Esera

8 Jaanong tseno e ne e le ditlhogo tsa dikgotla tsa bone le ba ba kwadisitsweng go ya ka tatelano ya masika ba ba neng ba tsamaya le nna fa re tswa kwa Babelona ka nako ya puso ya ga Kgosi Aretaserese:+ 2 go tswa mo go bomorwa Finease,+ e ne e le Gereshome; go tswa mo go bomorwa Ithamare,+ e ne e le Daniele; go tswa mo go bomorwa Dafide, e ne e le Hatushe; 3 go tswa mo go bomorwa Shekania, ba bomorwa Paroshe, e ne e le Sekarea, mme o ne a na le banna ba ba kwadisitsweng ba le 150; 4 go tswa mo go bomorwa Pahathe-moabe,+ e ne e le Eliehoenai morwa Serahia, mme o ne a na le banna ba le 200; 5 go tswa mo go bomorwa Satu,+ e ne e le Shekania morwa Jahasiele, mme o ne a na le banna ba le 300; 6 go tswa mo go bomorwa Adine,+ e ne e le Ebede morwa Jonathane, mme o ne a na le banna ba le 50; 7 go tswa mo go bomorwa Elama,+ e ne e le Jeshaia morwa Athalia, mme o ne a na le banna ba le 70; 8 go tswa mo go bomorwa Shefatia,+ e ne e le Sebadia morwa Mikaele, mme o ne a na le banna ba le 80; 9 go tswa mo go bomorwa Joabe, e ne e le Obadia morwa Jehiele, mme o ne a na le banna ba le 218; 10 go tswa mo go bomorwa Bani, e ne e le Shelomithe morwa Josifia, mme o ne a na le banna ba le 160; 11 go tswa mo go bomorwa Bebai,+ e ne e le Sekarea morwa Bebai, mme o ne a na le banna ba le 28; 12 go tswa mo go bomorwa Asegade,+ e ne e le Johanane morwa Hakatane, mme o ne a na le banna ba le 110; 13 go tswa mo go bomorwa Adonikame,+ ba e neng e le ba bofelo go boa, e ne e le Elifelete, Jeiele le Shemaia, mme ba ne ba na le banna ba le 60; 14 mme go tswa mo go bomorwa Bigefai,+ e ne e le Uthai le Sabude, mme ba ne ba na le banna ba le 70.

15 Ke ne ka ba phuthela kwa lotshitshing lwa noka e e elelelang kwa Ahafa,+ mme re ne ra tlhoma ditente mme ra nna koo malatsi a le mararo. Le fa go ntse jalo, fa ke ne ke tlhatlhoba batho le baperesiti, ga ke a ka ka fitlhela ope wa Balefi koo. 16 Ka jalo, ke ne ka laela gore go bidiwe Eliesere, Ariele, Shemaia, Elenathane, Jaribe, Elenathane, Nathane, Sekarea le Meshulame, ba e neng e le banna ba ba eteletseng pele, le gore go bidiwe Joiaribe le Elenathane, ba e neng e le barutisi. 17 Go tswa foo, ke ne ka ba naya taelo ya gore ba ye kwa go Ido yo e leng moeteledipele mo lefelong le le bidiwang Kasifia. Ke ne ka ba laela gore ba bolelele Ido le bomorwarraagwe, e leng batlhanka ba ba direlang mo tempeleng* ba ba neng ba le kwa Kasifia, gore ba re tlisetse badiredi ba ntlo ya Modimo wa rona. 18 E re ka Modimo wa rona a ne a re eme nôkeng, ba ne ba tlisa monna mongwe yo o botlhale yo o tswang mo go bomorwa Maheli+ setlogolwana sa ga Lefi morwa Iseraele, e leng Sherebia+ a na le bomorwawe le bomorwarraagwe, banna ba le 18; 19 le Hashabia a na le Jeshaia yo o tswang mo lelapeng la Bamerari,+ bomorwarraagwe le bomorwaabone, banna ba le 20. 20 Mme go ne go na le batlhanka ba ba direlang mo tempeleng* ba le 220, ba Dafide le dikgosana ba neng ba ba abetse go direla Balefi, bano botlhe e le ba ba neng ba tlhophilwe ka maina.

