse pedi. Kgosi ya Babelona e e tlang ka tšhaka e tla tshwanelwa ke go tlhopha gore e tla tsaya tsela efe. Fa ditsela tseno di kgaoganang teng, o tlhome letshwao* le le bontshang gore tsela e e yang kwa motseng ke efe. 20 O dire gore tsela e nngwe e nne ya tšhaka e e tla tlelang Raba+ wa Baamone, mme e nngwe e tlele motse o o sireletsegileng wa Jerusalema+ kwa Juda. 21 Gonne kgosi ya Babelona e ema kwa makopanelong a ditsela gore e dirise boitseanape, kwa ditsela tseo tse pedi di kgaoganang teng. E tshikinya metswi. E botsa medingwana ya yone* e dirisa sebete sa phologolo. 22 Boitseanape jo bo mo seatleng sa yone sa moja bo supile ntlheng ya Jerusalema, gore go tlhomiwe dikota tse dikgolo tse di thubang dipota, go ntshiwe taelo ya gore go bolaiwe, go tlhabiwe mokgosi wa tlhabano, go tlhomiwe dikota tse dikgolo tse di thubang dipota mo dikgorong, go dirwe thotana go o dikologa, go agiwe lobota go o dikologa.+ 23 Mme bo tla nna jaaka boitseanape jwa maaka mo matlhong a batho* ba ba dirileng maikano.+ Le fa go ntse jalo, kgosi e gakologelwa molato wa bone, mme e tla ba tshwara.+

24 “Ka jalo, seno ke se Morena Molaodimogolo Jehofa a se buang: ‘Lo dirile gore molato wa lona o gakologelwe ka go senola ditiro tsa lona tse di bosula le ka go dira gore maleo a lona a bonwe mo dilong tsotlhe tse lo di dirang. E re ka jaanong lo gakologetswe, lo tla tsewa ka dikgoka.’*

25 “Mme letsatsi la gago le gorogile wena kgosana e e bosula ya Iseraele,+ e e gobetseng botlhoko, e leng nako ya gore o otlhaiwe. 26 Seno ke se Morena Molaodimogolo Jehofa a se buang: ‘Tlosa tuku e e kgethegileng, mme o role serwalo sa bogosi.+ Dilo ga di kitla di tswelela di le ka tsela eno.+ Tsholetsa yo o kwa tlase,+ mme yo o kwa godimo o mo ise kwa tlase.+ 27 Bogosi* jono ke tla bo senya, ke bo senye, ke bo ke bo senya. Mme ga e kitla e nna jwa ga ope go fitlha yo o nang le tshwanelo ya semolao a goroga,+ mme ke tla bo mo naya.’+

28 “Mme wena morwa motho, porofeta mme o re, ‘Seno ke se Morena Molaodimogolo Jehofa a se buang ka Baamone le ka ditlhapa tsa bone.’ O re, ‘Tšhaka! Tšhaka e somoletswe go bolaya; e phatsimisitswe gore e kgemethe e bo e tsabakele jaaka legadima. 29 Go sa kgathalesege diponatshegelo tsa maaka le boitseanape jwa maaka tse di amanang le wena, o tla bewa mo godimo ga mokoa wa ba ba bolailweng setlhogo,* batho ba ba bosula ba letsatsi la bone le gorogileng, e leng nako ya gore ba otlhaiwe. 30 E busetse mo kgetsaneng ya yone. Ke tla go atlholela kwa lefelong le o bopilweng kwa go lone, kwa lefatsheng le o simologileng kwa go lone. 31 Ke tla tshololela bogale jwa me mo go wena. Ke tla budulela molelo wa tšhakgalo ya me mo go wena, mme ke tla go tsenya mo seatleng sa banna ba ba setlhogo, ba e leng ditswerere tsa go senya.+ 32 O tla nna sengwe se se tukisang molelo;+ madi a gago a tla tshololelwa mo lefatsheng, mme ga o kitla o tlhola o gakologelwa, ka gonne nna, Jehofa, ke buile.’”