Ditiro Tsa Baaposetoloi

28 Fa re sena go falola, re ne ra utlwa gore setlhaketlhake seo se bidiwa Maleta.+ 2 Mme batho ba ba nnang koo* ba ne ba re bontsha bopelonomi jo bogolo.* Ba ne ba gotsa molelo ba bo ba re amogela rotlhe ka lorato ka gonne pula e ne e tshologa e bile go ne go le serame. 3 E rile Paulo a sena go rwalela ngata ya dikgong a bo a e baya mo molelong, noga e e botlhole e ne ya tswa ka ntlha ya mogote e bo e ithathelela mo seatleng sa gagwe. 4 Fa batho bao ba bona noga eo e e botlhole e akgega mo seatleng sa gagwe, ba ne ba simolola go raana ba re: “Eleruri monna yono ke mmolai, le fa gone a kgonne go falola a tswa mo lewatleng, Tshiamiso* ga a mo letle gore a tswelele a tshela.” 5 Le fa go ntse jalo, o ne a tlhotlhorela noga eo mo molelong mme o ne a sa gobala. 6 Mme ba ne ba ithaya ba re o tla ruruga kgotsa o tla wa ka tshoganyetso a bo a swa. Fa ba sena go ema lobaka lo loleele mme ba bona a sa diragalelwe ke sepe se se sa siamang, ba ne ba fetola megopolo ya bone ba bo ba simolola go re ke modimo.

7 Jaanong gaufi le lefelo leo go ne go na le masimo a monna mongwe yo e neng e le mmusi wa setlhaketlhake seo, yo o neng a bidiwa Pubelio, mme o ne a re amogela ka lorato a bo a re letla gore re nne le ene malatsi a le mararo. 8 Rraagwe Pubelio o ne a lwala a tshwenngwa ke letshoroma le letshololo, mme Paulo o ne a ya kwa go ene, a rapela, a mmaya diatla a bo a mo fodisa.+ 9 Fa seo se sena go direga, batho ba bangwe botlhe mo setlhaketlhakeng seo ba ba neng ba lwala, le bone ba ne ba simolola go tla mo go Paulo mme o ne a ba fodisa.+ 10 Gape ba ne ba re tlotla ka go re abela dimpho di le dintsi, mme e rile re tsamaya ka sekepe, ba ne ba re naya dilo tsotlhe tse re neng re di tlhoka ba bo ba di pega mo go sone.

11 Dikgwedi di le tharo moragonyana, re ne ra tsamaya ka sekepe se se neng se na le letshwao le le reng “Bomorwa Seuse.” Sekepe seo se ne se tswa kwa Alekesanderia mme se ne se feditse mariga se le mo setlhaketlhakeng seo. 12 Re ne ra ema kwa lefelong le dikepe le emang mo go lone kwa Sirakuse mme ra nna teng malatsi a le mararo; 13 fa re tswa koo re ne ra tsamaya mme ra goroga kwa Regiuma. Letsatsi moragonyana, phefo ya borwa e ne ya foka mme re ne ra kgona go goroga kwa Puteoli mo letsatsing la bobedi. 14 Fa re goroga koo re ne ra fitlhela bakaulengwe mme ba ne ba re kopa gore re nne le bone malatsi a le supa, mme go tswa foo re ne ra ya kwa Roma. 15 Fa bakaulengwe ba kwa Roma ba utlwa gore re a tla, ba ne ba tla go re kgatlhantsha kwa Marekisetsong a Apio le Matlomararo a Boitapolosetso. E rile Paulo a ba bona, o ne a leboga Modimo a bo a kgothala.+ 16 La bofelo fa re goroga kwa Roma, Paulo o ne a letlelelwa go nna a le nosi mme a disitswe ke lesole.

17 Le fa go ntse jalo, malatsi a le mararo moragonyana o ne a phutha banna ba ba tseelwang kwa godimo ba Bajuda. Fa ba sena go phuthega, o ne a ba raya a re: “Banna, bakaulengwe, le fa gone ke sa dira sepe se se kgopisang batho kgotsa ke sa tlola ditlwaelo tsa borraaronamogolo,+ ke ne ka tsenngwa mo diatleng tsa Baroma ke le legolegwa le le tswang kwa Jerusalema.+ 18 Mme fa ba sena go batlisisa,+ ba ile ba re ba a nkgolola, ka gonne go ne go se na mabaka ape a a ka dirang gore ba mpolaye.+ 19 E rile Bajuda ba sa dumalane le gore ke gololwe, ke ne ka patelesega go ikuela kwa go Kaesara,+ mme e se ka gonne ke ne ke na le sengwe se ke latofatsang setšhaba sa gaetsho ka sone. 20 Ka ntlha ya seo ke ne ka kopa go lo bona le go bua le lona, ka gonne ke bofilwe ka keetane eno ka ntlha ya tsholofelo e batho ba Iseraele ba nang le yone.”+ 21 Ba ne ba mo raya ba re: “Ga re ise re amogele makwalo ape a a tswang kwa Judea a a buang ka wena, le gone ga go na mokaulengwe ope yo o tswang teng yo o begileng kgotsa yo o buileng sepe se se bosula ka wena. 22 Le fa go ntse jalo, re batla go utlwa gore wena wa reng,+ ka gonne re a itse gore ruri lekoko leno le a kgalwa gongwe le gongwe.”+

23 Jaanong ba ne ba rulaganya letsatsi la go kopana le ene, mme ba ne ba tla kwa lefelong le a nnang mo go lone ba le bantsi. Mme go tloga mo mosong go fitlha maitseboa, o ne a ba tlhalosetsa kgang eo, a ntsha bosupi jo bo tletseng ka Bogosi Jwa Modimo, a leka go ba tlhotlheletsa go dumela mo go Jesu+ a dirisa Molao wa ga Moshe+ le mekwalo ya baporofeti.+ 24 Bangwe ba ne ba simolola go dumela dilo tse a neng a di bua; ba bangwe ga ba a ka ba di dumela. 25 Ka jalo, e re ka ba ne ba sa dumalane, ba ne ba simolola go tsamaya, mme Paulo o ne a bua jaana:

“Moya o o boitshepo o ne o nepile fa o ne o bua le borraalonamogolo o dirisa moporofeti Isaia, 26 o re, ‘Ya kwa bathong bano mme o ba reye o re: “Eleruri lo tla utlwa, mme ga lo kitla lo tlhaloganya, e bile lo tla leba, mme ga lo kitla lo bona gotlhelele.+ 27 Gonne pelo ya batho bano e thatafetse. Ba a utlwa mme ga ba dire se ba se utlwang. Ba tswetse matlho e bile ba ikabile ditsebe gore ba se ka ba bona sepe kgotsa ba utlwa sepe. Mme seno se dira gore ba se ka ba tlhaloganya gore ba tshwanetse go dira eng e bile ga ba boele mo go nna gore ke ba fodise.”’+ 28 Ka jalo, itseng gore dikgang tseno tse di tlhalosang kafa Modimo a tlisang poloko ka gone, di rometswe kwa bathong ba ditšhaba tse dingwe;+ eleruri ba tla di reetsa.”+ 29 *——

30 Ka jalo, o ne a tswelela a nna mo ntlong e a neng a e hirile dingwaga di le pedi,+ mme o ne a amogela ka lorato botlhe ba ba neng ba tla kwa go ene, 31 a ba rerela ka Bogosi Jwa Modimo e bile a ba ruta ka Morena Jesu Keresete a le pelokgale,*+ a sa kgorelediwe ke ope.