Dikgosi wa Ntlha

11 Le fa go ntse jalo, Kgosi Solomone o ne a rata basadi ba le bantsi ba ditšhaba tse dingwe+ mmogo le morwadia Faro:+ basadi ba Bamoabe,+ ba Baamone,+ ba Baedoma, ba Basidona+ le ba Bahite.+ 2 Ba ne ba tswa mo ditšhabeng tse Jehofa a neng a boleletse Baiseraele jaana ka tsone: “Ga lo a tshwanela go tlhakana le bone,* ka gonne ruri ba tla faposa dipelo tsa lona gore di sale medimo ya bone+ morago.” Le fa go ntse jalo, Solomone o ne a ba ngaparela e bile o ne a ba rata. 3 Mme o ne a na le basadi ba le 700 ba e neng e le bahumagadi le bagadingwana ba le 300, mme basadi ba gagwe ba ne ba faposa pelo ya gagwe ka iketlo.* 4 Fa Solomone a tsofala,+ basadi ba gagwe ba ne ba faposa pelo ya gagwe gore e sale medimo e mengwe+ morago, mme o ne a sa ineela ka botlalo mo go Jehofa, Modimo wa gagwe jaaka Dafide rraagwe. 5 Mme Solomone o ne a sala Ashethorethe,+ modimo wa mosadi wa Basidona morago, le Milekome,+ modimo yo o ferosang sebete wa Baamone. 6 Solomone o ne a dira se se bosula mo matlhong a ga Jehofa, mme o ne a se ka a sala Jehofa morago ka botlalo fela jaaka Dafide rraagwe a ne a dira.+

7 Ke ka yone nako eo Solomone a neng a agela Kemoshe, modimo yo o ferosang sebete wa Moabe le Moleke,+ modimo yo o ferosang sebete wa Baamone,+ lefelo le le kwa godimo le le boitshepo+ mo thabeng e e fa pele ga Jerusalema. 8 Seo ke se a neng a se direla basadi ba gagwe botlhe ba ditšhaba tse dingwe ba ba neng ba kuisa mosi wa setlhabelo e bile ba ntshetsa medimo ya bone setlhabelo.

9 Jehofa o ne a galefela Solomone fela thata, ka gonne pelo ya gagwe e ne e katogetse kgakala le Jehofa, Modimo wa Iseraele,+ yo o neng a iponaditse mo go ene gabedi+ 10 mme o ne a mo tlhagisitse ka selo seno, gore a se ka a sala medimo e mengwe+ morago. Le fa go ntse jalo, ga a ka a ikobela se Jehofa a neng a se laetse. 11 Jaanong Jehofa o ne a raya Solomone a re: “E re ka o dirile seno e bile o sa boloka kgolagano ya me le melao ya me jaaka ke go laetse, ruri ke tla tsaya* bogosi mo go wena, mme ke tla bo naya mongwe wa batlhanka ba gago.+ 12 Le fa go ntse jalo, ka ntlha ya ga rrago e bong Dafide, ga nkitla ke dira seo o sa ntse o tshela. Ke tla bo tsaya* mo seatleng sa ga morwao,+ 13 mme ga nkitla ke tsaya* bogosi jotlhe.+ Ke tla naya morwao lotso lo le longwe,+ ka ntlha ya ga Dafide motlhanka wa me le ka ntlha ya Jerusalema, e ke e tlhophileng.”+

14 Go tswa foo, Jehofa o ne a tlisetsa Solomone mmaba,+ Hadade wa Moedoma, wa losika lwa segosi kwa Edoma.+ 15 Fa Dafide a ne a fenya Edoma,+ molaodi wa masole e bong Joabe o ne a ya go fitlha ba ba neng ba bolailwe setlhogo, mme o ne a leka go bolaya monna mongwe le mongwe mo Edoma. 16 (Gonne Joabe le Baiseraele botlhe ba ne ba nna koo dikgwedi di le thataro go fitlha a bolaya* monna mongwe le mongwe mo Edoma.) 17 Le fa go ntse jalo, Hadade o ne a tshaba le bangwe ba batlhanka ba ga rraagwe ba Baedoma, mme ba ne ba ya kwa Egepeto; ka nako eo Hadade e ne e sa ntse e le mosimanyana. 18 Ka jalo, ba ne ba tswa kwa Midiana mme ba ya kwa Parana. Ba ne ba tsaya banna bangwe mo Parana+ mme ba ya le bone kwa Egepeto kwa go Faro kgosi ya Egepeto, yo o neng a mo naya ntlo, a mo abela dijo a bo a mo naya lefatshe. 19 Faro o ne a amogela Hadade mo e leng gore o ne a mo nyadisa monnawe mosadi wa gagwe, e leng Kgosigadi* Tahepenese. 20 Fa nako e ntse e tsamaya, monnawe Tahepenese o ne a tsholela Hadade morwa e bong Genubathe, mme Tahepenese o ne a mo godisetsa* mo ntlong ya ga Faro, mme Genubathe o ne a tswelela a nna mo ntlong ya ga Faro le bomorwa Faro.

21 Hadade o ne a utlwa a le kwa Egepeto gore Dafide o ne a swa jaaka borraagwemogolo+ le gore Joabe molaodi wa masole o ne a sule.+ Ka jalo, Hadade o ne a raya Faro a re: “Nneye tsela, gore ke tle ke ye kwa lefatsheng la gaetsho.” 22 Le fa go ntse jalo, Faro o ne a mo raya a re: “Ke eng se o ntseng o se tlhoka fa o na le nna, fa jaanong o batla go ya kwa lefatsheng la gaeno?” Mme ene o ne a araba a re: “Ke ntse ke sa tlhoke sepe, mme gone, tsweetswee nneye tsela.”