21 Foo ke ne ka laela gore go itimiwe dijo gone koo kwa nokeng ya Ahafa, gore re ikokobetse fa pele ga Modimo wa rona, gore re mo kope gore a re kaele mo loetong lwa rona, le gore a re sireletse le bana ba rona le dithoto tsotlhe tsa rona. 22 Ke ne ke tlhabiwa ke ditlhong go kopa kgosi gore e re neye masole le masole a a tsamayang ka dipitse gore ba re sireletse mo babeng ba rona mo tseleng, ka gonne re ne re reile kgosi ra re: “Modimo wa rona o tla ema nôkeng botlhe ba ba mo direlang,+ mme nonofo ya gagwe le bogale jwa gagwe di tlela botlhe ba ba mo tlogelang.”+ 23 Ka jalo, re ne ra itima dijo ra bo ra rapela Modimo wa rona ka seno, mme o ne a reetsa thapelo ya rona.+

24 Jaanong ke ne ka tlhaola balaodi ba baperesiti ba le 12, e bong Sherebia le Hashabia,+ ba na le bomorwarraabone ba le lesome. 25 Go tswa foo, ke ne ka ba kalela selefera le gauta le dilwana, e leng moneelo o kgosi le bagakolodi ba yone le dikgosana tsa yone le Baiseraele botlhe ba ba neng ba le gone koo ba neng ba o ntsheditse ntlo ya Modimo wa rona.+ 26 Ka jalo, fa ke sena go o kala, ke ne ka ba naya ditalenta* tsa selefera di le 650, dilwana tsa selefera di le 100 tsa boleng jwa ditalenta di le 2, ditalenta tsa gauta di le 100, 27 dikotlele tse dinnye tsa gauta di le 20 tsa boleng jwa didariki* di le 1 000 le dilwana tsa kopore e e phatsimang e e sa tswakanngwang di le 2, di le tlhwatlhwakgolo jaaka gauta.

28 Foo ke ne ka ba raya ka re: “Lo boitshepo mo go Jehofa,+ le dilwana tseno di boitshepo, mme selefera le gauta tsone ke moneelo o o ntsheditsweng Jehofa, Modimo wa borraalonamogolo ka go rata. 29 Lo di tlhokomele ka kelotlhoko go fitlha lo kala bokete jwa tsone fa pele ga balaodi ba baperesiti le Balefi le dikgosana tsa dikgotla tsa lona tsa Iseraele kwa Jerusalema,+ mo matlwaneng* a a mo ntlong ya ga Jehofa.” 30 Mme baperesiti le Balefi ba ne ba tsaya selefera le gauta le dilwana tse di neng di kadilwe tse ba neng ba di newa, gore ba di tlise mo Jerusalema mo ntlong ya Modimo wa rona.

31 La bofelo re ne ra tswa fa nokeng ya Ahafa+ mo letsatsing la bo12 la kgwedi ya ntlha+ re bo re ya Jerusalema, mme Modimo wa rona o ne a na le rona a bo a re sireleletsa mo babeng ba rona le mo go ba ba re laletseng mo tseleng. 32 Ka jalo, re ne ra goroga mo Jerusalema+ mme ra nna teng malatsi a le mararo. 33 Mme mo letsatsing la bonê, re ne ra kala selefera le gauta le dilwana mo ntlong ya Modimo wa rona+ re bo re di naya Meremothe+ morwa moperesiti Urija, mme o ne a na le Eliasare morwa Finease, mme ba ne ba na le Josabade+ morwa Jeshua le Noadia morwa Binui+ ba e leng Balefi. 34 Sengwe le sengwe se ne se badilwe e bile se kadilwe, mme bokete jwa tsone tsotlhe bo ne jwa kwalwa. 35 Batho ba ba tswang botshwarwa, ba pele e neng e le batshwarwa, ba ne ba isetsa Modimo wa Iseraele ditlhabelo tse di fisiwang ka dipoo+ di le 12 tse di neng di ntshediwa Baiseraele botlhe, diphelefu+ di le 96, dikwanyana tse ditonanyana di le 77 le diphoko+ di le 12 e le tsa setlhabelo sa boleo; tseno tsotlhe e ne e le setlhabelo se se fisiwang se se ntshediwang Jehofa.+

36 Go tswa foo, re ne ra ntsha ditaelo tsa kgosi+ ra di naya babusi ba dikgaolo* ba kgosi le balaodi ba kgaolo e e Ka Kwa ga Noka,*+ mme ba ne ba ema batho nôkeng ba bo ba ntshetsa ntlo ya Modimo wa boammaaruri sepe fela se se neng se tlhokega.+