Ditiro Tsa Baaposetoloi

11 Jaanong baaposetoloi le bakaulengwe ba ba neng ba le kwa Judea ba ne ba utlwa gore batho ba ditšhaba tse dingwe le bone ba ne ba amogetse lefoko la Modimo. 2 Ka jalo, fa Petere a tla mo Jerusalema, batho ba ba neng ba ema kgang ya go rupa nôkeng+ ba ne ba simolola go mo tshwaya phoso,* 3 ba re: “O ne o ile kwa ntlong ya banna ba ba sa rupang mme wa ja le bone.” 4 Foo Petere o ne a ba tlhalosetsa kgang eno ka botlalo a re:

5 “Ke ne ke le kwa motseng wa Jopa ke rapela, mme fa ke sa ntse ke le mo maibing, ke ne ka bona ponatshegelo e mo go yone go neng go na le sengwe* se se tshwanang le letsela le legolo se fologela kwa tlase ka dikhona tsa sone tse nnê se tswa kwa legodimong, mme se ne sa tla kwa go nna.+ 6 Fa ke ntse ke se lebile ka kelotlhoko, ke ne ka bona diphologolo tse di nang le maoto a le manê, dibatana, digagabi le dinonyane di le mo go sone. 7 Gape ke ne ka utlwa lentswe le nthaya le re: ‘Ema Petere, tlhaba o je!’ 8 Le fa go ntse jalo, ke ne ka re: ‘Nnyaa Morena, ka gonne ga ke ise nke ke tsenye sepe se se leswafetseng kgotsa se se seng phepa mo molomong wa me.’ 9 Lentswe leo le le tswang kwa legodimong le ne la bua lekgetlo la bobedi le re: ‘Tlogela go bitsa dilo tse Modimo a di phepafaditseng o re di leswafetse.’ 10 Mme fa ke sena go utlwa lentswe leo lekgetlo la boraro, sengwe le sengwe se ne sa gogelwa gape kwa legodimong. 11 Gape ka yone nako eo, banna ba le bararo ba ne ba eme fa ntlong e re neng re nna mo go yone, ba romilwe mo go nna ba tswa kwa Kaesarea.+ 12 Foo moya o ne wa mpolelela gore ke tsamaye le bone, ke se ka ka belaela sepe. Mme bakaulengwe bano ba barataro le bone ba ne ba tsamaya le nna, mme re ne ra tsena mo ntlong ya ga Korenelio.

13 “O ne a re bolelela gore o ile a bona moengele a eme mo ntlong ya gagwe a bo a mo raya a re: ‘Roma banna kwa Jopa gore ba ye go bitsa Simone yo o bidiwang Petere,+ 14 mme o tla go bolelela dilo tse wena le ba lelapa la gago lo tshwanetse go di dira gore lo bolokwe.’ 15 Mme fa ke simolola go bua, ba ne ba amogela moya o o boitshepo fela jaaka le rona re ile ra o amogela kwa tshimologong.+ 16 Foo ke ne ka gakologelwa lefoko la Morena, fa a ne a tlhola a re: ‘Johane o ne a kolobetsa ka metsi,+ mme lona lo tla kolobediwa ka moya o o boitshepo.’+ 17 Ka jalo, fa e le gore Modimo o ne a ba naya yone mpho eo ya mahala e le rona ba re dumetseng mo go Morena Jesu Keresete a neng a re e naya, nna ke ne ke le mang gore nka thibela Modimo?”*+

18 Fa ba utlwa dilo tseno, ba ne ba tlogela go mo ganetsa,* mme ba ne ba galaletsa Modimo ba re: “Seno se raya gore Modimo o batla gore batho ba ditšhaba tse dingwe le bone ba ikwatlhaye gore ba tle ba bone botshelo.”+

19 Jaanong ba ba neng ba gasamisitswe+ ke pogiso e e neng ya tsoga ka ntlha ya ga Setefane ba ne ba ya go fitlha kwa Fonikia, Kupero le Antioka, mme ba ne ba rerela Bajuda fela.+ 20 Le fa go ntse jalo, banna bangwe mo go bone ba ba tswang kwa Kupero le Kurene ba ne ba ya kwa Antioka ba bo ba simolola go bua le batho ba ba buang Segerika, ba ba bolelela dikgang tse di molemo ka Morena Jesu. 21 Mo godimo ga moo, Jehofa* o ne a ba eme nôkeng, mme batho ba le bantsi ba ne ba sokologa ba bo ba dumela mo Moreneng.+

22 Phuthego e e mo Jerusalema e ne ya utlwa ka ga bone, mme ba ne ba roma Barenabase+ kwa Antioka. 23 Fa a goroga koo mme a bona kafa Modimo a bontshitseng barutwa bao bopelonomi jo bogolo* ka gone, o ne a itumela a bo a simolola go ba kgothatsa botlhe gore ba tswelele ba ikobela Morena ka pelo yotlhe;+ 24 gonne e ne e le monna yo o siameng, a tletse moya o o boitshepo e bile a na le tumelo. Mme batho ba le bantsintsi ba ne ba dumela mo Moreneng.+ 25 Ka jalo, o ne a ya kwa Tareso a ya go batla Saulo go fitlha a mmona.+ 26 Mme fa a sena go mmona, o ne a mo tlisa mo Antioka. Ka jalo, ba ne ba fetsa ngwaga ba kopanela le bone mo phuthegong e bile ba ruta batho ba le bantsi thata, mme barutwa ba ne ba bidiwa Bakeresete lekgetlo la ntlha kwa Antioka ba kaelwa ke Modimo.+

27 Mo malatsing ao baporofeti+ ba ile ba tla mo Antioka ba tswa kwa Jerusalema. 28 Mongwe wa bone yo o neng a bidiwa Agabuse+ o ne a ema a bo a bolelela pele a tlhotlhelediwa ke moya gore go ne go tla nna le leuba le legolo mo lefatsheng lotlhe,+ tota e bile, leuba leo le ne la nna teng ka nako ya puso ya ga Kalaudio. 29 Ka jalo, mongwe le mongwe wa barutwa o ne a ikemisetsa go ntsha se a se kgonang,+ gore go romelwe thuso ya namolo+ kwa bakaulengweng ba ba nnang mo Judea; 30 mme ba ile ba dira jalo ba bo ba roma Barenabase le Saulo gore ba ise thuso eo ya namolo kwa bagolwaneng.+