Baroma

12 Ka jalo bakaulengwe, e re ka Modimo a lo tlhomogetse pelo, ke kopa gore lo ntshe mebele ya lona+ e le setlhabelo se se tshelang, se se boitshepo+ le se se amogelesegang mo Modimong, e leng tirelo e e boitshepo lo dirisa bokgoni jwa lona jwa go akanya.+ 2 Mme tlogelang go etsa tsela e batho ba lefatshe leno* ba dirang dilo ka yone. Go na le moo, letlang Modimo gore a fetole tsela e lo akanyang ka yone,+ gore lo iponele+ se thato ya Modimo e e molemo le e e amogelesegang le e e itekanetseng e leng sone.

3 Gonne ka ntlha ya bopelonomi jo bogolo* jo Modimo a bo mpontshitseng, ke rotloetsa mongwe le mongwe wa lona gore a se ka a akanya gore o botlhokwa thata.+ Le fa go ntse jalo, a mongwe le mongwe a akanye sentle mme a itebe ka tsela e e tshwanetseng go ya ka selekanyo sa tumelo e Modimo a mo neileng* yone.+ 4 Gonne mmele o na le dikarolo di le dintsi,+ mme dikarolo tseo ga di dire tiro e e tshwanang. 5 Ka tsela e e tshwanang, le fa re le bantsi, re mmele o le mongwe ka gonne re seoposengwe le Keresete. Mme e re ka re le dikarolo tsa mmele tse di sa tshwaneng, mongwe le mongwe wa rona o ikaegile ka yo mongwe.+ 6 E re ka jaanong re na le dimpho tse di sa tshwaneng go ya ka bopelonomi jo bogolo jo re bo neilweng,+ fa e le gore re neilwe mpho ya go porofeta, a re porofeteng go ya ka tumelo e re nang le yone; 7 fa e le gore re neilwe bodiredi, a re bo direng ka pelo yotlhe; fa e le gore mongwe o neilwe mpho ya go ruta, a a tswelele a ruta;+ 8 kgotsa yo o kgothatsang,* a a tswelele a kgothatsa;*+ yo o abang,* a a abe ka pelo e ntle;+ yo o okamelang* ba bangwe, a a dire jalo a tlhoafetse;+ yo o utlwelang ba bangwe botlhoko, a a dire jalo a itumetse.+

9 Lo se ka lwa itira e kete lo rata batho ba bangwe mme lo sa ba rate.*+ Tlhoang se se bosula;+ ngaparelang se se molemo. 10 Ratanang thata jaaka bana ba motho ba ratana. Nnang ba ntlha* go tlotla ba bangwe.+ 11 Dirang ka natla,* lo se ka lwa nna ditshwakga.*+ A moya o o boitshepo o dire gore lo tlhoafale.+ Direlang Jehofa* ka pelo yotlhe.+ 12 Itumeleng ka ntlha ya tsholofelo ya lona. Itshokeng fa lo na le mathata.+ Nnang lo rapela.+ 13 Abelang bakaulengwe ba lona* dilo tse ba di tlhokang.+ Amogelang ba bangwe ka lorato.+ 14 Nnang lo rapelele gore ba ba lo bogisang ba segofadiwe;+ kopang Modimo gore a segofatse batho mme lo se ka lwa bua dilo tse di bosula ka bone.+ 15 Itumeleng le batho ba ba itumelang; lelang le batho ba ba lelang. 16 Akanyetsang ba bangwe fela jaaka lo ikakanyetsa; lo se ka lwa tlhoma mogopolo mo dilong tse di kwa godimo, mme ikokobetseng.*+ Lo se ka lwa akanya gore lo botlhale go feta ba bangwe.+

17 Lo se ka lwa busetsa ope bosula ka bosula.+ Dirang dilo tse batho ba di tsayang di siame.* 18 Fa go kgonega, dirang sotlhe se lo ka se kgonang go agisana le batho botlhe.+ 19 Bakaulengwe ba me ba ba rategang, lo se ka lwa ipusolosetsa, mme sutelang bogale jwa Modimo;+ ka gonne go kwadilwe jaana: “ ‘Ke tla busolosa; ke tla duela,’ go bua Jehofa.”*+ 20 Mme “fa mmaba wa gago a tshwerwe ke tlala, mo neye dijo; fa a nyorilwe, mo neye sengwe gore a nwe; ka gonne fa o dira jalo, o tla bo o koela magala a a tukang mo tlhogong ya gagwe.”*+ 21 Lo se ka lwa itetla gore lo fenngwe ke bosula, mme nnang lo fenye bosula ka molemo.+