23 Modimo o ne a tlisetsa Solomone mmaba yo mongwe gape,+ e bong Resone morwa Eliada, yo o neng a tshabile kwa moreneng wa gagwe e bong Hadadesere+ kgosi ya Soba. 24 Resone o ne a phuthela banna kwa go ene mme a nna molaodi wa setlhopha sa dirukutlhi ka nako ya fa Dafide a ne a ba fenya.*+ Ka jalo, ba ne ba ya kwa Damaseko+ mme ba aga teng ba bo ba simolola go busa mo Damaseko. 25 Mme o ne a nna mmaba wa Iseraele malatsi otlhe a ga Solomone, a oketsa botlhoko jo Hadade a neng a bo dirile, mme fa a ntse a busa Siria o ne a ila Iseraele.

26 Gape go ne go na le Jeroboame+ morwa Nebate, Moeferaime yo o tswang kwa Sereda, motlhanka wa ga Solomone+ yo leina la ga mmaagwe e neng e le Serua, yo e neng e le motlholagadi. Le ene o ne a simolola go tlhanogela* kgosi.+ 27 Leno ke lebaka la go bo a ne a tlhanogela kgosi: Solomone o ne a agile Thota*+ mme o ne a tswetse phatlha ya Motse wa ga Dafide rraagwe.+ 28 Jaanong Jeroboame yono e ne e le monna yo o nang le bokgoni. E rile Solomone a bona gore lekawana leno le ne le dira ka natla, o ne a le tlhoma go nna molebedi+ wa badiri ba ba tlhophilweng go tswa mo lotsong lwa ga Josefa. 29 Ka nako eo, Jeroboame o ne a tswa mo Jerusalema, mme moporofeti Ahija+ wa Moshilo o ne a mo fitlhela mo tseleng. Ahija o ne a apere seaparo se sesha, mme boobabedi ba ne ba le bosi mo nageng. 30 Ahija o ne a tshwara seaparo se sesha se a neng a se apere a bo a se gagola dikarolo di le 12. 31 Go tswa foo, o ne a raya Jeroboame a re: “Itseele dikarolo di le lesome, ka gonne seno ke se Jehofa, Modimo wa Iseraele a se buang: ‘Ke gagola* bogosi mo seatleng sa ga Solomone, mme ke tla go naya ditso di le lesome.+ 32 Le fa go ntse jalo, go tla sala lotso lo le longwe+ ka ntlha ya motlhanka wa me Dafide+ le ka ntlha ya Jerusalema, motse o ke o tlhophileng mo ditsong tsotlhe tsa Iseraele.+ 33 Ke tla dira seno ka gonne ba ntlogetse+ mme ba ikobela Ashethorethe modimo wa mosadi wa Basidona, Kemoshe modimo wa Moabe le Milekome modimo wa Baamone, mme ga ba a tsamaya mo ditseleng tsa me ka gonne ba ne ba se ka ba dira se se siameng mo matlhong a me e bile ba ne ba se ka ba boloka melao ya me le dikatlholo tsa me fela jaaka Dafide rraagwe a ne a dira. 34 Le fa go ntse jalo, ga nkitla ke tsaya bogosi jotlhe mo seatleng sa gagwe, mme ke tla mo tlogela e le kgosana malatsi otlhe a botshelo jwa gagwe, ka ntlha ya ga Dafide motlhanka wa me yo ke mo tlhophileng,+ ka gonne o ne a ikobela ditaelo tsa me le melao ya me. 35 Mme ke tla tsaya bogosi mo seatleng sa ga morwawe ke bo ke bo go naya, e leng ditso di le lesome.+ 36 Ke tla naya morwawe lotso lo le longwe, gore Dafide motlhanka wa me a nne le lobone fa pele ga me ka metlha mo Jerusalema,+ motse o ke o itlhophetseng gore e nne lefelo le ke bayang leina la me mo go lone. 37 Ke tla go tsaya, mme o tla laola sotlhe se o se eletsang, mme o tla nna kgosi mo Iseraele. 38 Mme fa o ikobela sotlhe se ke se go laelang o bo o tsamaya mo ditseleng tsa me e bile o dira se se siameng mo matlhong a me ka go ikobela melao ya me le ditaelo tsa me, fela jaaka Dafide motlhanka wa me a ne a dira,+ ke tla nna le wena. Ke tla dira gore lelapa la gago e nne bogosi jo bo nnelang ruri, fela jaaka ke ne ka dira ka lelapa la ga Dafide,+ mme ke tla go naya Iseraele. 39 Mme ke tla kokobetsa bana ba ga Dafide ka ntlha ya seno,+ le fa go ntse jalo e seng ka metlha.’ ”+

40 Ka jalo, Solomone o ne a leka go bolaya Jeroboame, mme Jeroboame o ne a tshabela kwa Egepeto, kwa go Shishake+ kgosi ya Egepeto, mme o ne a tswelela a nna kwa Egepeto+ go fitlha Solomone a swa.

41 Pego yotlhe ya botshelo jwa ga Solomone, sotlhe se a se dirileng le botlhale jwa gagwe, a ga e a kwalwa mo bukeng ya pego ya botshelo jwa ga Solomone?+ 42 Solomone o ile a busa Baiseraele botlhe mo Jerusalema dingwaga di le 40. 43 Go tswa foo, Solomone o ne a swa jaaka borraagwemogolo mme o ne a fitlhwa mo Motseng wa ga Dafide rraagwe; mme morwawe e bong Rehoboame+ o ne a nna kgosi mo boemong jwa gagwe.