Bakorintha wa Bobedi

5 Gonne re a itse gore fa ntlo ya rona ya mo lefatsheng, e leng tente eno, e ka senngwa,*+ re tla nna le kago e e tswang kwa Modimong, ntlo e e sa dirwang ka diatla,+ e e nnelang ruri kwa magodimong. 2 Gonne mo ntlong* eno eleruri re utlwa botlhoko thata, re eletsa ka pelo yotlhe go tsena mo ntlong e re e baakanyeditsweng kwa legodimong,*+ 3 gore fa re tsena mo go yone,* re se ka ra fitlhelwa re se na lefelo le re ka nnang mo go lone.* 4 Tota e bile, rona ba re leng mo tenteng eno re utlwa botlhoko thata, re a imelwa, ka gonne ga re batle go tswa mo go yone, le fa go ntse jalo, re batla go tsena mo go e nngwe,+ gore botshelo jo bo sa khutleng bo tle bo kometse mebele ya rona e e swang.+ 5 Jaanong Modimo, yo o neng a re naya moya wa gagwe o o boitshepo e le sesupo* sa se se tla tlang, ke ene yo o re baakanyeditseng botshelo jono.+

6 Ka jalo, ka metlha re pelokgale e bile re a itse gore fa legae la rona le sa ntse le le mo mmeleng ono, re kgakala le Morena,+ 7 gonne ga re kaelwe ke* se re se bonang, mme re kaelwa ke* tumelo. 8 Mme re pelokgale e bile re ka rata go nna kwa legaeng la rona le Morena go na le go nna mo mmeleng ono.+ 9 Ka jalo, le fa re ka tswa re le kwa gae le ene kgotsa re le kgakala le ene, boikaelelo jwa rona ke go dira gore a re amogele. 10 Gonne rotlhe re tshwanetse go ema* fa pele ga setulo sa katlholo sa ga Keresete, gore mongwe le mongwe a tle a bone maduo go ya ka dilo tse a di dirileng fa a ne a sa ntse a na le mmele ono, di ka tswa di le molemo kgotsa di le bosula.+

11 E re ka re itse gore go boifa Modimo go kaya eng, re nna re tlhotlheletsa batho gore ba dumele se re se buang, mme Modimo o a itse gore re batho ba ba ntseng jang. Le fa go ntse jalo, ke solofela gore digakolodi tsa lona di lo thusa go tlhaloganya gore re batho ba ba ntseng jang. 12 Ga re batle go lo ikgantshetsa gape, mme re lo tlhotlheletsa gore lo ikgantshe ka rona, gore lo kgone go araba ba ba ikgantshang ka se ba se bonang ka fa ntle+ mme e seng ka se se mo pelong. 13 Gonne fa e le gore re ne ra dira sengwe jaaka motho yo o se nang tlhaloganyo,+ re ne re se direla Modimo; mme fa e le gore re ne re se dira re na le tlhaloganyo, se ne se tla tswela lona mosola. 14 Gonne lorato lo Keresete a nang le lone lo re tlhotlheletsa gore re mo ikobele, ka gonne seno ke se re neng ra se tlhaloganya: gore motho a le mongwe o ne a swela batho botlhe;+ ka jalo, batho botlhe ba ne ba sule. 15 Mme o ne a swela batho botlhe gore ba ba tshelang ba se ka ba tlhola ba itshelela,+ mme ba tshelele ene yo o neng a ba swela a bo a tsosiwa.

16 Ka jalo, go tloga jaanong ga re sa tlhole re atlhola batho go ya ka se re se bonang.+ Mme fa e le gore re ne re leba Keresete ka tsela eo mo nakong e e fetileng, ga re sa tlhole re dira jalo.+ 17 Ka gone, fa e le gore mongwe o seoposengwe le Keresete, motho yoo ke popo e ntšha;+ dilo tsa bogologolo di fetile mme dilo tse disha di gone. 18 Mme dilo tsotlhe di tswa kwa Modimong, yo o neng a dira gore re nne ditsala tsa gagwe a dirisa Keresete+ a bo a re naya bodiredi jo bo dirang gore batho ba boe ba nne ditsala tsa gagwe,+ 19 mo go rayang gore Modimo o ne a dira gore lefatshe le nne ditsala tsa gagwe a dirisa Keresete,+ a sa balele batho maleo a bone+ e bile o ne a re naya tiro ya go bolelela batho molaetsa wa gore ba ka kgona go boa ba nna ditsala tsa gagwe.+

20 Ka jalo, re baemedi+ ba ga Keresete+ mme Modimo o re romile gore re ikuele mo bathong. E re ka re le baemedi ba ga Keresete, re a lo kopa: “Agisanang le Modimo.” 21 Keresete ga a ise a ko a leofe+ mme Modimo o ne a mo ntsha e le setlhabelo sa maleo a rona, gore Modimo a re tseye re siame ka ene.+